Pretty Soon God Goin Make All Suffaring Pau

Habakkuk, one good man who wuz close to Jehovah God, wen tell Him, “Eh! You, Da One In Charge! How long I gotta yell to you fo help us guys, But you no lissen?! I yell to you, ‘Us all bus up!’ But you no get us outa trouble.” (Habakkuk 1:2, 3) Dis wen show he neva have enuff fait, o wat? No. But God wen tell Habakkuk fo no worry cuz He wen plan one time wea no goin get suffaring.​—Habakkuk 2:2, 3.

Wen we goin tru hard times an suffa or somebody we kea about suffa, maybe we feel like God taking too long fo help us. But Jehovah like us kno, “Garans he goin do wat he wen promise fo do. Get peopo, dey tink he real slow, but he not! [God] hang in dea an wait fo peopo . . . He like erybody fo come sorry an no do all da bad kine stuff no moa. He no like nobody get cut off from him!”—2 From Peter 3:9.

WEN GOD GOIN DO SOMETING?

Pretty soon! Jesus wen talk about da time wen God goin do someting. He wen tell dat one generation of peopo living right befoa da world come pau goin see all kine tings happen. (Matthew 24:3-42, NWT-E) Wat Jesus wen tell stay happening now. All dis show dat God goin step in an do someting about um real soon.a

But how God goin stop suffaring? Wen Jesus wuz on eart, he wen show how God’s powa can hemo suffaring. Try look some exampos.

Natural Disastas: Had one time wen Jesus an his aposals wuz on one boat in da Sea of Galilee. Den had one big storm dat wen almos make dem sink. But Jesus wen show dat him an his Faddah can control da wedda an nature. (Fo Da Colosse Peopo 1:15, 16) All Jesus had fo say wuz “Quiet! Come calm!” an den “da wind die down an da watta come calm.”​—Mark 4:35-39.

Sickness: Peopo wen kno Jesus az one guy who could heal da blind, guys who no could walk, had suffa from seizures, leprosy, an odda kine healt problems. “He make all da sick peopo come good.”​—Matthew 4:23, 24; 8:16; 11:2-5.

No Mo Nuff Food: Jesus wen use da powa his Faddah wen give him fo make litto bit food come plenny. Da Bible show dat two times Jesus wen feed tousands of peopo wen he wuz on eart.—Matthew 14:14-21; 15:32-38.

Death: Da Bible talk about three times dat Jesus wen bring somebody back to life. One of dose times da guy wuz mahke fo four days awready, but Jesus wen bring him back to life. Dis iz proof dat Jehovah get da powa fo hemo death.​—Mark 5:35-42; Luke 7:11-16; John 11:3-44.