Who We Can Blame Fo All Oua Suffaring?

If God no make us suffa, den who we can blame fo all da stuff goin on, like wars, natural disastas, all kine sickness, no moa nuff food, an plenny dass pooa? God’s Word da Bible tell us three main reasons why peopo suffa:

1. Peopo Stay Selfish, Greedy, an Hate. “Peopo boss aroun odda guys.” (Da Teacha 8:9) Get imperfeck, selfish, an mean kine peopo dat make oddas suffa.

2. Tings You No Expeck Can Happen Any Time. Plenny times peopo suffa “cuz tings you no expeck can happen to anybody at any time.” (Da Teacha 9:11, NWT.) Bad tings happen to peopo cuz dey stay at da wrong place at da wrong time, accidents happen, peopo no tink befoa dey do tings, or dey jus make mistakes.

3. Da Bad Guy Who Rule Da World. Da Bible shows da main reason why peopo suffa. It tell, “Da Bad Guy stay in charge a all da odda peopo inside da whole world.” (1 From John 5:19) Dat Bad Guy iz Satan da Devil, who at firs wuz one of God’s powaful angels but he neva like da trut. (John 8:44) Had odda angels dat wen come demons who wen join Satan fo go agains God cuz dey wanted fo do dea own ting. (Da Start 6:1-5) Eva since dey wen go agains God, Satan an his demons wen use dea powa fo control da world. We see um happening moa in oua time. Cuz da Devil stay supa mad an he “bulai all da peopo inside da world,” dass how come stay “horraz” fo erybody on eart.” (Jesus Show 12:9, 12) Satan iz one pilau rula an it make him happy fo see peopo suffa. So iz Satan, not God, who make peopo suffa.

TRY TINK: Ony one real pilau buggah would make peopo suffa. But da Bible tell, “God erytime get love.” (1 From John 4:8) Cuz He get plenny love, “No ways God goin do someting bad!”—Job 34:10.

So den, how long God goin let Satan rule? We had see, God hate anyting bad an make him sad fo see us suffa. An da Bible even tell, “Let God take kea all da stuff dat bodda you guys cuz he get one big heart fo you guys.” (1 From Peter 5:7) God love us an he get da powa fo take away all da stuff dat make us suffa. Da nex paht goin talk moa about dis.a