LIVE JALIKE JESUS

You Stay Ready Fo Mayjah Money Kine Problems?

Not goin surprise us wen stuffs happen around da world dat goin make um so dat erybody all ova get mayjah money kine problems. How come? Cuz we stay livin in da time befo da world come pau, an da Bible tell us “fo no trus all da rich kine stuff.” (1 Tim 6:17; 2 Tim 3:1) Wat King Jehoshafat’s exampo can teach us about makin ready fo mayjah money kine problems?

Wen odda guys from diffren places wanted fo attack dem, Jehoshafat wen trus dat Jehovah goin kokua. (2 Rec 20:9-12) But still yet he wen do stuffs he could do, like makin da peopo an da towns moa solid an puttin army camps all ova. (2 Rec 17:1, 2, 12, 13) So befo we go thru hard times, jalike Jehoshafat, iz good dat we trus Jehovah an do da stuffs dat we can do fo make ready.

WAT US CAN DO FO MAKE READY FO MAYJAH MONEY KINE PROBLEMS?

Make ready spiritually: Work on bein good wit wat we get awready, an make moa solid oua trus dat Jehovah goin take kea all da stuffs we need. (Mat 6:26; 1 Tim 6:8) Make up yoa mind dat you neva goin go agains wat da Bible tell jus so you can get da stuffs dat you need. (Rome 2:21) Try tink about how you goin get spiritual kaukau if da powa go out o da intanet get cut off. Good fo keep some paypa kine books around dat you tink iz good, an if can, try download da electronic kine books befo dis kine stuffs happen.

Make ready all yoa stuffs: Befo da money kine problems start, try pay off wateva monies you owe an get rid of da stuffs you stay payin fo dat you no need. (Smart Guys 22:7) If can, try store some foods an odda kine stuffs you might need. You can even tink about growin yoa own vegetables fo save some money.

WATCH UM DA VIDEO YOU STAY READY FO ONE DISASTA? AN DEN ANSA DESE QUESTIONS:

One part from da video, “You Stay Ready Fo One Disasta?” Da picha wen show one Bible, one go bag, one phone, an construcktion workas.

Wat we can do on oua own fo make ready fo one disasta?

Yoa ansa

One part from da video, “You Stay Ready Fo One Disasta?” Braddas kokua da relief work by doin construcktion an unloadin stuffs from da truck.

How us can make ready fo kokua oddas?

Yoa ansa