We Neva Stay Alone

1-2. (a) How come we kno we neva alone wen we get hahd time? (b) Wat we goin talk about in dis lesson?

WEN we get hahd time, maybe we feel like we out in da ocean on one boat all by ouaself in da middo of one storm. But we not alone. Oua Faddah in heaven no jus see wat we go tru, but he promise fo help us get tru um. Jehovah promise his peopo dis, “I help you guys.”​—Isa 41:10.

² In dis lesson we goin talk about how Jehovah help us (1) by showing us da way fo go, (2) by giving us da tings we need, (3) by protecking us, an (4) by helping us feel betta. Jehovah promise us dat no matta wat we go tru, he neva goin foget about us. He neva goin bag from us. So we neva stay alone.

JEHOVAH SHOW US DA WAY FO GO

3-4. How Jehovah show us da way fo go? (Songs Fo God 48:14)

³ Read um Songs Fo God 48:14. Jehovah show us da way fo go cuz he kno we no can do um by ouaself. How he do dat fo his peopo? One way iz tru da Bible. (Songs 119:105) Jehovah use da Bible fo help us make good choices an fo be like him in how we tink an ack. Wen we lissen wat he tell, we goin be moa happy now an get da hope fo live foeva.a Fo exampo, he teach us fo fogive oddas an no stay mad at dem, fo be honest, an show choke love to oddas. (Songs 37:8; Heb 13:18; 1 Pet 1:22) Wen we do dese tings, we come betta parents, husbans, wifes, an frenz.

⁴ An in da Bible, Jehovah tell us stories about real peopo who wen go tru hahd times an dat get feelings same like us. (1 Cor 10:13; Jam 5:17) Get two good tings dat happen wen we read about dea lifes an use wat we learn from um. Firs, we undastan we not da ony ones dat get problems, oddas wen go tru same kine problems an Jehovah wuz dea fo help dem. (1 Pet 5:9) Anodda ting iz we learn how fo deal wit oua problems an be happy.​—Rome 15:4.

5. Who Jehovah use fo show us da way fo go?

⁵ Jehovah use braddahs an sistahs fo show us da way fo go too.b Fo exampo, circuit ovaseahs visit da local huis fo build us up. Da talks dey give make oua fait moa strong an help us fo stick tight togedda. (Jesus Guys 15:40–16:5) Da eldas work hahd fo help ery one of us stay close to Jehovah. (1 Pet 5:2, 3) Parents teach dea kids fo love Jehovah, how fo make good choices, an fo do good tings. (Smart Guys. 22:6) An solid sistahs help younga sistahs by bein one good exampo, giving advice, an giving good kine words fo build dem up.​—Titus 2:3-5.

6. Wat we gotta do fo Jehovah’s help be good fo us?

⁶ Jehovah wen give us wat we need fo make good choices an be happy. How we can show we tankful fo wat Jehovah wen do fo us? Smart Guys 3:5, 6 say, “No tink if you know eryting, dass all you need. Mo betta if you go all out fo trus Da One In Charge.” An wen come to oua problems, “he goin make shua notting goin jam you up,” an we goin be moa happy. We supa tankful dat cuz Jehovah love us, he give us da advice we need!​—Songs 32:8.

JEHOVAH GIVE US DA TINGS WE NEED

7. How Jehovah take kea us? (Fo Da Philippi Peopo 4:19)

⁷ Read um Fo Da Philippi Peopo 4:19. Anodda way Jehovah take kea us iz he bless us wen we work hahd fo get food, clothes, an one place fo live. (Mat 6:33, NWT; 2 Tess 3:12) Iz normal fo worry about getting da tings we need but Jehovah no like us worry too much about um. (Go look da study note on Matthew 6:25.) How come? Cuz Jehovah neva goin bag out on his guys wen dey need Him. (Mat 6:8, NWT; Heb 13:5) We can full on trus him wen he tell he goin give us da tings we need.

8. Wat Jehovah wen do fo David?

⁸ Try look how Jehovah had help David. Wen David wuz on da run, tings wuz hahd but Jehovah wen give him an his guys wat dey wen need. Tinking about how Jehovah wen take kea of him tru dat time, he tell, “Befo time, I was one small kid, an now I one ol man. All dat time, I neva see God foget bout nobody dat do da right ting. I neva see dose guys kids stay beg fo get someting fo eat.” (Songs 37:25) Maybe even you wen see how Jehovah wen give you or yoa braddahs an sistahs wat dey need wen get hahd times.

9. Wen get one disasta, how Jehovah give his peopo wat dey need? (Go look da pichas.)

⁹ Jehovah give his peopo da tings dey need wen get disastas. Fo exampo, in da firs century, had one time wea neva have food, but Christians from odda places wen sen braddahs an sistahs da tings dey wen need. (Jesus Guys 11:27-30; Rome 15:25, 26) An even now, Jehovah’s peopo help dea braddahs an sistahs. Wen get one disasta, Jehovah use his peopo fo give tings like food, watta, clothes, an medicine to da braddahs dat need um. Construction teams go fix houses an Kingdom Halls dat wen get bus up. An Jehovah’s peopo fas fo build up an give good kine words from da Bible to guys dat wen lose dea house or peopo dey love.c

10-11. Wat you learn from wat Borys wen go tru?

¹⁰ Jehovah even help da guys dat no worship him yet. We copy Jehovah an look fo ways fo be nice to guys dat no worship him. (Gal 6:10) Wen we do dat we get chance fo give one good witness. We go look wat wen happen to Borys, one skool principal who live in Ukraine. He wuz nice to his Witness students an wen show respeck fo wat dey believe, even tho he no wuz one Witness. Cuz of da war, he wen leave da village he wuz living in an wen move to one moa safe paht of da country, an oua braddahs wen help him. Layta on, Borys wen go da Meeting Fo Rememba Wen Jesus Had Mahke. Wen he tink about wat he wen go tru, Borys tell, “Da Witnesses wuz real nice to me an wen take kea me. I so tankful fo dem.”

¹¹ All us can copy oua Faddah Jehovah by showing love to da guys dat need help, no matta dey one Witness or not. (Luk 6:31, 36) We hope dat da love we show dem goin make dem like learn moa about Jehovah an start fo worship him wit us. (1 Pet 2:12) Wedda dey worship Jehovah or not, we goin be happy cuz we wen show love an give.​—Jesus Guys 20:35.

JEHOVAH PROTECK US

12. How Jehovah promise fo proteck all his peopo? (Songs Fo God 91:1, 2, 14)

¹² Read um Songs Fo God 91:1, 2, 14. Today, Jehovah promise fo proteck his peopo from anyting dat could hurt dea frenship wit him. He neva goin let Satan stop his peopo from worshipping him da right way. (John 17:15) An wen da “big trouble” come, we can kno fo shua dat Jehovah goin keep his promise fo help us keep oua fait strong an save us.​—Jesus Show 7:9, 14.

13. How Jehovah proteck each one of us?

¹³ How Jehovah proteck each one of us? Jehovah wen give us da Bible so dat we can kno wass right an wass wrong. (Heb 5:14) Wen we use wat we learn from da Bible, we proteck oua frenship wit him an make good choices so dat we live one good life. (Songs 91:4) On top of dat, Jehovah use da local hui fo proteck us. (Isa 32:1, 2) Wen we spen time wit oua braddahs an sistahs who love Jehovah an lissen him, dey build us up an help us stay away from tings dass bad.​—Smart Guys 13:20.

14. (a) How come Jehovah no proteck us from all oua problems? (b) Wat Songs Fo God 9:10 help us kno fo shua? (Go look da extra info.)

¹⁴ In da pas, Jehovah wen sometimes proteck his guys from getting hurt or killed. But he neva do dat erytime. Da Bible teach dat “tings you no expeck can happen to anybody at any time.” (Teacha 9:11, NWT.) An had times dat Jehovah wen let his guys suffa an even die fo show dat Satan iz one liar. (Job 2:4-6; Mat 24:9) Az da same fo us today. Even tho Jehovah no take away all oua problems, we can kno fo shua dat he neva goin bag from da guys dat love him.d​—Songs 9:10.

JEHOVAH HELP US FEEL BETTA

15. How can praya, da Bible, an oua braddahs an sistahs help us feel betta? (2 Fo Da Corint Peopo 1:3, 4)

¹⁵ Read um 2 Fo Da Corint Peopo 1:3, 4. Sometimes we get anxiety or one heavy heart. Maybe you get someting hahd you dealing wit right now an it make you feel all alone. Get anybody dat undastan how you feel? Jehovah undastan. He no jus feel oua pain but he help us feel betta. Wen we pray to Jehovah about eryting we feel he goin give us peace fo help us feel betta. (Php 4:6, 7) Anodda ting dat can help us iz wen we read wat Jehovah tell us in da Bible. Inside dea he tell us how much he love us, he teach us fo be akamai, an he give us hope. An da meetings can help us, cuz we learn tings from da Bible dat can build us up an we get fo be wit oua braddahs an sistahs dat love us.

16. Wat you had learn from wat Nathan an Priscilla wen go tru?

¹⁶ We go look wat wen happpen to Nathan an Priscilla, who live in da United States, fo see how Jehovah help us feel betta an build us up tru da Bible. Few years back dey wen choose fo move one place dat need moa help fo preach. Nathan wen tell, “We wen trus dat Jehovah would bless us.” But wen dey wen get dea, dey had run into healt an money problems dat wen come outa nowea. Bumbye dey had fo go back home wea dey still had fo deal wit money kine problems. Nathan wen tink back an tell, “I wen wonda how come God neva bless us da way we figga he wuz goin . . . I even started fo tink I wen do someting wrong”. Layta on, Nathan an Priscilla started fo see dat God neva bag from dem wen dey needed help. Nathan wen tell, “During dose hahd times, da Bible had come like one good fren dat wen help us an guide us . . . radda den focus on oua problems, we had focus on how Jehovah wen help us hang in dea an dis had help us kno fo shua He goin help us wen we get odda hahd times bumbye.”

17. How Jehovah wen help sistah Helga feel betta? (Go look da picha.)

¹⁷ Jehovah use oua braddahs an sistahs fo help us feel betta too. We go see how dis wen happen to Helga, who live in Hungary. Fo long time she wen deal wit all kine hahd problems dat had make her feel anxious an wortless. But tinking back she had see how Jehovah wen use da local hui fo help her feel betta. She wen write, “Jehovah had always help me wen he wen see I wuz stress out cuz of work, taking kea my sick kid, an odda problems. Eryday fo da pas 30 years he wen keep his promise fo help me feel betta. Plenny times he wen build me up tru good kine words from oddas. I would get one text message, one card, or peopo would tell me I wuz doin good right wen I needed um da mos.”

18. How we can help oddas feel betta?

¹⁸ We get da chance fo copy oua God wen we help oddas feel betta. How we can do dat? We can be patient an lissen to dem, talk nice to dem, an help dem wit odda tings. (Smart Guys 3:27) We do oua bes fo be dea fo erybody who suffa, even da guys who no serve Jehovah yet. Wen oua neighbas stay sad, sick, or stress out, we visit dem, lissen dem, an build dem up wit good kine words from da Bible. Wen we copy Jehovah, we no ony help oua braddahs an sistahs fo hang in dea but maybe we can help da guys who no serve Jehovah yet fo like learn about him.​—Mat 5:16, NWT.

JEHOVAH ALWAYS DEA FO US

19. Wat Jehovah do fo us an how we can copy him?

¹⁹ Jehovah really kea fo all da guys who love him. Jehovah no bag from us wen we struggle. Like one faddah who love an take kea his kid, Jehovah take kea of his peopo who serve him. He show us da way fo go, give us da tings we need, proteck us, an help us feel betta. We copy Jehovah wen we build up oddas an be dea fo dem wen dey go tru hahd times. Even tho we get problems dat make oua heart soa, we kno fo shua Jehovah goin be wit us. He promise us, “So no sked, cuz you guys da one I stay wit.” (Isa 41:10) Dis promise help us kno fo shua dat wit Jehovah we neva stay alone.