Young Braddahs, Copy Mark An Timoty

1-2. Wat coulda made um hahd fo Mark an Timoty fo do moa?

IZ GOOD fo see dat plenny young braddahs like do moa fo Jehovah an oddas. You like do moa? (Songs 110:3) Maybe get stuff dat make um hahd fo you do dis. You sked fo do moa cuz you donno how yoa life goin be like or wea you goin end up? You wen turn down one assignment cuz you tink you not good enuff? Plenny peopo wen feel lidat.

² Mark an Timoty wen feel lidat too. But jus cuz dey neva kno how tings wuz goin turn out or dey neva tink dey wuz good enuff, dat neva stop dem from doin moa fo oddas. Wen da aposal Paul an Barnabas wen ask Mark fo go on da firs preaching tour all ova, Mark wuz probly living at home wit his maddah. (Jesus Guys 12:12, 13, 25) Mark wen leave one comfortable life fo go wit dem. Firs, he wen move Antiok an den he wen go wit Paul an Barnabas to odda places far away. (Jesus Guys 13:1-5) Same ting wit Timoty. He wuz probly one young guy living at home wit his parents wen Paul wen ask him fo go wit him preaching. Cuz Timoty wuz young, he coulda felt dat he wuzn’t good enuff fo go wit Paul. (Go check 1 Fo Da Corint Peopo 16:10, 11 an 1 Fo Timoty 4:12.) But he wen go, an plenny good tings wen happen cuz of dat.​—Jesus Guys 16:3-5.

3. (a) How we kno dat Paul wuz tankful fo Mark an Timoty? (2 Fo Timoty 4:6, 9, 11) (Go look da pichas.) (b) Wat questions we goin go ova in dis lesson?

³ Wen Mark an Timoty wuz young dey wen learn how fo take kea all kine kuleana in da hui. Paul wuz so tankful fo dese young braddahs dat wen he knew he wuz goin mahke, he wanted dem fo be by him. (Read um 2 Fo Timoty 4:6, 9, 11.) Wat Paul wen like about Mark an Timoty? How young braddahs can copy dem? An how Paul’s advice can help young braddahs now days?

COPY MARK AN DO MOA FO ODDAS

4-5. How Mark wen show he wanted fo help oddas?

⁴ Doin moa fo oddas mean you goin keep helping dem even wen iz hahd. Dass wat Mark wen do. Mark wuz probly hurt wen Paul neva take him on his secon preaching trip. (Jesus Guys 15:37, 38) But dat neva stop him from helping da braddahs.

⁵ Mark wen go wit his cuzin Barnabas fo help da braddahs in one diffren place. About 11 years layta, Mark wen go help Paul wen he wuz lock up in Rome. (Fil 23, 24) Paul wuz so tankful fo dis dat he wen say Mark wen “kokua me plenny.”​—Col 4:10, 11.

6. How come wuz good fo Mark spen time wit solid braddahs? (Go look da extra info.)

⁶ Wuz good fo Mark fo spen time wit solid braddahs. Afta he wuz wit Paul in Rome, he wen hui up fo go work wit Peter in Babylon. Dey wen come so tight, dass how come Peter wen call him, “My boy Mark.” (1 Pet 5:13) Wen dey wuz working togedda Peter wen probly tell Mark all da stuff Jesus wen do, an he wen write all dat down in da Bible book of Mark.a

7. How Seung-Woo wen copy Mark? (Go look da pichas.)

⁷ Mark wen stay busy doin moa fo Jehovah an he wen stay close to solid braddahs. How you can copy Mark? Maybe you like do moa fo Jehovah, like be one servant or one elda, but neva happen yet. No get all down cuz of dat, but keep looking fo da stuff you can do fo Jehovah an da hui. Try look wat wen happen to Seung-Woo, who now stay one elda. Wen he wuz young had odda young braddahs who wuz doin moa in da local hui befoa him, an he would compare himself to dem. He wuz hurt cuz of dat an layta on he wen tell da eldas how he feel. One of da eldas wen tell him fo do wat he can fo help oddas even if nobody see um. Dat advice wen make him like help da kupunas an da guys who wen need ride fo go meetings. Wen he tink about dat time he say, “I wen learn wat really mean fo help oddas. Wen make me so happy fo help odda peopo.”

COPY TIMOTY AN SHOW YOU KEA ABOUT ODDAS

8. How come Paul wen pick Timoty fo go wit him? (Fo Da Philippi Peopo 2:19-22)

⁸ Paul needed braddahs wit courage fo go wit back to da cities wea da peopo wen go agains him. Da firs guy he wen choose wuz Silas. (Jesus Guys 15:22, 40) Den afta dat he wen pick Timoty. How come Paul wen pick Timoty fo go wit him? Cuz he had one good rep. (Jesus Guys 16:1, 2) An he really wen kea about peopo.​—Read um Fo Da Philippi Peopo 2:19-22.

9. How Timoty wen show he really kea about his braddahs an sistahs?

⁹ From da time Timoty started working wit Paul, he wen show he wen kea moa about odda peopo den himself. Dass how come wen Paul wen leave Timoty in Berea, he knew dat he would take kea of da braddahs an sistahs ova dea. (Jesus Guys 17:13, 14) Silas wen stay in Berea too an Timoty musta learn plenny from him. Layta on, Paul wen sen Timoty by himself fo build up da braddahs in Tessalonika. (1 Tess 3:2) Ova da nex 15 years, Timoty wen love his braddahs an sistahs so much dat he wen sometimes cry wit dem wen dey wuz suffaring. (Rome 12:15; 2 Tim 1:4) Young braddahs, how you can copy Timoty?

10. How Woo Jae wen learn fo kea about oddas?

¹⁰ One braddah name Woo Jae wen learn fo show he kea about odda peopo. Wen he wuz young, he had hahd time talking story wit olda braddahs an sistahs. At da Kingdom Hall he would jus tell dem howzit an den walk away. One elda wen tell him, fo break da ice he can tell oddas wat he like about dem. Anodda ting da braddah wen tell him fo do iz tink about da stuff dat dey stay interested in. So he wen try um. Now Woo Jae stay one elda an he wen say, “Now iz moa easy fo me talk story wit all kine peopo. I happy I kno moa about wat oddas stay goin tru. Dis make um moa easy fo help my braddahs out.”

11. How young braddahs can learn how fo show dey kea about oddas in dea hui? (Go look da picha.)

¹¹ Young braddahs, you guys can learn how fo show you kea about oddas. Like wen you stay at da meetings you can talk to erybody, da olda guys an da younga guys. Ask dem how dey doin, an den lissen. Cuz if you do dat, you goin find out how you can help dem. Maybe you goin see dat one olda coupo need help wit dea JW Library® app, or maybe dey no moa nobody fo work wit in field service. You can help dem wit dea electronic devices or make plans fo preach wit dem? Wen you do dis kine stuff, you goin be one good exampo fo erybody.

PAUL’S ADVICE CAN HELP YOU

12. How Paul’s advice to Timoty can help young braddahs?

¹² Paul wen give Timoty advice on how fo be happy an work hahd fo Jehovah. (1 Tim 1:18; 2 Tim 4:5) His advice can help you young braddahs too. Go read Paul’s two lettas to Timoty like Paul wen write um to you, an try see wat stuff you can try do. We go look some of da tings from dose lettas.

13. Wat goin help you stay close to Jehovah?

¹³ “Do da kine tings God like erytime.” (1 Tim 4:7b) Wat dat mean? Dass wen somebody like do da stuff dat make Jehovah happy. Dis no come automatic, we gotta work at um. How we do dat? Fo “do da kine tings God like erytime,” we gotta train real plenny like how one athlete train fo compete in one contest. Da athletes had fo do tings fo help dem stay focus on dea goal, jus like we gotta do tings fo help us stay close to Jehovah.

14. Wass da goal wen we read da Bible.

¹⁴ Wen you try read da Bible eryday, da goal iz fo get moa close to Jehovah. Like wen you read da story about Jesus an da rich young guy, wat you learn about Jehovah? (Mar 10:17-22) Even tho da young guy neva have nuff fait fo be Jesus followa, how Jesus wen talk to him wen show dat he “get aloha fo him” an dat he wanted him fo be happy. Wuz so nice da way Jesus wen treat dis guy. Dis show us how Jehovah feel too. (John 14:9) Wen you tink about dis story, iz good fo ask yoaself, “Wat I gotta do fo come moa close to Jehovah an fo do tings fo oddas?”

15. Why one young braddah gotta tink about his actions? (1 Fo Timoty 4:12, 13)

¹⁵ “Make good fo da peopo dat trus God fo show dem how fo ack.” (Read um 1 Fo Timoty 4:12, 13.) Paul wen tell Timoty fo no ony read an teach good, but fo have fait, get love an aloha fo peopo, an fo stay clean inside. How come? Cuz actions speak louda den words. Like would be shame if you had fo give one talk about goin all out in service, an you not doin um. Da guys lissening to yoa talk goin like go all out fo preach if dey kno you goin all out fo preach. Yoa actions goin help oddas like copy you.​—1 Tim 3:13.

16. (a) Wat ways young braddahs can be one exampo? (b) How one young braddah can be one exampo in how he talk?

¹⁶ Paul wen talk about ways young braddahs can be one exampo inside 1 Fo Timoty 4:12. Would be good fo go study about um. Like if you wanted fo come moa betta in “how you talk,” try tink about how wat you say can encourage oddas. If you living wit yoa parents, tell dem mahalo fo all da stuff dey do fo you. An at da meetings try ansa in yoa own words, an tell da guys who had one paht dat dey did one good job. Wen you come one exampo in da way you talk, you show oddas dat you growing up spiritually.​—1 Tim 4:15.

17. Wat goin help one young braddah do moa fo Jehovah? (2 Fo Timoty 2:22)

¹⁷ “Watch out! No be like da younga guys, da way dey come jam up cuz dey like do any kine stuff. Mo betta you go all out fo do da right ting erytime.” (Read um 2 Fo Timoty 2:22.) Paul wen tell Timoty fo stay away from anyting dat could stop him from doin moa fo Jehovah. You might figga out dat get stuff in yoa life dass stopping you from doin dat. Stuff dass maybe not wrong fo do like playing sports, playing video games, or goin on da intanet, but maybe you spending too much time doin um. You can use some of dat time fo take kea da Kingdom Hall or do cart witnessing? If you do dese kine tings, you goin make frenz dat goin help you do moa fo Jehovah.

YOU GOIN BE HAPPY DOIN TINGS FO ODDAS

18. How come Mark an Timoty wuz happy?

¹⁸ Mark an Timoty wuz happy cuz dey wen make sacrifices fo do moa fo oddas. (Jesus Guys 20:35) Mark wen travel all ova da world fo do moa fo da braddahs, an wen even write about wat Jesus wen do wen he wuz on top da eart. An Timoty wen help Paul build up da braddahs an sistahs an set up local huis. Jehovah wuz happy wit da sacrifices Mark an Timoty wen make.

19. Why young braddahs should lissen good to wat Paul wen write to Timoty, an wat goin happen cuz of dat?

¹⁹ Can see how much Paul wen love Timoty by da stuff he wen write in his lettas to him. But wuz Jehovah who wen use Paul fo write dese lettas, so it show how much Jehovah love you young braddahs, an He like you do good. So lissen good to wat Paul wen say an try do yoa bes fo do moa fo oddas. If you do dat, you goin get one good life now, an you goin “get da kine life dass fo real.”​—1 Tim 6:18, 19.