Jehovah Get Da Powa Fo Help You Erytime

1. How Moses wen show trus in Jehovah wen he had lead da Israel guys outa Egypt?

DA BOOK Fo Da Hebrew Peopo talk about plenny peopo who had fait in Jehovah. (Heb 3:2-5; 11:23-25) One of dem wuz Moses who had unreal fait. He wen show fait wen he had lead da Israel guys outa Egypt. He neva let Pharoah an his army stop him. He wen full on trus in Jehovah an lead da peopo tru da Red Sea an layta on into da boonies. (Heb 11:27-29) Mos of da Israel guys wen stop trusting dat Jehovah had da powa fo take kea dem, but Moses neva stop trusting him. An Jehovah did take kea dem. He wen give da Israel guys food an watta so dat dey could stay alive in da boonies.a​—Egypt 15:22-25; Songs 78:23-25.

2. How come God wen ask Moses, “You tink I no mo enuff powa fo do dat?!” (Census 11:21-23)

² Even tho Moses had strong fait, ony about one year afta he wen lead da Israel guys outa Egypt, he wen question wedda Jehovah could give meat to his peopo. Cuz neva have food in da boonies, Moses no could figga how Jehovah could give dem nuff meat fo feed da millions of peopo who wuz camping dea. So Jehovah wen tell Moses, “You tink I no mo enuff powa fo do dat?!” (Read um Census 11:21-23.) Hea, da word “powa” in Hebrew mean “da hand of Jehovah.” Dis talking about God’s spesho spirit, or his powa, fo do wat he like. So Jehovah really wuz telling Moses, “Wateva I say I goin do, I get da powa fo do um.”

3. How come iz importan fo us tink about wat Jehovah wen tell Moses?

³ You eva wen worry about if Jehovah goin give you an yoa ohana wat you need fo live? No matta if you had or neva, we go see how come Moses an da Israel guys neva trus dat Jehovah could take kea dem. An den we go look some scripchas dat goin make oua trus moa strong dat Jehovah get da powa fo help us erytime.

LEARN FROM MOSES AN DA ISRAEL GUYS

4. How come plenny Israel guys wen start fo tink dat Jehovah no could take kea dem?

⁴ How come plenny Israel guys wen start fo tink dat Jehovah no could take kea dem? Dem an da “guys from da odda peopos” who wen leave Egypt too wuz walking long time tru da boonies on dea way to da Land Dat Jehovah Wen Promise Dem. (Egypt 12:38; Rules 8:15) Da odda guys who wuzn’t Jews wuz sick of eating manna awready, same wit plenny of da Israel guys, an dey all wen complain to Moses. (Cens 11:4-6) Da peopo wanted fo eat food dat dey had in Egypt. Cuz of da presha da peopo wuz putting on him, Moses had feel like he wuz da one dat had fo find meat fo all dem.​—Cens 11:13, 14.

5-6. Wat we can learn from how da guys who no wuz Jews had rub off on da Israel guys?

⁵ Da guys who no wuz Jews wuzn’t tankful fo da tings Jehovah had give dem, an dat had rub off on da Israel guys. Same ting can happen to us. Wen oddas aroun us no stay tankful, us too can start fo not be happy wit da tings Jehovah give us. We could start fo miss wat we had befoa in oua life or come jealous of wat oddas get. We goin be moa happy if we learn how fo stay good wit da stuff we get awready.

⁶ Da Israel guys shoulda tink about wat Jehovah had promise dem. He wuz goin give dem way moa den wat dey wen need, once dey had reach dea new home, not while dey wuz walking tru da boonies. Same same, we goin be happy if we tink about all da good stuff Jehovah promise fo give us in da new world, radda den tinking about da stuff dat we no moa right now. We can also tink hahd about scripchas dat can help us make oua trus in Jehovah moa strong.

7. How we kno fo shua dat Jehovah always get da powa fo help us?

⁷ Wen Jehovah had ask Moses da question “You tink I no mo enuff powa fo do dat?!” maybe He wen like Moses fo tink about two tings, (1) His powa no moa one limit, an (2) He can use his powa anywea an erywea. Even if da Israel guys wuz in da middo of da boonies, God still yet could give dem choke meat. Wit “his strong arm,” God wen show dat he can help his peopo anywea. (Songs 136:11, 12) So wen we get hahd time, we can be shua dat Jehovah can help ery one of us, no matta wea we stay.​—Songs 138:6, 7.

8. Wat goin help us fo no do da same ting like plenny of da guys in da boonies? (Go look da picha.)

⁸ Jehovah wen do wat he wen promise an sen his peopo choke quail birds. But da Israel guys neva mahalo God fo dat. Plenny of dem wen come greedy. Fo one an a half days, dey wuz trying fo catch all da quails dey could get. Jehovah wuz real huhu wit dose who wuz “pigging out on da meat,” an wen punish um. (Cens 11:31-34) We can learn from dat exampo. We gotta be keaful fo no come greedy. Wedda we get plenny money or not, we gotta go all out fo “work hard an do tings fo God who stay in heaven” by coming close frenz wit Jehovah an Jesus. (Mat 6:19, 20, NWT; Luk 16:9) Wen we do dat, we can kno dat garanz Jehovah goin give us wat we need.

9. Wat we can full on trus?

⁹ Jehovah stay ready fo help his peopo today. Dis mean we neva goin need money or food? No.b But Jehovah neva goin bag from us. He goin always be dea fo us no matta wat. How we can show we trus Jehovah goin take kea us? We go look two ways, (1) wen get money kine problems an (2) wen we tinking about how we goin have nuff money wen we get old.

WEN GET MONEY KINE PROBLEMS

10. Wat money kine problems might come up?

¹⁰ We can expeck fo have moa money problems da closa we get to da end of dis world. Cuz of wars, disastas, changing govaments, or new pandemics, all of a sudden we can lose oua job, da tings we get, or maybe we gotta move somewea else. If dat happen can be even moa hahd fo get da tings we need. Wat can help us fo make choices dat show dat we trus Jehovah goin take kea us?

11. Wat can help you fo hando money kine problems? (Luke 12:29-31)

¹¹ Da mos importan ting dat goin help you iz fo tell Jehovah wat you stay worry about. (Smart Guys 16:3) Ask Jehovah fo help you be akamai so you can make good choices an fo be calm so dat you “no worry” about wat you goin tru. (Read um Luke 12:29-31.) Keep asking him fo help you feel good wit jus having da tings you need. (1 Tim 6:7, 8) Go find stuff fo read from oua hui dat goin help you figga out wat fo do wen you get money problems. Plenny peopo wen say dat da stuff dey wen read an da videos on top jw.org about money kine problems wen help dem.

12. Wat somebody can ask himself fo choose wass bes fo his family?

¹² Some guys wen take one job wea dey gotta move far away from dea family but layta dey wen see it no wuz one smart ting fo do. Befoa you pick one new job, no jus tink about da money you goin get but tink about how iz goin affeck you an yoa family spiritually. (Luk 14:28) Ask yoaself, “Wat can happen to oua marriage if I not dea? I goin be able fo go all da meetings, go field service, an spen time wit my braddahs an sistahs o wat?” If you get keiki, you gotta ask yoaself dis importan question, “How I goin “teach um right, an show um eryting Da One In Charge like um fo know an fo do” if I no stay wit dem?” (Efe 6:4) Wen you tinking about wat fo do, lissen to wat God tink, not yoa frenz an family dat no respeck da Bible.c Tony, who live western Asia, wen get some job offers in anodda country dat wuz goin pay him plenny money. But afta he wen pray about um an talk wit his wife, he wen choose fo not take any of da jobs an den tink about how dey could make changes fo spen less money. Tinking back, Tony wen say, “Cuz we wen choose fo do dis, I wuz able fo help some peopo come fo kno Jehovah, an oua kids love Jehovah plenny too. Oua family wen learn dat wen we trus wat tell at Matthew 6:33, Jehovah goin take good kea of us.”

TINKING ABOUT HOW WE GOIN HAVE NUFF MONEY WEN WE GET OLDA

13. Wass some tings we can do now so dat we get nuff money wen we get olda?

¹³ Anodda way we can show how much we trus Jehovah iz how we plan fo wen we get olda. Da Bible tell us fo work hahd so dat we get nuff money fo take kea ouaselfs layta on. (Smart Guys 6:6-11) If can, would be good fo save some money now fo da future. Iz tru dat money can proteck us litto bit. (Teacha 7:12) But we no like make money come da mos importan ting in oua life.

14. How can Fo Da Hebrew Peopo 13:5 help us wen we plan fo oua future?

¹⁴ Jesus wen tell one story fo show dat one person who save money but no do wat Jehovah like, iz not too smart. (Luk 12:16-21) Nobody kno wat goin happen tomorrow. (Smart Guys 23:4, 5; Jam 4:13-15) Jesus even wen tell dat all da guys dat like follow him gotta be ready fo “give up” da tings dey get. (Luk 14:33) Dis wat wen happen to da firs Christians in Judea. Dey wen give up wat dey had, but still yet wuz happy. (Heb 10:34) Today, plenny braddahs wen lose dea job an dea tings cuz dey wen choose fo no back up political kine stuffs. (Jesus Show 13:16, 17) Wat wen help dem fo do dat? Dey wen full on trus wat Jehovah wen promise, “No way I eva goin leave you! No way I goin bag from you!” (Read um Fo Da Hebrew Peopo 13:5.) So we do oua bes fo plan fo oua future, but if someting come up all of a sudden, we trus dat Jehovah goin take kea us.

15. How Christian parents should view dea kids? (Go look da picha.)

¹⁵ In some places, coupos like have kids so dat da kids can make nuff money fo take kea dem wen dey get olda. But da Bible tell dat da parents iz suppose to take kea wat da kids need. (2 Cor 12:14) Of course, wen parents get olda dey might need dea kids fo help dem wit money an odda stuffs, an dea kids iz happy fo help dem. (1 Tim 5:4) But Christian parents kno dat dey goin be moa happy wen dey raise dea kids fo serve Jehovah radda den raising dem fo make nuff money fo take kea dem layta on.​—3 John 4.

16. How parents can help dea kids learn how fo make money fo take kea demselfs? (Fo Da Efesus Peopo 4:28)

¹⁶ Tru yoa exampo, teach yoa kids fo trus Jehovah az you help dem learn how fo make money fo take kea demselfs. Show dem iz good fo work hahd. (Smart Guys 29:21; read um Fo Da Efesus Peopo 4:28.) Az dey grow up, help dem do dea bes at skool. Parents can do research fo find Bible truts dat can help dea kids make good choices about wat kine education fo get. Da parents goal iz fo help dea kids be able fo take kea demself an have moa time fo go all out fo preach.

17. Wat we can kno fo shua?

¹⁷ Da guys who trus Jehovah can be shua dat he can, an he like, take kea dem an da tings dey need. Da moa closa we come to da end of dis world, da moa we goin need solid trus in Jehovah. No matta wat happen, we go full on trus Him dat he goin use his powa fo take kea us. We can kno fo shua dat Jehovah get da powa fo always help us erytime.