Learn From Da Las Words Of Faitful Braddahs

1. How come we can learn from olda ones?

ALL us need help fo make good choices. Plenny of da help we get, come from eldas an solid braddahs an sistahs. We no like tink dea advice no stay good fo us today, jus cuz dey olda. Cuz dey been aroun longa den us, dey stay akamai an wen learn plenny about life.​—Job 12:12.

2. Wat we goin learn in dis lesson?

² Back in Bible times, Jehovah wen use faitful olda ones fo build up an help his peopo kno wat fo do. We go check out da exampo of Moses, David, an da aposal John. Da time dey wen live in an da tings dey wen go tru wuz all diffren from each odda. Nea da end of dea life, dey wen give good kine advice to younga guys. Each one of dem wen talk about how importan it iz fo lissen to God. Jehovah wen make shua dat wat dey wen tell stay in da Bible so dat we can learn from dem. Az good fo all us go ova dea advice, no matta we young or old. (Rome 15:4; 2 Tim 3:16) In dis lesson, we goin read some of da las words from dese three olda braddahs an see wat we can learn from wat dey tell.

“STAY LONG TIME ON TOP DA LAND”

3. Wat ways Moses wen work fo God an da Israel peopo?

³ Moses wen work full on fo Jehovah his whole life. He wuz one prophet, judge, leada, an writa. Moses wen learn plenny from all da tings he wen do in his life. He wen free da Israel peopo from bein slaves an he wen lead dem outa Egypt. An he wen get fo see plenny of Jehovah’s miracles happen. Jehovah wen use him fo write da firs five books of da Bible, Song 90, an maybe Song 91. An he probly wen write da book of Job.

4. Who Moses wanted fo build up, an how come?

⁴ Right befoa he had die, wen he wuz 120 years old, Moses wen hui up da Israel peopo fo remind dem of da tings Jehovah do fo dem. Wen some of da Israel guys wuz younga, dey wen see da miracles dat Jehovah wen do an how he wen punish da Egypt guys. (Egypt 7:3, 4) Dey wen see Jehovah split da Red Sea an dey wen walk tru um. An dey wen see Jehovah wipe out Pharaoh an his army. (Egypt 14:29-31) In da boonies, Jehovah wen proteck an take kea dem. (Rules 8:3, 4) Pretty soon da Israel peopo wuz goin go into da Promise Land. So befoa he had mahke, Moses wen like build up da peopo.a

5. In Da Rules Secon Time 30:19, 20, wat Moses wen help da Israel peopo kno fo shua?

⁵ Wat Moses had tell? (Read um Da Rules Secon Time 30:19, 20.) He wen remind da Israel peopo dat dey had one awesome future bumbye. Wit Jehovah’s blessing, da Israel peopo could live fo long time in da land dat he wen promise dem. An da land wuz beautiful an could grow plenny food! Moses wen tell dem about da land, “Big, rich towns dat you guys neva build. Get plenny house dea wit all kine good tings you guys neva put dea, an big holes fo hold watta dat stay dea awready, an grape fields an plenny olive trees you guys neva plant.”​—Rules 6:10, 11.

6. How come God wen let odda rulas take ova Israel?

⁶ Moses had warn da Israel peopo too. He wen tell dat if dey like keep living in dea beautiful land, dey wuz goin have fo lissen to wat Jehovah tell. Moses wen tell dem fo choose “fo stay alive” by lissening to Jehovah an by staying “tight wit him.” But da Israel guys wen go agains Jehovah an neva lissen him. So bumbye God wen let da Assyria guys, an den layta on da Babylon guys, take ova an take dem away from dea land.​—2 Ki 17:6-8, 13, 14; 2 Rec 36:15-17, 20.

7. Wat we learn from wat Moses had tell? (Go look da picha.)

⁷ Wass da lesson fo us? Wen we lissen to Jehovah, we can live foeva. Jus like da Israel guys wuz almos in da Promise Land, we stay real close to da new world dat Jehovah wen promise us. Pretty soon, da eart goin be one paradise again. (Isa 35:1; Luk 23:43) Da Devil an his demons not goin be dea. (Jesus Show 20:2, 3) Not goin have religions dat bulai about Jehovah. (Jesus Show 17:16) Not goin have human govaments dat hurt da peopo dey suppose fo take kea of. (Jesus Show 19:19, 20) Not goin have any trouble maykas in Paradise. (Songs 37:10, 11) Erybody in Paradise goin lissen to Jehovah’s rules, so goin have peace. An erybody goin love an trus each odda. (Isa 11:9) Dat future stay so unreal! An if we lissen to Jehovah, we not ony goin live fo hundred years but foeva in one paradise eart.​—Songs 37:29; John 3:16.

8. How da promise fo live foeva wen help one missionary braddah? (From Jude 20, 21)

⁸ If we tink plenny about Jehovah’s promise fo live foeva, we goin like stick wit him no matta wat problems come up. (Read um From Jude 20, 21.) Dat promise goin give us da powa we need fo fight agains da tings we struggle wit. One braddah who been one missionary long time in Africa tell dat plenny times he like do someting dat Jehovah no like. He tell, “I had figga dat I no could live foeva in paradise if I no lissen to Jehovah. Dat wen help me fo keep fighting da problem an fo pray to Jehovah moa about um. Wit Jehovah’s help I wuz able fo win ova my problem.”

“GOIN COME OUT GOOD FO YOU”

9. Wat hard times David wen go tru in his life?

⁹ David wuz one real good King. He wuz one musician, poet, warrior, an prophet. David wen go tru all kine hard times. Fo plenny years he wuz on da run an hiding cuz King Saul wuz trying fo kill him. Afta he wen come king, again David had fo run an hide cuz his son Absalom wuz trying fo steal his throne. Even tho David had some hard times an wen make some big mistakes, he wen stay loyal to Jehovah til he mahke. Jehovah tell dat David wuz “da kine guy dat make [Him] stay good inside.” So goin be real good if we lissen to wat David tell!​—Jesus Guys 13:22; 1 Ki 15:5.

10. How come David wen give advice to his son Solomon befoa he wen come king?

¹⁰ Fo exampo, try look da good kine advice David wen give to his boy Solomon, who wuz goin come da nex king. Jehovah wen choose Solomon fo build one temple wea peopo could worship Him. (1 Rec 22:5) Solomon wuz goin have plenny work fo do an he wuz goin need Jehovah’s help fo get tru um. Wat David wuz goin say to him? We go see.

11. From wat 1 Kings 2:2, 3 tell, wat advice David wen give Solomon, an wat wen happen wen Solomon had lissen to um? (Go look da picha.)

¹¹ Wat David had tell? (Read um 1 Kings 2:2, 3.) David had tell his boy dat if he lissen to Jehovah, he goin be one good leada an Jehovah goin bless him. An fo plenny years Solomon had one good life an eryting wen come out good fo him. (1 Rec 29:23-25) He wen build da awesome temple, write some books of da Bible, an can read some of his words in odda pahts of da Bible. Peopo wen kno him fo how akamai an rich he wuz. (1 Ki 4:34) But like David had tell, tings ony would go good fo Solomon if he lissen to Jehovah. Wuz sad tho, cuz layta on Solomon wen worship odda gods. Jehovah neva like dat, so he wen take away da smarts he wen give Solomon fo be one nice an fair rula.​—1 Ki 11:9, 10; 12:4.

12. Wat we can learn from wat David tell?

¹² Wass da lesson fo us? Wen we lissen to Jehovah, eryting goin come out good fo us. (Songs 1:1-3) Of course, Jehovah neva promise he goin make us rich or famous like Solomon wuz. But if we lissen oua God, he goin give us da smarts fo help us make good kine choices. (Smart Guys 2:6, 7; Jam 1:5) Jehovah’s advice can help us wen we make choices about work, skool, money, an wat we do fo fun. If we lissen wat he tell, we goin stay solid wit him an live foeva. (Smart Guys 2:10, 11) We goin have good frenz. An oua ohana goin be happy.

13. Wat wen help Carmen make her life moa betta?

¹³ Carmen, who live Mozambique, wen tink dat extra skool wuz goin make her life moa betta. She wen go one university fo learn how fo design buildings. “I had love wat I wuz learning,” she had write. “But wen take so much of my time an energy. I wuz at skool from 7:30 in da morning til 6 at nite. Wuz hard fo get to da meetings an my relationship wit Jehovah wen come weak. An I wen figga I no wuz lissening to Jehovah’s advice.” (Mat 6:24, NWT.) She wen pray about wat she wuz goin tru an wen do research in oua publications. Den she wen write, “Afta I wen get good kine advice from solid braddahs an from my maddah, I wen choose fo leave da university an serve Jehovah full-time. I feel I wen make da bes choice an I stay supa happy I wen do dat.”

14. Wass da main ting both Moses an David had tell?

¹⁴ Moses an David wen love Jehovah an dey wen kno how importan wuz fo lissen to him. So dey wen tell oddas fo copy dea exampo an stick tight to Jehovah. An dey wen warn oddas dat if dey no stick to Jehovah, dey not goin be his frenz anymoa an He not goin bless dem. Dea advice stay good fo us now. Hundreds of years layta, anodda solid braddah wen show how importan it iz fo stay faitful to Jehovah.

“STAY GOOD INSIDE TO DA MAX”

15. Wat da aposal John wen go tru in his life?

¹⁵ John wuz good frenz wit Jesus an wuz one of his aposals. (Mat 10:2; John 19:26) John wen preach wit Jesus, wen see him do miracles, an wen stick wit him tru hard times. He wen see Jesus get killed an wen see him afta he wen come back alive. He wen see da Christian congregation grow an had live long enuff fo see da good kine tings get preach “all ova da world.”​—Col 1:23.

16. Who John’s lettas wen help?

¹⁶ Wen John wuz real old, Jehovah wen give him da spesho chance fo write pahts of da Bible. He wen write da action pack book, Jesus Show. (Jesus Show 1:1) He wen write da book of John dat talk about Jesus life. An he wen write three lettas. In his third letta, John wen write to one solid Christian name Gaius, who he wen love like his own spiritual boy. (3 John 1) By dis time in his life, probly had plenny braddahs an sistahs dat John wen tink of az his spiritual kids. Wat dis faitful olda braddah wen write had build up all of Jesus followas even til now.

17. In 3 From John 4, wat can make you happy?

¹⁷ Wat John had write? (Read um 3 From John 4.) In his third letta, John had tell he wuz happy fo see his braddahs an sistahs lissening to God. At da time, some peopo wuz teaching bulais an wuz making problems fo try split up da braddahs. But oddas wen “stick wit da trut.” Dey wen lissen to Jehovah an do wat he tell. (2 John 4, 6) Dese faitful braddahs an sistahs wen make John an Jehovah supa happy.​—Smart Guys 27:11.

18. Wat we can learn from wat John tell?

¹⁸ Wat we can learn from wat John tell? Wen we stay faitful to Jehovah, we goin be happy an we make oddas happy too. (1 John 5:3) Fo exampo, we goin feel good inside wen we kno we make Jehovah happy. He stay happy wen he see us lissen to him an no give in to da preshas fo do someting bad. (Smart Guys 23:15) An da angels stay happy too. (Luk 15:10) Make us feel good too fo see oua braddahs an sistahs stay faitful, even tho dey gotta deal wit all kine hard times an preshas. (2 Tess 1:4) An wen Satan’s world get wipe out, we goin be happy we wen stay tight wit Jehovah.

19. Wat one sistah name Rachel had say about teaching da trut to oddas? (Go look da picha.)

¹⁹ We stay real happy wen we teach oddas about Jehovah. Rachel, who live in da Dominican Republic, feel dat iz supa spesho fo us teach oddas about oua God Jehovah. She wen help plenny peopo fo come into da trut an dey wen come her spiritual kids. She tell, “Iz hard fo say how happy I feel fo see da ones I teach come fo love Jehovah, full on trus him, an change up dea lifes so dat dey can make him happy. Dat feeling stay wort way moa den all da hard work an sacrifice I wen put in fo teach dem.”

DA LAS WORDS FROM FAITFUL MEN STAY GOOD FO US

20. Wat ways we same same wit Moses, David, an John?

²⁰ Wen Moses, David, an John had live long time ago, wuz way moa diffren den how iz today. But get ways we stay same same. Dey wen serve Jehovah an we do too. Like dem, we pray to Jehovah, trus him fo help, an go to him fo good advice. An like dese solid braddahs from befoa, we trus dat Jehovah goin bless da guys dat lissen to him.

21. How Jehovah goin bless da guys who lissen to da advice from faitful olda men like Moses, David, an John?

²¹ We go follow da advice from da olda men an lissen to wat Jehovah tell us fo do. Cuz wen we lissen to Jehovah, eryting we do goin come out good. We goin live “long time,” dass foeva! (Rules 30:20) An we goin be happy cuz we make Jehovah happy, da one who goin blow oua minds wit unreal kine blessings.​—Efe 3:20.