How Fo Hando Wen Tings Not Fair

1-2. How come all us guys no goin be treated fair?

JESUS wen tell one story about one widow dat wen keep asking one judge fo help her cuz somebody wuz treating her bad. Garanz Jesus guys wen undastan dat story cuz plenny times dey had fo deal wit tings dat no wuz fair. (Luk 18:1-5) Us too can undastan how she wen feel, cuz sometime in oua life, we all wen go tru someting dat no wuz fair.

² Plenny peopo in da world today look down on oddas, no stay nice, an ony tink about demself, so no shock us wen tings happen dat no stay fair. (Teacha 5:8) But maybe throw us off fo tink oua braddahs or sistahs goin treat us bad. Dey no try fo treat us bad, but cuz dey not perfeck, it can happen. We can learn plenny from Jesus an how he wen hando wen da guys dat go agains him treat him bad. If we can hando wen da guys who go agains us no treat us fair, den fo shua we can hang in dea wen oua braddahs an sistahs no treat us fair. How Jehovah feel wen peopo no treat us fair, inside or outside da local hui? He kea wen dat happen?

3. Jehovah kea wen we suffa from tings dass not fair, an how come?

³ Jehovah kea plenny about how peopo treat us. Jehovah “like fo peopo do wass right.” (Songs 37:28) Jesus garantee dat Jehovah goin make tings good wen da time stay right. (Luk 18:7, 8) Pretty soon he goin take away all da tings we suffa from an we not goin have fo deal wit tings dass not fair eva again.​—Songs 72:1, 2.

4. How Jehovah help us today?

⁴ We gotta wait fo da time wen Jehovah goin fix all oua problems. But fo now, he help us wen peopo no treat us fair. (2 Pet 3:13) Wen peopo treat us bad, he teach us how fo ack so we no make tings moa worse. Jehovah, tru his boy Jesus, wen give us one perfeck exampo of da way we can ack wen tings no stay fair. An in da Bible he give us good kine advice fo kno wat fo do wen we stay treated bad.

WATCH OUT HOW YOU ACK WEN TINGS NO STAY FAIR

5. Why we gotta watch out how we ack wen someting happen dass not fair?

⁵ We can feel supa soa an bum out wen someting happen dass not fair. (Teacha 7:7) Solid guys like Job an Habakkuk wen feel da same way. (Job 6:2, 3; Hab 1:1-3) No stay wrong fo feel lidat, but we gotta watch out how we ack so dat we no do someting stupid.

6. Wat Absalom’s exampo teach us? (Go look da picha.)

⁶ Wen somebody no treat us or somebody we love good, maybe we goin like fix um on oua own. But if we go do dat, we can make tings moa worse. Try tink about wat wen happen to King David’s boy Absalom. He wen come all nutz wen his sistah Tamar wen get raped by dea half braddah Amnon. In da Rules from Moses, Amnon should mahke fo wat he wen do. (Pries 20:17) So, even tho no wuz wrong fo Absalom get all nutz, no wuz his right fo kill Amnon.​—2 Sam 13:20-23, 28, 29.

7. How da song writa wen ack at firs wen he wen see tings dat no wuz fair?

⁷ Wen guys who do wass bad get away wit um, we might tink, wass da point in doin wass right? One song writa wen see dat da good peopo get bus up by da pilau kine guys, an dose same pilau guys live one good life. He tell, “Dass how da peopo dat do bad kine stuff stay. No mo notting bodda dem any time.” (Songs 73:12) All da bad kine stuff he wen see, wen bodda him plenny. An he wen tink no wuz wort it fo serve Jehovah. An he wen tell, “Dass why I wen try hard fo undastan how come eryting come good fo da bad guys. An I wen tink, no good fo even try undastan.” (Songs 73:14, 16) An den he wen say, “Me, I wen almos miss out, jalike almos fall ova one cliff, jalike my feets almos slip an I fall down.” (Songs 73:2) Someting lidat wen happen to one braddah we goin call Alberto.

8. Wat wen happen cuz one braddah no wuz treated fair?

⁸ Some braddahs wen say dat Alberto wuz stealing money from da local hui, even tho he no wuz. Cuz of dat, he no could be one elda anymoa an plenny guys in da local hui neva respeck him afta dat. He tell, “I wuz supa mad an all nutz.” He wen let his feelings jam up his relationship wit Jehovah, an he even wen stop goin meetings fo five years. Dis show wat can happen if we no control oua feelings wen we not treated fair.

COPY HOW JESUS WEN ACK WEN HE NO WUZ TREATED FAIR

9. Wat wrong tings Jesus wen go tru? (Go look da picha.)

⁹ Jesus wen show us one perfeck exampo of how fo hando wen peopo no treat us fair. Plenny peopo wen treat him pilau, even his ohana. His ohana wen tell dat he wuz goin crazy, da church leada guys tell dat he get his powa from da demons, an da Rome soldiers wen tease him, make him suffa, an den wen kill him. (Mar 3:21, 22; 14:55; 15:16-19, 35-37) Still yet, Jesus wen go tru all dat an neva try pay dem back. Wat we learn from his exampo?

10. How Jesus wen hando wen tings no wuz fair? (1 From Peter 2:21-23)

¹⁰ Read um 1 From Peter 2:21-23.a Jesus iz one perfeck exampo fo us copy how fo hando wen tings not fair. He wen kno wen wuz okay fo say someting or no say someting. (Mat 26:62-64) Wen oddas wen tell lies about him, he neva try erytime fo correck um. (Mat 11:19) Wen he did say someting to da guys goin agains him, he neva make threats or talk bad to dem. Jesus erytime wen control how he ack cuz he “let God da Judge take kea all dat cuz he know God do da right ting.” Jesus had kno dat Jehovah had see oddas treat him bad. An he wen trus dat Jehovah wuz goin fix eryting wen da time stay right.

11. Wass some ways we can control wat we say? (Go look da pichas.)

¹¹ Wen oddas treat us bad, we can copy Jesus an control wat we say. Sometimes we no need say or do notting, cuz wat wen happen wuz ony mynah. Or we choose fo no say notting cuz we no like make tings worse. (Teacha 3:7; Jam 1:19, 20) An odda times, we gotta say someting fo stick up fo somebody dass treated bad or fo stan up fo da trut. (Jesus Guys 6:1, 2) An if we do talk, we gotta try oua bes fo stay calm an show respeck.​—1 Pet 3:15.b

12. How we can “let God da Judge take kea” tings?

¹² We can also copy Jesus an “let God da Judge take kea all dat cuz . . . God do da right ting.” Wen oddas judge us wrong or treat us bad, we trus dat Jehovah kno da trut. Wen we kno dat Jehovah goin make tings right, dat help us fo hang in dea wen tings no stay fair. If we trus Jehovah an wait fo him fo take kea tings, we not goin stay mad or hate oddas. Cuz if we feel lidat, it can hemo oua joy, make us do someting bad, an hurt oua relationship wit Jehovah.​—Songs 37:8.

13. Wat can help us fo hang in dea wen oddas treat us bad?

¹³ We no can eva copy Jesus perfeck. Goin get times wea we can say or do someting we wish we neva. (Jam 3:2) An sometimes wen oddas treat us bad, da hurt an stress can stick wit us da res of oua lifes. If dass you, be shua dat Jehovah kno wat you stay goin tru. An Jesus kno how you feel, cuz peopo wen make him suffa too. (Heb 4:15, 16) Jehovah neva jus give us Jesus perfeck exampo, but he also wen give us solid words in da Bible fo help us wen oddas treat us bad. We go look two scripchas in Fo Da Rome Peopo dat can help us.

“WAIT, AN LET GOD TAKE KEA”

14. Wat dat mean fo “wait, an let God take kea”? (Fo Da Rome Peopo 12:19)

¹⁴ Read um Fo Da Rome Peopo 12:19. Da aposal Paul wen tell Christians fo “wait, an let God take kea.” We let God take kea tings wen we let him choose wen an how he goin make tings right. Afta one braddah name John no wuz treated fair, he tell, “I had fo hold back fo no hando tings my own way. Fo Da Rome Peopo 12:19 wen help me fo wait an trus Jehovah goin fix tings.”

15. How come iz betta fo wait fo Jehovah take kea da problem?

¹⁵ Tings goin turn out good fo us if we wait fo Jehovah fix da problem. If we do dat, we no goin get stress or bum out wen we try fix tings on oua own. Jehovah ready fo help us. Az like he tell, “Let me hando um, I goin take kea um.” If we trus Jehovah wen he tell he goin take kea um, den we can let um go, an we no need stay mad cuz we kno he goin do wass bes. Dass wat wen help John, who we wen talk about befoa. He tell, “If I jus wait fo Jehovah, den he goin hando um way betta den I can.”

DO GOOD KINE STUFF FO GET POWA OVA BAD KINE STUFF

16-17. How praya can help us fo get powa ova da bad kine stuff? (Fo Da Rome Peopo 12:21)

¹⁶ Read um Fo Da Rome Peopo 12:21. Paul wen tell da Christians, “Mo betta do good kine stuff. Az how you get da powa ova da bad kine stuff.” Wen Jesus had give one talk on da mountain, he tell, “You gotta keep loving da guys who like hurt you an pray fo da guys who make you suffa.” (Mat 5:44, New World Translation.) Dass wat he wen do. We probly wen tink about how Jesus wen suffa wen da Rome army guys wen nail him to da pos. Dey wen treat Jesus so bad an he wen go tru so much pain, we no can even undastan how much he wen suffa.

¹⁷ Even tho Jesus wen suffa so much, he still yet wen love an stay faitful to Jehovah. Radda den asking Jehovah fo punish da army guys, he wen pray, “Faddah, let dem go fo dis bad ting dey stay doing. Dey donno wat dey stay doing.” (Luk 23:34) Wen we pray to Jehovah fo help da guys dat treat us bad, it can help us fo stay calm an no be az mad. An it can help us change how we feel about dem.

18. How praya wen help Alberto an John fo hando wen oddas neva treat dem fair?

¹⁸ Praya wen help da two braddahs we wen talk about befoa fo hando wen oddas neva treat dem fair. Alberto tell, “I wen pray fo dose braddahs dat neva treat me fair. An I wen keep asking Jehovah fo help me no stay mad about wat wen happen to me.” Iz so good dat Alberto iz serving Jehovah again. John tell, “Plenny times I had pray fo da braddah dat wen hurt me an fo help me fogive him. Jehovah wen help me fo no stay mad wit my braddah an fo stop judging him. An dose prayas wen help me fo res inside.”

19. Wat we gotta do til dis world pau? (1 From Peter 3:8, 9)

¹⁹ We goin have fo deal wit tings dass not fair til dis world pau. But wateva we gotta deal wit, we gotta keep praying to Jehovah fo help us. We also gotta copy how Jesus wen ack wen oddas neva treat him fair an use Bible truts fo help us in oua life. If we do dat, den we can kno fo shua dat Jehovah goin bless us.​—Read um 1 From Peter 3:8, 9.