Jehovah Garuntee He Going Make Da Earth One Paradise

1. Wat da prophet Isaiah wen tell da Israel peopo?

DA PROPHET Isaiah wen say dat Jehovah is “da true God.” Da word translated “true” mean “amen.” (Isa 65:16, NWT.) An “amen” mean “dass it,” o “az fo shua.” Wen da Bible talk about Jehovah o Jesus an use dose words, dat mean garans da ting is true. So wat Isaiah was telling da Israel peopo was clear. Weneva Jehovah tell dat someting going happen, it always going happen. Jehovah wen prove dat, cuz he erytime do wat he promise.

2. How come we can trus Jehovah’s promises about da future, an wat questions we going go ova?

² Jehovah wen make odda promises about da future. Can trus dose too? Almos 800 years afta Isaiah’s time, da aposal Paul wen tell why we can always trus God’s promises. Paul sed, “God no bulai nobody.” (Heb 6:18) Jalike one fresh watta spring ony give out fresh watta an no can give out salt watta, az da same wit Jehovah who ony tell da trut, an no can bulai. Das how come we always can trus eryting dat Jehovah tell, even all da promises he make about da future. In dis lesson we going talk about dese questions, Wat Jehovah wen promise fo give us in da future? An wat kine garuntee he wen give dat dose promises going come true?

WAT JEHOVAH WEN PROMISE?

3. (a) Wat promise God’s peopo love? (Jesus Show 21:3, 4, NWT.) (b) How some ack wen we tell um dat promise?

³ God’s peopo all ova da world love da promise dat we going talk about. (Read um Jesus Show 21:3, 4, NWT.) Jehovah promise dat “nobody going mahke no moa, stay sad inside, o cry, o suffa no moa.” Plenny of us use dat scripcha about da paradise fo try help da peopo we preach to feel betta. How some of da peopo ack wen we tell dem dis promise? Maybe dey tell, “Dass way too good fo be true.”

4. (a) Wat Jehovah wen know was going happen oua time? (b) Wat else Jehovah wen do besides make one promise?

⁴ Wen Jehovah had da aposal John write down da promise of life in paradise, He wen know dat all us today would share um wit da peopo we preach to. Anodda ting he wen know was dat plenny peopo would have hard time believe da “new kine stuff” he wen promise. (Isa 42:9; 60:2; 2 Cor 4:3, 4) So how we can garuntee us an odda peopo dat da blessings inside Jesus Show 21:3, 4 going come true? Jehovah neva ony tell dis promise but he wen give proof fo show how come we can trus um. Wat kine proof he wen give?

JEHOVAH GARUNTEE HIS PROMISE

5. Wat verses help us fo trus God’s promise, an wat dey say?

⁵ Get reasons fo trus Jehovah’s promise about da Paradise in da verses afta dat. Ova dea say, “Da One dat sit on top da throne tell, “Try look! I stay make eryting all new.” Den he tell, “Write um down da words cuz az true an you can trus um.” Den he tell me, “Dass it! Eryting pau! Me, da One wen do all dese tings, from first to las, A to Z.””​—Jesus Show 21:5, 6a, NWT.

6. How da garuntee in Jesus Show 21:5, 6 make oua trus in God’s promise moa strong?

⁶ How come dese words make oua trus in God’s promise moa strong? Wat Jehovah wen say was jalike he wen sign off on one title, fo garuntee he going keep his promise.b In Jesus Show 21:3, 4, dass wea God’s promise stay. But den in verses 5 an 6, Jehovah sign off on um an garuntee dat his promise going come true. We go look moa close at wat da garuntee say.

7. In verse 5, who start fo talk an how come dass spesho?

⁷ Verse 5 start lidis, “An da One dat sit on top da throne tell.” (Jesus Show 21:5a, NWT.) Ony get three times Jehovah wen talk in Jesus Show, an dis is one of dose times. No was one angel, o even Jesus, who wen make dat garuntee, but was Jehovah! Dat mean we can full on trus wat he tell nex. How come? Cuz Jehovah “no bulai.” (Titus 1:2) Wat we read at Jesus Show 21:5, 6 fo shua going happen.

“TRY LOOK! I STAY MAKE ERYTING ALL NEW”

8. Wat Jehovah say fo make um clear his promise going come true? (Isaiah 46:10)

⁸ Den Jehovah wen say “Try look!” (Jesus Show 21:5, NWT.) Da Greek word fo “look!” is used plenny times in Jesus Show. One reference book wen write dat da word “look!” is used az “one way fo get da reada fo look real good da words dat come afta.” Wat God say nex? “I stay make eryting all new.” Jehovah talking about wat he going do in da future, but cuz he know he going make um happen, he talk about um like he awready stay do um.​—Read um Isaiah 46:10.

9. (a) Wat “I stay make eryting all new” mean? (b) Wat going happen to da “firs sky” an da “firs earth”?

⁹ Jehovah den wen say at Jesus Show 21:5, “I stay make eryting all new.” Wat dat mean? Dis Bible chapta talk about two tings Jehovah going do, replace an fix up. Firs, wat Jehovah going replace? Jesus Show 21:1 tell dat “da firs earth an da firs sky pau.” Da “firs sky” is da govaments dat Satan an his demons control. (Mat 4:8, 9; 1 John 5:19) In da Bible, “earth” can mean da guys dat live on da earth. (Start 11:1; Songs 96:1) So den da “firs earth” is all da bad peopo in da world today. Jehovah not going jus fix up da “sky” an da “earth” dat get now, but he going get rid of um an replace um. He going replace um wit “one new kine earth an one new kine sky,” dass one new govament dat going rule ova all da good peopo on earth.

10. Wat Jehovah going make new?

¹⁰ Jesus Show 21:5 tell wat Jehovah say about da tings he going make new. He neva say, “I stay make all new eryting.” But he wen say, “I stay make eryting all new.” In wat odda way Jehovah stay make eryting all new? He going make da earth an da peopo on top um come all good. Like Isaiah wen say, Jehovah going make da whole earth into one beautiful place jus like da Eden garden. An fo ery one of us, he going make us new, o fix us up. Da guys who no can walk, see, an hear going get healed, an even da guys who had mahke going come back alive.​—Isa 25:8; 35:1-7.

“DA WORDS . . . AZ TRUE AN YOU CAN TRUS UM. . . . DASS IT! ERYTING PAU!”

11. Wat Jehovah wen tell John fo do, an how come?

¹¹ Wat else Jehovah wen say fo show we can trus him? Jehovah wen tell John, “Write um down da words, cuz az true an you can trus um.” (Jesus Show 21:5, NWT.) Jehovah no ony tell um “write um down,” he wen tell da reason. He sed, “Cuz az true an you can trus um.” We tankful dat John wen lissen an “write um down.” Cuz of dat, we can read about God’s promise of da paradise an tink hard about da awesome kine blessings we going get.

12. Why Jehovah can say, “Dass it! Eryting pau!”?

¹² Wat da nex ting Jehovah say? “Dass it! Eryting pau!” (Jesus Show 21:6) Now Jehovah stay talk about da promise of da Paradise like wen happen awready. An he can talk lidat cuz notting can stop him from doing um. Jehovah tell us someting else fo let us know garuntee eryting he promise, going happen. Wat is dat?

“I ERYTING, FROM FIRS TO LAS, A TO Z”

13. Why Jehovah wen say he da “A to Z”?

¹³ Like we wen say earlia, in da book Jesus Show, Jehovah wen talk to John three times. (Jesus Show 1:8; 21:5, 6; 22:13) Ery one of dose times, Jehovah wen say dat he da firs to las, A to Z. Da letta A is da firs letta in da alphabet, an da letta Z is da las one. Wen Jehovah say he da “A to Z,” dat help us fo undastan dat wen he start someting, he going finish um.

14. (a) Wen was da “A,” an wen going be da “Z”? (b) Wat Da Start 2:1-3 garuntee us?

¹⁴ Afta Jehovah wen make Adam an Eve, He wen tell dem wat his goal was fo dem an fo da earth. Jehovah say dat, “I give you guys da powa fo you do eryting I wen make you fo do. So, born plenny bebes, an fill up da world wit um, an take ova!” (Start 1:28) Right dea, wen Jehovah had tell wat his goal was fo peopo an da earth, dat was da start, o da “A”. Layta on, wen Adam an Eve’s kids who wen lissen fill up da earth an turn um into one paradise, dat going be da “Z.” Afta Jehovah was pau making “da sky, da world, an all da tings inside dem,” he wen give one garuntee. Dis garuntee stay at Da Start 2:1-3. (Read um.) Jehovah wen say dat day numba seven stay spesho to him. Wat dat mean? Jehovah wen garuntee dat his goal fo man an fo da earth going happen at da end of day numba seven.

15. How come Satan wen tink he was able fo stop Jehovah from making his promise come true?

¹⁵ Afta Adam an Eve wen go agains God, dey wen sin an no was perfeck, an dey wen pass down sin an death to all dea kids. (Rome 5:12) Cuz a dat, wen look like Satan wen jam up God’s goal fo have da earth filled wit perfeck peopo who lissen to him. Was Satan able fo stop Jehovah from making his promise come true? Satan probly wen tink Jehovah no could keep his promise. Maybe he wen tink God was going kill Adam and Eve an den start from scratch an make anodda perfeck couple fo reach his goal. But if God wen do dat, garans Satan woulda call him one bulaia. How come? Cuz jalike tell in Da Start 1:28, Jehovah wen tell Adam an Eve dat dea bebes was going fill up da earth.

16. How come maybe Satan wen tink he could say Jehovah neva do wat he wen promise?

¹⁶ Wat else Satan maybe wen tink God would do? Maybe Satan wen tink Jehovah was going let Adam an Eve have kids dat neva could be perfeck. (Teacha 7:20; Rome 3:23) If dat wen happen, da Devil garans would tell Jehovah dat He wen fail. How come? Cuz den da earth no would be filled with perfeck peopo like He wen promise.

17. How Jehovah wen fix wat Satan an da firs couple wen do, an wat going happen cuz a dat? (Go look da picha)

¹⁷ Jehovah wen fix wat Satan an da firs couple wen do in one way dat Satan neva even tink of. (Songs 92:5) Fo show dat He no was one bulaia an dat He neva fail, Jehovah wen let Adam an Eve have kids. Wen Jehovah tell he going do someting, notting can stop um. Fo make shua His goal come true, He wen give one kid fo save all of Adam an Eve’s kids who lissen. (Start 3:15; 22:18, NWT.) Dis kid was going give his life as one ransom fo cut loose an save erybody. Satan neva see dat one coming. How come? Cuz da ransom come from having plenny love an aloha fo erybody. (Mat 20:28; John 3:16) Satan no moa love an aloha cuz he selfish. So wat going happen cuz a da ransom? Afta Jesus pau rule fo tousand years, all Adam an Eve’s kids dat wen lissen going be perfeck an going live on one paradise earth. Dat was God’s goal from da start. Dat time going be da “Z”.

HOW WE MAKE OUA TRUS IN JEHOVAH’S PROMISE OF DA PARADISE COME MOA STRONG

18. Wat three garuntees God give us? (Go look da box “Three Reasons Fo Trus Jehovah’s Promise.”)

¹⁸ In dis lesson, we wen cova why we know garuntee da earth going be one paradise. Wat we can tell oddas fo help dem see dat dis really going happen? Numba one, Jehovah da one dat make da promise. Da book Jesus Show say, “An da One dat sit on top da throne tell, “Try look! I stay make eryting all new.”” Jehovah know how fo do um, he get da powa fo do um, an he like make his promise come true. Numba two, Jehovah know dat wat he promise, garans going happen. Dass how come he can say, “Write um down da words, cuz az true an you can trus um. . . . Dass it! Eryting pau!” Numba three, wen Jehovah start someting, no moa notting dat going stop um. Dass how come he sed: “I eryting, from firs to las, A to Z.” Jehovah going prove dat Satan da bulaia an da one dat wen fail.

19. Wen peopo get hard time believe God’s Paradise promise, wat you can do?

¹⁹ No foget, erytime you share God’s garuntee wit peopo you preach to, yoa own trus in Jehovah’s promises going come moa strong. So nex time you read da promise about da Paradise in Jesus Show 21:4 an somebody tell, “Dass way too good fo be true,” wat you can do? Read verses 5 an 6 an explain um to dem. Show um how Jehovah wen sign his name fo garuntee his promise.​—Isa 65:16.