How Fo Keep Oua Love Fo Each Odda Strong

1-2. (a) How come da aposal Paul could say dat love is “da main ting”? (b) Wat questions we going ansa?

WEN da aposal Paul was talking about faith, hope, an love, he wen tell dat “love an aloha fo erybody, dass da main ting.” (1 Cor 13:13) How come Paul wen say dis? Bumbye, wen all God’s promises about da new world come true, no going need faith o hope cuz awready wen happen. But we always going need love fo Jehovah an oddas. In fact, oua love fo dem going keep growing foeva.

² Cuz us always gotta have love, we going ansa three questions. Numba one, why we gotta show love fo one anodda? Numba two, how we show love fo one anodda? An numba three, how we can keep oua love fo one anodda strong?

WHY WE GOTTA LOVE ONE ANODDA?

3. Wat reasons we get fo love one anodda?

³ How come az importan fo us love one anodda? Cuz wen we show love fo oua braddahs, dass proof dat we fo real kine Christians. Jesus wen tell his aposals, “If all you guys show love an aloha fo each odda, den erybody goin know you my guys.” (John 13:35) Wen we get love, dis help us stick tight wit each odda. Paul wen say dat love “make all da odda stuff come togedda perfeck.” (Col 3:14) But get anodda reason why we gotta love each odda. Da aposal John wen tell his braddahs an sistahs, “Whoeva get love an aloha fo God gotta get love an aloha fo dea braddah an sistah too.” (1 John 4:21) Wen we show love fo one anodda, dass proof dat we love God too.

4-5. Try show how oua love fo God conneck to oua love fo one anodda.

⁴ How oua love fo God stay conneck to da love we show fo oua braddahs an sistahs? Try tink about how da heart stay conneck to odda parts of da body. Wen one docta check yoa pulse fo see if da ting weak o strong, maybe he can tell if yoa heart stay good o not. Wat dis got to do wit love?

⁵ Jalike one docta can tell if yoa heart stay good o not wen he check yoa pulse, we can find out if oua love fo God stay strong wen we check how much we love oddas. If we see dat oua love fo oua braddahs an sistahs not az strong az befoa, maybe dat mean oua love fo God stay coming weak too. Wen we show love to oua braddahs an sistahs all da time, dat show oua love fo God stay strong.

6. Why we gotta worry if oua love fo oua braddahs an sistahs stay come weak? (1 John 4:7-9, 11)

⁶ Why we gotta worry if oua love fo oua braddahs an sistahs stay come weak? Dat mean we no stay az close to Jehovah az we was befoa. Da aposal John make um supa clear wen he tell us, “If dey no moa love an aloha fo dea braddah o sistah dat dey can see, how dey goin get love an aloha fo da God dat dey neva see?” (1 John 4:20) Wat we learn from dis? Jehovah stay happy wit us ony if we “show love an aloha fo each odda.”​—Read um 1 John 4:7-9, 11.

HOW WE SHOW LOVE FO ONE ANODDA?

7-8. Wat some ways we can show love fo one anodda?

⁷ Ova an ova da Bible tell we gotta “get love an aloha fo each odda.” (John 15:12, 17; Rome 13:8; 1 Tess 4:9; 1 Pet 1:22; 1 John 4:11) Love is one feeling inside oua heart dat nobody can see. So how oua braddahs an sistahs going know we love dem? From wat we say an do.

⁸ Get plenny ways we can show oua braddahs an sistahs dat we love dem. Hea some of um, “Tell da trut to each odda!” (Zek 8:16) “No fight no moa, an try stay good wit each odda.” (Mar 9:50) “Show da oddas you get plenny respeck fo dem.” (Rome 12:10) “Take kea dem wit aloha.” (Rome 12:13) “Wen somebody give you problem, eh, let um go.” (Col 3:13) “Help da odda guy wen you know dat he need help.” (Gal 6:2) “Give each odda dis kine good words.” (1 Tess 4:18) “Help each odda come mo solid.” (1 Tess 5:11) “Pray fo each odda.”​—Jam 5:16.

9. How come giving good kine words is one importan way fo show oua love to oddas? (Go look da picha.)

⁹ We go look one of da ways we can show love fo oddas. We going check out how come Paul sed “give each odda dis kine good words.” How come giving good kine words to oddas is one importan way fo show oua love? One book about da Bible tell dat wen Paul sed “dis kine good words,” he wen mean “fo stan nex to somebody an help um wen dey get mayjah kine problems.” So wen we give good kine words to one braddah who stay suffa, we stay help him fo no give up serve Jehovah. Erytime we dea fo oua braddahs an sistahs, we show we love dem.​—2 Cor 7:6, 7, 13.

10. How feeling pity an giving good kine words go togedda?

¹⁰ How feeling pity an giving good kine words go togedda? One person who get pity going like give good kine words to somebody who stay suffa. So firs we feel pity an den we try fo help oddas so dey no suffa anymoa. Try look how Paul conneck Jehovah’s pity wit how he give good kine words to peopo. He tell dat Jehovah is “da Faddah dat pity us an da God dat erytime give us good kine words.” (2 Cor 1:3) Paul wen use da word “pity” fo show how Jehovah feel about us. So God is da Faddah dat pity us cuz dat feeling come from him. An dass how come “He give us good kine words weneva we get hard time.” (2 Cor 1:4) Wen Jehovah give us good kine words fo make us feel betta, dass jalike wen somebody give us clean watta fo drink wen we stay thirsty. How we can copy da way Jehovah feel pity an give good kine words to oddas? One way is fo grow qualities in oua heart dat conneck wit giving good kine words. Wat some of dem?

11. From wat Fo Da Colosse Peopo 3:12 an 1 From Peter 3:8 tell, wat odda qualities we gotta have fo show love to oddas an give um good kine words?

¹¹ Wat going help us have da love fo keep giving “each odda dis good kine words” eryday? We gotta be da kine peopo dat show dat we get da same kine heart, get plenny love an aloha fo da braddahs an sistahs an do good from yoa heart. (Read um Fo Da Colosse Peopo 3:12; 1 From Peter 3:8.) How dose tings going help us? Wen we feel pity fo oua braddahs an really kea about dem, we going really like help dem wen dey stay suffa. Jesus wen say, “wateva stay inside you guys, goin come outa you guys mout. Da good guy, he good inside, an he do good kine stuff.” (Mat 12:34, 35) Wen oua braddahs an sistahs stay suffa an we help um, dass one importan way we show oua love fo dem.

HOW WE CAN KEEP OUA LOVE FO ONE ANODDA STRONG?

12. (a) How come we gotta make shua we no lose oua love fo each odda? (b) Wat question we going talk about?

¹² All us “gotta get love an aloha fo each odda.” (1 John 4:7) But we gotta rememba Jesus wen warn us dat “plenny peopo no goin get aloha fo each odda no moa.” (Mat 24:12) Jesus neva mean dat mos of his followas was going stop showing love fo each odda. But cuz no moa love in dis world, we gotta make shua dat no rub off on us. Cuz a dat, we go talk about dis question, Get one way fo know if oua love fo oua braddahs stay strong?

13. Wat going help us fo know if oua love fo oua braddahs stay strong?

¹³ One way fo see how strong oua love stay is fo look at how we hando tings dat come up in oua life. (2 Cor 8:8) Da aposal Peter wen talk about one of dose tings. “Dis da main ting: Get plenny love an aloha fo each odda, cuz no matta how plenny bad kine stuff da odda guy wen do, still yet you can be frenz.” (1 Pet 4:8) How we ack wen oua braddahs make mistake o do tings dat hurt us, going help us fo know how strong oua love stay.

14. How 1 From Peter 4:8 show us da kine love we gotta have?

¹⁴ We go look real keaful at wat Peter had tell. Da firs part of verse 8 show da kine love we gotta have​—“plenny love.” Da word Peter use fo “plenny” means fo stretch um out. Da second part of da verse tell wat happen wen you get plenny love. Going cova da sins of oua braddahs. Try tink about um lidis, go grab yoa love wit yoa two hands an stretch um like one piece of cloth so he cova not one o two, but “plenny bad kine stuff.” Fo cova is anodda way fo say to let um go. Jalike one tablecloth can cova scratches on top one table, oua love can cova wen oua braddahs make mistake o do stuff dat irritate us.

15. If oua love fo oua braddahs an sistahs is strong enuff, wat we going be able fo do? (Fo Da Colosse Peopo 3:13)

¹⁵ Oua love fo oua braddahs an sistahs should be strong enuff so we can let um go​—even if sometimes az real hard fo do. (Read um Fo Da Colosse Peopo 3:13.) If we do dat, we show dat oua love is strong an we like make Jehovah happy. Wat else can help us wen oddas make mistake o irritate us?

16-17. Wat else going help us fo get ova da manini tings oddas might do? Try tell how. (Go look da picha.)

¹⁶ Tink ony about da good tings yoa braddahs an sistahs do, not da bad stuff. Try imagine you stay at one get togedda wit some of yoa braddahs an sistahs. You stay having good fun an befoa you dig you take one picha wit erybody. In fact, you take two moa pichas jus in case da firs one no come out good. Now you get three pichas. But in one a dem, you see dat one braddah no stay smile. Wat you going do wit dat picha? You going throw away dat one. Cuz in da odda two pichas erybody, even da braddah, stay smiling.

¹⁷ Da pichas we wen save is jalike da tings we choose fo rememba. Mos time we rememba da good times wit oua braddahs an sistahs. But maybe one of dose times one braddah o sistah wen say o do someting dat no was too nice. Wat you going do about dat? Mo betta try hemo um ah. Jalike you wen hemo da picha. (Smart Guys 19:11; Efe 4:32) No going hurt fo hemo dat manini ting dey wen do cuz we get plenny good times wit dem we can rememba. Dass da kine tings we like choose fo rememba.

WHY AZ IMPORTAN FO SHOW LOVE NOW

18. Wat importan tings about love we wen talk about in dis lesson?

¹⁸ How come we gotta keep oua love fo one anodda strong? Like we wen talk about, wen we show love to oua braddahs an sistahs, we show love fo Jehovah. How we show love to oua braddahs an sistahs? One way is give dem good kine words. We can keep giving dem “dis kine good words” if we get pity fo dem. How we can keep oua love fo one anodda strong? By letting oddas go wen dey make mistake even tho az hard fo do dat.

19. Why az importan fo show love now?

¹⁹ How come az importan fo show love fo each odda now? Peter wen tell how come wen he sed, “Da time wen eryting goin come pau, goin come pretty soon. So you guys . . . get plenny love an aloha fo each odda.” (1 Pet 4:7, 8) Az da end of dis world come closa an closa, wat we can expeck? Wen he wen talk about his followas, Jesus wen tell, “All da diffren kine peopos all ova da world goin hate you guys cuz you stay my guys.” (Mat 24:9) Fo hang in dea wen dat happen we gotta stick tight wit each odda. Wen we do dat, Satan no can split us up. Wat stay hold us togedda is love. An “dat make all da odda stuff come togedda perfeck.”​—Col 3:14; Php 2:1, 2.