You Wen Know?

Wat da govament guy from Etiopia was riding wen Philip wen go up to him?

DA ORIGINAL word fo “wagon” inside da Bible can mean diffren kine wagons. (Jesus Guys 8:28, 29, 38) But it look like da guy from Etiopia was riding in one dat was moa big den one war wagon, o one racing wagon. Try look how come can say dat.

Da guy from Etiopia was one govament guy who wen travel real far. “He one real importan guy dat stay in charge a all da money fo Queen Candace from Etiopia side.” (Jesus Guys 8:27) Sudan an da south part of Egypt we get today, was part of Etiopia long time ago. Even tho da guy probly neva ride in da same wagon fo da whole trip, he musta had plenny stuffs fo take wit him. Some of da wagons dey wen use in da firs century fo carry peopo had four wheels an one cova. One book dat wen write about da book Jesus Guys wen say, “Dis kine wagon could carry moa stuff, was moa comfortable, an you could go moa far wit um.”

Da Etiopia guy was reading wen Philip wen go up to um. Da Bible tell dat “Philip run ova dea, an hear da guy stay read Isaiah book.” (Jesus Guys 8:30) Dey neva make dese wagons fo go fas. Cuz da wagon wen go moa slow, da Etiopia guy was able fo read, an Philip could run an get to da wagon.

Da Etiopia guy wen “tell Philip fo climb inside da wagon an sit down by him.” (Jesus Guys 8:31) In one racing wagon, da riders would stan up. But in one wagon dat was use fo travel, dea was room fo da Etiopia guy an Philip fo sit down togedda.

Cuz of wat history an Jesus Guys chapta 8 sez, lately oua Bible tools show pichas of da Etiopia guy riding one big wagon radda den one small one fo war o races.