Jehovah Going Help You Wen You Get Hard Time

1-2. Wat kine hard times guys who trus Jehovah go thru?

WEN real bad stuff happen, oua life can turn upside down an might not eva be da same again. Fo exampo, one faithful braddah Luisa wen find out he had cancer. Da docta wen tell um he ony was going live fo few moa months. Monika an her husband was busy serving Jehovah togedda. Den one day she wen find out dat her husband, who was one elda was doing pilau kine stuff in secret fo long time. One single sistah Olivia had fo bag from her house cuz one hurricane was coming. Wen she wen go back, she wen see dat da storm wen wipe out her house. Jus lidat eryting in dea life wen change. You eva went thru someting lidat? Anyting eva wen happen to you dat wen turn yoa life upside down?

² Even if we trus Jehovah, we still get hard time an come sick jalike erybody else. Maybe we gotta hang in dea wen guys go agains us o make us suffa jus cuz dey hate God’s peopo. Wen tings lidat happen, Jehovah no always stop um but he promise he going help us. (Isa 41:10) Cuz he help us we can stay happy, make good choices, an stay tight wit him even wen tings get real hard. In dis lesson we going check out four ways dat Jehovah can help us even thru da mos worstes times in oua life. We even going look at wat we need fo do so da help Jehovah give can be good fo us.

JEHOVAH GOING PROTECK YOU

3. Wat might be hard fo us do wen someting real bad happen to us?

³ How come hard. Wen someting real bad happen to us, can be hard fo tink clear an make good kine choices. How come? Maybe cuz oua heart stay all soa an we no can tink. Az jalike we stay walking aroun in da dark witout one light an we dunno which way fo go. Try look how da two sistahs we wen talk about had feel wen dey was going thru hard time. Olivia wen tell, “Afta da hurricane wen wipe out my house, I wen feel all los an was too much fo hando.” Afta Monika wen find out wat her husband was doing, she wen tell, “Was moa den he wen jus let me down, I had feel like my heart was broke an somebody wen stab me. Was hard fo me do da eryday kine tings. I no could believe dat dis wen happen to me.” How Jehovah tell he going help us wen we no can hando?

4. Wat Jehovah promise us in Fo Da Philippi Peopo 4:6, 7?

⁴ Wat Jehovah going do. Da Bible tell he promise fo “make you guys come so notting bodda you.” (Read um Fo Da Philippi Peopo 4:6, 7.) Dat mean dat we going stay calm cuz God going take kea how we feel an how we tink cuz we his frenz. Dis feeling stay “mo betta den anybody can figga”, no moa notting like um. You eva wen feel real calm inside afta you wen pray real hard to Jehovah? Dass da feeling you get wen “notting bodda you.”

5. Wen notting bodda you, how dat proteck how you feel an tink?

⁵ Dat same scripcha tell when God make um so notting bodda you, he going “take kea” o proteck “how you feel an how you tink.” Befoa time, da word fo “take kea”, wen mean army guys who take kea one city by keeping um safe from oddas who wanted fo attack dem. Da peopo who live dea could sleep real good cuz dey wen know da army guys was taking kea dem. Same ting wit us, cuz God take kea us, we stay calm an know we safe. (Songs 4:8) Jus like Hannah, even if tings no change right away, we still can feel calm. (1 Sam 1:16-18) An wen we stay calm, we can tink moa clear an make good choices.

6. Wat we gotta do so dat notting bodda us? (Go look da picha.)

⁶ Wat we gotta do. Jalike da peopo in one city would call da army guys fo proteck dem, wen you bum out, call Jehovah fo proteck you. How? Pray until notting bodda you. (Luk 11:9; 1 Tess 5:17) Luis wen tell how him an his wife Ana was able fo hando afta dey wen find out he ony was going live litto while moa. He tell, “Wen someting lidis happen, is real hard fo make choices about medical kine stuff an odda tings. Was ony cuz we wen pray, dat we had peace wen we was going thru all dis.” Luis an his wife wen tell dat dey wen pray real hard ova an ova. Dey wen ask Jehovah fo make um so notting bodda how dey tink an feel, an fo give dem da smarts fo make good kine choices. An cuz of dis, dey wen know dat Jehovah had help dem. If you going thru someting mayjah, pray all da time an you going feel God’s peace cuz he take kea how you feel an how you tink.​—Rome 12:12.

JEHOVAH GOING MAKE YOU SOLID

7. How we might feel wen we go thru one real bad time?

⁷ How come hard. Wen you go thru one hard time, da way we tink, feel, an ack might be diffren. Maybe yoa feelings jalike one boat dat stay get thrown aroun in ruff kine watta. Ana wen tell dass how she wen feel afta Luis had mahke. She tell, “Wen I started fo feel all alone, I would feel sorry fo myself. An den I would get mad cuz he no was dea.” Odda times, Ana would feel lonely an presha out cuz now she had fo take kea da tings dat Luis used to do real good. Had days she wen feel like she was out on da ocean in da middo of one storm. How Jehovah help us wen we feel like one boat dat stay sinking?

8. Wat Jehovah promise us at Isaiah 33:6?

⁸ Wat Jehovah going do. Isaiah tell Jehovah jalike one solid foundation dat going make us moa stable. (Read um Isaiah 33:6.) Wen one boat stay in one storm can be dangerous cuz stay rocking back an forth. Fo keep um stable, one boat might have spesho fins on both sides dat stay unda da watta. Da fins make um so dat da boat no rock plenny an is moa safe an moa betta fo erybody on da boat. But going work even moa betta if da boat stay moving. Same ting, Jehovah going make us solid an stable if we get faith an keep working fo him wen we get hard time.

9. How da tools we get fo look up stuff can help us stay solid? (Go look da picha.)

⁹ Wat we gotta do. Wen you stay feeling like you no can hando, jalike you in one storm, make shua you do yoa bes fo pray, go meetings, an preach. Maybe you no can do plenny like befoa but no foget dat Jehovah no expeck us fo do moa den we can. (Go check Luke 21:1-4.) Studying fo yoaself an tinking hard about um gotta be part of da spiritual tings you do all da time. How come? Cuz Jehovah use his hui fo give us good kine info about da Bible an dat can help us fo stay solid wen we get hard time. Fo find wat you need you can use da tools fo look up stuff in yoa language, like JW Library^® app, Watch Tower Publications Index, an Research Guide for Jehovah’s Witnesses. Monika wen say dat az soon az she started fo feel like she was going lose um, she wen use dose tools fo help her find wat fo do. Fo exampo, she wen look up da word “anger.” An odda times she look up “betrayal” o “loyalty.” Den she would read um until she feel betta. She wen tell, “At firs I would be all nutz, but wen I kept reading, wen feel like Jehovah was hugging me. I wen come fo see dat Jehovah wen undastan all da diffren ways I was feeling an he wen help me.” If you do dat, Jehovah can help you fo control yoa feelings until you calm down.​—Songs 119:143, 144.

JEHOVAH NO GOING LET YOU FALL DOWN

10. How we might feel wen someting real bad happen to us?

¹⁰ How come hard. Afta one real bad ting happen, you might feel real weak. You no can move o tink. Maybe you feel like one guy who used to run fas but now he limp cuz he wen get hurt. You get hard time fo do da tings dat used to be duck soup. O maybe you no feel like doing da tings you used to like do befoa. Jalike Elijah, maybe you feel like you no like get up. You ony like sleep. (1 Ki 19:5-7) Wat Jehovah promise he going do wen you feel lidat?

11. Wat anodda way Jehovah help us? (Songs Fo God 94:18)

¹¹ Wat Jehovah going do. He promise fo no let us fall down. (Read um Songs Fo God 94:18.) Jalike da runna dat wen get hurt need help fo move aroun, maybe we going need help fo keep doing Jehovah’s work. Wen dat happen, Jehovah promise us, “Cuz me, Da One In Charge, I yoa God. I da One stay hold yoa right hand, Da One stay tell you guys, “No sked! I goin help you.”” (Isa 41:13) King David wen know wat dat feel like. Wen he had pilikia an had guys dat go agains him, he wen tell to Jehovah, “You hold me wit yoa strong hand fo me no fall down.” (Songs 18:35) But how Jehovah do dat?

12. Who Jehovah can use fo help us wen we come all weak?

¹² Jehovah help us by getting oddas fo help us. Fo exampo, one time David wen feel all weak, an his fren Jonathan wen come see him fo build him up an give him good kine words. (1 Sam 23:16, 17) Same ting wit Elijah, Jehovah wen use Elisha fo help him. (1 Ki 19:16, 21; 2 Ki 2:2) Today, Jehovah can use oua ohana, frenz, o da eldas fo help us. But wen we real bum out, maybe we no like be aroun oddas. We jus like be by ouaself. Dass normal. Wat we can do fo get Jehovah’s help?

13. Wen Jehovah try help us, wat we gotta do? (Go look da picha.)

¹³ Wat we gotta do. We gotta try real hard fo no ony stay by ouaself. Wen we ony stay by ouself cuz we no like be aroun oddas, we might start fo tink ony about us an da problems dat we get. If we tink lidat, dat can affeck da choices we make. (Smart Guys 18:1) Yeah we all need time fo be by ouaself, speshly wen someting bad happen to us. But if we stay lidat long time, we might be telling Jehovah we no like his help. So wen someting bad happen to you, even if az hard, wen yoa ohana, frenz an da eldas like help you, take um. See dat Jehovah stay using dem fo help you.​—Smart Guys 17:17; Isa 32:1, 2.

JEHOVAH GOING MAKE YOU FEEL BETTA

14. Wat kine tings can make us sked?

¹⁴ How come hard. Get times wen we come sked. In da Bible, da guys dat trus Jehovah talk about wen dey was sked an all shaking cuz of da guys dat go agains dem an odda preshas. (Songs 18:4; 55:1, 5) Same ting wit us, maybe we get guys who go agains us at school, at work, from oua ohana o da govament. Maybe we sked we going mahke cuz someting wrong wit oua health. Dose kine times maybe you feel jalike one small kid dat no can help demself. How Jehovah help wen you feel lidat?

15. Wat Songs Fo God 94:19 tell we can be shua of?

¹⁵ Wat Jehovah going do. He make us feel shua dat notting bad going happen. (Read um Songs Fo God 94:19.) Dis scripcha might make us tink of one small girl who no can sleep cuz of one tundastorm. But den her faddah come pick her up an hold her in his arms till she go sleep. Even if da storm stay raging, she feel safe cuz he holding her. Wen we going thru tings dat make us sked maybe we need oua Faddah Jehovah fo make jalike he holding us, till we calm down. How we can get dat kine help from Jehovah?

16. Wat we can do so da help Jehovah give can be good fo us? (Go look da picha.)

¹⁶ Wat we gotta do. You can spen time wit Jehovah all da time wen you pray to him an read da Bible. (Songs 77:1, 12-14) Den wen you stay stressing, automatic you going go ask Jehovah fo help. Tell Jehovah about all da tings you sked of an wat you stay worried about. Den lissen him by reading da Bible an you going see how he going help you feel betta. (Songs 119:28) Fo exampo, wat stay in Job, Songs, Smart Guys an wat Jesus tell in Matthew chapta 6, can help you wen you sked. Wen you pray to Jehovah an read da Bible, he going make you feel betta.

17. Wat you can know fo shua?

¹⁷ We know fo shua dat Jehovah going take kea us wen bad tings happen in oua life. We neva going be by ouaself. (Songs 23:4; 94:14) Jehovah promise he going proteck us, make us moa solid, he not going let us fall down an he going make us feel betta. Isaiah 26:3 tell about Jehovah, “You take kea whoevas stay shua bout wat dey tink. Az why dey no mo worries cuz dey trus you.” So trus Jehovah an use all da tings he get fo help you. If you do dat, you going come strong again even wen get hard times.