Jehovah Get Love An Pity Fo You

1. Wat you picha in yoa mind wen you tink about Jehovah?

YOU eva tink about wat Jehovah stay like? Wen you pule to him, wat you picha in yoa mind? Even if no can see Jehovah, da Bible tell he jalike “da sun shine . . . one shield” an “one fire dat burn up eryting.” (Songs 84:11; Heb 12:29) Ezekiel wen tell dat Jehovah look like one blue stone, shiny like real hot kine metal an one rainbow. (Eze 1:26-28) Wen you tink about Jehovah lidat, can blow yoa mind o even make us feel sked.

2. Wat can make um hard fo some guys come close to Jehovah?

² Cuz we no can see Jehovah, maybe we get hard time believe dat he love us. Some guys tink dat Jehovah could neva love dem cuz of da bad stuff dey had go thru befoa. Maybe we neva have one faddah dat love us. Jehovah undastan wen we feel lidat an he know dis can make um hard fo us come close to him. Fo help us, he use da Bible fo tell us wat kine God him.

3. How come we gotta look good at da love Jehovah get?

³ Da bes word fo use wen you talking about Jehovah is love, cuz dass how he stay. (1 John 4:8) He do eryting cuz of love. God get so much love an stay so strong dat he even show um to da guys who no love him. (Mat 5:44, 45, NWT) In dis lesson we go look real good at Jehovah an da love he get. Da moa we learn about oua God, da moa we going love him.

JEHOVAH LOVE US PLENNY

4. Cuz Jehovah show us pity, how dat make you feel? (Go look da picha.)

⁴ “[Jehovah] feel pity fo us guys.” (Jam 5:11) Da Bible tell dat Jehovah jalike one maddah dat love her bebe. (Isa 66:12, 13) Try picha one maddah who take kea her bebe wen she bounce um on her knee an talk to um in one nice kine voice. Wen da bebe cry o stay soa, she make shua he get wat he need. So wen we stay soa inside, we can know fo shua Jehovah still love us. Da songwrita wen tell, “Wen I tink bout tings dat bodda me plenny, you make me feel shua notting bad goin happen. Cuz a dat, I stay feel real good inside!”​—Songs 94:19.

5. How dat make you feel fo know dat Jehovah stay tight wit you?

⁵ Jehovah stay tight wit his peopo. (Songs 103:8) Dass why he no give up on us if we do someting wrong. Even if da Israel peopo had let Jehovah down ova an ova an ova again, wen dey was sad about wat dey had do an wen stop doing um, he tell dem, “You worth plenny to me. I show you respeck, cuz I get love an aloha fo all you guys.” (Isa 43:4, 5) Jehovah get da same kine love fo us today. His love always going be dea. Even if we do someting real bad, Jehovah not going leave us. If we feel sorry fo wat we did an stop doing um an come back to Jehovah, we going see he still love us. He promise, “he goin do plenny fo let [us] go . . . an hemo [oua] shame.” (Isa 55:7) Da Bible tell dat wen Jehovah let us go, he “goin make [us] guys so notting bodda [us], an come strong inside.”​—Jesus Guys 3:19, 20.

6. In Zekariah 2:8, wat we learn about Jehovah?

⁶ Read um Zekariah 2:8. Jehovah tell we jalike da middo of his eye. Da eye is one importan part of yoa body an you no like notting happen to um. Dass like Jehovah stay tell, “Who eva hurt my peopo, dass jalike dey hurt me too.” Cuz Jehovah love us, he quick fo undastan how we feel an he like proteck us. He feel soa inside wen he see us going thru hard stuff. Dass how come we can know fo shua he going ansa wen we pray, “Take kea me, jalike peopo take kea dea eye.”​—Songs 17:8.

7. How come az importan fo know dat garans Jehovah love us?

⁷ Jehovah like you know fo shua dat he love you. But he know dat maybe you not shua if he love you cuz of tings dat wen happen to you befoa. O maybe you stay going thru someting right now. Wat can help you fo know dat Jehovah love you? Learn how Jehovah show his love fo Jesus, da guys he pick fo go heaven, an all us.

HOW JEHOVAH SHOW HIS LOVE

8. How come Jesus wen know fo shua dat his Faddah wen love him?

⁸ Jehovah an his Boy been togedda longa den anybody else. Cuz dey was togedda fo uku billion years in heaven, dey wen come real close an wen love each odda plenny. Matthew 17:5 show us az easy fo see how much Jehovah wen love Jesus. Jehovah neva jus tell, “I feel real good inside cuz a him.” He wanted us fo know how much he love Jesus cuz he wen tell, “Dis my boy! I get plenny love an aloha fo him.” Jehovah was proud of Jesus, speshly cuz he was going mahke fo erybody. (Efe 1:7) Jesus wen know fo shua dat garans his Faddah wen love him. Plenny times he wen tell dat his Faddah love him.​—John 3:35; 10:17; 17:24.

9. Wat words show Jehovah’s love fo da guys dat going heaven? Try tell how. (Fo Da Rome Peopo 5:5)

⁹ Jehovah even show dat he get love fo da guys dat going heaven. (Read um Fo Da Rome Peopo 5:5.) One Bible dictionary tell da words, “God wen give us” mean “come on top us jalike one stream of watta.” Dis help us fo see how much love Jehovah get fo da guys dat going heaven. An dey know dat God “get plenny love an aloha” fo dem. (Jude 1) Da aposal John wen tell how dey feel wen he had write, “Tink bout da kine love an aloha da Faddah wen show us! He even call us his kids!” (1 John 3:1) Jehovah love ony da guys who going heaven? No ways, Jehovah wen show he love all us.

10. Wat da bigges way Jehovah show his love fo you?

¹⁰ Wat da bigges way Jehovah show his love fo us? Da ransom​—by dis Jehovah wen show moa love den anybody eva did! (John 3:16; Rome 5:8) Jehovah wen send his Boy, dat he wen love da mos, fo die fo us, hemo oua shame an let us go. Dass why we can come His frenz. (1 John 4:10) If we tink plenny about how much Jehovah an Jesus had fo give up, den we can see how much love dey get fo all us. (Gal 2:20) Jehovah neva pay da ransom jus fo make tings right. Was one gif from Jehovah cuz he love all us. He wen show dis by giving up wat he love da mos​—Jesus. Jehovah wen let him suffa an die fo us.

11. Wat us learn from Jeremiah 31:3?

¹¹ Jehovah no ony feel love fo us, but he tell us too. (Read um Jeremiah 31:3.) Jehovah like us come close to him cuz he love us. (Go check Da Rules Secon Time 7:7, 8.) No moa notting dat can cut us off from God’s love. (Rome 8:38, 39) How dat love make you feel? Go read Songs 23 an see how David wen feel about da way Jehovah wen love an take kea him, an how dat can make us feel.

HOW JEHOVAH’S LOVE MAKE YOU FEEL?

12. Wat da main ting Songs Fo God 23 talk about?

¹² Read um Songs Fo God 23:1-6. In Songs Fo God 23 David wen tell he had know fo shua dat Jehovah wen love him an was going take kea him. He wen write about wat close frenz him an Jehovah was an how He was jalike one Sheep Guy to him. David wen feel safe cuz he wen let Jehovah lead him in eryting he wen do. David had know dat Jehovah was going show His love fo him eryday. How he wen know dat?

13. How come David wen know dat Jehovah was going take kea him?

¹³ “I get eryting I need.” David wen know dat Jehovah kea fo him cuz Jehovah always wen give him wat he need. David wen know dat God was his fren and dat He was happy wit him. Dass how come he was shua dat Jehovah was going take kea him no matta wat was going happen. Jehovah was always going give him wat he need. David wen trus dat Jehovah had love an pity fo him an was going take kea him. Dass why he neva need worry an he was happy cuz he wen feel good inside to da max.​—Songs 16:11.

14. How Jehovah can take kea us?

¹⁴ Jehovah love an take kea us speshly wen bad tings happen in oua life. Claire,a who been at Bethel fo ova 20 years, neva know how fo help her ohana wen dey went thru one big problem afta anodda. Her faddah had one bad stroke, one of her sistahs no was one Witness Fo Jehovah anymoa, an her ohana wen lose dea biznis. How Jehovah wen take kea dem? Claire had tell, “Jehovah always wen make shua my ohana had wat eva dey wen need eryday. Ova an ova, Jehovah wen give way moa den we wen need. Plenny times I tink about how Jehovah wen help us an I neva going foget da love an pity he had show. Dis wen help me fo stay happy serving Jehovah wen odda problems had come up in my life.”

15. How come David wen feel strong again? (Go look da picha.)

¹⁵ “He make me come strong one moa time.” Had times David wen feel all stress out cuz of da plenny trouble an big kine problems he was going thru. (Songs 18:4-6) But Jehovah’s love an pity wen make him come strong one moa time. Jehovah wen take his tired fren to wea da “sof grass stay an . . . by da calm watta.” An cuz of dat David wen come strong again an was happy fo keep working fo Jehovah.​—Songs 18:28-32.

16. How da love Jehovah show wen make you come strong?

¹⁶ Same ting today, Jehovah “stay tight wit us guys foeva” an dass how come we can hando anykine an can hang in dea long time. (Sad Song 3:22; Col 1:11) Try look wat wen happen to Rachel. Wen broke her heart cuz her husband had bag from her an Jehovah wen da COVID-19 pandemic was raging. Wat Jehovah wen do fo her? She tell, “Jehovah wen make shua I wen feel his love. He made um so I always had frenz aroun me who wen spen time wit me, bring me food, send me nice kine messages, share good kine scripchas, smile at me an no let me foget dat Jehovah was taking kea of me. I always tank Jehovah fo giving me one big ohana who love me.”

17. Why David could say “I no goin come sked”?

¹⁷ “I no goin come sked dat someting bad goin happen, cuz you stay wit me.” Plenny times David was in danger, an da guys who go agains him had plenny powa. But cuz Jehovah wen love him, David had feel safe. He wen know dat Jehovah was wit him all da time an dat wen make him feel betta. Dass how come he could sing, “[Jehovah] wen get me outa eryting dat make me come real sked.” (Songs 34:4) Even if David was real sked, he could keep going cuz he wen know Jehovah love him.

18. Wen you know Jehovah love you, how dat make you stronga wen you stay sked?

¹⁸ Cuz we know Jehovah love us, how dat make us stronga wen we come sked? One pionea name Susi wen tell how her an her husband wen feel afta dea boy wen kill himself. She tell, “Wen someting bad happen dat you no expeck, you feel like you no can do notting about um an you wonda wat odda bad kine stuff going happen. But da love an pity dat Jehovah get, wen make us feel safe.” Rachel, da one we wen talk about befoa, had say, “One night, my heart was soa, I was all sked an worried. I wen cry an pray out loud to Jehovah. Right den an dea Jehovah wen make my heart no hurt anymoa. I wen calm down jalike how one maddah make to her bebe an I could go sleep. I neva going foget dat.” Tasos, one elda, was lock up four years cuz he neva like join da army. How he had feel Jehovah’s love an pity? He tell, “Jehovah wen give me eryting I need an moa. Dat wen make me know fo shua dat I could trus Him. He wen use his spirit fo keep me happy even if I was in one place dat can bring you down. I wen know dat da moa I trus Him da moa I going feel His love. So I wen come one pionea preacha wen I was lock up.”

COME CLOSE TO DA GOD WHO LOVE YOU

19. (a) How we going pray if we know dat God love us? (b) Wat part of Jehovah’s love you like da mos? (Go look da box “Words Dat Show Us Jehovah’s Love.”)

¹⁹ Dese guys dat we wen talk about, help us fo see Jehovah, da God dat “get plenny love an aloha,” stay wit us! (2 Cor 13:11) He kea fo each one of us. We know fo shua cuz “God goin do all kine stuff fo show he stay tight wit [us]!” (Songs 32:10) Da moa we tink plenny about how he show his love, da moa real he come an we feel moa close to him. We no need hold back wen we pray an tell him we need his love. We can tell him all da tings we worry about an we know fo shua he undastan an like help us.​—Songs 145:18, 19.

20. How Jehovah’s love make us come moa close to him?

²⁰ Jalike we like go close to da fire wen we stay cold, we like go close to da warm love Jehovah get. His love is strong an he show pity too. So be happy cuz Jehovah love you. An den all us can tell, “I get love an aloha fo [Jehovah]”!​—Songs 116:1.