No Come Selfish Like Plenny Peopo Today
PLENNY peopo today feel dat dey should be treated like dey spesho. No matta how much dey get, dey tink dat dey deserve moa. Peopo who get dis kine tinking iz selfish an dey not tankful fo wat dey get. Da Bible say dat peopo would be lidat befoa da world pau.—2 Tim 3:2.
Always had selfish peopo. Adam an Eve wanted da right fo choose fo demselfs wat wuz good an wat wuz bad, an all us suffa cuz of dat. Anodda exampo iz King Uzziah. He thought he had da right fo burn incense at da temple, but he wuz wrong. (2 Rec 26:18, 19) Same like dese guys, da Pharisees an Sadducees wen tink dat God should treat dem moa betta den oddas jus cuz dey wen come from Abraham’s bloodline.—Mat 3:9.
Selfish peopo stay all aroun us, an dea attitude could rub off on us. (Gal 5:26) We might start fo tink dat we deserve one privilege or spesho treatment. Wat can help us fo no tink lidat? Firs, we gotta undastan how Jehovah tink. Two Bible truts goin help us.
Jehovah da one who choose wat we deserve fo get. We go look some exampos.
In da family, Jehovah like one husban fo feel dat his wife respeck him, an one wife fo feel dat her husban love her. (Efe 5:33) Jehovah say dat one husban an wife gotta show romantic kine love to each odda an nobody else. (1 Cor 7:3) Parents can expeck dat dea kids goin lissen to dem, an da kids can expeck dat dea parents goin show dem love an take kea dem.—2 Cor 12:14; Efe 6:2.
Jehovah say dat we should respeck da eldas in da congregation fo all da hard work dey do. (1 Tess 5:12) Same time, da eldas no moa da right fo control wat dea braddahs an sistahs do.—1 Pet 5:2, 3.
God wen give human govaments da right fo colleck taxes an fo get respeck from da peopo dey rule ova.—Rome 13:1, 6, 7.
Jehovah give us way moa den we deserve. Cuz we sinners, da ony ting we deserve iz fo die. (Rome 6:23) But cuz Jehovah love us, he bless us plenny. (Songs 103:10, 11) All da blessings we get from Jehovah, we no deserve um, but we get um cuz he like do good tings fo us.—Rome 12:6-8; Efe 2:8.
WAT CAN HELP US FO NO COME SELFISH, OR TINK WE MOA IMPORTAN DEN ODDAS
No start tinking like peopo in dis world. Witout even knowing it, we might start fo tink we deserve moa den oddas. Jesus wen show dat ony easy fo start tinking lidis. He wen use one word picha of da workas who wuz paid one silva denarius coin. Some workas wen start early in da morning an wen work all day in da sun, an oddas wen work ony fo one hour. Da firs guys wen tink dey wen deserve fo get paid moa cuz of da work dey wen do. (Mat 20:1-16) In dis word picha, Jesus wen show his followas dat dey should be happy wit wateva Jehovah give dem.
Da guys who wen work all day wen feel like dey deserve fo get paid moa
Be tankful an no expeck tings from oddas. (1 Tess 5:18) Copy da aposal Paul who neva ask fo da tings he we need from da braddahs in Corint, even tho he wen get da right fo do dat. (1 Cor 9:11-14) We should be tankful fo eryting peopo give us, an no expeck tings from oddas.
Da aposal Paul neva expeck peopo fo take kea him
Be humbo. Wen somebody tink he someting spesho, plenny times he start fo feel like he should get moa. Dis kine tinking iz abunai, but if we stay humbo, we not goin tink lidat.
Cuz Daniel wuz humbo, Jehovah wen love him
Daniel wuz one good exampo of somebody who wuz humbo. He wen come from one importan family, he wuz good looking, smart, an could do plenny stuff. So he coulda feel dat he deserve all da stuff he wen get an fo be treated spesho. (Dan 1:3, 4, 19, 20) But Daniel wen stay humbo, an Jehovah wen love dis about him.—Dan 2:30; 10:11, 12.
We no like come selfish like plenny peopo in today’s world. But we like stay happy fo all da tings Jehovah give us cuz he love us an like bless us plenny.