How Fo Be One Good Fren

YOU eva wen feel like you had fo hando all yoa problems by yoaself? We live in one time wea erybody stay presha out, an dat can make us feel bum out an like we got nobody fo talk to. (2 Tim 3:1) But, we no need hando all by ouaself. Da Bible say dat tru frenz can help us wen we “get trouble.”​—Smart Guys 17:17.

HOW GOOD FRENZ CAN HELP

Da aposal Paul wen travel wit some of his frenz an dey wen help him out plenny. (Col 4:7-11) Wen Paul wuz lock up in Rome, his frenz wen do stuff dat he couldn’t do himself. Like, Epafroditus wen bring him da stuff he wen need from da braddahs an sistahs in Philippi. (Php 4:18) Tykikus wen deliver Paul’s lettas to da diffren local huis. (Col 4:7; go look da study note.) Cuz Paul had frenz fo help him, he could build up da congregations even wen he wuz unda house arrest an wen he wuz lock up. How we can be one good fren lidat today?

Get braddahs an sistahs today dat show wat frenz can do fo help each odda. Try look how one sistah wen help Elisabet, one regula pionea in Spain, wen she wuz having hard time. Wen her maddah wen get diagnose wit terminal cancer, da sistah wen sen Elisabet texts from da Bible dat wen build her up. Elisabet wen tell, “Wen I had see her texts I wen feel happy fo kno dat somebody wuz tinking of me, an I wen get strong enuff fo hando.”​—Smart Guys 18:24.

We can get moa close wit oua braddahs an sistahs wen we help dem fo go meetings an field service. One ting we can do iz give dem one ride to da meetings or fo go preach. If we help dem lidat, garanz we goin build each odda up. (Rome 1:12) But, some of oua braddahs an sistahs no can leave dea house. How we can be one good fren to dem?

HELP DOSE DAT NO CAN LEAVE DEA HOUSE

Some of oua braddahs an sistahs no can come to da Kingdom Hall cuz dey get serious healt problems. Dass wat had happen to one braddah name David, who had cancer. Fo ova six monts, he had fo get chemotherapy. Dat whole time, David an his wife Lidia, wen go meetings on line.

How dea local hui wen help dem? Afta ery meeting, some of da braddahs an sistahs at da Kingdom Hall would go talk story wit dem on line. Anodda ting dat dey wen do iz afta David an Lidia wen give ansas, dey would text dem fo build dem up. How dat wen make dem feel? David an Lidia wen feel moa close to da braddahs an sistahs.

We can make plans fo preach wit one braddah or sistah who no can leave dea house? If we make some small kine changes in oua skedule fo work wit dem, we can show dem dat we neva foget dem. (Smart Guys 3:27) We can write lettas or preach on da phone wit dem. Maybe da braddah or sistah who stuck at home can tie in to da meeting fo field service on line. David an Lidia wuz so happy dat dea local hui wen do dis. David wen say, “Jus bein wit oua field service group fo litto while an having one praya wen give us one big time boost.” An if iz ok wit da braddah or sistah, maybe we can once in a while bring oua Bible study ova to dea house fo have da study.

Wen we spen time wit oua braddahs an sistahs who no can leave dea house, we get fo kno all da good stuff about dem, an we come closa frenz. Like, wen you see how dey use da Bible real good fo reach somebody’s heart, you feel even moa close to dem. Wen you help yoa braddahs an sistahs out fo go meetings an field service, you goin make plenny new frenz.​—2 Cor 6:13.

Wen Paul wuz goin tru hard times, his fren Titus wen come see him. An dat wen help him fo feel betta. (2 Cor 7:5-7) Iz good fo say good kine words to oua braddahs an sistahs, but Titus exampo show us dat we help oua braddahs an sistahs wen we spen time wit dem an do tings fo help dem.​—1 John 3:18.

HELP YOA FRENZ WEN DEY GET PERSECUTED

Oua braddahs an sistahs in Russia iz one awesome exampo in showing us how fo help each odda out. Look wat wen happen to Sergey an his wife, Tatyana. Afta da police wen search dea house, dey wen take dem down to da station fo question dem. Dey wen let Tatyana go an she we go home. Sergey wen tell, “Az soon az [Tatyana] wen get home, one brave sistah wen come see her. Litto while afta dat, some moa braddahs an sistahs wen show up at oua apartment fo help clean um up.”

Sergey wen say, “I wen always like Smart Guys 17:17 wea it tell, “You get one fren, an he get love an aloha fo you all da time. You get one braddah, an he dea fo help you wen you need um cuz get trouble.” Dese words wen mean even moa to me wen I wuz goin tru dis hard time an I no could hando all by myself.” Jehovah wen give me good frenz wit plenny courage an wuz dea fo help me.”a

Az times get moa hard, we need good frenz fo help us out. We goin need dem even moa wen da big trouble come. So we go do eryting we can fo be one real good fren now!​—1 Pet 4:7, 8.