One Simpo Question Anybody Can Ask

Mary an her husban, John,a live in one country wea dey happy fo preach to plenny peopo who come from da Philippines fo live an work. Wen had da COVID-19 pandemic, Mary wen start Bible studies not ony wea she live but odda countries too. How she wen do dat?

Mary wen ask her Bible studies, “You kno anybody else dat like study da Bible?” If dey say yeah, she would ask fo meet dem. Good tings wen happen cuz she wen ask dis simpo question. Dass cuz plenny times peopo who like wat dey learn from da Bible like share um wit dea ohana an dea frenz. Cuz she had ask dis question, wat wen happen?

Mary’s Bible study Jasmin wen introduce her to four moa peopo who wanted fo study da Bible. One of dem, Kristine, wen like her Bible study so much she wanted fo study two times a week. Wen Mary had ask her if she kno anybody else dat like study da Bible, Kristine tell, “Yeah come meet my frenz.” In da nex coupo weeks, Kristine wen help Mary fo meet four of her frenz who wen like study. Layta on, Kristine wen introduce Mary to some moa frenz. An dose frenz had frenz dat wanted fo study too.

Kristine wanted her family in da Philippines fo learn about da Bible too, so she wen talk to her daughtah Andrea. At firs, Andrea wen tink, “Da Witnesses stay one weird religion, dey no believe in Jesus, an dey ony use da Old Testament.” But ony afta one study she wen see dat wat she wen tink about da Witnesses wuz wrong. Erytime she wen learn someting new from da Bible, she would tell, “Stay in da Bible, so gotta be tru!”

Layta on, Andrea wen introduce Mary to two moa of her frenz an one co-worka who wen start fo study. Mary neva even kno dat Andrea’s blind Anty Angela wen lissen in on dea studies. Den one day, Anty Angela wen ask Andrea fo hook her up wit her own Bible study wit Mary. Anty Angela wen love wat she wuz learning, an in one mont she wen memorize plenny scripchas an wanted fo study four times a week! An Andrea wen help her fo go to da meetings on da intanet ery week.

Mary wen find out dat Kristine’s husban, Joshua, wuz always close by wen dey wen study, so Mary wen ask him if he like sit in. Joshua wen say, “I ony goin lissen, but no ask me notting. If you do, I goin hele.” Afta ony five minutes he wuz asking moa questions den Kristine an wanted fo study da Bible too.

Choke peopo wen study da Bible cuz Mary wen ask one simpo question. She wen turn ova plenny of dem fo study wit odda Witnesses. All togedda Mary wen start 28 Bible studies in four diffren countries.

Jasmin, da firs Bible study we wen talk about, wen get baptize in April 2021. Kristine wen get baptize in May 2022 an had go back to da Philippines fo be wit her ohana. Two odda studies who Kristine wen introduce to Mary wen get baptize too. Anty Angela wen get baptize coupo monts layta an now she stay one full-time pionea preacha. Kristine’s husban, Joshua, an dea daughtah, Andrea, an some odda studies still yet studying da Bible an coming moa close to Jehovah.

In da firs century, plenny peopo wen tell dea family an frenz about wat dey had learn about Jesus. (John 1:41, 42a; Jesus Guys 10:24, 27, 48; 16:25-33) Why you no go ask yoa Bible studies an odda guys dat like learn da Bible, “You kno anybody else dat like study da Bible?” You neva kno how much studies can start if you jus ask dis simpo question.