Copy Da Way Jehovah an Jesus Tink

1-2. Wat mean fo love Jehovah, an how Jesus tinking wen show he love his Faddah?

“GO ALL out fo show love an aloha fo yoa God, Da One In Charge. Show yoa aloha wit eryting inside you, wit how you feel, wit how you tink, an wit all yoa powa.” (Luk 10:27) Jesus wen make clear dis wuz da mos importan ting fo do from Da Rules From Moses. Paht of loving Jehovah iz loving him wit eryting inside us. Dat include da stuff we like do, how we feel, an oua powa. But loving Jehovah also include how we tink. An we like do oua bes fo tink like Jehovah. Fo help us do dat, we gotta study “how Jesus tink,” cuz he tink jalike his Faddah.​—1 Cor. 2:16, NWT an study note “we do have the mind of Christ.”

² Jesus tinking wen show he love his Faddah. He knew wat God wanted him fo do, an he wuz willing fo do um even tho he wuz goin suffa. Da way Jesus wen tink wuz so focus on doin wat his Faddah wen like, he neva let notting distrack him.

3. Wat da aposal Peter had learn from Jesus, an wat Peter wen encourage Christians fo do? (1 From Peter 4:1, NWT.)

³ Peter an his odda aposals had da unreal chance fo spen plenny time wit Jesus an learn from how he wen tink. Wen Peter wen write his firs letta, he wen encourage Christians fo make ready fo tink da same way like Jesus.a (Read um 1 From Peter 4:1, NWT.) Wen Peter had write “Make ready,” wuz like he wuz talking about soldiers getting ready fo fight one war. So if Christians copy da way Jesus tink, dey goin be ready fo fight agains wanting fo do bad tings an agains Satan’s world.​—2 Cor 10:3-5; Efe 6:12.

4. How dis lesson goin help us do wat Peter tell?

⁴ We go look how Jesus wen tink an how we can copy him. We goin learn from his exampo how we can (1) copy how Jehovah tink, an dass goin help us tink same wit each odda, (2) be humbo, an (3) use oua head wen we rely on Jehovah in praya.

COPY HOW JEHOVAH TINK

5. How one time Peter neva tink like Jehovah?

⁵ Try look dis one time wen Peter neva tink like Jehovah. Jesus wen tell his aposals dat he gotta go Jerusalem, get arrested by da religious leadas, suffa, an get killed. (Mat 16:21) Peter wen kno dat Jesus wuz da Messiah who God wen promise would save his peopo, so maybe wuz hahd fo Peter believe dat Jehovah wuz goin let his Boy mahke. (Mat 16:16) Peter wen take Jesus on da side an tell him, “No way, Boss! No way dass goin happen to you!” (Mat 16:22) Jesus an Peter no wuz on da same page on dis cuz Peter neva tink like Jehovah.

6. How Jesus wen show dat da way he tink match up wit how Jehovah tink?

⁶ Da way Jesus tink wen match up wit how his Faddah tink. Jesus wen tell Peter, “Get outa my face! You stay talking jalike Satan! You ony stay trying fo jam me up. Cuz you tink jalike da peopo tink, not jalike God tink.” (Mat 16:23) Jesus had kno dat fo do wat Jehovah wanted, he had fo suffa an die. So Jesus neva lissen to wat Peter wen tell him, even tho Peter probly wuz ony trying fo help him. Peter wen learn dat he had fo tink like Jehovah. Dis one importan lesson us too gotta learn.

7. How Peter had layta on show dat he wanted fo tink like Jehovah? (Go look da picha.)

⁷ Layta on, Peter wen show dat he wanted fo tink like Jehovah. Now wuz da time fo da guys who no wuz Jews fo come be paht of God’s hui. Jehovah had sen Peter fo preach to Cornelius, who no wuz one Jew, fo come one Christian. Jews wen try stay away from guys who no wuz Jews, so Peter had fo change da way he tink so dat he could preach to dem. Afta Peter had figga how God had see dese guys, he wen change up his tinking. Wen Cornelius had ask Peter fo go visit him, Peter neva tell he no can, but wen go. (Jesus Guys 10:28, 29) He wen preach to Cornelius an erybody in his house, an dey wen get baptize.​—Jesus Guys 10:21-23, 34, 35, 44-48.

8. How we can show dat we tink da same way like Jehovah? (1 From Peter 3:8)

⁸ Years layta, Peter wen encourage da braddahs fo “tink da same way.” (Read um 1 From Peter 3:8) We can tink da same way az oua braddahs if we copy how Jehovah tink. Fo exampo, Jesus wen help his followas fo make God’s Govament da mos importan ting in dea life. (Mat 6:33, NWT.) So if somebody in yoa hui like try fo start fo serve Jehovah full time, you should talk good about wat he like do an back him up instead of telling him fo jus take it easy.

BE HUMBO

9-10. How Jesus wen show he wuz supa humbo?

⁹ Da nite befoa he wen get killed, Jesus wen teach Peter an da odda aposals one importan lesson about how fo be humbo. Earlia, Jesus wen sen Peter an John fo get tings ready fo da las meal Jesus wuz goin eat wit dem befoa he mahke. One ting dey probly wen do wuz make shua had towels an one wash tub so dat somebody could wash da guests feet befoa dey eat. But who would be humbo an wash erybody’s feet?

¹⁰ Jesus wen show he wuz supa humbo cuz he neva even tink twice about doin um. Wen shock da aposals fo see Jesus do someting dat one worka guy would do. Jesus wen take off his robe, put one towel aroun his wais, pour watta inside one wash tub, an start fo wash dea feet. (John 13:4, 5) Had take time fo wash da feet of da 12 aposals. Jesus wen even wash Judas feet, da guy who wuz goin backstab him. But Jesus wuz humbo fo do all dis work. Jesus wen tell, “you guys undastan how come I wash you guys feets? You guys call me ‘Teacha’ an ‘Da One In Charge.’ Dass good, cuz dass who me. I Da One In Charge a you guys, an I yoa Teacha, aah? An I wen wash you guys feets . . . You guys suppose to wash each odda feets too.”​—John 13:12-14.

11. How Peter wen show he had learn fo be humbo? (1 From Peter 5:5) (Go look da picha.)

¹¹ Peter wen learn from Jesus how fo be humbo. Afta Jesus wen go back heaven, Peter had heal one guy who no could walk from wen he wuz born. (Jesus Guys 1:8, 9; 3:2, 6-8) Garanz dis miracle wen make plenny peopo come by Peter. (Jesus Guys 3:11) Even tho Peter wen grow up in one culture wea peopo wen kea about powa an bein importan, he neva like all da attention on him. Radda, he wuz humbo an wen give da credit to Jehovah an Jesus wen he wen say, “Dis guy . . . trus [Jesus]. Dass why he come good. Jesus, he da One dat make him come good to da max!” (Jesus Guys 3:12-16) Layta, Peter wen write to da Christians fo “no get big head.” Da original words he use give da idea dat peopo should see dat you humbo, jus like dey see da clothes on top you. Dis make us tink of wen Jesus wen wea one towel an den wash da aposals feet.​—Read um 1 From Peter 5:5.

12. How we can be like Peter an keep trying fo be humbo?

¹² We can copy Peter an keep trying fo be humbo. One humbo guy goin do moa den jus say tings fo ack like he humbo. Wen Peter wen say fo “no get big head,” dat mean fo be humbo in da way we tink about ouaselfs an oddas. We do nice tings fo oddas cuz we love Jehovah an peopo, not cuz we love da attention. If we humbo we goin be happy fo work hahd fo Jehovah an oua braddahs, even if nobody else see wat we do.​—Mat 6:1-4, NWT.

“USE YOA HEAD”

13. Wat dat mean fo “use yoa head”?

¹³ Wat dat mean fo “use yoa head”? (1 Pet 4:7) Wen one Christian use his head, wen he make choices he goin do his bestes fo tink about how Jehovah look at tings. He goin rememba dat his frenship wit Jehovah iz da mos importan ting. He not goin get all big head an he goin undastan dat he donno eryting. If he use his head, he show he rely on Jehovah by praying to him all da time fo direck him.b

14. How Peter one time neva rely on Jehovah?

¹⁴ On da las nite befoa Jesus wen mahke, he wen tell his guys, “All you guys goin come bum out cuz you no can handle da shame fo wat goin happen to me tonite.” Peter wen tink he wuz strong an wen say, “Eh, no way, Boss! No matta all da odda guys come bum out an like go way from you, no way I eva goin do dat!” Dat nite Jesus wen tell some of his guys, “Watch out an go aks God fo help you.” (Mat 26:31, 33, 41) Peter neva do dat. If he did, he probly woulda had da guts fo layta on say dat he wuz one of Jesus followas. But Peter wen say he neva kno Jesus, an dass someting he wen regret plenny.​—Mat 26:69-75.

15. How Jesus wen use his head da las nite befoa he wen mahke?

¹⁵ Jesus full on wen rely on Jehovah. Even tho Jesus wuz perfeck, he still yet wen pray ova an ova on da nite befoa he wen mahke. Dat wen make him strong enuff fo do wat Jehovah wen like him fo do. (Mat 26:39, 42, 44; John 18:4, 5) Fo shua, Peter neva had foget how Jesus wen pray plenny times.

16. How Peter wen show dat he wen use his head? (1 From Peter 4:7)

¹⁶ Layta on, Peter wen learn fo rely moa on Jehovah in praya. Wen Jesus had come back alive, he wen tell Peter an da odda aposals dat dey would get spesho spirit so dat dey could go preach. But Jesus wen ask dem fo wait in Jerusalem till dat time. (Luk 24:49; Jesus Guys 1:4, 5) Wat Peter wen do az he wuz waiting? Him an da odda Christians, “plenny times dey all pray togedda.” (Jesus Guys 1:13, 14) Wen Peter had write his firs letta to his Christian braddahs, he wen tell dem fo use dea head an fo rely on Jehovah by praying to him. (Read um 1 From Peter 4:7.) Peter wen come one solid braddah. He wen use his head an wuz able fo help his braddahs an sistahs come strong.​—Gal 2:9.

17. Wat we need fo keep on doin? (Go look da picha.)

¹⁷ Fo use oua head, we gotta talk to Jehovah plenny in praya. Even if we tink if someting iz easy fo us do, we kno we need fo keep praying to Jehovah fo help. Speshly wen we gotta make importan choices, pray to Jehovah fo direck us an trus dat he kno wass bes fo us.

18. How we can make oua tinking moa like Jehovah’s?

¹⁸ We mahalo Jehovah cuz he wen make us in one way dat we can copy da kine qualities he get. (Start 1:26) Az tru, we no can copy him perfeck. (Isa 55:9) But jus like Peter, we can come moa betta at copying da way Jehovah tink by bein humbo an by using oua head.