How Fo Pray To Jehovah From Yoa Heart

1-2. (a) Wat can hold us back from opening up to Jehovah? (b) How we kno dat Jehovah stay lissening wen we pray?

WEN you pray, sometimes you feel like you saying da same tings ova an ova, or you no tell Jehovah how you really feel? Plenny guys feel lidat. Maybe we rush tru oua prayas cuz oua lives stay so busy. Or maybe we get hahd time open up to Jehovah cuz we feel like we not good enuff fo talk to him.

² Da Bible teach dat wat matta da mos to Jehovah iz not how fancy da praya sound, but dat wen we pray, we humbo an it come from da heart. (Songs 10:17) Jehovah lissen real good to da tings we say cuz he really kea about us.​—Songs 139:1-3.

3. Wat we goin talk about in dis lesson?

³ In dis lesson we goin go ova dese questions, how come we no need be sked tell Jehovah how we feel? How we can pray fo come moa close to Jehovah? How da prayas of Jehovah’s peopo in da Bible can help us? An wat we can do if we unda so much presha dat we donno wat fo tell Jehovah?

NO SKED TELL JEHOVAH HOW YOU FEEL

4. Wat can help us no be sked tell Jehovah how we feel? (Songs Fo God 119:145)

⁴ Wen we come fo see dat Jehovah iz one real good fren who like da bes fo us, we no goin be sked fo tell him wat we tink an feel. Da writa of Songs Fo God 119 wen try fo have dat kine frenship wit Jehovah. He wen go tru some rough tings in his life. Had times he wen feel down cuz he had make mistakes. (Songs 119:23, 69, 78) An had guys talking stink about him. (Songs 119:5) Even tho he wen go tru all dat, he no wuz sked fo tell Jehovah how he feel.​—Read um Songs Fo God 119:145.

5. How come we should pray to Jehovah even if we feel bad or shame? Try use one exampo.

⁵ Jehovah even like da guys who wen sin mayjah fo pray to him. (Isa 55:6, 7) So if you feel bad or shame cuz of someting you wen do, no let dat hold you back from praying to Jehovah. Try picha dis. One pilot of one airplane kno dat if he get into trouble or get some problems, he can call da air traffic controllers fo help. No make sense if he neva call dem cuz he stay shame he wen get los, or wen make one mistake. So same ting wit us, if get times if we feel los or wen make one mistake, we no need be sked fo pray to Jehovah an tell him how we feel.​—Songs 119:25, 176.

HOW FO PRAY FO COME MOA CLOSE TO JEHOVAH

6-7. How can tinking about Jehovah’s qualities help us fo tell him how we really feel? Give one exampo. (Go look da extra info.)

⁶ Wen we pray to Jehovah an tell him wat we really tink an feel, we goin come moa close to him. So how we can pray lidat?

⁷ Tink about Jehovah’s qualities.a Da moa we tink about his qualities, da moa easy goin be fo tell him wat we tink an feel. (Songs 145:8, 9, 18) Try look at one sistah Kristine, who’s faddah wuz violent. She tell, “Wuz hahd fo me see Jehovah az one Faddah who love me, an wuz hahd fo me talk to him cuz of dat. Wen I had make mistakes I wen feel junk, an I had feel like Jehovah wuz goin dig out on me.” Wat wen help her? She tell, “I wen tink a lot about Jehovah’s loyal love, an dis wen help me fo see dat Jehovah love me. I kno dat he always goin be by my side. Even if I make mistakes, he still goin love me an help me. Knowing dis about Jehovah help me talk to him about how I feeling, wen I supa happy or even wen I stay sad.”

8-9. Try tell how come iz good fo tink about wat you goin say befoa you pray?

⁸ Tink about wat you goin say. Befoa you pray, maybe good fo ask yoaself some questions like: “Wat kine problems I stay dealing wit right now? Anybody I stay mad wit dat I should let go? I get any new stuff dat come up in my life dat I need Jehovah’s help wit?” (2 Ki 19:15-19) An would be good fo follow Jesus’ exampo an tink about wat we can pray about wen come to Jehovah’s name, His Govament, an wat He like make happen.​—Mat 6:9, 10 NWT.

⁹ Wen one sistah name Aliska wen find out dat her husban had brain cancer an wuzn’t goin live too much longa, she had hahd time fo pray. She had tell, “I wuz so messed up wen I had pray, I neva even know wat fo say.” Wat wen help her? She wen say, “Befoa I pray, I stop an tink wat I can tell Jehovah. So wen I talk to him, iz not ony about wat me an my husban stay goin tru. Wen I do dis, I feel calm an I can pray to Jehovah about odda tings.”

10. Why iz good fo us no rush wen we pray? (Go look da pichas.)

¹⁰ No rush wen you pray. Short prayas stay good but if we no rush wen we pray, we probly goin tell Jehovah moa about wat we stay feeling.b Elijah, Aliska’s husban, wen say: “I pray plenny times in da day, but I feel moa close to Jehovah wen I pray moa long to him. Cuz I kno Jehovah not rushing me, I can take my time wen I talk to him.” Fo help you no rush yoa prayas, try find one time an one place away from stuffs dat could bodda you. You can even pray out loud if you like. Try make um one habit for no rush yoa prayas.

TINK ABOUT DA PRAYAS DASS IN DA BIBLE

11. How goin be good fo us wen we tink about wat Jehovah’s peopo in da Bible wen pray about? (Go look da box “You Eva Wen Feel Like Dem?”)

¹¹ Would be good fo you go check out wat Jehovah’s peopo in da Bible wen pray an sing about. Wen you see how dey tell Jehovah all dat dey stay feeling, dat can help you fo do da same ting. You might catch someting dey wen say dat you neva tink about saying befoa, an den you can try say dose tings in yoa prayas. An you might feel like wat dey wen go tru iz wat you goin tru, an you like ask fo da same tings dey wen ask fo.

12. Wen you read one praya in da Bible, wat you can ask yoaself?

¹² Wen you read one praya in da Bible, try ask yoaself, ”Who wen say dis praya? Wat stay goin on in dea life an how come dey wen pray lidis? From wat dey tell in da praya, I eva feel da same jalike dem? Wat I can learn from wat dey tell?” Maybe gotta dig moa deep wit research fo ansa dose questions, but iz wort it. We go check out four prayas.

13. Wass one ting we can learn from wat Hannah wen pray? (1 Samuel 1:10, 11) (Go look da picha.)

¹³ Read um 1 Samuel 1:10, 11. Wen Hannah had say dis praya, she had two mayjah problems goin on. She no could have kids, an her husban’s odda wife wuz making life supa hahd fo her. (1 Sam 1:4-7) If you goin tru one problem dass jus not goin away, wat you can learn from wat Hannah wen pray? She wen take da time fo tell Jehovah eryting dat wen bodda her, an afta dat she wen feel way betta. (1 Sam 1:12, 18) Us guys too, if we no hold back an tell Jehovah “all da stuff dat bodda [us] guys, an turn um ova to” him, den we goin feel way betta​—Songs 55:22.

14. (a) Wat else we learn from Hannah? (b)  Wen we tink hahd bout wat da scripchas tell, how dat can help us make oua prayas moa betta? (Go look da extra info.)

¹⁴ Few years afta Samuel wuz born, Hannah wen bring him to Main Pries Eli. (1 Sam 1:24-28) Afta dat, she wen pray to Jehovah fo tank him cuz she wen see how he proteck an kea fo his peopo.c (1 Sam 2:1, 8, 9) She still had problems at home, but she wen tink moa about how Jehovah wuz blessing her den da tings she wuz goin tru. Wat we can learn from dat? If we focus on how Jehovah been helping us wit oua problems dis whole time, dat goin help us fo hando wat we goin tru moa betta.

15. How Jeremiah’s praya can help us wen we go tru stuff dass not fair? (Jeremiah 12:1)

¹⁵ Read um Jeremiah 12:1. Jeremiah wen see stuff dat wen bodda him plenny. Peopo wuz doin bad tings an had look like dey still yet wuz happy. Anodda ting dat wen bum him out wuz da Israel peopo treating him bad. (Jer 20:7, 8) Jeremiah wen tell Jehovah dat all dis wen bodda him plenny an he wuz fed up. But still yet he neva blame Jehovah or say dat he wuz not fair. Wen Jehovah had step in an do someting about da bad stuff da peopo wuz doin, Jeremiah’s trus dat Jehovah wuz fair wen come moa strong. (Jer 32:19) We can undastan how Jeremiah had feel wen get guys dat give us hahd time, or get peopo dat do bad stuff but look like dey get one good life. Jalike Jeremiah we can pray to Jehovah about all da stuff dass not fair dat bodda us plenny, an we can trus dat Jehovah goin fix all dat at da right time.

16. Wat we can learn from da praya of da Levi guy? (Songs Fo God 42:1-4) (Go look da pichas.)

¹⁶ Read um Songs Fo God 42:1-4. One guy from da Levi ohana who couldn’t worship at Da Tempo wit his braddahs an sistahs wen write dis song fo show how he had feel. We can feel like him if we stay stuck at home, or we stay lock up cuz we worship Jehovah. Oua feelings can be all ova da place. Some days we feel good, some days we feel bad, but eidda way iz good fo talk to Jehovah about um. Cuz wen you do dat, goin help you fo see wat you goin tru in one betta way. Jalike da guy from da Levi ohana, he wen figga out dat he had odda chances fo tell how awesome Jehovah. (Songs 42:5) An he wen tink plenny about how Jehovah wen take kea of him. (Songs 42:8) Praying hahd to Jehovah can help us undastan how we feel, get peace again, an help us keep serving Jehovah.

17. (a) Wat we can learn from Jonah’s praya? (Jonah 2:1, 2) (b) How da scripchas in Songs Fo God can help us wen we go tru hahd times? (Go look da extra info.)

¹⁷ Read um Jonah 2:1, 2. Jonah wen say dis praya in da opu of da big fish. Even tho he neva lissen to Jehovah, Jonah was shua dat Jehovah wen hea him. In his praya he wen use plenny words from Songs Fo God, so can see dat he wen kno dese scripchas real good.d Cuz he wen tink about um, he wen kno fo shua Jehovah would help him. Same lidat, if we kno da Scripchas real good, maybe we goin rememba um wen we pray to Jehovah wen we go tru hahd times, an dat goin help us feel betta.

COME MOA CLOSE TO JEHOVAH TRU PRAYA

18-19. If get times we donno wat fo pray, how can Fo Da Rome Peopo 8:26, 27 help us feel betta? Give one exampo.

¹⁸ Read Fo Da Rome Peopo 8:26, 27. Maybe goin get times wea we feel like we no can hando awready, an we donno how fo explain to Jehovah how we feel. But we get help. Dat kine times, God’s spirit “aks God fo do tings fo us.” Wat dat mean? Jehovah wen use his spirit fo get guys fo write down prayas in da Bible. Wen we donno wat fo say, Jehovah can look at da prayas in da Bible like dass oua words dat we wanted fo say, an he can ansa um.

¹⁹ Dis wen help Yelena, one sistah from Russia who wuz arrested fo praying an reading da Bible. She wuz unda so much stress, she had hahd time fo pray. She wen say, “An den I rememba dat wen I no can hando an I donno wat fo say, Jehovah goin use da prayas dat stay in da Bible . . . like dey wuz my prayas. . . . Dis had help me plenny wen I wuz goin tru dis real hahd time.”

20. Wen you stressing, how you can make yoa mind ready fo pray?

²⁰ Wen you supa stressed, can be hahd fo pray cuz yoa mind can be all ova da place. Fo get oua minds ready fo pray, we can read some of da Songs Fo God out loud. Or we can be like David an try write down oua feelings. (Songs 18, 34, 142; da words befoa da songs.) But no moa rules on how fo get ready fo pray. (Songs 141:2) Try do wat works bes fo you.

21. Why can we pray from oua heart?

²¹ Iz so good fo kno dat Jehovah totally gets how we feel even befoa we talk to him. (Songs 139:4) But he love fo hea how we feel an how much we trus him. So no hold back fo pray to yoa Faddah. Go learn from da prayas dat stay in da Bible. Pray from yoa heart, an tell him eryting dat make you happy an sad. Cuz Jehovah iz yoa bes Fren, he always got yoa back!