God’s Love Las Foeva

1-2. Wat problem plenny braddahs an sistahs get?

TRY picha one boat in da middo of one raging storm wit huge waves. Da boat stay getting thrown all ova da place, an unless somebody throw down one anchor, da boat goin drift away.

² Maybe wen you goin tru rough times, you feel like dat boat. You getting thrown all ova da place. One day you kno Jehovah love you an helping you, but da nex day you donno if he kea about you. (Songs 10:1; 13:1) Maybe yoa fren tell you someting fo help you feel betta an dat help you fo litto while. (Smart Guys 17:17; 25:11) But den you start fo wonda again if Jehovah love you. How you can throw down one anchor fo be shua, an stay shua, dat Jehovah goin keep loving you an helping you?

3. Like it tell at Songs Fo God 31:7 an 136:1, wat dat mean fo “stay tight”, an how Jehovah da bestes exampo of dat? (Go look da picha.)

³ One ting dat can help you fo stay anchored wen you goin tru hahd times, iz fo rememba Jehovah’s love an how he stay loyal. (Read um Songs Fo God 31:7; 136:1.) Da original words “stay tight” give da idea of strong love an loyalty dat someone get fo anodda person. Jehovah iz da bestes exampo of dat kine love. Jehovah tell in da Bible, “I stay tight wit my peopo plenny.” (Egypt 34:6, 7) Da Bible also tell about Jehovah, “You stay tight wit yoa peopo all da time.” (Songs 86:5) Dat mean dat Jehovah neva goin dig out on his peopo. So if you rememba dat Jehovah goin stay tight wit you, dat goin help you wen you go tru hahd times.​—Songs 23:4.

REMEMBA DAT JEHOVAH’S LOVE IZ ONE SOLID BIBLE TRUT

4. Wat iz some solid Bible truts, an how come we can believe dem?

⁴ Anodda ting you can do fo anchor yoaself wen goin tru hahd times, iz fo tink of Jehovah’s love az one solid Bible trut. Try tink of all da solid truts you wen learn from da Bible awready. Like God’s name iz Jehovah, Jesus iz his one an ony Boy, da mahke peopo donno notting, an da eart goin be one Paradise dat peopo goin live foeva on. (Songs 83:18, NWT; Teacha 9:5; John 3:16; Jesus Show 21:3, 4, NWT) Once you wen believe all dese truts, dat wuz it awready. No one could stop you from believing in um. How come? Cuz all dese truts come from facts. We go check out how seeing Jehovah’s love az one solid Bible trut, can help you stop secon guessing if Jehovah love you or kea about wat you goin tru.

5. How can somebody stop believing bulai teachings?

⁵ Wen you started fo study da Bible, wat had help you fo stop believing bulai kine teachings? Probly you had match up wat yoa religion teach wit wat da Bible teach. Maybe one time you wen believe Jesus iz God. But wen you wuz studying da Bible you had wonda, “Iz dat tru or wat?” Afta you wen check out da Scipchas real good, you wen find out dat Jesus iz not God. So you had hemo da bulai teachings you had believe befoa. An now you believe da trut dat Jesus iz God’s one an ony Boy, da firs one dat Jehovah wen make. (Col 1:15; John 3:18) Iz tru, can be hahd fo stop believing bulai kine teachings. (2 Cor 10:4, 5) But once you learn da trut, you neva goin go back to dose kine teachings again.​—Php 3:13.

6. Why you can be shua dat Jehovah “stay tight wit his peopo foeva”?

⁶ Wen you goin tru someting hahd an you start fo wonda if Jehovah love you or kea about you, try do da same ting you would do wen come to not believing one bulai kine teaching. Try ask yoaself, “Make sense da way I tinking about Jehovah’s love?” Den try match up wat you feeling wit da main scripcha of dis lesson, Songs Fo God 136:1, wea it tell dat Jehovah “stay tight wit his peopo foeva.” Da original word fo “love” stay conneckted to “stay tight”. How come Jehovah wen get da song writa fo talk about His love 26 times lidat, in Songs Fo God 136? Cuz Jehovah wanted peopo fo see dat him staying tight wit his peopo iz one solid Bible trut, jalike odda Bible truts we wen learn. So da tinking dat Jehovah no love you an no kea about you iz one bulai. We gotta shut down dat lie, jus like how we would shut down any odda bulai kine teaching!

7. Wat iz some scripchas dat show proof dat Jehovah love us?

⁷ Da Bible get plenny moa proof dat Jehovah love us. Like look wat Jesus wen tell his followas, “God know you guys worth mo den plenny sparrow birds.” (Mat 10:31) An Jehovah wen tell his peopo, “I help you guys. I no let you guys fall down! Az cuz I get plenny powa fo do da right ting fo you guys.” (Isa 41:10) You wen see how clear dose words stay? Jesus neva say, “Maybe you wort moa den da sparrows.” An Jehovah neva say, “Maybe I goin help you.” But, Jesus wen say, “God know you guys worth mo”. An Jehovah wen say, “I help you guys.” So wen you goin tru one hahd time an start fo wonda if Jehovah kea about you, dese words no only goin help you feel betta, but let you kno fo shua dat Jehovah love you. Cuz dese truts stay facts. If you pray to Jehovah about yoa doubts an tink real good about dese scripchas, den you goin be able fo say, “Us know dat God get love an aloha fo us guys.”a​—1 John 4:16

8. Wat you can do if you still not shua if Jehovah love you?

⁸ Wat you can do if you still not shua if Jehovah love you? Go compare wat you feel wit wat you kno about Jehovah. Feelings can change but facts stay da same. Da Bible show dat Jehovah’s love iz one fact. If we tink dat Jehovah no love us, den we blind to his numba one quality, love.​—1 John 4:8.

TINK ABOUT JEHOVAH’S “LOVE AN ALOHA FO YOU”

9-10. Wat Jesus wuz talking about wen he sed at John 16:26, 27, “My Faddah, he da One dat get love an aloha fo you guys”? (Go look da picha.)

⁹ We can learn moa about Jehovah’s love wen tinking about wat Jesus wen tell his followas, “My Faddah, he da One dat get love an aloha fo you guys.” (Read um John 16:26, 27.) Jesus neva say dese words jus fo make his followas feel good. Wen we look at da scripchas befoa an afta dose words, we see dat Jesus wuzn’t talking about his followas’ feelings. But, he wuz talking about praya.

¹⁰ Jesus told his followas dey should pray tru him, not to him. (John 16:23, 24) Wuz importan fo dem kno dat. Afta Jesus wen come back alive, maybe his followas wanted fo pray to him cuz dey wuz good frenz wit him. Dey coulda tink dat, cuz Jesus wen love dem so much, he would lissen to all da stuff dey wuz asking him, an den ask his Faddah Jehovah fo help dem. But Jesus wen tell dem fo no tink lidis. How come? Cuz he wen tell dem, “My Faddah, he da One dat get love an aloha fo you guys.” Jesus wuz trying fo teach dem dat Jehovah love dem so much dat He wuz goin lissen to dea prayas. Dat fact iz one solid Bible trut about praya. Try tink about wat dat mean. From studying da Bible you wen come fo kno Jesus an love him, an he love you too. (John 14:21) But like his followas dat time, Jesus like you kno dat he not da ony one who love you. His Faddah, “he da One” dat love you too. Knowing dis can help you kno fo shua dat Jehovah lissen to yoa prayas.​—1 John 5:14.

TINGS DAT MAKE US TINK DAT JEHOVAH NO LOVE US

11. How come Satan would be happy if we tink dat Jehovah no love us?

¹¹ Wen we get hahd time believe Jehovah love us, wea dat kine tinking come from? Maybe you would say, “Cuz of Satan,” an dass paht of da reason. He stay “looking fo somebody fo him eat up,” an he like us tink dat Jehovah no love us. (1 Pet 5:8) Rememba, cuz Jehovah love us, he wen give us da gif of da ransom, but Satan like us feel dat we not good enough fo um. (Heb 2:9) Satan would be so happy if we believe dat Jehovah no love us, an we get so down dat we stop serving Jehovah. Try tink about how twisted dat iz, Satan iz jus trying fo bulai us fo make us believe dat Jehovah no love us. (Efe 6:11) But da trut iz, Satan iz da one Jehovah no love. Wen we start fo see wat Satan iz trying fo do, we goin do oua bes fo “stan up agains” him​—Jam 4:7.

12-13. How not being perfeck, an having da presha fo sin make us tink dat Jehovah no love us?

¹² Get someting else dat can make us tink dat Jehovah no love us. Dass cuz we born not perfeck, an we get da presha fo sin. (Songs 51:5; Rome 5:12) Sin no ony wen wreck oua relationship wit Jehovah but it also wen mess up da way we tink, how we feel, an oua healt.

¹³ Sin can affeck how we feel. It can give us anxiety, an make us feel guilty, an shame. We can get dese kine feelings wen we sin. Or dese feelings could come up cuz we always tinking about how we not perfeck. Jehovah neva wen make us fo be lidat. (Rome 8:20, 21) Jalike one car wit one flat tire no can drive az good az suppose to, cuz we not perfeck, we not living az good az we suppose to. So it shouldn’t shock us dat goin get times wen we struggle fo believe dat Jehovah love us. If we start fo feel lidat, we gotta rememba dat Jehovah iz da “awesome God . . . dat get love an aloha . . . an . . . stay tight wit [us].”​—Neh 1:5.

14. How can tinking about da ransom help us be shua dat Jehovah love us? (Fo Da Rome Peopo 5:8) (Go look da box “Watch Out Fo Wat Sin Can Do.”)

¹⁴ Goin get times wen we might feel dat we no deserve Jehovah’s love. An iz tru, we no deserve um. But dass wat makes Jehovah’s love even moa awesome. No moa notting we can do fo deserve um. But still yet, cuz Jehovah love us, he wen give Jesus az da ransom so dat He can fogive oua sins. (1 John 4:10) Rememba dat Jesus wen come fo save sinners, not perfeck peopo. (Read um Fo Da Rome Peopo 5:8.) We not perfeck, an Jehovah no expeck us fo be. Wen we undastan dat us not being perfeck can make us tink dat Jehovah no love us, den we can fight hahd fo win ova dat kine tinking.​—Rome 7:24, 25.

CHOOSE FO STAY TIGHT WIT JEHOVAH

15-16. Wat we can kno fo shua wen we stick to Jehovah, an how come? (2 Samuel 22:26)

¹⁵ Jehovah like us make da smart choice fo “stay tight wit him.” (Rules 30:19, 20) An if we do, den we can kno fo shua he goin stay tight wit us an help us tru anyting dat can come up in oua life. (Read um 2 Samuel 22:26.)

¹⁶ Jalike we wen talk about how one anchor can hold down one boat in one storm, we get plenny tings dat can help anchor us down wen we go tru hahd times. If we eva start fo wonda if Jehovah love us, no focus on how we feel, but focus on wat we kno about Jehovah’s love. From wat da Bible tell, we kno dat Jehovah love us an goin help us. Stick to da Bible trut dat Jehovah stay tight wit his peopo foeva!