Should I Stop Driving, Or Wat?

TRY picha one olda guy dass been driving fo plenny years. He likes fo drive cuz he can go weaeva he like. But now his family an frenz worry about him being safe. Dey tink dat he gotta stop driving. He jus no get how come dey feel lidat.

Dat sound like you? If it does, wat can help you figga out if you should keep driving or not?

In some countries, guys ova one certain age gotta get da okay from one docta befoa dey can renew dea license. Braddahs an sistahs living in dose countries follow dose laws. (Rome 13:1) But no matta wea you live, get tings dat can help you figga out if iz still safe fo you drive.

CHECK OUT HOW YOU DRIVING NOW

One govament program dat help olda peopo wen make one lis of questions you can ask yoaself:

I get hahd time see da road signs or see at night?
I get hahd time turn my head fo check my mirror an blind spots?
Iz hahd fo me reack fas, speshly wen I gotta move my foot from da gas to da brake?
I drive so slow dat I slow down traffic?
Lately, I almos wen get into some accidents? Or my car get dents an scratches cuz I wen hit stuff?
Da cops eva pull me ova cuz how I wuz driving?
I eva had start fo fall asleep wen driving?
I taking any meds dat can affeck how I drive?
Anybody in my family or frenz wen tell me dey worry about how I drive?

If you had ansa yes to one or two of dese questions, den maybe iz time fo tink about making some changes. Like, you might choose fo no drive az much, speshly night time. Try keep checking yoaself fo see how good you stay driving. You can ask somebody in yoa family or one fren fo tell you wat dey tink about yoa driving. Maybe get one class you can take dat can give you tips on how fo drive moa safe. But if you wen ansa yes to moa den two of da questions, den maybe bes fo you stop driving.a

HOW DA BIBLE CAN HELP YOU MAKE ONE GOOD CHOICE?

Maybe not easy fo you see dat you not az good of one driva az you wuz befoa. An jus tinking about dat or talking about not being able fo drive anymoa, can be really hahd fo you. So how da Bible can help you see tings da right way, an help you make one good choice? We go look at two of um.

Rememba yoa limits. (Smart Guys 11:2) Az we get olda, oua eyes, hearing an muscles start fo break down. An how fas we reack start fo slow down too. Like, mos peopo stop playing some sports az dey get olda cuz dey kno dey can get hurt. Same same wen come to driving. One guy dat kno his limits might choose fo stop driving, cuz he kno iz not safe fo him anymoa. (Smart Guys 22:3) An he goin lissen to oddas wen dey tell him dey worry fo him.—Go check out 2 Samuel 21:15-17.

We no like da blame of killing somebody. (Rules 22:8) One car can be one weapon if you no drive um safe. One guy who keep driving, even tho he not one good driva anymoa, could kill himself or somebody else. An he could get da blame if he get into one accident dass his fault an someone mahke.

If you gotta make da hahd choice fo keep driving or not, no tink dat oddas no goin respeck you anymoa. Jehovah love you fo who you stay. He love dat you kno yoa limits, you humbo, an you look out fo oddas. He neva goin bag from you. He promise fo kokua an give you all dat you need. (Isa 46:4) So ask him fo help you be akamai, an use da advice from da Bible fo help you choose wedda fo keep driving or not.

How Oddas Can Help

Da bes peopo fo talk to olda ones about dea driving iz dea family. Or maybe you one good fren of da driva dat hea odda peopo say dey worry about how he drive. No make like wat dey say iz notting. You could ask fo ride wit him. An if you see dat you gotta talk to him about his driving, den talk to him. Wen you do, put yoaself in his slippahs an tink about how you would feel if somebody wuz to talk to you about dis. Be nice but honest. No need talk about his age, jus talk about how he stay driving. You could say someting like, “I worry fo you wen you drive” an not “You not one good driva.” Remind him of da Bible truts dat stay in dis article, an tell him you kno he like do wat da Bible tell.

All us guys can put ouaselfs in da slippahs of one olda person who gotta stop driving. He might feel like he not free fo go do wat he like anymoa. Wat you can do? Look fo ways fo help him. (Smart Guys 17:17) Like, he might be shame fo ask fo help or rides, so go ask him firs. Or you could even help him make one schedule fo make shua he get one ride to da meetings, field service, shopping, an doctas appointments. Let him kno dat you happy fo help him, an like spend time wit him.—Rome 1:11, 12.

a Fo moa info, go check out da August 22, 2002 Awake! Article, “Automobile Accidents—Are You Safe?”