Stay Happy Wen Taking Kea Da Guys You Love

1-2. If you one keagiva, how Jehovah feel about you? (Smart Guys 19:17) (Go look da pichas.)

JIN Yeol, one braddah from Korea who been married fo ova 32 years tell, “My wife wen get supa sick wit one disease dat make um hahd fo her move her body. So fo da pas 5 years, I been taking kea her. I love my wife plenny an I love taking kea her. Ery night, she sleep in one hospital bed at home an I sleep nex to her, an we hold hands.”

² Maybe you one keagiva fo someone in yoa family or one fren. You love fo do um cuz you love dem, an you love Jehovah. (1 Tim 5:4, 8; Jam 1:27) Iz not always easy fo take kea someone you love, an you go tru tings dat nobody even kno about. Wen peopo see you, dey tink you happy but dey donno dat sometimes you real sad. (Songs 6:6) Even tho oddas no undastan how you feel, Jehovah does. (Go check out Outa Egypt 3:7.) He see all da sacrifices you make fo take kea da one you love. (Songs 56:8; 126:5) He see yoa hahd work, see wen you cry, an he love you fo all dat you do. Jehovah feel like you lending someting to him an he goin pay you back.​—Read um Smart Guys 19:17.

3. How come coulda been hahd fo Abraham an Sarah take kea Terah?

³ Da Bible talk about plenny guys who wuz keagivas, like Abraham an Sarah. Wen dey had dig out from Ur, dea faddah Terah, who wuz about 200 years old, wen go wit dem. Try tink how hahd wuz fo Abraham an Sarah take kea Terah wen dey had travel 600 miles to Haran. (Start 11:31, 32) Dat time dey wen use camels an donkeys fo get aroun. Probly wuz hahd fo Terah get up on dose animals an ride um fo long time. Garanz Abraham an Sarah woulda been supa tired taking kea of Terah. But Jehovah wen give dem da powa dey had need. Jalike Jehovah wen help Abraham an Sarah, he goin give you da powa you need fo take kea da one you love.​—Songs 55:22.

4. Wat we goin talk about in dis lesson?

⁴ Goin be moa easy fo you keep taking kea of da guys you love if you happy. (Smart Guys 15:13) Rememba, you can stay happy even wen life iz hahd. (Jam 1:2, 3) Wat you can do fo stay happy? One ting you can do iz pray to Jehovah an ask him to help you fo stay positive. In dis lesson we goin talk about wat odda tings can help you fo stay happy, an wat oddas can do fo help you. Firs, we go talk about why keagivas gotta stay happy, an den tings dat can bring dem down.

HOW COME CAN BE HAHD FO STAY HAPPY WEN YOU ONE KEAGIVA

5. How come keagivas gotta stay happy?

⁵ If keagivas ony tink about da stuff dass hahd, can be hahd fo dem stay happy an dey can come tired. (Smart Guys 24:10) An if dey tired, maybe dey not goin be az nice an no can help az much az dey like. Wat iz some tings dat can bring one keagiva down?

6. How come some keagivas feel burn out?

⁶ Keagivas can feel burn out. One sistah name Leah tell, “Even on one good day, by da end of da day, I feel so stressed out dat I feel like no moa notting lef in da tank. Sometimes I no can even tink about ansaring one text message.” Odda keagivas get hahd time fo get enuff sleep or take breaks dat dey need. One sistah name Inés tell, “I no get good sleep. Plenny times at night, I gotta get up ery couple hours fo take kea my maddah in law. An me an my husban neva take one vacation long time.” Some no can hang out wit dea frenz or even do tings fo Jehovah cuz dey keagiving 24/7. Cuz of dat, dey might miss being wit oddas an feel trapped.

7. How come some keagivas feel guilty or sad?

⁷ Keagivas can fight feeling guilty or sad. One sistah name Jessica wen tell, “Plenny times I feel junk cuz I feel like I should be doin moa fo help my dad. An I feel bad wen I take time fo res.” Some keagivas feel guilty cuz dey feel stuck, an dat taking kea somebody iz one burden. Oddas feel like dey not doin enuff fo help. Some feel bad cuz wen dey wuz tired, dey wen say or do someting dat wuz mean. (Jam 3:2) Some keagivas feel sad cuz dey see da person dey love get moa an moa sick. One sistah name Barbara say, “It break my heart fo see my fren getting moa sick eryday.”

8. How keagivas feel wen oddas tank dem fo dea help?

⁸ Some keagivas feel dat oddas iz not tankful fo wat dey do. How come? Cuz not too many peopo tell um dat dey doin one good job fo dea hahd work. But wen somebody tank dem, dey feel real good. (1 Tess 5:18) One sistah name Melissa tell, “Sometimes I cry cuz I so frustrated. But wen da guys dat I take kea of tell me, “Tank you fo eryting you do,” it make me feel so happy. Dose words help me fo keep doin wat I doin.” One braddah name Ahmadu an his wife take kea dea niece who stay supa sick. He wen tell how he feel wen his niece tank dem. “Maybe she no really undastan how much we do fo take kea her, but wen she try fo write down da words “I love you,” dat make me so happy.”

HOW FO STAY HAPPY

9. How keagvias can show dey kno dea limits?

⁹ Kno how much you can do. (Smart Guys 11:2) All us get limits. So you gotta figga out how much you can do. An sometimes wen somebody ask you fo do stuff, you gotta say no. Wen dat happen, you no need feel bad, dass ok. It jus show dat you kno wat you can an cannot do. An if oddas like help you, take da help. One braddah Jay wen tell, “Eryday we ony can do so much. Wen you undastan yoa limits an no go pas um, dat goin help you fo stay happy.”

10. Wat iz importan fo keagivas undastan? (Smart Guys 19:11)

¹⁰ Try undastan how come somebody acking da way dey ack. (Read um Smart Guys 19:11.) If you do dat, den you goin be able fo stay calm wen dey do someting mean to you. Some diseases can make peopo do stuff dey normally neva would. (Teacha 7:7) Like, one guy dass normally nice might now ony like make argue or beef. Or dey can start fo grumbo plenny or get mad all da time. So if you take kea someone wit one serious disease, might be good fo learn about dea disease. Cuz if you do dat, den you goin find out dat iz not da person but da disease making dem ack lidat.​—Smart Guys 14:29.

11. Wat importan ting keagivas gotta make time fo? (Songs Fo God 132:4, 5)

¹¹ Make time fo build up yoa frenship wit Jehovah. Sometimes you gotta sacrifice time on some tings so dat you can spen moa time on da importan tings, like yoa frenship wit Jehovah. (Php 1:10) Like, King David wuz one busy guy but he wen make shua dat serving Jehovah wuz da mos importan ting in his life. (Read um Songs Fo God 132:4, 5.) Same ting fo us, we supa busy but we gotta make time fo read da Bible an pray ery day. One sistah name Elisha tell, “Wat help me fo stay calm an happy iz I read Songs Fo God an tink hahd about um, an pray all tru da day. Praya iz wat help me da mos.”

12. Why keagivas gotta make time fo take kea dea healt?

¹² Do wat you can fo stay healty. Cuz keagivas supa busy, can be hahd fo dem eat healty. Maybe dey no moa time fo go shopping fo fresh food an cook. But one good diet an exercise iz good fo yoa body an mind. So even tho you no moa too much time, try do wat you can fo eat healty an exercise. (Efe 5:15, 16) On top of dat, try get enuff sleep. (Teacha 4:6) Guys who study sleep say dat wen you sleep, dat help fo get rid of da toxins in yoa brain. One medical article tell dat wen one person get enuff sleep, dat help dem get less anxiety an stay calm even wen dey unda plenny presha. Anodda ting you gotta do iz make time fo have fun. (Teacha 8:15) One keagiva wen say, “Wen da weatha iz good, I go outside in da sun. At leas one day a mont, I make time fo have fun wit one of my frenz.”

13. How come iz good fo laugh? (Smart Guys 17:22)

¹³ No foget fo laugh. (Read um Smart Guys 17:22; Teacha 3:1, 4) Laughing iz good fo yoa body an mind. Wen you keagiving, tings no always go da way you like. But wen dat happen, an you can laugh about um, goin be moa easy fo get tru um. An if you an da person you taking kea of can laugh togedda, dat goin help you come moa close.

14. How talking to one good fren can help you?

¹⁴ Talk wit one fren you can trus. Even wen you try yoa bes fo stay happy, sometimes you goin feel like iz too much an you no can hando. Wen dat happen, iz good fo talk to one fren dat not goin make you feel bad about how you stay feeling. (Smart Guys 17:17) Dem lissening to you vent, maybe iz all you need fo help you keep goin an stay happy.​—Smart Guys 12:25.

15. How can talking about Paradise make you happy?

¹⁵ Tink about wat you goin do togedda in Paradise. Rememba dat you not goin be one keagiva foeva, an it neva wuz Jehovah’s plan fo us do dis kine work. (2 Cor 4:16-18) Pretty soon in da future, we goin live da way Jehovah wanted us fo live. (1 Tim 6:19) Wen you an da guy you take kea of talk about wat you guys goin do in Paradise, you both goin be happy. (Isa 33:24; 65:21) One sistah name Heather had say, “I tell da ones I take kea dat pretty soon we goin sew, run, an ride bike togedda. We goin even make food fo all da guys we love dat goin come back alive. We tank Jehovah togedda fo da hope we get.”

HOW ODDAS CAN HELP

16. How we can help one keagiva out? (Go look da picha.)

¹⁶ Help keagivas get da res dey need. Wen we willing fo help da keagivas’ love one, dat goin give da keagiva one break an time fo take kea of stuff dey gotta. (Gal 6:2) Some braddahs an sistahs wen even make one schedule fo who goin help out ery week. One sistah name Natalya, who take kea of her paralyze husban, wen say, “One braddah in oua local hui come ova once or twice a week fo spen time wit my husban. Dey preach togedda, talk story, an even watch movies. My husban has good fun wit him, an dis give me time fo take kea of myself, an even go on one walk.” Sometimes we can stay wit da keagivas’ love one ovanight so dat da keagiva can res.

17. How we can help keagivas at da meetings?

¹⁷ Help keagivas at da meetings. Cuz keagivas so busy taking kea da ones dey love, dey might not get too much out of da meetings an da big kine meetings. Fo help dem out, we can sit wit dea love one during da whole meeting or paht of um. If da person stay stuck at home, we could go his house an tie in wit dem so da keagiva can go meeting in person.

18. Wat odda tings we can do fo keagivas?

¹⁸ Encourage an pray fo keagivas. Eldas should make time fo shepherd keagivas. (Smart Guys 27:23) All us in da local hui should tell keagivas how much we love dem, an tank dem fo all dat dey do. Anodda ting we can do iz ask Jehovah fo help dem stay happy.​—2 Cor 1:11.

19. Wat we no can wait fo?

¹⁹ Pretty soon Jehovah goin hemo all da stuff dat make us suffa an sad. Sickness an death goin be pau. (Jesus Show 21:3, 4, NWT) “Da peopo dat no can walk, dey goin jump jalike da deer.” (Isa 35:5, 6) All da sad tings dat come wit getting olda goin be gone. An even da pain keagivas feel wen taking kea dea sick love one goin be gone too. “Nobody goin rememba da stuff dat wen happen befo time. Nobody goin even tink bout dat.” (Isa 65:17) Until den, if we rely on Jehovah, he goin help us fo stay happy, “handle any kine an hang in dea long time.”​—Col 1:11.