How Da Book Of Job Can Help You Wen You Suffa

1-2. How come we should read da book of Job?

WEN wuz da las time you had read da book of Job? Da ting wuz written long time ago, but plenny peopo still tink iz one of da bes books eva. Peopo say dat da guy who wen write dis book iz unreal cuz he wen use nice words dass easy fo undastan, an it touch da heart. Moses wen write dis book, but da one who wen tell him wat fo write wuz Jehovah.​—2 Tim 3:16.

² Da book of Job iz one supa importan book in da Bible. It help us fo undastan da big issue dat humans an angels face, dass fo clear Jehovah’s name an give him all da respeck. It even teach us about Jehovah’s qualities. Like how he get plenny love, how he fair, how akamai him, an how much powa he get. Fo exampo, da book of Job plenny times call Jehovah “Da God Dat Get All Da Powa”. An it ansa plenny questions dat peopo get, like how come God let peopo suffa?

3. Wat we can learn from da book of Job?

³ Wen we read da book of Job, iz like bein on top one mountain, we can see eryting moa clear. We can see how Jehovah feel wen we suffa. We go learn how Job’s story coulda help some of da Israel peopo an how it can help us. Anodda ting we goin learn iz how we can use da book of Job fo help oddas.

GOD LET JOB SUFFA

4. How wuz Job diffren from some of da Israel guys in Egypt?

⁴ Wen Job wuz living in Uz on da north side of Arabia, da Israel peopo wuz slaves in Egypt. Ova dea, some Israel guys wuz worshipping idol kine gods. But Job neva do dat, he wuz serving Jehovah. (Josh 24:14; Eze 20:8) Jehovah wen say about Job, “Nobody stay like him.”a (Job 1:8, New World Translation) Job wuz supa rich an da mos respeckted guy in dat paht of da world. (Job 1:3) Musta made Satan so mad fo see Job, one guy dat erybody kno an respeck, serving Jehovah.

5. How come Jehovah let Job suffa? (Job 1:20-22; 2:9, 10)

⁵ Satan wen say dat if Job wen suffa, he would stop serving Jehovah. Wat Satan wen say had bring up some mayjah issues. (Job 1:7-11, NWT; 2:2-5) Even tho Jehovah wen love Job plenny, He wen let Satan try prove if wat he sed about Job wuz tru or not. (Job 1:12-19, NWT; 2:6-8) Satan wen take away Job’s animals, had kill his ten kids, an wen make him have supa soa boils all ova his body. Even tho Satan wen make Job suffa plenny, he no could break Job. Job wen stay faitful to Jehovah. (Read um Job 1:20-22; 2:9, 10.) Layta on, Jehovah wen heal Job, make him rich again, an give him ten moa kids. An da peopo wen respeck Job again. Jehovah even wen let Job live anodda 140 years. He got fo see four generations of his family. (Job 42:10-13, 16) How Job’s story coulda help God’s peopo in da pas, an how can it help us today?

6. How Job’s exampo coulda help da Israel guys? (Go look da picha.)

⁶ How Job’s story coulda help da Israel peopo. Da Israel peopo who wen live in Egypt had one hahd life. Like, Joshua an Caleb wen grow up az slaves ova dea, an den had fo spen 40 years in da boonies cuz some of da Israel guys neva lissen Jehovah. So if da Israel guys back den wen kno about wat Job wen go tru, garanz it helped dem an da guys dat came afta dem fo undastan dat Satan iz da one behind all da suffaring. An Job’s exampo coulda help dem undastan why God let peopo suffa an how he love an goin bless da guys dat stay faitful to him.

7-8. How da book of Job help us guys wen we suffa? Try give one exampo.

⁷ How Job’s story can help us? So sad how much peopo today lose dea trus in God cuz dey no undastan how come bad tings happen to good peopo. We go look da exampo of Hazelb from Rwanda. Wen she wuz younga, she wen believe in God but den bad tings had happen to her. Her parents wen get divorce, an her maddah wen marry anodda guy dat wen treat Hazel real bad. Den wen she wuz one teenaga, one guy wen rape her. She wen try go church fo get good kine words, but she neva get um dea. So den layta, she wen write one letta to God telling him, “God, I wen pray to you, I wen try fo do good, but you ony wen make me suffa. I done wit you. Now I goin do wateva I like dat make me happy.” Ho, oua hearts stay so soa fo peopo like Hazel an oddas dat tink dat God iz da one dass making dem suffa!

⁸ Da book of Job teach us dat suffaring no come from God, but come from Satan. It also teach us dat wen peopo suffa, we no should tink iz cuz dey wen do someting wrong. Da Bible tell dat “tings you no expeck can happen to anybody at any time.” (Teacha 9:11, NWT; Job 4:1, 8) An we wen learn dat if we stay faitful to Jehovah tru hahd times, we give Jehovah one chance fo call Satan one bulaia. (Job 2:3; Smart Guys 27:11) We so happy we get dese Bible truts, cuz it help us fo kno how come us guys an da ones we love suffa. Layta on, wen Hazel wuz studying wit Witnesses Fo Jehovah, she wen learn dat God not da one making her suffa. She tell, “I wen pray to God again an tell him eryting I wuz feeling. I wen tell Jehovah dat wen I sed I wuz done wit him, I neva really mean um. I jus neva kno him. Now I kno dat Jehovah love me plenny an I stay supa happy.” We so tankful we kno how come God let peopo suffa. Now, we go see how da exampo of Job can help us wen we stay suffaring.

HOW JOB’S STORY CAN HELP US HANG IN DEA

9. What Job wen do wen he wuz suffaring? (From James 5:11)

⁹ Try picha Job all buss up, sitting in da ashes all by himself. He supa skinny an weak wit soa boils all ova his body. He scraping himself wit pieces from one clay pot. He no could help but complain about all da pain he wuz goin tru. But tru all his suffaring, Job neva jus keep living, he wen keep hanging in dea an wen stay faitful to Jehovah. (Read um From James 5:11.) Wat wen help Job hang in dea?

10. Wat shows dat Job wuz close wit Jehovah?

¹⁰ Job wen tell Jehovah exackly how he wen feel. (Job 10:1, 2; 16:20) Like in chapta 3, he wen complain about all da bad tings dat wen happen to him, tinking dat Jehovah wuz da one causing all his problems. Den three of Job’s frenz wen tell Job again an again dat God wuz punishing him fo his sins, but Job wen keep saying dat he wuz faitful to Jehovah. Some of da tings Job wen say had show dat he wen tink God wuzn’t fair. (Job 10:1-3; 32:1, 2; 35:1, 2) He wuz trying so hahd fo prove he wuz faitful dat he wen say some stupid stuff. (Job 6:3, 26) Den in chapta 31, Job wanted God fo say dat he neva do notting wrong fo get punish. (Job 31:35) But wuz wrong fo Job say dat.

11. How Jehovah wen reack to wat Job wen say?

¹¹ Da way dat Job wen talk to Jehovah had show dey wuz close frenz, an dat he wen trus Jehovah would see he wuz faitful. Wen Jehovah had finally ansa Job from one windstorm, Jehovah neva explain to Job why he wuz suffaring. An he neva scold Job fo complaining an saying dat he neva do notting wrong. Radda, Jehovah wen teach Job da right way fo tink, jus like how one good faddah would teach his boy. Dis wuz da bes way fo help Job. An cuz of dat, Job wen see dat he neva kno notting an wuz sorry fo da tings he wen say. (Job 31:6; 40:4, 5; 42:1-6) How Job’s story coulda help peopo in da pas an us guys today?

12. How Job’s story coulda help da Israel guys?

¹² How Job’s story coulda help da Israel peopo. Try tink about Moses’ exampo. He had fo hang in dea tru a lot. No wuz easy fo him be da leada fo da Israel peopo. Wen tings wuz hahd, Moses wen pray to Jehovah about all da stuff he wuz goin tru. On da odda hand, wen tings wuz hahd fo da Israel peopo, dey wen grumbo about Jehovah an dat wen bum Moses out. (Egypt 16:6-8; Cens 11:10-14; 14:1-4, 11; 16:41, 49; 17:5) Moses even had fo hang in dea wen Jehovah had correck him. Like right befoa da Israel guys wuz about fo go in da Promise Land, Moses wen get supa mad wit dem. He wen “tell stuff dass not good” an neva give Jehovah da credit. (Songs 106:32, 33) Cuz of dat, Jehovah neva let him go in da Promise Land. (Rules 32:50-52) Dis coulda hurt Moses plenny, but he wuz humbo, wen take da correcktion, an wen learn from um. Job’s story coulda even help da faitful Israel guys dat wen live afta Moses. By tinking about Job’s story, dey coulda learn how fo tell Jehovah how dey feel, an wen bad tings happen, not tink Jehovah wuz bein unfair. Dey coulda learn fo be humbo an lissen wen Jehovah correck dem.

13. How Job’s story help us fo hang in dea an keep goin? (Fo Da Hebrew Peopo 10:36)

¹³ How Job’s story can help us. Cuz life can be hahd nowdays we need da strength fo hang in dea fo keep serving Jehovah. (Read um Fo Da Hebrew Peopo 10:36.) Like maybe we dealing wit one physical or emotional kine problem, drama in da family, somebody we love wen mahke, or some odda kine pilikia. An wen we goin tru dat kine stuff, sometimes somebody can say or do someting fo make um even moa hahd fo hando. (Smart Guys 12:18) But Job’s story helps us fo undastan dat we can tell Jehovah exackly how we feel an trus dat he goin lissen to us. (1 John 5:14) Sometimes we goin say stupid stuff like Job, but Jehovah not goin get mad at us. He goin help us kno wat fo do an give us da powa fo keep goin. (2 Rec 16:9; Jam 1:5) Sometimes, if gotta, he goin correck us like he wen do wit Job. So Job’s story help us fo no give up if Jehovah correck us tru his Word da Bible, his hui, or odda solid braddahs an sistahs. (Heb 12:5-7) Wuz good fo Job lissen to Jehovah an take da cracks, an goin be good fo us too if we humbo an take da correcktion we get. (2 Cor 13:11) Get plenny tings we can learn from Job! But now we goin check out how we can use his story fo help oddas.

USE JOB’S STORY FO HELP ODDAS

14. Wass one way fo ansa da question, how come we suffa?

¹⁴ Wen you wuz out in service, somebody eva wen ask you how come we suffa? Wat you wen say? Maybe you had tell dem wat wen happen in da Garden of Eden an how Satan wen tell da firs coupo one lie dat had make dem go agains God. (Start 3:1-6) An cuz of wat Adam an Eve wen do, peopo started fo suffa an die. (Rome 5:12) Afta dat, you probly wen tell dem how God letting time pass fo prove dat Satan wen lie. An you probly wen tell dem how God goin hemo suffaring so we can live foeva. (Jesus Show 21:3, 4, NWT) Dis iz one solid way fo ansa da question how come peopo suffa, an it can work real good.

15. How you can use Job’s story fo explain why we suffa? (Go look da pichas.)

¹⁵ Anodda way fo explain why we suffa, iz by using Job’s story. We could start um off by telling da person dass one good question dey wen ask. Den we can tell dem about Job, who wuz one good guy dat wen ask da same question. Job even wen tink dat God wuz da one making him suffa. (Job 7:17-21) Da person you talking to might tink dat iz pretty cool dat somebody from long time ago wen ask da same question. Den you can tell um dat God neva make da bad stuff happen to Job. Wuz Satan, cuz he wanted fo prove dat peopo ony serve God cuz of da good stuff dey get from him. Den we can tell um dat even tho God wuzn’t da one making Job suffa, he wen let Job go tru um. Dat wen sho dat God trus faitful peopo to prove Satan iz one liar. Afta dat, you can tell dem dat in da end God wen bless Job fo staying faitful. So we can help oddas feel good by letting um kno dat suffaring no come from Jehovah.

16. Try tell one exampo fo show how Job’s story can help somebody who suffa.

¹⁶ Check out how Job’s story wen help Mario. In 2021, one sistah wuz preaching on da phone. Da firs person she wen talk to wuz Mario. She wen share wit him one scripcha dat talk about how God no ony lissen to oua prayas but he also give us one hope fo da future. Den she wen ask him wat he had tink about dat scipcha. Mario wen tell her dat he wuz jus writing one suicide letta. He tell, “I believe in God, but I wuz jus tinking dis morning how he no kea about me.” Da secon time da sistah wen talk to Mario on da phone, dey wen talk about Job an how he wen suffa. Mario wen decide dat he gotta read da whole book of Job, so da sistah wen sen him one link to da Bible on jw.org. Wat wen happen? Mario started fo study, an he wuz pumped fo learn moa about Jehovah, da God who kea bout him.

17. Why you tankful dat Jehovah wen put Job’s story in da Bible? (Job 34:12)

¹⁷ Da Bible get da powa fo help peopo, speshly da guys who suffa. (Heb 4:12) We so tankful dat Jehovah wen put Job’s story in da Bible! (Job 19:23, 24) Da Book of Job help us kno “fo shua, God no goin do wass wrong!” (Read um Job 34:12.) It even teach us why God let peopo suffa, how fo hando wen we do, an how fo keep goin. An it show us how fo help da guys who suffa fo feel betta. Da nex lesson goin talk about how da book of Job can help us give good counsel.