Kupunas, Get So Much You Can Do In Da Hui

Maybe you slowing down too cuz you getting olda. Even tho you wen serve Jehovah fo long time, you might feel bummed out cuz you compare all da stuff you use to do fo Jehovah wit wat you do now. If dass how you feel, wass some tings dat can help you?

WAT JEHOVAH EXPECK OF YOU

Try ask yoaself, “Wat Jehovah expeck of me?” Da Rules Secon Time 6:5 tell, “Get love an aloha fo yoa God, Da One In Charge, wit eryting how you tink, an wit eryting dat stay inside you, an wit all yoa powa.”

From wat da verse tell, Jehovah jus like you give him yoa bes. Knowing dat can help you fo no compare yoaself wit oddas, or wat you could do befoa wit wat you can do now.

Try tink about dis: Wen you wuz young, you wen go all out fo Jehovah, an dat wuz yoa bes back den. How bout now? You probly doin all you can fo give Jehovah yoa bes right now. So if you tink about um, you giving Jehovah da same ting. You wen give Jehovah yoa bes back den, an you stay giving him yoa bes now.

YOU CAN REALLY HELP ODDAS

Heas anodda ting fo tink about. Instead of tinking about da stuff you no can do, tink about wat you can do fo help oddas. Now dat you stay olda, get tings you can do dat you no could do wen you wuz younga. Tings like:

Share wit oddas wat you wen go tru in life. Like, try look wat some of dese guys wen say in da Bible:

King David: “Befo time, I was one small kid, an now I one ol man. All dat time, I neva see God foget bout nobody dat do da right ting. I neva see dose guys kids stay beg fo get someting fo eat.”​—Songs 37:25.

Joshua: “Now litto bit moa, I goin go da way erybody in da world go. So, go all out fo know dis: All da good tings Da One In Charge wen promise fo give you guys, happen awready. You get um all, he neva even broke one promise!”​—Josh 23:14.

Maybe wen you wuz younga, you had say some of da tings David an Joshua wen say fo encourage oddas. But wen dey had say um, dey wuz olda awready an wen go tru plenny tings in dea life serving Jehovah. So garanz dey wen kno wat dey wuz talking about.

If you been serving Jehovah fo long time too, you can share wat Jehovah wen do fo you an fo oddas. You rememba someting spesho dat wen happen wea Jehovah had take kea his peopo? If you do, tell oddas bout um, cuz dat goin build dem up. Wen odda peopo had share dat kine experiences wit you, dat wen build you up. So you really can encourage yoa braddahs an sistahs by sharing wit dem da stuff you wen go tru wen serving Jehovah.​—Rome 1:11, 12.

Anodda way fo build yoaself an oddas up iz by goin to da meetings in person az much az can. Connie, da sistah from earlia, wen tell, “Goin to da meetings help me so I no get all depress. How I can get depress wit all da love an aloha da braddahs an sistahs show me at da Kingdom Hall? I try fo show dem I tankful by giving dem small gifs. I try fo make shua I keep doin spiritual tings wit my braddahs an sistahs.”

JEHOVAH IZ TANKFUL FO ALL DAT YOU DO

Da Bible get choke exampos of peopo Jehovah had love, even tho dey no could do az much az dey like fo him. Try tink about da olda Israel guy Simeon. Wen he had go visit Da Tempo, he probly wen see all da younga guys working hahd ova dea. Maybe wen Simeon had see dem, he coulda tink dat Jehovah no could use him like dose young guys. But wen Jehovah had look Simeon, he wen see him az “one guy dat erytime do da right ting an pray.” Jehovah blessed Simeon by letting him see bebe Jesus. An He had even use Simeon fo tell peopo dat Jesus wuz goin be da Messiah. (Luk 2:25-35) Az clea fo see dat wen Jehovah had look at Simeon, he neva jus see one old man. But He wen see one guy dat had strong fait an dat da “Good An Spesho Spirit stay in charge a him.”

You too can kno fo shua dat Jehovah love all dat you do fo him, even if get limits to wat you can do. To Jehovah, “wateva you give, az good . . . Give wat you can, not wat you no can.”​—2 Cor 8:12.

So, try tink about wat you can do. Like get diffren kine ways you can go preach, even if iz ony fo litto while. Or you can build up somebody in yoa hui by calling dem up or giving dem one card. Litto tings lidat show how much you love yoa braddahs an sistahs. An dat can mean so much to dem, speshly wen it come from you, somebody dat been serving Jehovah fo long time.

Some guys get physical kine problems. Try look wat wen happen to one sistah in East Africa in da box “It Wen Save Her Life.”

Try rememba dat all yoa faitful years of serving Jehovah can encourage oddas plenny. You one solid exampo of hanging in dea. You can kno fo shua, “God, he erytime do da right ting. Az why he no goin foget how plenny you guys wen work fo him, an how you guys wen show him love an aloha cuz you kno who him. An you guys wen kokua God spesho peopo, an still yet you guys stay kokua dem.”​—Heb 6:10.

DO AZ MUCH AZ YOU CAN

Get studies dat show dat kupunas who help oddas, iz moa sharp, get betta healt, an live longa.

Of course, doin good tings fo oddas not goin make us younga. Ony God’s govament goin fix dat by getting rid of da sin we get from Adam dat make us come old an mahke.​—Rome 5:12.

But doin all you can now fo Jehovah an helping oddas come fo kno him, dat can help keep yoa hope strong, an can even help you stay healty. All you kupunas, kno dat Jehovah love you fo all dat you do fo him, an yoa faitful exampo mean plenny to da hui.