Show Jehovah Respeck Wen You Plan One Wedding

1-2. How Jehovah look at weddings?

YOU engaged? Right on, congrats! You probly supa busy planning yoa wedding. Jehovah like you have one good weddinga day. An he like you guys have one good marriage an be happy togedda.​—Smart Guys 5:18; Love Song 3:11.

² Iz supa importan fo show respeck to Jehovah at yoa wedding. How come? An how you can do dat? Dis lesson goin help one coupo fo see how dey can show Jehovah respeck wen dey planning dea wedding. Da Bible truts dat we goin go ova goin be good not ony fo da coupo, but even fo us guys helping wit da wedding or goin to da wedding.

WHY SHOW JEHOVAH RESPECK AT YOA WEDDING?

3. Wat one coupo gotta tink about wen dey plan dea wedding, an how come?

³ Wen coupos stay planning dea wedding, dey should try use Bible truts fo help dem. How come? Cuz Jehovah da one who wen set up da marriage in da firs place. He da one dat wen make da firs wedding between Adam an Eve. (Start 1:28; 2:24) So coupos like make shua dey tink about how dea wedding goin show respeck fo Jehovah.

4. Wass anodda reason why coupos like show Jehovah respeck at dea wedding?

⁴ Jehovah iz yoa heavenly Faddah an yoa bes Fren. (Heb 12:9) So you like make shua you tink about him an how he feel on yoa wedding day. You no like do notting fo hurt him, cuz you like stay close to him. (Songs 25:14) Wen you tink about all da stuff Jehovah wen do fo you, dat goin make you like show him plenny respeck on yoa wedding day.​—Songs 116:12.

HOW YOU CAN SHOW JEHOVAH RESPECK AT YOA WEDDING?

5. How da Bible can help coupos plan dea wedding?

⁵ Da Bible no give rules bout how yoa wedding should be like. Can be litto bit diffren depending on wea you live, yoa culture, how much money you get, or cuz of some odda stuff dass goin on in yoa life. But Christians gotta make shua dey follow da govament laws fo make shua dat dea marriage iz legit. (Mat 22:21) But no matta wat one coupo choose fo dea wedding, dey like use Bible truts fo make shua dat Jehovah happy. So wat kine Bible truts dey should tink about?

6. How come iz importan fo one coupo follow da govament laws wen come to marriage?

⁶ Follow da govament laws. (Rome 13:1, 2) In mos countries, da govament get laws dat you gotta follow so dat you can get married. Iz importan fo one coupo find out wat dose laws are. If you need help finding info on dat, go ask da eldas.b

7. How one wedding should be like, an how you can make um lidat?

⁷ Make shua da wedding show respeck. (1 Cor 10:31, 32) You like try yoa bes fo yoa wedding refleck da fruits dat come from Jehovah’s spesho spirit, radda den da spirit of dis world. (Gal 5:19-26, NWT) Cuz da groom goin be da head of da family, he da one dat gotta make shua dat eryting iz good an show respeck at da wedding. Wat can make um lidat? Have one braddah give da wedding talk using da Bible. Wen he give da talk in one loving an respeckful way, it goin help erybody dat lissen to um fo see dat marriage iz one gif from Jehovah an iz someting serious. Dass why, if dey can, mos coupos choose fo get married at da Kingdom Hall. If you like get married at da Kingdom Hall, make shua you write one letta az soon az can an den give um to da eldas fo see if you can use da Hall.

8. How you can make shua yoa reception iz not how da world throw party? (Fo Da Rome Peopo 13:13)

⁸ Read um Fo Da Rome Peopo 13:13. If you choose fo have one wedding reception, how you can make um so iz not how da world throw party. Da Greek word “party up” talk about get togeddas wea peopo get all buss an play music til iz supa late. If goin get alcohol at da party, make one plan fo make shua dat nobody drink too much.c If goin get music, make shua da volume not too loud so dat peopo can still talk story wit each odda. Check out da kine music you goin be playing an look ova da words to um so nobody get trip up.

9. Wat one coupo should tink about wen come to speeches or odda entertainment at dea reception?

⁹ You planning fo have speeches, one slideshow, or odda entertainment at yoa reception? Dese kine tings can make yoa day supa spesho. But you like make shua all of dat iz good fo erybody. (Php 4:8) Ask yoaself, “Dis goin show respeck fo oddas? Dis goin show respeck fo da marriage?” An da mos importan ting fo ask yoaself iz, “Dis goin show Jehovah respeck?” Even if might be ok fo crack one joke, gotta be keaful fo no say notting pilau dat goin make peopo tink about sex. (Efe 5:3) If somebody from yoa family or one of yoa frenz like say someting at da reception, make shua dey undastan dakine tings you no like dem say.

10. Why iz good fo one coupo keep um simpo wen dey plan dea wedding? (1 John 2:15-17)

¹⁰ Keep um simpo. (Read um 1 John 2:15-17.) Jehovah love it wen his peopo try fo give Him all da respeck, radda den try fo make um all about dem. So dey try dea bes fo no “show off” or spen too much money. Why iz good fo keep yoa wedding simpo? Try look wat one braddah from Norway, name Mike, wen say, “Oua wedding wuz simpo, but still yet wen turn out supa nice an wuz one day we neva goin foget. We neva go into debt, an we could keep pioneering togedda.” An one sistah from India, name Tabitha, wen say, “Cuz we wen keep oua wedding simpo, had less stuff fo plan an less stuff fo fight ova. We neva have too much fo stress about.”

11. Wat one bride an groom gotta tink about wen come to wat dey wea an how dey look? (Go look da pichas.)

¹¹ You wen pick wat you goin wea? Fo shua you like look good. Even long time ago, one bride an groom wen kea about how dey look. (Isa 61:10) Wat you wea at yoa wedding probly not goin be da same az wat you would wea to odda places, but dat no mean you can dress anykine. (1 Tim 2:9) No let wat you wea or da way you look be da mos importan paht of yoa wedding.​—1 Pet 3:3, 4.

12. Why one coupo gotta stay away from customs dat no match up wit da Bible?

¹² Stay away from customs dat no match up wit da Bible. (Jesus Show 18:4) Peopos weddings nowdays get customs dat stay conneckted to bulai kine religions an spirit stuffs. Jehovah tell us fo stay far away from pilau tings lidat. (2 Cor 6:14-17, NWT) If get anykine customs or traditions wea you stay dat you not too shua about, iz good fo go check out wea dey had come from. An look fo Bible truts dat can help you make one good choice fo have um at yoa wedding or not.

13. How one coupo can copy Jehovah wen dey get gifs?

¹³ Wea you live, peopo give gifs to da coupo getting married? Wat somebody give might depend on how much money dey get. Fo shua Jehovah like wen his peopo give to oddas, an it make dem happy wen dey do dat. (Smart Guys 11:25; Jesus Guys 20:35) But we no like make da guys we invite to da wedding feel like dey gotta give one gif, or make um feel bad cuz dey no could give someting expensive. We copy Jehovah by bein tankful fo wateva somebody give, cuz wat dey wen give had come from dea heart.​—2 Cor 9:7.

HOW FO AVOID PROBLEMS AN GET TRU UM

14. Wat problems can come up fo some coupos?

¹⁴ Wen you trying fo plan one wedding dat make Jehovah happy, problems can come up. Like maybe you having hahd time keeping um simpo. Charlie, from da Solomon Islands, wen say, “Iz supa hahd fo pick who we goin invite to da reception cuz we get plenny frenz. An wea we stay, erybody expeck fo be invited.” Tabitha, who we wen talk about earlia, wen say, “Iz normal fo have big receptions wea I live. Wen take long time fo oua parents be ok wit us ony inviting bout 100 peopo.” Sarah, from India, wen tell, “Some peopo focus too much on wat oddas tink about dem. Like my cuzins, dea weddings wuz big an all fancy. So I wen feel da presha fo have one even bigga one.” Wat can help you get tru dese kine problems an odda ones dat can come up?

15. How come iz importan fo pray wen you planning yoa wedding?

¹⁵ Keep praying wen you stay planning yoa wedding. Pray to Jehovah an tell um eryting you stay stressing out about. (Php 4:6, 7) You can ask him fo help you make good choices, stay calm, an be strong enuff fo do tings dass diffren from wat oddas expeck you fo do. (1 Pet 5:7) Wen you see Jehovah ansa yoa prayas, yoa trus in him goin come moa strong. Tabitha, who we had talk about earlia, wen say, “Me an my fiancé wuz sked dat we wuz goin fight wit each odda an get into it wit oua family. So erytime we wen talk about wedding plans, we wen make shua fo pray. An Jehovah had help us fo stay calm an show each odda respeck.”

16-17. How can talking tings out help wit planning one wedding?

¹⁶ Talk nice an wit respeck. (Smart Guys 15:22) Az one coupo, you gotta make plenny decisions fo yoa wedding. Like picking one date, how much money you goin spen, who you goin invite, an plenny odda stuff. Befoa you make one choice, go ova yoa options togedda an talk about any Bible truts an any advice you had get from solid braddahs an sistahs fo help you. Wen you talking wit each odda an wit oddas about wat you like, be nice an flexible. If yoa parents or one close family memba ask you fo do someting at yoa wedding, try do um if you can, cuz dis one spesho day fo dem too. If you no can do um, try tell um how come in one nice way. (Col 4:6) Make um clear to yoa ohana dat da main ting you like iz fo have one happy wedding dat show respeck to Jehovah.

¹⁷ If yoa parents not in da trut, can be hahd fo tell dem wat you like at yoa wedding. But you can help dem undastan yoa choices. Santhosh, one braddah in India, wen tell, “Oua families wanted us fo have Hindu customs az paht of oua wedding. Wen take long time fo me an my fiancée explain oua choices to dem. We had try fo do some of da stuff dey wanted in oua wedding, az long az it neva hurt Jehovah. Like, we had change up da food from wat we wanted at da reception, to wat dey wanted. An we had choose fo not have singing an dancing cuz oua ohana wuzn’t use to dat.”

18. Wat can help you make shua dat da wedding day go smooth? (1 Fo Da Corint Peopo 14:40) (Go look da picha.)

¹⁸ Plan good. Wen you organized, you not goin be so stress out on da day of yoa wedding. (Read um 1 Fo Da Corint Peopo 14:40.) Wayne, from Taiwan, wen tell, “Coupo days befoa da wedding, we wen hui up wit some of da guys who wuz goin help us out. We had talk about da plans fo dat day, an practice pahts fo da wedding fo make shua tings go smooth.” Show respeck fo yoa guests by doin yoa bes fo keep tings on time.

19. Wat can help you make shua eryting go good at yoa wedding reception?

¹⁹ You can avoid plenny problems wen you tink about wat can happen an how you can hando um. (Smart Guys 22:3) Fo exampo, if iz normal wea you live dat peopo jus show up wen dey not invited, try tink about wat you can do so dis no happen. An if you get any family dass not in da trut, make shua dey kno wat fo expeck, an wat you believe wen come to wedding customs. Can share wit dem da article “What Happens at a Wedding of Jehovah’s Witnesses?” on jw.org. Fo make shua eryting go good an no get outa hand at da reception, try ask one braddah you trus fo be in charge an watch ova eryting dat happen ova dea. (John 2:8) Wen you make clear to him wat you like at yoa wedding, den he can help make shua eryting go good an how you want um fo be.

20. Wass good fo one coupo rememba about dea wedding?

²⁰ Wen you tink bout all da tings you gotta do fo yoa wedding, can feel like a lot. But rememba, yoa wedding iz jus one day. Iz da start of one beautiful life serving Jehovah togedda. Do yoa bes fo keep yoa wedding simpo an respeckful. Trus Jehovah, cuz wit his help you goin have no regrets an goin feel happy weneva you tink about yoa wedding.​—Songs 37:3, 4.