Copy How Jehovah Stay Humbo

1. Wass unreal about how humbo Jehovah stay?

WEN you look at govament leadas today, you tink dey humbo? Probly not. But, Jehovah iz humbo even tho he get da mos powa. (Songs 113:5-8) Nobody stay az humbo az Jehovah. Wateva he do, he no get big head. In dis lesson, we goin go ova four ways how Jehovah ack an show he humbo. An we goin see how Jesus copy his Faddah. All dis goin help us come moa close to Jehovah an be moa humbo like him.

JEHOVAH IZ EASY FO TALK TO

2. Wat Songs Fo God 62:8 tell us about Jehovah? (Go look da picha.)

² Mos times peopo who get big head iz not easy fo talk to, cuz dey tink dey betta den oddas an no treat oddas nice. But Jehovah stay way diffren! Cuz he humbo, he make um easy fo us pray to him an tell him eryting we tink an feel. (Read um Songs Fo God 62:8.) Jus like one faddah dat like kno wat his kids worry about, Jehovah really like hea oua prayas. We kno dis, cuz he had plenny of dese kine prayas put in da Bible. (Josh 10:12-14; 1 Sam 1:10-18) But wat if we feel like we no can pray to Jehovah, cuz of all da times we wen jam up?

3. How we kno fo shua dat Jehovah like us pray to him all da time?

³ We should pray to Jehovah no matta how bad we feel about ouaself. How come? In Jesus story about da los boy, he wen say Jehovah wuz like one faddah dat had one boy who wen do plenny bad tings. Cuz da boy wen jam up plenny, he wen feel dat his faddah neva like him back in da family. How da faddah reack wen da boy had come back? Jesus wen tell dat az soon az da faddah spock him, “he run to his boy. He hug his boy an kiss him.” (Luk 15:17-20) Jehovah iz jus like dat faddah. Az soon az we pray cuz we worry or bum out about someting bad we wen do, he lissen real good. (Sad Song 3:19, 20) Jehovah get plenny pity fo us, an like da faddah who wen run to his boy, He let us kno dat he love an kea fo us. (Isa 57:15) How Jehovah “run to us” today? Plenny times he use da eldas an oua family an frenz in da hui fo help us feel betta. (Jam 5:14, 15, NWT) Jehovah give dis help cuz he like us stay close to him.

4. Wat wen show dat Jesus wuz easy fo talk to?

⁴ Jesus copy his Faddah. Like his Faddah, he humbo. Dass why wen Jesus wuz on eart, peopo wen feel comfortable goin up to him fo ask him questions. (Mar 4:10, 11) Wen he had ask dem wat dey wuz tinking about someting, dey neva hold back from telling him how dey really feel. (Mat 16:13-16) An wen dey wen jam up, dey no wuz sked of wat Jesus would do to dem. Dey wen kno dat Jesus wuz nice, he show pity, an wuz patient. (Mat 17:24-27) Cuz Jesus had copy his Faddah so good, his followas wen get fo kno Jehovah betta. (John 14:9) Dey could see how humbo Jehovah stay an how he wanted dem fo be close to him. He no wuz like da high makamaka religious leadas dat time who neva kea about dem.

5. How come moa easy fo peopo talk to us wen we humbo?

⁵ How we can copy Jehovah? Wen we learn fo be moa humbo, goin be moa easy fo oddas come talk to us. If we not humbo, we could come jealous of oddas, tink we betta den dem, an no let um go wen dey hurt us. If we make lidat, nobody goin like come by us. (Col 3:12-14, NWT) Eldas gotta make shua dat braddahs an sistahs in da hui no feel sked fo go talk to dem. Fo do dis, da eldas gotta be wit dem on da regula. Dis mean dey goin do eryting can fo be at da meetings in-person, radda den goin to da meetings online. An weneva dey can, dey go wit da braddahs an sistahs preaching house-to-house. Da betta da braddahs an sistahs get fo kno da eldas, da moa easy goin be fo dem ask fo help.

JEHOVAH IZ FLEXIBLE

6-7. Wat exampos show dat Jehovah wuz flexible wen his peopo wen pray to him?

⁶ Peopo dat not humbo tink dea way da bes an no like change dea mind. But cuz Jehovah humbo, he flexible even tho he always kno da bes way fo do someting. Try look how he had deal wit Moses sistah, Miriam. Her an Aaron wen talk stink about dea braddah Moses. Dis wuz real bad cuz Moses wuz Jehovah’s rep. So really Miriam no wuz showing respeck to Jehovah. Jehovah wuz supa mad at Miriam an wen give her leprosy. But afta Aaron wen ask Moses fo help her, Moses wen beg Jehovah fo heal her. So wat Jehovah wen do? Cuz he humbo, he wen lissen to Moses an wen heal Miriam. Jehovah not like proud peopo dat no like change dea mind.​—Cens 12:1-15.

⁷ An we see how humbo Jehovah stay wen we tink about how he wen lissen to King Hezekiah. Jehovah wen sen his prophet Isaiah to da king fo tell him he wuz goin mahke. Hezekiah wen cry an beg Jehovah fo heal him. Jehovah wen lissen an wen let him live fo 15 moa years. (2 Ki 20:1, 5, 6) Fo shua Jehovah kea fo peopo, an cuz he humbo, he like lissen dem.

8. Wat exampos show dat Jesus iz flexible? (Mark 3:1-6)

⁸ Jesus copy his Faddah. Wen Jesus wuz on eart, he wen do good tings fo oddas weneva he had chance. One way he did dis wuz wen he had heal peopo on da Sabbath, even tho da religious leadas wen tink dat wuz wrong. (Read um Mark 3:1-6.) Jesus iz still flexible wen he look afta Jehovah’s peopo today. Like wen somebody in da local hui sin mayjah, Jesus iz patient wit dem so dey get chance fo change.​—Jesus Show 2:2-5.

9. How we can be somebody dass flexible? (Go look da pichas.)

⁹ How we can copy Jehovah? We gotta learn from Jehovah how fo tink an ack so we can be flexible. (Jam 3:17, NWT) Parents dat copy Jehovah no expeck dea kids fo do tings dey no can do. Jacob iz one good exampo of dis in Da Start 33:12-14. Humbo an flexible parents no goin compare one kid wit anodda. Eldas gotta be flexible too. One way da eldas do dis iz wen dey no push wat dey like. If mos of da eldas like go wit someting else, he goin support um if no go agains Bible truts. (1 Tim 3:2, 3) All us should try fo undastan how oddas tink an feel, even if we no feel da same way. (Rome 14:1) We like erybody kno us az someone dass flexible an “not hard head.”​—Php 4:5, NWT.

JEHOVAH IZ PATIENT

10. How Jehovah wen show he patient?

¹⁰ You probly kno dat high makamaka peopo no like wen oddas make dem wait. Dey not patient. Jehovah not lidat. He moa patient den anybody! Back in Noah’s day, Jehovah sed dat He wuz goin wait 120 years befoa he wipeout all da bad peopo. (Start 6:3) Noah had time fo raise his kids an build da big boat wit his ohana. Layta on, wen Abraham wuz asking plenny questions about Sodom an Gomorrah getting wipeout, Jehovah neva get all irraz an wen lissen him. Somebody dass not humbo coulda sed, “Who you tink you asking me all dese questions?” But cuz Jehovah humbo, he wuz patient wit Abraham.​—Start 18:20-33.

11. Like tell at 2 From Peter 3:9, how come Jehovah patient in oua day?

¹¹ Jehovah show he patient in oua day too. He waiting fo da time he wen set fo bring da end. How come he patient? “He like erybody fo come sorry an no do all da bad kine stuff no moa. He no like nobody get cut off from him!” (Read um 2 From Peter 3:9.) Wuz fo notting Jehovah patient? No! Millions of peopo wen come his frenz. An we like plenny moa get chance fo do dat too. But Jehovah no goin stay patient foeva. Jehovah love peopo, but he not goin let dem keep doing wateva dey like. He goin hemo bad peopo foeva.​—Hab 2:3.

12. How Jesus copy da way Jehovah stay patient?

¹² Jesus copy his Faddah. Fo tousands of years, Jesus copy how Jehovah patient. He had see Satan tell bulais about Jehovah an da guys dat worship Him. (Start 3:4, 5; Job 1:11, NWT; Jesus Show 12:10, NWT) Jesus had see plenny peopo suffa tru pilau tings. Try tink how much Jesus no can wait fo “bus up da bad kine stuff da Devil stay do.” (1 John 3:8) Wat help Jesus fo wait fo Jehovah give him da green light fo do dis? One ting iz cuz Jesus iz humbo. He kno dat Jehovah da one fo choose wen da time stay right fo do um.​—Jesus Guys 1:7.

13. How come Jesus wuz patient wit his aposals?

¹³ Wen Jesus wuz on eart, he wuz patient wit his aposals. Fo exampo, da aposals wen argue ova an ova about who da numba one guy, but Jesus neva give up on dem. (Luk 9:46; 22:24-27, NWT) He wen kno dat bumbye dey wuz goin learn fo be moa humbo. You eva wen make da same mistake ova an ova? Den garanz you feel real happy you get one humbo an patient King!

14. Wat goin help us be moa patient?

¹⁴ How we can copy Jehovah? Wen we “kno how Jesus tink”, dat goin help us tink an ack like Jehovah. (1 Cor 2:16, NWT) So how we can tink moa like Jesus? No moa one shortcut. We gotta read about Jesus life in da Bible. Den we gotta make time fo tink about wat Jesus did an why he wen do um. An we gotta ask Jehovah fo help us be humbo an patient jus like Jesus. Da moa we tink like Jesus, da moa we goin be like God wen we show we patient wit ouaselfs an oddas.​—Mat 18:26-30, 35.

HUMBO PEOPO STAY SPESHO TO JEHOVAH

15. Wass some exampos dat show dat Jehovah love humbo peopo? (Songs Fo God 138:6)

¹⁵ Read um Songs Fo God 138:6. Try tink, even tho Jehovah da Mos Importan One in da universe, humbo peopo stay spesho to him! We go look at some exampos of humbo peopo who wuz importan to Jehovah ova da years. Some of dem maybe we no tink of right away, but Jehovah wen put um in da Bible. One of dem wuz Deborah, who wen work fo Isaac & Jacob’s ohana fo about 125 years! Even tho we donno too much about dis loyal wahine, Jehovah had make shua dat Moses wen write down someting fo show dat Jacob an his family wen love her plenny. (Start 24:59; 35:8) Hundreds of years layta, Jehovah wen pick one young shepherd boy name David fo be da Israel king. (2 Sam 22:1, 36) Not too long afta Jesus wuz born, Jehovah wen sen angels to one humbo group of shepherds. He wen give dem da spesho chance fo kno firs, dat da Messiah wuz jus born in Betlehem. (Luk 2:8-11) An wen Joseph an Mary wen bring Jesus to da temple, Jehovah had give two kupunas, Simeon an Anna, da spesho chance fo see His Boy. (Luk 2:25-30, 36-38) Even tho Jehovah da mos importan, “still yet, [he] see wass happening wit da peopo dat not importan”!

16. How Jesus wen copy how his Faddah treat oddas?

¹⁶ Jesus copy his Faddah. Like his Faddah, Jesus wen love humbo peopo. He wen teach “regula guys dat neva go school fo learn” da truts about God’s Govament. (Jesus Guys 4:13; Mat 11:25) Jesus wen heal da sick in one way dat show he get love an respeck fo dem. (Luk 5:13) On da night befoa he had mahke, Jesus wen wash da feet of his aposals, someting dat ony worka guys would do. (John 13:5) An befoa he had go up to heaven, he wen give all his followas, even us today, da mos importan work fo help oddas live foeva.​—Mat 28:19, 20.

17. How we can show love an respeck to oddas? (Go look da picha.)

¹⁷ How we can copy Jehovah? We show love an respeck fo peopo wen we preach to erybody, no matta wea dey come from, dea skin color, or how much skool dey wen go. An we show love an respeck fo oua braddahs an sistahs no matta wat kuleana we get in da hui. (Php 2:3) We make Jehovah happy wen we “go all out” fo be humbo an treat oddas wit love an respeck.​—Rome 12:10; Zef 3:12.

18. How come you like copy how humbo Jehovah stay?

¹⁸ Wen we try oua bes fo copy how humbo Jehovah stay, we goin be moa easy fo talk to, moa flexible, an moa patient. An we goin show love an respeck, jus like Jehovah. Wen we go all out fo be moa like oua humbo God, dat goin make us moa spesho to Him!​—Isa 43:4.