Wat God’s Govament Goin Do Fo Us?

Wat da Bible tell

God’s Govament goin wipe out all da odda govaments an goin be in charge of da whole world. (Daniel 2:44; Wat Jesus Show John 16:14) Afta dat, dis wat His Govament goin do…

• Hemo all da bad guys dat stay makin peopo suffa. “But da peopo dat no stay do wass right, dey goin get wipe out so dat no mo dem on top da land... God goin hemo dem from dea.”—Wat Da Smart Guys Tell 2:22.

• Stop all da fighting. “An all ova da world, [God] make peopo pau fight so dat no mo war.”—Songs Fo God 46:9.

• Give erybody nuff fo live an fo feel safe. “Dat time, erybody goin sit down undaneat his grape plant an his fig tree, an nobody goin make um come sked.”—Micah 4:4.

• Make da whole world one paradise. “…da place wea no mo watta, dey goin feel good inside. Da place wea no mo nobody, goin get plenny flowas…”—Isaiah 35:1.

• Give erybody good fun kine work an not goin be fo notting. “Peopo goin build house an live inside um. Dey goin plant grape plants an eat da grapes. Not like befo time, wen you build house, odda peopo take um away an live inside um. O you plant stuff, odda peopo take um away an eat um. Dass how was!”—Isaiah 65:21, 22.

• Give us perfeck health. “…nobody… goin tell, ‘I stay sick!’”—Isaiah 33:24.

• Make um so nobody get old no moa. “…his body goin come new jalike one small kid. Jalike wen he was young.”—Job 33:25.

• Bring da mahke guys back to life. “…cuz da time goin come wen all da mahke guys goin hear [Jesus’] voice. An dey goin come outa dea graves.”—John 5:28, 29.