How Come Witnesses Fo Jehovah No Celebrate Easter?
Da Wrong Stuff Peopo Tink Bout Us
Wat Peopo Tink: Da reason why Witnesses no celebrate iz cuz dey not Christians.
Da Trut: We believe Jesus goin save us, an we do oua bes fo “make jalike him.”—1 Peter 2:21; Luke 2:11.
Wat Peopo Tink: You no believe Jesus wen come back to life afta he wen mahke.
Da Trut: We do believe dat Jesus wen come back to life. Iz supa importan fo us believe dat, an we preach bout um too.—1 Corint 15:3, 4, 12-15.
Wat Peopo Tink: You no kea dat yoa kids stay missing out on da fun.
Da Trut: We love oua kids an do wateva we can fo make um happy.—Titus 2:4.
How Come Witnesses Fo Jehovah No Celebrate Easter?
Cuz no moa nottin bout Easter in da Bible.
Jesus wen tell us fo rememba wen he had mahke, not fo celebrate wen he had come back alive. Dass why we get one spesho meeting ery year fo rememba wen Jesus had mahke.—Luke 22:19 NWT, 20.
We believe dat Easter traditions wen come from supa old fertility ceremonies dat God no like. God tell fo no “go down in front da odda gods,” an cuz he “one Jealous God”, he no like us do dat kine tings.—Outa Egypt 20:5; 1 Kings 18:21.
Da reason we no celebrate Easter iz cuz no stay in da Bible. Da Bible tell us fo “tink firs so you kno wat fo do” instead of jus following wat erybody else stay doin. (Smart Guys 3:21; Matthew 15:3) Wen peopo ask wat we believe bout Easter, we tell um, an we goin respeck wat dey choose fo do.—1 Peter 3:15 NWT.