How Come Witnesses Fo Jehovah No Take Blood Transfusions?
Da Wrong Stuff Peopo Tink Bout Us
Wat Peopo Tink: Witnesses Fo Jehovah no believe in getting help from da docta.
Da Trut: We like da bes kine help fo us an oua ohana. We like go to doctas who good at wat dey do witout usin blood. Doctas stay coming up wit all kine new treatments fo Witnesses Fo Jehovah an erybody make out cuz of dat. In plenny places, all kine peopo can now choose fo no take blood. Dat make um so dat dey no need go tru problems jalike catching blood diseases, getting bad immune reactions or even wen peopo make mistakes in da hospital.
Wat Peopo Tink: Witnesses Fo Jehovah believe dat dea fait goin make dem all betta.
Da Trut: We no believe dat ony fait can make you healty.
Wat Peopo Tink: Da treatments dat no use blood stay moa expensive.
Da Trut: Overall, no cost too much.a
Wat Peopo Tink: Plenny Witnesses, even dea kids, die ery year cuz dey no like take blood.
Da Trut: Dass not tru. Doctas do differen kine mayjah surgeries all da time witout using blood.b Da guys who no take blood usually do good or even betta den da guys who take um.c Da trut iz, not garans dat you goin live jus cuz you take blood.
How Come Witnesses Fo Jehovah No Take Blood?
Fo us, dis one religion ting moa den one medical ting. Da Bible tell us real clea fo no take in blood cuz dass wea da life stay. Cuz we lissen an respeck God, we goin do wat he tell wen come to blood.—(Da Start 9:4; Da Prieses 17:10, 14; Da Rules Secon Time 12:23; Jesus Guys 15:28, 29)
Da Tinking Wen Change
Mayjah kine surgeries can turn out good witout using one blood transfusion.
Befoa, da doctas used to tink dat if dey no give blood fo shua tings goin go bad an peopo goin mahke, but dat tinking wen change. Fo exampo, one medical article in 2004 wen tell “da techniques dat wuz made fo da Witnesses Fo Jehovah, dat goin be da norm.”d Den in 2010, one article in da magazine Heart, Lung and Circulation wen tell dat “surgeries witout one blood transfusion should be da way it’s done all da time an not ony fo Witnesses Fo Jehovah.”
All ova da world, choke doctas stay usin spesho techniques fo no waste blood wen dey doin mayjah kine surgery so dat dea patients no even need one blood transfusion. Dese techniques getting used even in pooa countries, an peopo who not Witnesses Fo Jehovah stay asking fo um.
a Look Transfusion and Apheresis Science, Volume 33, No. 3, p. 349.
b Look The Journal of Thoracic and Cardiovascular Surgery, Volume 134, No. 2, pp. 287-288; Texas Heart Institute Journal, Volume 38, No. 5, p. 563; Basics of Blood Management, p. 2; an Continuing Education in Anaesthesia, Critical Care & Pain, Volume 4, No. 2, p. 39.
c Look The Journal of Thoracic and Cardiovascular Surgery, Volume 89, No. 6, p. 918; an Heart, Lung and Circulation, Volume 19, p. 658.
d Continuing Education in Anaesthesia, Critical Care & Pain, Volume 4, No. 2, page 39.