Gotta Be Paht Of One Religion?

Da Bible’s ansa

Yeah, cuz God like peopo come togedda fo worship. Da Bible tell, “’An we go tink bout how fo help each odda do all kine good kine stuff an show peopo choke love an aloha. No stop come togedda fo meet each odda.”​—Fo Da Hebrew Peopo 10:24, 25.

Jesus wen show dat his followas wuz goin hui up wen he sed, “If all you guys show love an aloha fo each odda, den erybody goin know you my guys.” (John 13:35) Da main way Jesus guys show love, iz wen dey get togedda fo worship on da regula in dea local huis. (1 Fo Da Corint Peopo 16:19) All togedda, dey would come one ohana all ova da world.​—1 From Peter 2:17.

No nuff jus be paht of one religion

Da Bible show dat peopo should come togedda fo worship God, but da Bible teach no nuff fo jus be paht of one religion. Fo make God happy, one person’s religion gotta affeck how he live eryday. Fo exampo, da Bible tell, “Da guy dat stay religious fo real kine, an no do notting pilau, he da one goin kokua da peopo dat get hard time—da kids dat no mo faddah o muddah, an da wahines dat no mo husban fo take kea dem. Dat kine guy, he no goin let da peopo inside da world make him do bad kine stuff.”​—From James 1:​27.