Firs King Of Israel

Jehovah wen give da Israel peopo leadas, but dey wanted one king. Dey tell Samuel: ‘How come all da odda countries aroun us get kings? We like one too!’ Samuel wen feel dis wuz bad, so he wen pray to Jehovah about um. Jehovah tell him: ‘You not da one dey no like. Az me da one dey no like! Tell dem dey can have one king, but da king goin tell um fo do plenny stuffs.’ Still yet, da peopo tell: ‘We no kea! We like one king!’

Jehovah wen tell Samuel dat one guy name Saul wuz goin be da firs king. So den wen Saul had visit Samuel at Ramah side, Samuel pour oil on his head fo show God wen pick Saul fo be da king.

Layta, Samuel wen hui up da Israel peopo fo show dem dea new king. But dey no could find Saul anywea. You kno how come? Cuz he wuz hiding in da luggage, az why! Wen dey had find Saul, dey wen make him go in fron erybody. Saul wuz da tallest guy dea, an he wuz one real good looking braddah. Samuel tell: ‘Hea, dis da guy Jehovah wen pick.’ Da peopo yell: ‘Chee-hoo! We like you rule long time!’

At firs, King Saul wen lissen to Samuel an had do wat Jehovah tell. But den he wen change. Fo exampo, da king not suppose to give da sacrifices. Had dis one time, Samuel wen tell Saul fo wait til he come fo make da sacrifice. Samuel neva go right away so Saul wen tell: ‘I not goin wait, I goin do um myself.’ An dass wat he had do. How Samuel wen feel? He tell Saul: ‘You shoulda lissen to Jehovah.’ You tink Saul wuz goin learn from dis, or wat?

Layta, wen Saul had scrap wit da Amalek peopo, Samuel tell Saul fo wipe out erybody. But Saul neva kill King Agag. Jehovah tell Samuel: ‘Saul wen bag from me, an he no lissen me no moa.’ Samuel come all bum out, an tell Saul: ‘Cuz you wen stop doing wat Jehovah tell, he goin pick anodda king.’ Wen Samuel wuz goin hele, Saul had try fo grab him. But den, Samuel’s coat wen rip. Den Samuel tell Saul: ‘Jehovah wen rip da kingdom away from you.’ Now Jehovah goin give da kingdom to somebody who wuz goin love an lissen him.