Young Sistahs, Work Hard Fo Come Solid Christians

1. Wat we gotta do fo come one solid Christian?

IS UNREAL fo see one kid grow up into one adult. Dey grow up right in front yoa eyes an az jalike dey neva need fo do notting. But fo come one solid Christian az not automatic, take plenny work.b (1 Cor 13:11; Heb 6:1) Fo do um, each of us gotta come real tight wit Jehovah. We need his good an spesho spirit fo help us work on qualities dat make him happy, learn skills dat can help, an make ready fo da kuleana we might get bumbye.​—Smart Guys 1:5.

2. Wat we learn from Da Start 1:27, an wat we going talk about in dis lesson?

² Jehovah wen make humans fo be one guy, o one wahine. (Read um Da Start 1:27.) Az easy fo see dat guys an wahines bodies stay diffren, but dey stay diffren in odda kine ways too. Try tink, Jehovah wen make guys an wahines fo do diffren kine tings, so dey need dakine qualities an skills dat going help dem fo take kea dea kuleana. (Start 2:18) In dis lesson, we going talk about wat one young sistah can do fo come one solid Christian. In da nex lesson we going talk about wat young braddahs can do.

WORK ON QUALITIES DAT MAKE GOD HAPPY

3-4. Wea young sistahs can find solid exampos fo copy? (Go look da picha.)

³ Da Bible talk about plenny solid wahines who wen love Jehovah an work fo him. (Go look on jw.org da article “Women in the Bible​—What Can We Learn From Them?”) Like da main scripcha talk about, dey “know how fo ack” an “can trus um bout eryting.” Not ony dat, sistahs can find odda solid Christian wahines who dey can copy in dea local hui.

⁴ Young sistahs, try tink about any solid sistahs you know whose exampo you can copy. Da qualities dey get is beautiful. Try tink how you can show da same kine qualities az dem. Now we going talk about three importan qualities solid Christian wahines need.

5. How come one solid Christian wahine gotta be humbo?

⁵ Fo be one solid Christian we gotta be humbo. If one wahine is humbo, she going have one good relationship wit Jehovah an wit oddas. (Jam 4:6) One exampo of dat is, one wahine dat love Jehovah going be humbo an going choose fo follow wat tell at 1 Fo Da Corint Peopo 11:3. Ova dea, Jehovah tell who get da kuleana fo be in charge of da local hui an da ohana.c

6. How young sistahs can learn fo be humbo like Rebecca?

⁶ We go look wat Rebecca wen do. All thru her life she was one smart wahine who wen know wat fo do an had da courage fo do um. (Start 24:58; 27:5-17) Same time, she had plenny respeck an was ready fo lissen. (Start 24:17, 18, 65) If you stay humbo like Rebecca an you back up da guys dat Jehovah wen give kuleana to, you going be one good exampo fo erybody in yoa ohana an in yoa local hui.

7. How young sistahs can copy Esther in knowing dea limits?

⁷ Knowing yoa limits is anodda quality dat all Christians need. Da Bible tell, “if you no tink dat you betta den erybody, den you can learn wass good fo do.” (Smart Guys 11:2) Esther wen know her limits an she wen trus God. Cuz she wen know her limits, she neva come high makamaka wen she wen come da queen. She wen lissen wat her olda cousin Mordecai wen tell her an wen follow um. (Est 2:10, 20, 22) You can show you know yoa limits wen you ask oddas fo good kine advice an use um.​—Titus 2:3-5.

8. From wat 1 Fo Timoty 2:9,10 tell, how dis quality going help one sistah be akamai wen she gotta choose how fo dress?

⁸ Esther wen show dis quality in anodda way. She was “real good looking wit one awesome figure”, but she neva try make erybody look at her. (Est 2:7, 15) Wat good kine tings sistahs can learn from wat Esther wen do? One ting stay dea at 1 Fo Timoty 2:9, 10. (Read.) Da aposal Paul wen tell Christian wahines fo dress good an show respeck. Da Greek words he wen use hea show dat one wahine should always dress in one good kine way, show respeck, an tink about wat oddas feel about wat she wear. We proud of you sistahs dat lissen to dis advice an dress in one way dat show respeck fo oddas!

9. Wat us can learn from wat Abigail wen do?

⁹ Good judgement is anodda quality Christian sistahs need fo come solid. Dat mean you able fo know wass right an wass wrong, an den can choose da right ting fo do. We go look wat Abigail wen do. Her husband wen choose fo do someting so bad dat was going jam up erybody who was living wit him. Abigail wen ack fas an her good judgement wen save dea lifes. (1 Sam 25:14-23, 32-35) Having good judgement can help us fo know wen fo say someting an wen fo no say notting. An dat going help us show we kea about oddas, witout being too niele.​—1 Tess 4:11.

LEARN SKILLS DAT CAN HELP

10-11. If you know how fo read an write good, how going be good fo you an oddas? (Go look da picha.)

¹⁰ One wahine gotta learn skills. Some skills she wen learn from small kid time going help her thru her whole life. We go look some exampos.

¹¹ Learn how fo read an write good. In some cultures az not importan fo wahines learn how fo read an write. But learning how fo do dis good is importan fo ery Christian.d (1 Tim 4:13) Even if az hard, no let notting stop you from learning how fo read an write good. How dat going be good fo you? Dat kine skills can help you fo find an keep one job. You going be able fo learn an teach da Bible moa betta. Da bestes part, you going get moa closa to Jehovah wen you read da Bible an tink about um.​—Josh 1:8; 1 Tim 4:15.

12. How Smart Guys 31:26 can help you fo lissen an talk story good?

¹² Learn how fo communicate wit peopo good. Az importan fo Christians learn how fo do dis. James wen write in da Bible how fo do um, “erybody gotta lissen real good firs befo dey talk.” (Jam 1:19) Wen you really lissen to oddas wen dey talk, you show you kea about dem an feel fo dem. (1 Pet 3:8) If you not shua you undastan wat somebody saying o how he feel, ask um moa questions. Den stop an tink befoa you start fo talk. (Smart Guys 15:28) Try ask yoaself, wat I about fo say az true an going make oddas feel good o wat? Is it nice an showing dem respeck? Try learn from solid sistahs who can lissen an talk story good. (Read um Smart Guys 31:26.) Pay attention to wat dey tell an how dey tell um. Da betta you know how fo communicate, da betta yoa relationship wit oddas going be.

13. How you can learn fo take kea one home? (Go look da picha.)

¹³ Learn how fo take kea one home. In plenny places da wahine do mos a da house work. Yoa maddah o anodda sistah can help you fo learn da skills you need fo do um good. One sistah name Cindy tell, “One of da bes tings my maddah wen teach me is dat hard work make you happy. Learning some tings like how fo cook, clean, sew, an shop wen make my life moa easy, an wen help me fo do moa fo Jehovah. An mom wen teach me how fo show aloha, an cuz a dat I got fo meet some awesome braddahs an sistahs dat I can learn from.” (Smart Guys 31:15, 21, 22) One hard working wahine dat show aloha an take kea one house is one blessing fo her ohana an da local hui.​—Smart Guys 31:13, 17, 27; Jesus Guys 16:15.

14. Wat you wen learn from wat wen happen to Crystal, an wat you gotta rememba?

¹⁴ Learn how fo take kea yoaself. Az importan fo all Christians learn how fo take kea demselfs. (Php 4:11) One sistah name Crystal tell, “My parents wen help me choose wat classes fo take in high school so I would learn skills dat can help out in life. My faddah wen tell me fo go take accounting classes, an cuz I wen do um, dat wen help me plenny. But you gotta learn moa den jus skills fo get one job, you gotta try learn how fo budget an no spen moa money den you get. (Smart Guys 31:16, 18) If you stay happy wit wat you get awready an no buy tings you no can afford, den you going be able fo do moa fo Jehovah.​—1 Tim 6:8.

MAKE READY FO YOA FUTURE

15-16. How come single sistahs stay spesho? (Mark 10:29, 30)

¹⁵ Wen you work on qualities dat make God happy an learn skills, dat going help you choose wat fo do layta in life. Try look some tings you can do.

¹⁶ You can choose fo stay single. Jalike Jesus wen tell, some wahines choose not fo marry, even if in dea culture dey get presha fo get married. (Mat 19:10-12) Some choose fo stay single cuz a odda reasons. You can know fo shua dat Jehovah an Jesus no look down on you if you stay single. All ova da world, single sistahs stay one mayjah blessing fo da local hui. Cuz dey love an kea fo oddas, dey come jalike sistahs an maddahs to plenny.​—Read um Mark 10:29, 30; 1 Tim 5:2.

17. How one young sistah can make ready now fo work fo Jehovah full-time?

¹⁷ You can work fo Jehovah full-time. All ova da world, da sistahs do mos a da preaching work. (Songs 68:11) You can make one plan fo work fo Jehovah full-time? Maybe can work az one pionea, help wit construcktion, o work at Bethel. Pray about yoa goal. Talk to oddas who wen reach dat goal awready an try find out wat you gotta do fo qualify. Den make one plan dat work fo you. Wen you work full-time fo Jehovah, dat open da door fo you do plenny awesome tings fo him.

18. How come one sistah gotta tink good about who she going choose fo be her husband? (Go look da picha.)

¹⁸ You can choose fo get married. Da qualities an skills dat we wen talk about can help you fo come one good wife. If you like get married, you gotta tink good about who you going choose. Is one a da mos importan tings you eva going choose. You gotta rememba da braddah you marry going be yoa head. (Rome 7:2; Efe 5:23, 33) Try tink, is he one solid Christian? He put Jehovah firs in his life? He make smart choices? He admit wen he stay wrong? He respeck wahines? He get da skills fo help me stay tight wit Jehovah, fo take kea me, an he going be one good fren? He take kea his kuleana? Like da kuleana he get in da local hui, how he hando um? (Luk 16:10; 1 Tim 5:8) No foget, if you like find one good husband, you gotta be one good wife.

19. How come one wife’s kuleana az one helpa stay spesho?

¹⁹ Da Bible tell dat one good wife kokua her husband an stay “jalike him, but diffren.” (Start 2:18) Dis put da wife down o wat? No way. One wife’s kuleana az one helpa is spesho. Even da Bible talk plenny about how Jehovah stay one helpa. (Songs 54:4; Heb 13:6) One wife help her husband fo real kine wen she support him. Like wen da husband gotta make choices fo da family, she work wit him fo help tings come out good. Cuz she love Jehovah, she work fo make her husband’s rep moa betta. She do wat she can fo help oddas see da good kine qualities her husband get. (Smart Guys 31:11, 12; 1 Tim 3:11) You can make ready now fo come one wife by making yoa love fo Jehovah moa strong an by being one helpa to oddas at home an in da local hui.

20. Wat good kine tings one maddah can do fo her ohana?

²⁰ You can come one maddah. Afta you get married, you an yoa husband might have kids. (Songs 127:3) Az how come is good fo tink wat you need fo be one good maddah. Da qualities an skills we wen talk about in dis lesson going help you if you come one wife an maddah. Wen you show love, make nice kine, an be patient, you help yoa ohana fo be happy an yoa keiki going feel safe an loved.​—Smart Guys 24:3.

21. How we feel about oua sistahs an how come? (Go look da picha on da cova.)

²¹ We love you sistahs fo all you do fo Jehovah an his peopo. (Heb 6:10) You work hard on da qualities dat make Jehovah happy, you learn skills dat make yoa life an da guys aroun you moa betta, an you make ready fo yoa future. You stay supa spesho to Jehovah’s hui!