Young Braddahs, Work Hard Fo Come Solid Christians

1. Wat one braddah gotta do fo come one solid Christian?

KING David wen tell his boy, Solomon, “Be strong an show dat you one man.” (1 Ki 2:1-3, NWT.) Wat he wen tell stay importan fo all Christian braddahs today. Fo do dat, dey gotta learn fo lissen God’s laws an use Bible truts in eryting dey do. (Luk 2:52) How come is so importan fo young guys come solid Christians?

2-3. How come az importan fo one young braddah come one solid Christian?

² One Christian braddah get plenny tings he gotta do inside da ohana an in da local hui. Young braddahs, you probly wen tink about all da kuleana you can get in da future. Maybe you like be one pionea, one helpa guy in da local hui, an layta on one elda. Maybe you like get married an have kids. (Efe 6:4; 1 Tim 3:1, NWT.) Fo reach dese goals an do good at um, you gotta be one solid Christian.b

³ Wat going help you come one solid Christian? Get importan skills you gotta learn an be good at. Wat you can do now fo get ready fo da kuleana you might get in da future, an do um good?

STEPS FO BE ONE SOLID CHRISTIAN

4. Wea you can find good exampos fo copy? (Go look da picha.)

⁴ Choose good exampos fo copy. Da Bible get plenny exampos fo young braddahs copy. Dose braddahs from befoa wen love God an wen kea fo his peopo in all kine ways. Get good exampos of solid Christian braddahs inside yoa ohana an in yoa local hui too. (Heb 13:7, NWT.) An you get Jesus’ perfeck exampo. (1 Pet 2:21) Wen you study dese exampos, try tink hard about da qualities you like about dem. (Heb 12:1, 2, NWT.) Den figga out how you going copy dese braddahs.

5. How you can learn fo tink firs, an how come dass importan? (Songs Fo God 119:9)

⁵ Work on an “make shua you try hard an no foget . . . fo . . . tink firs so you know wat fo do.” (Smart Guys 3:21) One braddah who tink firs not going jus ack fas. He going tink befoa he choose wat fo do. So work hard fo learn how fo do dat, an keep doing um. How come? Mos young guys in da world today jus go wit wat dey tink o how dey feel. (Smart Guys 7:7; 29:11) T.V., movies, intanet, an social media can full on affeck da way you tink an ack. But how you can learn fo tink da right way? Start by learning Bible truts an tink about why dey stay good fo you do um. Den use dose Bible truts fo help you make choices dat going make Jehovah happy. (Read um Songs Fo God 119:9.) If you learn how fo tink lidat, dass one mayjah step fo come one solid Christian braddah. (Smart Guys 2:11, 12; Heb 5:14) We go look how tinking lidis going be good fo you in two ways. (1) how you ack wit sistahs an (2)  in making good choices about wat you going wear an how you look.

6. How tinking da right way going help one young braddah show respeck fo sistahs?

⁶ One braddah who tink da right way going show respeck fo wahines. Is natural an notting wrong fo one young braddah like get involved wit one Christian sistah. But one young braddah who tink good not going say, write, o do anyting dat would make her tink he like date her, wen he not even tinking about marrying her. (1 Tim 5:1, 2) If he dating one sistah, he going proteck her good rep by neva being alone wit her if no moa one chaperone.​—1 Cor 6:18.

7. How tinking da way Jehovah tink going help one young braddah choose wat fo wear an how fo make his hair?

⁷ Anodda way one young braddah show he tink da way Jehovah tink is he make good choices wit wat he wear an how he make his hair. Plenny times da guys dat design da clothes an make da ads fo um, live in one pilau way an dey no respeck Jehovah. Can see dea pilau tinking by da way da clothes stay designed, dey eidda supa tight o make guys look like wahines. One young guy dat like be one solid Christian going use Bible truts an good exampos in da local hui fo help him choose wat fo wear. He can ask himself, “Da stuff I choose show dat I tink like Jehovah an I respeck oddas? Oddas can see dat I serve Jehovah by da clothes dat I wear?” (1 Cor 10:31-33; Titus 2:6) One young braddah who tink good, not ony going have his braddahs an sistahs respeck him, but he going get Jehovah’s respeck too.

8. How one young braddah can learn fo be reliable?

⁸ Be reliable. One young braddah who reliable going work hard fo take kea all his kuleana. (Luk 16:10) Tink about Jesus’ perfeck exampo. He neva have one “I no kea” kine attitude, an he wen take kea da stuff he suppose to do. He wen finish all da work dat Jehovah wen give him, even wen was hard fo do. He loved peopo, speshly his followas, an he neva hold back give his life fo dem. (John 13:1) So copy Jesus an work hard fo finish all da work dat you get. If you donno how fo do um, be humbo an ask fo help from solid braddahs. No be lazy an no try do az litto az can. (Rome 12:11) Instead, finish da work you get, “go all out fo do um fo Da One In Charge! No do um jus fo odda peopo.” (Col 3:23) You not perfeck, so be humbo an no be shame fo admit wen you jam up.​—Smart Guys 11:2.

LEARN SKILLS DAT CAN HELP

9. How come one young braddah gotta learn good skills fo live?

⁹ Fo come one solid Christian braddah, you gotta learn skills. Dese going help you wit yoa kuleana in da local hui, keep one job fo take kea yoaself o yoa family, an get along good wit peopo. We go try look some a dese skills.

10-11. How would be good fo one young braddah an da local hui if he learn how fo read an write good? (Songs Fo God 1:1-3) (Go look da picha.)

¹⁰ Learn fo read an write good. Da Bible say dat one guy who read God’s word eryday an tink hard about um, going be happy an tings going turn out good fo him. (Read um Songs Fo God 1:1-3.) Wen he read da Bible eryday, he going know how Jehovah tink, an dat going help him fo tink betta an use wat he learn from da scripchas. (Smart Guys 1:3, 4) Need dat kine braddahs in da local hui. How come?

¹¹ Oua braddahs an sistahs need solid braddahs who can give good advice an can teach from da Bible. (Titus 1:9) If you can read an write good, you going be able fo give good talks an comments dat going build up oua braddahs an sistahs. An you going be able fo take good notes wen you study an lissen to talks at da meetings an big kine meetings. Dese notes going help build up yoa own faith an help you build up oddas too.

12. Wat going help you communicate good?

¹² Learn how fo communicate good. One Christian braddah gotta learn how fo communicate good. One braddah who know how fo do dat can undastan how peopo tink an feel. (Smart Guys 20:5) He can learn how peopo tink an feel by how dea voice sound, how dea face look, an by dea body language. No can learn dis witout spending time wit peopo. If you ony always use stuff like email o texting fo communicate wit oddas, den you not going get betta at communicating wit peopo face to face. Az why good fo find ways fo talk wit peopo in person.​—2 John 12.

13. Wat else one young braddah gotta learn? (1 Fo Timoty 5:8) (Go look da picha.)

¹³ Learn fo support yoaself. One solid Christian braddah gotta be able fo take kea himself an his ohana. (Read um 1 Fo Timoty 5:8.) In some places, young braddahs can learn one trade from dea faddah o somebody else in dea family. In odda places, one young guy can learn one skill o one trade wen he still in high school. Eidda way, is good fo learn one skill dat going help you find one job. (Jesus Guys 18:2, 3; 20:34; Efe 4:28) Get da rep of being one hard worka who stick to someting til pau. If you do dat, you going get moa chance fo find one job an keep um. Da qualities an skills we wen talk about stay importan fo one Christian braddah take kea wateva kine tings he going do in da future. We go check out some a dese tings.

MAKE READY FO YOA FUTURE

14. How one young braddah make ready fo work fo Jehovah full-time?

¹⁴ Work fo Jehovah full-time. Plenny solid Christian braddahs wen start fo work fo Jehovah full-time wen dey was still young. Pioneering help one young braddah learn fo work good an get along wit anykine peopo. It help um fo be smart wit his money an no spen moa den he get. (Php 4:11-13) One good way fo get into full-time service is fo part-time pionea. Plenny work az one part-time pionea fo a while, an dat help um make ready fo be one regula pionea. Pioneering can open da door fo work fo Jehovah full-time in odda ways, like being one construcktion servant o one Bethelite.

15-16. Wat can help one young braddah qualify fo be one helpa guy o one elda?

¹⁵ Helpa guy o elda. Christian braddahs should have da goal fo qualify az eldas in da local hui so dey can work fo dea braddahs an sistahs. Da Bible tell dat da braddahs who like do dis, “like do one good kine work.” (1 Tim 3:1, NWT.) Befoa coming one elda, one braddah gotta qualify fo be one helpa guy. Dey kokua da eldas in plenny diffren ways. Both da eldas an da helpa guys, dey humbo an work fo da braddahs an sistahs, an dey go all out fo preach. Young braddahs in dea late teens can qualify fo be helpa guys. An one solid helpa guy in his early 20’s can qualify fo be one elda.

¹⁶ How you can qualify fo come one helpa guy o one elda? Da Bible tell da qualities you need. But rememba, dese qualities come from da Bible, yoa love fo Jehovah, yoa ohana, an da local hui. (1 Tim 3:1-13; Titus 1:6-9; 1 Pet 5:2, 3, NWT.) Try hard fo undastan ery quality real good. Pray to Jehovah fo help you qualify.c

17. How can one young braddah get ready fo be one husband an head of da ohana? (Go look da picha.)

¹⁷ Husband an head of da ohana. Jesus wen show dat some solid Christian braddahs going stay single. (Mat 19:12) But if you choose fo get married, get moa tings you gotta take kea az one husband an head of da ohana. (1 Cor 11:3) Jehovah expeck one husband fo love his wife, kea fo wat she need, be one good fren to her, an help her stay close to Jehovah. (Efe 5:28, 29) Da qualities an skills we wen talk about earlia in dis lesson, like tinking how Jehovah tink, respecking wahines, an being reliable, going help you be one good husband. Dat going help you be ready fo take kea wat you gotta az one husband an head of da ohana.

18. How one young braddah can get ready fo be one faddah?

¹⁸ Faddah. Afta you get married, maybe you going have kids. Wat you can learn from Jehovah about being one good faddah? Get plenny tings you can learn. (Efe 6:4) Jehovah wen tell his boy, Jesus, out loud dat He love him an dat He happy cuz a him. (Mat 3:17) If you come one faddah, make shua you let yoa kids know you love dem all da time. Ery time tell dem all da good tings dey do. Faddahs who copy Jehovah’s exampo help dea kids come solid Christian braddahs an sistahs. You can get ready fo dis now by taking kea oddas inside yoa family an in da local hui, an learning how fo tell dem you love dem an dey mean plenny to you. (John 15:9) Dis going help you be one good husband an faddah layta on. But til den, you going be worth plenny to Jehovah, yoa ohana, an da local hui.

WAT YOU GOING DO NOW?

19-20. Wat going help young guys fo come solid Christian braddahs? (Go look da picha on da cova.)

¹⁹ Young braddahs, not automatic you going come one solid Christian braddah. You gotta choose good exampos fo copy, tink like Jehovah, be reliable, learn skills dat going help you out, an get ready fo wat you gotta do layta on.

²⁰ Sometimes you might feel like az too much wen you tink about all da tings you gotta work on. But no worry, can! Rememba, Jehovah like help you. (Isa 41:10, 13) Yoa braddahs an sistahs in da local hui like help you too. Wen you come one solid Christian braddah, yoa life going be real good. We love you, young braddahs! Jehovah going bless you fo all da work you do now fo come one solid Christian.​—Smart Guys 22:4.