You Rememba?

How good you wen read all Da Place Fo Watch From dis year? See if you can ansa dese questions:

Wat gotta do fo “let God make you . . . tink diffren kine inside”? (Rome 12:2)

Dis mean moa den jus doing good tings. We gotta check out who we stay inside an change wea we gotta so we can live da way God like.​—w23.01, pp. 8-9.

Wat we gotta do wen we look wat goin on in da world?

We like know how tings goin on now making Bible prophecy come true. But we no like jus guess cuz dat can split us up. Moa betta fo talk story about wat Jehovah’s hui stay telling us. (1 Cor 1:10)​—w23.02, p. 16.

How is Jesus baptism diffren from his followas?

Wen Jesus was born he was part of one nation dat awready was spesho fo God. So he neva need dedicate himself to Jehovah like us. Jesus was perfeck so he neva have anyting to tell sorry fo.​—w23.03, p. 5.

How we can give oddas moa chance fo ansa at da meetings?

Keep oua ansas short so oddas can ansa. No take all da ansas in da paragraph so dat get someting fo oddas talk about.​—w23.04, p. 23.

Wat “Da Road Dat Stay Good An Spesho” at Isaiah 35:8 talking about?

Firs dis spesho road was wat da Jews wen use fo go back Israel from Babylon. Wat about now? Hundreds of years befoa 1919, work was being done fo make da road ready like translating an printing Bibles an odda stuffs. Since den God’s peopo been traveling on “Da Road Dat Stay Good An Spesho” dat take dem to one spiritual paradise an moa blessings layta on.​—w23.05, pp. 15-19.

Wat two wahines Smart Guys chapta 9 talk about?

Smart Guys talk about one stupid wahine who invite peopo fo go inside her house, dat end up at “da Mahke Peopo Place”. An one akamai wahine who invite peopo fo “stick wit da way dat goin help you undastan stuff” an live fo real kine. (Smart Guys 9:1, 6, 13, 18)​—w23.06, pp. 22-24.

How God wen show he was humbo an flexible wen he wen deal wit Lot?

Jehovah wen tell Lot fo dig outa Sodom an go to da mountains. Wen Lot neva like an had beg fo go Zoar, God wen tell um dat was ok.​—w23.07, p. 21.  

Wat one wife can do if her odda half look at porn?

She gotta rememba dat az not her fault. She should focus on her frenship wit God an tink hard about wahines in da Bible dat Jehovah wen help wen dey was stress out. She can help her odda half stay away from anyting dat make um easy fo him get tempted.​—w23.08, pp. 14-17.

Wen somebody ask us wat we believe, wat goin help us be gentle wen we ansa?

Look at wat dey asking az one way fo find out wat stay importan to dem. Dat goin help us fo ansa in one nice, gentle kine way.​—w23.09, p. 17.

Wat we can learn from Mary about how she wen come moa strong?

Wen Mary wen learn dat she was goin be da maddah of da boy who was goin come da Messiah, oddas wen make her come strong. Gabriel an Elizabet wen use da Scripchas fo give her good kine words. Oua braddahs an sistahs can help us lidat too.​—w23.10, p. 15.

How Jehovah ansa oua prayers?

He promise he goin lissen to oua prayers an tink about how line up wit his goal. (Jer 29:12) He no goin always ansa da same kine way, but he goin always get oua back an be dea fo us.​—w23.11, pp. 21-22.

Fo Da Rome Peopo 5:2 talk about hope, so how come verse 4 wen talk about um again?

Wen somebody firs hear about da good kine tings, he might get da hope fo live in paradise on earth. But wen he go thru hard times, hang in dea thru um, an know dat God stay happy wit him, den his hope goin come moa stronga an mean moa to him.​—w23.12, pp. 12-13.