Choose Who You Goin Work Fo

1. Wat we gotta do fo be fo real kine happy, an how come? (Isaiah 48:17, 18)

OUA heavenly Faddah love us real plenny, an he like us be happy now an in da future. (Teacha 3:12, 13) He wen make us fo be able fo do some awesome tings, but he neva make us fo be able fo rule ova ouaselfs or make oua own rules of wass right an wrong. (Teacha 8:9; Jer 10:23, NEW WORLD TRANSLATION) He kno dat fo us be fo real kine happy, we gotta serve him an lissen to him.​—Read um Isaiah 48:17, 18.

2. Wat Satan like us believe, an wat Jehovah wen do cuz of dat?

² Satan like us believe dat we can rule ova ouaselfs, an dat we can be happy witout Jehovah. (Start 3:4, 5) Fo prove dat Satan iz one bulaia, Jehovah wen give humans some time fo rule ova demselfs. Ony easy fo see dat humans no can rule demselfs. On da odda hand, da Bible talk about plenny guys an wahines who wuz happy cuz dey wen serve Jehovah. Da numba one exampo iz Jesus. In dis lesson we goin see why Jesus wen choose fo serve Jehovah. Den we goin look how come we should worship oua Faddah in heaven. Afta dat, we goin go ova some reasons why we choose fo serve Jehovah.

WHY JESUS WEN CHOOSE FO SERVE JEHOVAH

3. Wat Satan wen offer Jesus, an wat Jesus wen choose fo do?

³ Wen Jesus wuz on top da eart, he had fo make one choice who he goin serve. Litto while afta Jesus wen get baptize, Satan wen offer him all da govaments on da eart if he worship him ony one time. Jesus wen tell him, “Beat it awready, Satan! Da Bible befo time tell, ‘Gotta go down on yoa knees an show plenny respeck to God, Da One In Charge, an live an work ony fo him.’” (Mat 4:8-10) How come Jesus wen choose fo do dat? We go look how come.

4-5. Why Jesus wen choose fo serve Jehovah?

⁴ Da main reason why Jesus wen choose fo serve Jehovah iz cuz he get so much love an aloha fo his Faddah. (John 14:31) Anodda reason he serve Jehovah iz cuz az da right ting fo do. (John 8:28, 29; Jesus Show 4:11) He kno dat Jehovah give us life, we can trus him, an dat he give us plenny good tings. (Songs 33:4; 36:9; Jam 1:17) Jehovah always wen tell Jesus da trut an wen give him eryting. (John 1:14) On da odda hand, sin an death wen come from Satan. He one selfish, greedy bulaia. (John 8:44) Cuz Jesus knew all dis, he neva be like Satan an go agains Jehovah.​—Php 2:5-8, NWT.

⁵ Anodda reason why Jesus wen choose fo serve Jehovah iz cuz he wen kno da plenny good tings dat wuz goin happen from him doin dat. (Heb 12:2, NWT) He knew dat if he wen stay faitful, he would show respeck fo his Faddah’s name an make one way fo hemo sin an death.

WHY WE SHOULD WORSHIP JEHOVAH

6-7. Why plenny peopo today no serve Jehovah, but why we should worship him?

⁶ Plenny peopo today no serve Jehovah cuz dey donno about his good qualities an all da good tings he wen do fo dem. Dass how da guys dat Paul wen preach to in Athens wuz.​—Jesus Guys 17:19, 20, 30, 34.

⁷ Paul wen tell da guys in Athens dat da fo real God “make all da peopo stay alive, an he give dem air fo breave, an all da odda stuff.” Den he wen say, “From one guy, God make all da diffren peopos fo live all ova da world . . . cuz a him, us stay alive, move, an do eryting.”​—Jesus Guys 17:25, 26, 28.

8. Wat Jehovah neva goin do, an how he wen show us he love us plenny?

⁸ Cuz Jehovah iz da Mayka an Rula ova eryting, he could force peopo fo serve him. But Jehovah neva goin do dat. Wat he do iz give us proof dat he dea an he love ery one of us plenny. He like az much peopo az can fo be his frenz foeva. (1 Tim 2:3, 4) Dass why Jehovah show us how fo teach oddas about da good tings he goin do fo erybody an how he goin do um. (Mat 10:11-13; 28:19, 20, NWT) He wen give us one local hui wea we can worship him an loving braddahs who love an kea about us.​—Jesus Guys 20:28.

9. How Jehovah wen show his love fo erybody?

⁹ We see how much love Jehovah get by da way he treat da guys dat no believe in him. Try tink about dis. Fo tousands of years, billions of peopo wen choose fo do wat dey tink iz right an wrong. Even tho dey do dat, Jehovah give dem wat dey need fo keep living an one good life. (Mat 5:44, 45, NWT; Jesus Guys 14:16, 17) Cuz of him, dey can have family an frenz dat love dem, dey can have kids, dey can work, an dey can enjoy dea lifes. (Songs 127:3; Teacha 2:24) All dis iz proof dat Jehovah love erybody. (Egypt 34:6) Now we go talk about why we choose fo serve Jehovah an how he bless da guys dat serve him.

WHY WE CHOOSE FO SERVE JEHOVAH

10. (a) Wass da main reason why we serve Jehovah? (Matthew 22:37) (b) How you benefit cuz Jehovah iz patient? (Songs Fo God 103:13, 14)

¹⁰ Jus like Jesus, da main reason why we serve Jehovah iz cuz we get love an aloha fo Him. (Read um Matthew 22:37.) Wen we learn about Jehovah’s qualities, we like come close to him. One exampo of dat iz how Jehovah iz patient wit us. Wen da Israel guys neva lissen to him, he wen tell dem fo no “do da bad kine stuff no moa, an . . . change how all you guys ack.” (Jer 18:11) Jehovah kno dat we not perfeck an dat we ony dus. (Read um Songs Fo God 103:13, 14.) Wen you tink about Jehovah’s qualities like how he patient, dat make you like serve him foeva?

11. Wass some odda reasons why we choose fo serve Jehovah?

¹¹ Anodda reason why we like serve Jehovah iz cuz az da right ting fo do. (Mat 4:10) On top of dat, we kno dat plenny good tings goin happen if we stay loyal to Jehovah. Wen we faitful, we show respeck fo Jehovah’s name, we make him happy, an we prove dat Satan iz one liar. An if we choose fo serve Jehovah now, we get da chance fo serve him foeva!​—John 17:3.

12-13. Wat we learn from wat wen happen to Jane an Pam?

¹² Wen we still yet young, can learn fo love Jehovah plenny an oua love fo him goin get moa strong da olda we get. Try look wat wen happen to two sistahs, Jane an Pam.a Jane wuz 11 years old an Pam wuz 10 years old wen dey wen firs start fo study da Bible. Dea parents neva like study but dey wen tell da girls dey could study wit da Witnesses az long az dey wen go church wit da family on da weekends. Jane wen tell, “Wat da Witnesses wen teach me from da Bible wen help me fo no do drugs or have pilau kine sex like da odda kids in skool.”

¹³ Afta a few years, both girls wen come publishas. Layta on, dey wen start fo pionea same time taking kea dea parents who wuz getting olda. Tinking back about wat wen happen Jane wen tell, “I wen learn dat Jehovah take kea his frenz an dat 2 Fo Timoty 2:19 stay tru wea it say dat Jehovah, “He know all his peopo!”” Az automatic dat Jehovah always kea fo dose who choose fo love an serve him!

14. How we can stan up fo Jehovah? (Go look da pichas.)

¹⁴ We like oddas kno dat da bad tings we hea about God no stay tru. Fo exampo, try tink about if you get one good fren who iz nice, dey fogive, an dey no hold back from giving wat dey get to oddas. One day you hea somebody say dat yoa fren iz mean an he rip peopo off. Wat you goin do? You stan up fo him. Same lidat, wen Satan an odda peopo tell lies about Jehovah, we stan up fo Him by telling da trut about Him. (Songs 34:1; Isa 43:10, NWT.) We show dat we choose fo love an serve Jehovah by da tings we say an do.

15. Wat good tings wen happen to da aposal Paul afta he wen change up his goals? (Fo Da Philippi Peopo 3:7, 8, NWT.)

¹⁵ We willing fo change up oua goals fo make Jehovah happy an do moa fo him. Fo exampo, da aposal Paul wuz real importan in da Jew religion but he wen give dat up fo follow Christ an serve Jehovah. (Gal 1:14) Cuz of dat, he had awesome stuff happen in his life, an he had get da chance fo rule wit Christ in heaven. He neva wen regret dat he wen choose fo serve Jehovah, an we not goin eidda.​—Read um Fo Da Philippi Peopo 3:7, 8, NWT.

16. Wat we learn from wat wen happen to Julia? (Go look da pichas.)

¹⁶ If we make serving Jehovah da main ting, he goin bless us now an bumbye. Try look wat wen happen to one sistah name Julia. Befoa she wen learn da trut, she wen sing in one church from wen she wuz one young girl. One professional opera singa wen see dat she wuz someting spesho an wen train her. Julia wen come real popular an wen perform in all kine famous places. Wen she wuz goin one famous music skool, her classmate wen start fo talk to her about God an wen tell her dat God’s name iz Jehovah. Not too long afta dat, Jula wen start fo study da Bible two times a week. Afta a while, she decided fo use her life fo serve Jehovah instead of bein one opera singa. Dat choice no wuz easy. She wen say, “Plenny peopo wen tell me dat wuz one dumb choice, but I wanted fo use my life fo serve Jehovah.” How she feel about da choice she wen make 30 years ago? “I happy I wen choose fo serve Jehovah an I kno dat he goin give me eryting I need in da future so dat I not goin need notting no moa.”​—Songs 145:16.

KEEP SERVING JEHOVAH

17. Cuz we living close to da end, how dat affeck da guys who choose fo serve God an da guys who neva?

¹⁷ We living supa close to da end. Da aposal Paul wen write, “You know da One dat goin come? He goin come fo shua real fas, not afta real long time.” (Heb 10:37) How dis affeck us? One ting iz, no moa too much time lef fo peopo choose fo serve Jehovah. (1 Cor 7:29) An if we awready wen make da choice fo serve God, we kno dat even wen we go tru hahd times, iz ony goin be fo litto while moa.

18. Wat Jesus an Jehovah like us do?

¹⁸ Jesus wen encourage peopo fo come his followas an den fo keep following him. (Mat 16:24) So if we wuz serving Jehovah fo long time awready, we gotta make up oua mind fo no stop. We gotta work hahd fo keep serving Jehovah. Not goin be easy, but we goin be happy an get choke blessings, even now!​—Songs 35:27.

19. Wat we learn from wat wen happen to Gene?

¹⁹ Some peopo feel like dey gotta sacrifice too much fo serve Jehovah. If you young, you sked fo serve Jehovah cuz you feel like you goin be missing out? One young braddah name Gene wen say, “I had feel dat I no could have fun cuz I wuz one Witness Fo Jehovah. Wen look like plenny of da odda kids I wen grow up wit wuz having good fun partying, dating, or playing violent video games, while I had fo go meetings an field service.” How dis kine tinking had affeck Gene? He wen tell, “I wen start fo live one double life, an wuz fun fo litto while. But neva make me fo real kine happy. I wen tink about da Bible truts I neva lissen to befoa an wen make up my mind fo serve Jehovah. Since I wen start fo do dat, wen look like Jehovah wen ansa all my prayas.”

20. Wat should we make up oua mind fo do?

²⁰ Da song writa wen sing to Jehovah, “Anybody you pick an bring um nea you fo dem make house nex to yoa temple, dey can stay good inside.” (Songs 65:4) So we go make up oua mind fo keep serving Jehovah. Jus like Joshua, we goin say, “Me an my ohana, us guys goin work fo Da One In Charge.”​—Josh 24:15.