Can Da Tings You Firs Wen Learn From Da Bible Still Help You Today?

1. How da tings you firs wen learn in da Bible had affeck you?

DA TINGS we had learn wen we firs studied da Bible wen change oua life. Like learning dat God’s name iz Jehovah, dat wuz da start of oua frenship wit him. (Isa 42:8, NWT.) Wen we had learn wat happen wen somebody mahke, we neva worry anymoa if da guys we love who wen die stay suffaring. (Teacha 9:10) An wen we had learn about God’s promise about da Paradise, we neva worry about da future. We kno we can live foeva, not ony litto while.​—Songs 37:29; 90:10.

2. How 2 From Peter 1:12, 13 show dat da tings even solid Christians wen firs learn from da Bible can help dem?

² We no like foget how importan da tings we wen learn wen we firs had study da Bible. How come? Try look wat wen happen to da Christians who wuz solid in da trut wen Peter wen write his secon letta to dem. (Read um 2 From Peter 1:12, 13.) Had pilau bulaias inside da hui dat wuz trying fo make da braddahs an sistahs leave da trut. (2 Pet 2:1-3) Peter wanted fo help da braddahs an sistahs fo come moa strong so dey no fall fo dea lies. So wat he wen do? He wen remind dem of da stuff dey wen learn awready. Dis wuz fo help dem stay faitful to Jehovah.

3. Wat word picha help us undastan how come Christians should keep tinking about basic Bible truts?

³ Even if we been in da trut long time, we still can learn new tings from basic Bible truts. Fo help us undastan dat, try picha dis. One chef an somebody who jus learning how fo cook use da same basic ingredients fo make someting fo eat. But ova time, da chef learn how fo use dose basic ingredients fo make all kine new tings fo eat. Same lidat, guys who stay serving Jehovah long time an guys jus learning da Bible can look at da same basic Bible truts in diffren ways. From da time we wen get baptize til now, plenny tings wen change in oua life. But we still yet can use dose basic truts fo help us now. We go try check out wat guys who been in da trut long time can learn from three basic Bible truts.

JEHOVAH WEN MAKE ERYTING

4. How knowing dat Jehovah wen make eryting affeck us?

⁴ We kno dat somebody who stay supa smart an powaful wen make da eart an eryting on top um. Da Bible say dat “God da One wen make eryting” (Heb 3:4) He wen make us so he kno us from head to toe. An on top of dat, he kea about us an he kno wass bes fo us. Knowing dat Jehovah wen make eryting wen change oua life an wen give us one reason fo live.

5. Wat trut can help us be humbo? (Isaiah 45:9-12)

⁵ Knowing da trut dat Jehovah wen make eryting teach us dat we gotta be humbo. One exampo of dat iz wen Job wen say wrong tings about Jehovah cuz he wuz ony focus on defending himself. Jehovah wen remind Job dat He wen make eryting. (Job 38:1-4) Dis wen help Job see dat eryting Jehovah do iz da right ting. Da prophet Isaiah layta on wen write, “You tink da clay aks da guy dat make pots, ‘Wat you stay making?’”​—Read um Isaiah 45:9-12.

6. Wen would be good fo tink about how smart an powaful Jehovah iz? (Go look da pichas.)

⁶ Wen somebody stay in da trut fo long time dey can start fo trus moa in dea own tinking den on Jehovah an da Bible. (Job 37:23, 24) Wat can help him fo be humbo an put his trus in Jehovah instead of himself? He can tink hahd about how smart an powaful Jehovah iz fo make eryting.​—Isa 40:22; 55:8, 9. 

7. Wat Rahela wen do fo help her go along wit one change in da hui?

⁷ Tinking about how Jehovah wen make eryting wen help Rahela, one sistah who live in Slovenia, fo go wit da changes in Jehovah’s hui. She wen say, “Sometimes iz hahd fo me go wit da changes dat da braddahs make. Like even afta I wen watch da 2023 Jesus Luna Guys Update #8, still wen throw me off da firs time I wen see one braddah wit one beard give one talk. So I wen pray to Jehovah fo help me go along wit da change.” Rahela wen realize dat Jehovah wen make eryting an he always kno da bes way fo guide his hui. So if you get hahd time fo go along wit one new change in da hui, tink hahd about how smart an powaful Jehovah iz fo make eryting.​—Rome 11:33-36.

WHY GOD LET PEOPO SUFFA

8. How knowing why God let peopo suffa help us?

⁸ Cuz peopo donno how come God let peopo suffa, dey eidda mad wit him or tink he not real. (Smart Guys 19:3) We kno dat Jehovah no make us suffa, but we suffa cuz we not perfeck an we sin. An cuz he patient an not ending suffaring yet, plenny peopo still get chance fo kno him an learn about how he goin end suffaring foeva. (2 Pet 3:9, 15) We feel good fo kno da trut about why God let peopo suffa. An dat make us love him even moa.

9. Wen would be good fo tink about why Jehovah let peopo suffa?

⁹ We kno dat we gotta be patient wen we wait fo Jehovah fo end suffaring. But wen somebody we love suffa, iz hahd fo wait. We might get mad an tink dat Jehovah iz taking too long fo do someting about um. (Hab 1:2, 3) Wen dat happen, iz good fo us tink about how come Jehovah let peopo suffa.a (Songs 34:19) We can even tink about how Jehovah goin end suffaring foeva.

10. Wat wen help Anne fo hang in dea afta her maddah wen mahke?

¹⁰ Knowing da trut about why God let peopo suffa can help us fo hang in dea. Like look wat wen happen wit Anne who live on da island of Mayotte, in da Indian Ocean. She wen say, “Wen I had lose my maddah a few years ago, I wuz supa sad. I gotta keep telling myself fo no blame Jehovah, he no make peopo suffa. In fact, he no can wait fo suffaring be pau awready. An he like bring back da guys we love who wen mahke. Tinking hahd about dose truts wen help me fo be calm an have peace. An it keep me goin even tho I stay supa sad.”

11. How can knowing why Jehovah let peopo suffa help us fo keep preaching?

¹¹ Knowing why Jehovah let peopo suffa can make us like keep preaching. Afta Peter wen talk about how Jehovah giving peopo time fo come sorry an get save, he wen say, “Try tink about wat kine guys you guys gotta be. You gotta . . . do tings dat show you worship God wit eryting you get.” (2 Pet 3:11, NWT.) One of da tings “dat show you worship God” iz preaching. Jus like oua Faddah Jehovah, we love peopo an we like dem live in paradise. Try tink about da guys dat live in yoa area. Jehovah patient wit dem an giving dem chance fo worship him. We get da awesome chance fo work wit Jehovah fo help peopo learn about him til dis world pau!​—1 Cor 3:9.

WE LIVING IN DA TIME BEFOA DA WORLD PAU

12. How knowing dat we living in da time befoa da world pau help us?

¹² Da Bible tell how peopo goin ack “befo da world goin come pau.” (2 Tim 3:1-5) Wen we look da peopo nowdays, easy fo see dat wat da Bible tell stay happening right now. Eryday we see peopo coming moa worse. An dis can make us moa shua dat we can trus wat da Bible say.​—2 Tim 3:13-15.

13. How da story Jesus wen tell at Luke 12:15-21 help us?

¹³ Knowing dat we living in da time befoa da world pau can help us focus on wat stay really importan. Try look wat we can learn about dis from da story Jesus wen tell in Luke 12:15-21. (Read um.) In da story, how come God wen tell da guy, “Eh brah! Wat you tinking!”? Wuzn’t cuz he wuz rich, but wuz cuz his priorities wuz off. Instead of making time fo God, he wuz piling up stuff fo ony him. Wuz one big mistake cuz dat nite he wuz goin mahke. How dis story can help us today? No moa too much time til da end come. So iz good fo tink about dis, “Wat my goals show about wat stay importan to me? Wat kine goals I help my kids make? I use eryting I get fo myself or Jehovah?”

14. How Miki’s story help us see iz importan fo look da proof dat we living in da time befoa da world pau?

¹⁴ Wen we tink about da proof dat we stay living in da time befoa da world pau, dat can affeck da choices we make. Dass wat wen happen to one sistah name Miki. She wen say, “Afta I wen grad, I wanted fo go college an get one job studying animals. Same time I wanted fo pionea an go preach wea need help. Some braddahs an sistahs wen tell me fo tink hahd if I really could do both. Dey wen remind me dis world goin be pau pretty soon. But in da new world I goin have foeva fo learn about da animals. So I wen choose not fo go college. But I wen take classes dat neva take too much time fo help me get one job so I can pionea an den layta on move to Ecuador wea dey needed moa preachas.” Now Miki an her husban in da circuit work ova dea.

15. How James exampo help us fo no stop preaching to guys who neva like lissen befoa. (Go look da pichas.)

¹⁵ No come bum out if peopo at firs no stay interested in da trut cuz peopo can change. Try tink about Jesus half braddah James. He wen watch Jesus grow up, see proof dat Jesus wen come da Messiah, an wen see how Jesus wuz one unreal teacha. But fo years he neva follow Jesus. Ony afta Jesus wuz resurrected, James wen go all out fo be his followa.b (John 7:5; Gal 2:9) If yoa ohana or da peopo you preach to no like lissen at firs, iz importan fo no give up on dem. No foget we living in da time befoa da world pau, so iz supa importan dat we preach. Rememba dat wat you share wit peopo now maybe goin affeck dem layta on, even afta da big trouble start.c

BE TANKFUL FO JEHOVAH’S REMINDAS

16. How Jehovah’s remindas help you? (Go look da box “Use Bible Truts Fo Help Oddas.”)

¹⁶ Some of da spiritual food Jehovah’s hui give us iz fo da guys who donno too much about da Bible. Like da talk fo erybody, some articles an videos on top jw.org, an oua public magazines iz made mosly fo guys who not Witnesses. But dese remindas iz good fo all us too. Dey help oua love fo Jehovah come moa strong, build up oua fait in da Bible, an help us be betta at teaching da Bible to peopo.​—Songs 19:7.

17. Wen iz good fo tink about wat we wen firs learn in da Bible?

¹⁷ If we wen serve Jehovah fo long time, we happy wen one Bible trut come moa clear. Same time we should be tankful fo da importan Bible truts we wen firs learn dat wen help us come close to Jehovah. If you eva get hahd time following Jehovah’s hui an you like do tings yoa own way, be humbo an rememba Jehovah, da One who wen make eryting, iz da one stay guide da hui. Wen us or somebody we love iz goin tru hahd times, can be patient an tink about why Jehovah let peopo suffa. An wen we choosing how fo use oua time an da stuff dat we get, we gotta rememba dat we living in da time befoa da world pau. We go let Jehovah’s remindas help us come strong, make good choices, an stay faitful to him.