How Come Witnesses Fo Jehovah No Go War?

Dis why Witnesses Fo Jehovah no go war:

1. Dey lissen God. Da Bible tell dat da guys dat serve God “goin take dea swords an make um come plows” an “no even goin . . . make war no moa.”—Isaiah 2:4.

2. Dey lissen Jesus. Jesus wen tell da Aposal Peter: “Put away yoa sword. Erybody dat use his sword fo beef goin mahke from da sword.” (Matthew 26:52) Dis scripcha wen show dat Jesus neva like his guys use weapons fo war.

   Da guys dat follow Jesus lissen wen he tell fo “no do same same jalike da odda peopo inside dis world”, by not taking sides in political stuffs. (John 17:16) Wen come to military kine stuff, dey no protest or try stop da guys who choose fo serve in da army.

3. Dey love oddas. Jesus wen tell his guys wat dey gotta do, “show love an aloha fo each odda.” (John 13:34, 35) Cuz a dat, dey would have one humangus hui all ova da world, wea nobody goin fight in one war agains dea braddah or sistah.—1 John 3:10-12.

4. Dey copy da Christians from befoa time. Da Encyclopedia of Religion and War tell: “From da beginning, Jesus’ followas neva get involved wit war or da military” cuz dey wen kno dat “it no match up wit wat Jesus had teach about love an loving da guys dat hate you.” Even Peter Meinhold, one guy dat study religion, wen say bout Jesus firs followas: “No ways could be one Christian an one soldier at da same time.”

Dey kokua da community

Witnesses Fo Jehovah iz good peopo an dey not one threat to da country wea dey live. We respect da govament guys, an lissen wat da Bible tell we gotta do:

• “Erybody gotta lissen da govmen guys in charge.”—Rome 13:1.

• “Give um to Cesar, wat his, an give to God, wat his!”—Matthew 22:21.

So, we lissen da laws, pay oua taxes an work wit da govaments fo do public services.