Da Israel peopo wen leave Mount Sinai an go tru Paran Boonies to one place called Kadesh. Ova dea, Jehovah tell Moses: ‘Sen 12 guys, one from each tribe, fo spock out Canaan, da land I goin give you guys.’ So Moses wen pick 12 guys an tell um: ‘Go Canaan, an find out wat kine dirt get an if good fo grow stuff. Check out if da peopo strong or weak, wedda dey live in tents or towns wit walls.’ So Joshua, Caleb, an da odda 10 spies wen go Canaan.

Afta 40 days dey come back, an wen bring figs, pomagrams, an grapes. Da spies tell: ‘Da land iz good, but da peopo stay real strong an dea towns get big walls all aroun um.’ But Caleb tell: ‘Fo shua we can take ova da land. We go now!’ You kno how come Caleb say dat? Cuz him an Joshua wen trus Jehovah. But da odda ten spies tell: ‘No can! Dey humangus, an moa strong den us! We look jalike grasshoppas nex to dem.’

Da Israel guys wuz all bum out. Dey had grumbo an tell each odda: ‘We go pick anodda leada guy an go back Egypt. Why we go Canaan ony fo mahke?’ Joshua an Caleb tell um: ‘No go agains Jehovah an no be sked. Jehovah goin proteck us.’ But dey no like lissen an even wanted fo kill Joshua an Caleb!

Wat Jehovah wen do? He tell Moses: ‘Afta eryting I wen do fo dese guys, dey still no like lissen me. So cuz of dat, dey goin stay in da boonies fo 40 years, an mahke ova dea. Ony da kids an Joshua an Caleb goin live in da land I wen promise fo give dem.’

Layta on, wen da Israel peopo stay in da boonies, Korah, Datan, Abiram, an 250 oddas wen go agains Moses. Dey had tell him: ‘Nuff awready! Why ony you gotta be oua leada guy an Aaron da main pries guy? All us stay spesho to Jehovah, not jus you guys.’ Jehovah no wuz happy, cuz da way he see um, dey wuz goin agains him!

Moses wen tell Korah an da guys who wen back him up: ‘Come by da tent tomorrow, an bring yoa fiyah holders wit da incense inside. Jehovah goin show us who he pick.’

Da nex day, ony Korah an da 250 guys wit him wen go meet Moses by Da Tent. Ova dea, dey had ack jalike dey wuz pries an had burn da incense. Den Jehovah tell Moses an Aaron: ‘Get away from dem!’

Datan, Abiram, an dea ohanas neva like go to Da Tent cuz dey wuz ova lissening to Moses. Jehovah tell da Israel guys fo move away from da tents wea Korah, Datan, an Abiram live. Da Israel guys wen ack fas an had move away from dem. Datan an Abiram wen stan outside dea tents wit dea ohanas. All of a sudden da groun wen open up an swallow all of dem! At Da Tent, fiyah wen come down an burn up Korah an da 250 guys wit him.

Den Jehovah tell Moses: ‘Take one stick from da leada of ery tribe, an write his name on um. But on da stick fo da Levi tribe, write Aaron’s name on um. Put all of um inside Da Tent. Da guy I pick, his stick goin grow flowas.’

Da nex day, Moses wen bring out all da sticks an show um to da leadas. Aaron’s stick had flowas an almonds growing on top um. Dis wen prove dat Jehovah wen pick Aaron fo be da main pries guy.