God Undastan You?

WAT GOD WEN MAKE TEACH US

Try tink about identical twins an how dey stay supa close wit each odda. Nancy Segal, who one twin an da director of da Twin Studies Center tell, “Wen some twins say someting to each odda dey full on undastan each odda an dey no need even explain um.” One wahine talk about wat az like fo her an her identical twin, she tell, “We kno eryting about each odda.”

How come twins can undastan each odda lidat? Some guys who wen study about dis wen find out dat az not jus wea o how dey wuz raise, but one mayjah reason iz cuz identical twins get da same kine DNA, o stuff dey made of.

TRY TINK: Da One dat wen make DNA fo shua undastan ery one of us moa betta den anybody else. Da song writa David wen tell, “Wen my muddah come hapai, you wen put togedda all my parts. Da way my bones come togedda, you wen see um real good, . . . Wea nobody can see um . . . Befo I born, you see my body come togedda.” (Songs Fo God 139:13, 15, 16) God da ony one who full on undastan how we made an all da tings we wen go tru in life dat make us who we are. Cuz God kno us an how we made we can trus dat he undastan eryting about us.

WAT DA BIBLE TEACH US ABOUT WAT GOD UNDASTAN

David wen pray, “Eh! You Da One In Charge! You check me out all da time fo see how I stay inside. Az how you know eryting bout me. Erytime I sit down o stan up, you know bout all dat. No matta you stay far away, you know wat I tink. Eh Boss, even befo someting come outa my mout, fo real, you know eryting I goin tell!” (Songs Fo God 139:1, 2, 4) On top of dat, Jehovah kno how we feel deep down inside an “he undastan how come [we] tink how [we] tink.” (1 Records 28:9; 1 Samuel 16:6, 7) Wat dis scripcha tell us about God?

Even tho we maybe no tell eryting we tink an feel wen we pray to God, he see wat we do an undastan why we do um. An he undastan da good tings we like do, even if sometimes we no can do um. Cuz God wen put love in oua mind an heart, He undastan how we able fo tink an do good tings out of love, an it make him happy fo see us do dose tings.—1 From John 4:​7-10, NWT.

Da Scripchas help us kno fo shua

• “Da One In Charge get aloha fo da peopo dat do da right tings, an he lissen good wen dey pray to him.”—1 FROM PETER 3:12.

• God promise: “I goin help you undastan an show you da way you suppose to go. I goin tell you wass da bestes ting fo you fo do, cuz I stay watch out fo you.”—SONGS FO GOD 32:8.

GOD REALLY UNDASTAN HOW YOU FEEL

You tink knowing dat God undastan wat we goin tru an how we feel can help us hang in dea tru hard times? Try look wat wen happen to Anna, from Nigeria, who wen tell, “Cuz plenny bad tings wen happen to me, I wen wonda if wuz wort it fo keep living. My husband wen mahke an I had fo take kea my daughtah who wuz in da hospital cuz she had too much fluid in her brain. Dass wen I wen find out dat I had breast cancer an needed fo have surgery, chemo, an radiation. Fo be in da hospital da same time az my daughtah wuz real hard fo me hando.”

Wat wen help Anna fo hando all dis? “I wen tink about scripchas like Fo Da Philippi Peopo 4:6, 7, dat tell, “God goin make you guys come so notting bodda you . . . God goin take kea you, how you feel an how you tink.” Ery time I wen tink about dis scripcha I wen feel real close wit Jehovah cuz I had kno dat he undastan me betta den I undastan myself. Anodda ting dat wen build me up wuz da help from my spiritual braddahs an sistahs in da Christian hui.

“Even tho I still get problems wit my health, tings fo me an my daughtah getting betta. Cuz Jehovah iz on oua side, we wen learn fo no tink negative wen we go tru hard times. From James 5:11 tell, “Wen we tink bout da peopo dat suffa an no give up, we tell, dey can stay good inside. You no foget da guy Job dat da Bible tell bout? He wen suffa plenny, but he neva give up. An bumbye Da One In Charge wen make eryting good. Cuz Da One In Charge feel pity fo us guys, an give us chance.””Jehovah wen full on undastan da tings Job wen go tru, an so we can kno fo shua dat he undastan any hard times we go tru.