Keep Trusting Da Town Dat Goin Come Bumbye

1. Wat Jesus wen say wuz goin happen to Jerusalem?

JESUS wen give one prophecy right befoa he wen mahke. He wen tell wat wuz goin happen right befoa Jerusalem an da temple wen get wipe out. He wen tell dem dat dey would “see Jerusalem town wit da army guys all aroun dea.” (Luk 21:20) Jesus wen tell dem dat wen dey see dat happen, dey wuz fo dig out right away. Wen turn out dat dose army guys wuz da Rome army.​—Luk 21:21, 22.

2. Wat Paul wen remind da Hebrew Christians in Judea an Jerusalem?

² Few years befoa da Rome army wen go all aroun Jerusalem, Paul wen write da book Fo Da Hebrew Peopo. Paul wen write dat letta fo get da Christians in Judea an Jerusalem ready fo wen Jerusalem wuz goin get wipe out. Da ony way dey wuz goin survive wuz if dey wen dig out from dea houses an leave dea businesses behind. Paul wen say about Jerusalem, “us guys no mo town dat goin stay foeva. But we like wait fo see da big town dat goin come bumbye.”​—Heb 13:14.

3. Wat iz “da big town dat get da solid kine foundations,” an why we keep trusting um?

³ Wen da Christians wen dig out from Jerusalem an Judea, plenny peopo wen tink dey wuz stupid fo doin dat, but dat wen save dea life. Peopo tink da same ting about us today cuz we no trus money or peopo fo solve oua problems. We make dat choice cuz we kno dis system not goin las an we put oua trus in “da big town dat get da solid kine foundations,” dass God’s Govament.a (Heb 11:10; Mat 6:33, NWT.) Da main tings we goin talk about in dis lesson iz (1) how wat Paul wen say wen help da Christians fo keep trusting in God’s Govament, (2) how Paul wen help dem fo get ready fo dig out from Jerusalem, an (3) how wat he wen say help us today.

TRUS JEHOVAH, DA ONE DAT NEVA GOIN BAG FROM YOU

4. Why Jerusalem wuz real spesho to da Christians?

⁴ Jerusalem wuz real spesho to da Christians cuz da firs hui wuz set up dea in 33 C.E., an da luna guys wuz ova dea. On top of dat, plenny of da Christians wen own houses an odda stuff inside da city. Still yet, Jesus wen warn his followas fo dig out from Jerusalem an even from Judea side.​—Mat 24:16.

5. How Paul wen help get da Christians ready fo wat wuz goin happen?

⁵ Cuz Paul wanted da Christians fo be ready fo dig out from Jerusalem, he wen help dem fo see how Jehovah wen feel about dat city. Da prieses at da temple an da sacrifices wuz no good awready to Jehovah. (Heb 8:13) An pretty much erybody in da city neva believe dat Jesus wuz da Messiah. So peopo neva have fo go Jerusalem fo worship anymoa, an Jerusalem an da temple wuz goin get wipe out.​—Luk 13:34, 35.

6. How come wat Paul wen tell da Christians at Fo Da Hebrew Peopo 13:5, 6 wen come perfeck time?

⁶ Wen Paul wen write to da Hebrews, Jerusalem wuz one good place fo live. Plenny peopo dea wen make money cuz peopo would come from all ova fo spen money ova dea. One Roman writa from dat time wen call Jerusalem “da mos famous city in dat paht of da world.” Some Christians probly wuz living good. Dass how come Paul wen tell dem, “Try live so you no mo plenny love fo money. Stay good inside bout da stuff you get awready.” Den he wen quote one promise from Jehovah from da scripchas, “No way I eva goin leave you! No way I goin bag from you!” (Read um Fo Da Hebrew Peopo 13:5, 6; Rules 31:6; Songs 118:6) Christians needed fo rememba dis promise cuz afta Paul wen write his letta, dey would have fo dig out from dea houses, an leave dea businesses an all dea stuff. Dey had fo start one new life someplace else, an dat no wuz goin be easy.

7. Why we gotta learn fo trus Jehovah now?

⁷ Wat we learn: Pretty soon da “big trouble” goin start an dis world goin be wipe out. (Mat 24:21) Jus like da Christians in Jerusalem, we gotta stay faitful now fo be ready fo wen da big trouble come. (Luk 21:34-36) Wen dat time come, maybe we goin have fo leave all oua stuff behind an trus dat Jehovah goin take kea all us. Right now, befoa da big trouble start, we get chance fo show how much we trus Jehovah. But someting fo tink about iz, “My goals an da stuff I do show dat I trus Jehovah an not money?” (1 Tim 6:17) Even tho we can learn plenny from da firs Christians befoa, da big trouble dat we goin face pretty soon goin be moa worse den anyting Jehovah’s peopo eva wen go tru. So how we goin kno wat fo do wen da big trouble start?

LISSEN TO DA GUYS SHOWING US DA WAY FO GO

8. Wat instrucktions Jesus wen give his followas?

⁸ A few years afta Paul wen write da letta to da Hebrew Christians, dey wen see da Rome army guys come all aroun Jerusalem. Wen dey seen dat happen, dey wen kno wuz time fo dig out cuz Jerusalem wuz goin get smash. (Mat 24:3; Luk 21:20, 24) But wea dey wuz suppose to go? Jesus jus wen say, “Da peopo dat stay Judea side gotta run to da mountains.” (Luk 21:21) But had plenny mountains ova dea. So which one dey had fo run to?

9. Why da Christians wen wonda which mountains fo run to? (Go look da map.)

⁹ Try look some of da mountains wea da Christians coulda dig out to, da mountains of Samaria, Galilee, Lebanon, Mount Hermon, an da mountains on da odda side of da Jordan Riva. (Go look da map.) Some of dose cities in dose places wen look like one safe place fo dig out to. One of dose cities wuz Gamla dat wuz on da high paht of da mountain an wuz hahd fo get to. Some of da Jews wen tink dat wuz da perfeck place fo go. But wen end up dat at Gamla, had one mean battle between da Jews an da Romans an plenny of da peopo dat wen live dea wen mahke.b

10-11. (a) How Jehovah wen show da Christians wea fo go? (Fo Da Hebrew Peopo 13:7, 17, NWT.) (b) How wen turn out good fo da Christians who wen lissen to da braddahs in da hui? (Go look da picha.)

¹⁰ Wen look like Jehovah wen use da braddahs in da hui fo show da Christians wea fo go. One history guy name Eusebius wen write about dat time, an he wen say dat God wen show some of da braddahs in Jerusalem dat da Christians should dig out to Pella, one city in Perea. Seem like Pella wuz one good place fo go cuz wuz close to Jerusalem an easy fo get to. On top of dat, mos of da guys living ova dea wuzn’t Jews so neva have all da fighting agains da Romans goin on.​—Go look da map.

¹¹ Da Christians who wen lissen to da braddahs in da hui wen run to da mountains to Pella. (Read um Fo Da Hebrew Peopo 13:7, 17, NWT.) An cuz of dat, dey wen survive. Cuz dey wen keep trusting in God’s Govament, “da big town dat get da solid kine foundations,” Jehovah wen stick wit dem.​—Heb 11:10.

12-13. How Jehovah wen guide his peopo wen had hahd times?

¹² Wat we learn: Jehovah wen always use guys fo show his peopo da way fo go. Da Bible get plenny exampos of how Jehovah wen use faitful guys fo guide his peopo wen get hahd times. (Rules 31:23; Songs 77:20) An today get proof dat Jehovah still doin da same ting.

¹³ Wen da COVID-19 pandemic wen start, da braddahs taking da lead wen give da eldas instrucktions on how fo take kea wat da braddahs an sistahs wen need spiritually. Spiritual food neva stop, cuz not long afta da pandemic wen start, wen have one big kine meeting like we neva had befoa in ova 500 languages tru da intanet, TV, an radio. Dat wen help da whole hui stick togedda. We kno dat no matta wat kine problems we goin face in da future, Jehovah goin help da braddahs dass showing us da way fo go make akamai choices. We gotta trus in Jehovah an lissen to wat he tell, but wat odda qualities we need fo make um tru da big trouble?

LOVE AN TAKE KEA DA BRADDAHS

14. In Fo Da Hebrew Peopo 13:1-3, wat qualities da Christians had fo show befoa Jerusalem wen get smash?

¹⁴ We goin have fo show moa love den eva wen da big trouble start. We gotta copy da Christians who wuz living in Jerusalem an Judea who wen always show love to each odda. (Heb 10:32-34) Da years right befoa Jerusalem wen get smash, da Christians ova dea had fo show moa love an aloha fo each odda an take kea dem.c (Read um Fo Da Hebrew Peopo 13:1-3.) Befoa dis world get smash, we gotta do da same ting.

15. How come da braddahs had fo show love an take kea each odda afta dey wen dig out?

¹⁵ Wen da Rome armies wen go all aroun Jerusalem an den all of a sudden leave, dass wen da Christians had chance fo dig out. But dey could ony take litto bit stuffs wit dem. (Mat 24:17, 18) Dey had fo help each odda out wen dey wuz goin tru da mountains an even wen dey wen get to Pella. Da braddahs wen get chance fo take kea an show love an aloha to da guys who wen need food, clothes, an one place fo stay.​—Titus 3:14.

16. How we can show love fo oua braddahs an sistahs who need oua help? (Go look da picha.)

¹⁶ Wat we learn: Love goin make us like be dea fo oua braddahs an sistahs wen dey need help. Plenny of God’s peopo wen help da braddahs an sistahs who wen come refugees cuz of wars an natural disastas. Dey wen take kea dem spiritually an give dem wat dey wen need fo live. One sistah from Ukraine who wen dig out from her house cuz of da war wen say, “We wen see how Jehovah wen use oua braddahs an sistahs fo help us. In Ukraine, Hungary, an now Germany dey wuz all happy fo take us in an take good kea of us.” Wen we kokua oua braddahs an sistahs wit da stuff dey need, we stay working togedda wit Jehovah.​—Smart Guys 19:17; 2 Cor 1:3, 4.

17. How come we gotta learn fo love an take kea oua braddahs an sistahs now?

¹⁷ We goin have fo help each odda even moa wen da big trouble start. (Hab 3:16-18) Jehovah teaching us now fo love an take kea oua braddahs an sistahs, cuz garanz we goin need dose qualities layta on.

WAT GOIN HAPPEN BUMBYE

18. How we can copy da Christians dat wen dig out from Jerusalem?

¹⁸ Da Christians who wen lissen an dig out to da mountains wen survive wen Jerusalem wen get smash. Dey wen bag from da city but Jehovah neva bag from dem. Fo us, we donno eryting dat goin happen bumbye, but Jesus wen warn us fo be ready an lissen. (Luk 12:40) An we can learn from wat Paul wen write to da Hebrews. On top of dat, Jehovah garantee dat he neva goin bag out on us. (Heb 13:5, 6) So keep trusting God’s Govament, da town dat goin come bumbye, cuz you goin get blessings now an foeva.​—Mat 25:34.