Wat Jehovah’s Name Mean To Jesus

1-2. (a) Wat Jesus wen do da nite befoa he wen mahke? (b) Wat we goin talk about in dis lesson?

THURSDAY nite, Nisan 14, 33 C.E., Jesus had one spesho meal wit his faitful aposals. He wen kno dat pretty soon he wuz goin suffa an mahke. Afta da meal, he wen tell good kine words to his aposals. Wen wuz time fo leave, Jesus wen say one importan praya. We can find um in John chapta 17.

² In dis praya we goin see wat Jesus wuz worried about jus befoa he wen mahke, an wat wuz importan to him wen he wuz on top da eart. We goin talk about dese tings in dis lesson.

“I WEN TELL DEM ABOUT YOA NAME”

3. Wat Jesus wen say about Jehovah’s name, an wat he wen mean? (John 17:6, 26, NWT.)

³ In his praya, Jesus wen tell, “I wen tell dem about yoa name.” We kno dis wuz importan to Jesus, cuz he wen say um two times. (Read um John 17:6, 26, NWT.) Dis mean Jesus followas neva kno God’s name? No, cuz da Jews awready wen kno God’s name iz Jehovah. In da Hebrew scripchas, get dat name almos 7,000 times. Jesus wuzn’t teaching dem God’s name, but radda wat kine God Jehovah iz. Cuz Jesus kno Jehovah so good, he could tell his followas wat his Faddah goin do fo da eart an peopo, wat he wen do awready, wat he goin do layta on, an wat kine qualities he get.

4-5. (a) Try tell how someone’s name can come moa spesho to you. (b) How Jehovah’s name wen come moa spesho to da aposals?

⁴ Try picha dis. One elda in yoa hui dat you kno long time name Kawika, iz one docta. One day you get into one car accident an dey rush you to da hospital wea dat docta work, an he save yoa life. Now dat braddah’s name iz moa spesho to you. Erytime you hea his name, you tink of wat he wen do fo you. Kawika iz not ony one elda, but he also da docta who wen save yoa life.

⁵ Same lidat, Jesus followas wen kno Jehovah’s name, but dat name wen come moa spesho cuz Jesus wen help dem fo kno Jehovah betta. We can say dat cuz Jesus wen copy his Faddah in eryting. Da aposals wen kno Jehovah betta by lissening to how Jesus wen teach an by watching how he wen treat oddas.​—John 14:9; 17:3.

“YOA NAME DAT YOU WEN GIVE ME”

6. How Jehovah wen give Jesus His name? (John 17:11, 12, NWT.)

⁶ Jesus wen pray fo his followas, “Cuz of yoa name dat you wen give me, watch ova dem.” (Read um John 17:11, 12, NWT.) So wuz Jesus telling his followas fo call him Jehovah? No, cuz wen Jesus wen talk about da name Jehovah, he wen say “yoa name.” So Jehovah’s name neva come Jesus name. So wat Jesus wuz talking about wen he sed “yoa name dat you wen give me”? Firs, Jesus wen rep Jehovah an His name, he wen talk fo Him, an he wen do miracles in His name. (John 5:43; 10:25) Anodda ting iz dat Jesus name mean “Jehovah Iz Da One Who Save.” So Jesus name stay conneckted to Jehovah’s name.

7. Try tell why Jesus could talk fo Jehovah.

⁷ Fo undastan why Jesus could rep Jehovah an talk fo Him, try tink about dis. One rula can sen one guy fo talk fo him, an wat he say carry da same weight az da rula. Same lidat, Jesus rep Jehovah an talk fo Him.​—Mat 21:9; Luk 13:35.

8. How come Jehovah wen say Jesus “come in my name”? (Outa Egypt 23:20, 21, NWT.)

⁸ Da Bible call Jesus da Word cuz Jehovah wen use him fo talk to da angels an humans. (John 1:1-3, NWT.) Jesus wuz probly da angel dat Jehovah wen use fo talk to da Israel peopo wen dey wuz goin outa Egypt. Wen Jehovah had tell dem fo lissen to dat angel he wen say, “Cuz he come in my name.”a (Read um Outa Egypt 23:20, 21, NWT.) Jehovah wen say dat cuz Jesus wuz da main guy who rep Him an prove dat His name iz spesho.

“FADDAH, MAKE YOA NAME SPESHO”

9. How we kno Jehovah’s name wuz real importan to Jesus?

⁹ Even befoa Jesus wen come to da eart, Jehovah’s name wuz real importan to him. An wen he wuz on top da eart, eryting he wen do wen show dat. Befoa Jesus wen mahke, he wen say, “Faddah, make yoa name spesho.” Right afta dat, Jehovah wen say real loud, “I wen make um spesho awready an going do um again.”​—John 12:28, NWT.

10-11. (a) How Jesus wen make Jehovah’s name spesho? (Go look da picha.) (b) How come had fo clear Jehovah’s name an give um plenny respeck?

¹⁰ Jesus wen make his Faddah’s name spesho. How he wen do dat? One way iz he wen tell oddas how awesome Jehovah iz an all da unreal tings He wen do. But fo make Jehovah’s name spesho, wen need moa den dat. Needed fo clear Jehovah’s name an give um plenny respeck. Jesus wen show how importan dat wuz wen he wen teach his followas how fo pray. He wen tell, “Dis how you gotta pray: “Oua Faddah in da heaven, we pray dat peopo get plenny respeck fo yoa name.””​—Mat 6:9, NWT.

¹¹ How come had fo clear Jehovah’s name an give um plenny respeck? Cuz in da Eden garden, Satan wen trash Jehovah God‘s name. He wen say dat Jehovah wuz one bulaia an wuz holding out on Adam an Eve. (Start 3:1-5) He even wen make like wat Jehovah do iz not right. Cuz of dat, plenny peopo might tink dat Jehovah iz no good. Layta on, Job’s time, Satan wen say dat erybody serve Jehovah ony cuz dey like someting from Him. An wen times get hahd dey goin bag from Jehovah cuz dey no really love Him. (Job 1:9-11, NWT; 2:4) Would take time fo prove dat Satan iz da liar.

“I GOIN MAHKE”

12. Wat Jesus wuz willing fo do cuz he love Jehovah’s name?

¹² Cuz Jesus wen love Jehovah, he wanted fo do eryting he could fo clear Jehovah’s name an give um plenny respeck. Jesus wen say, “I goin mahke,” cuz he wuz willing fo die fo his Faddah’s name.b (John 10:17, 18) Adam an Eve wuz perfeck, but dey wen follow Satan an turn dea back on Jehovah. On da odda hand, Jesus wen come to da eart an show he wen love Jehovah by lissening to Him an doin eryting his Faddah wanted him fo do. (Heb 4:15; 5:7-10) Jesus wen stay faitful to Jehovah all da way til he wen mahke. (Heb 12:2, NWT.) Dass how he wen prove he love Jehovah an His name.

13. Why wuz Jesus da bes one fo show Satan iz one liar? (Go look da picha.)

¹³ Eryting Jesus wen do wen show dat Satan iz da liar! (John 8:44) Jesus wen kno Jehovah betta den anybody. So if wat Satan wen say about Jehovah wuz tru, Jesus would kno. But no wuz tru. Dass why Jesus wen stan up fo Jehovah’s name no matta wat. Even wen it had look like Jehovah no wuz protecking Jesus anymoa, he neva turn his back on his Faddah an wuz willing fo die.​—Mat 27:46.c

“I WEN DO ALL DA STUFF DAT YOU WEN TELL ME FO DO”

14. How Jehovah wen bless Jesus fo bein faitful?

¹⁴ Right befoa Jesus wen mahke he had pray, “I wen do all da stuff dat you wen tell me fo do.” Jehovah wen bless Jesus fo bein faitful, an wen bring him back to life. (John 17:4, 5; Jesus Guys 2:24) An Jehovah wen give Jesus da highes position in heaven. (Php 2:8, 9, NWT.) Layta on, Jesus wen come King of God’s Govament. An he wen tell wat dat Govament wuz goin do wen he had pray, “We pray fo yoa Govament rule da earth, an dat tings happen on da earth da way you like um, jalike in heaven.”​—Mat 6:10, NWT.

15. Wat else Jesus goin do?

¹⁵ Pretty soon, Jesus goin fight agains God’s enemies an wipe um out at Armageddon. (Jesus Show 16:14, 16; 19:11-16) Litto while afta dat, he goin throw Satan into “da Deep Dark Hole,” wea he no can do notting. (Jesus Show 20:1-3) Jesus goin rule fo tousand years an he goin bring back da guys dat wen mahke, an goin make erybody an eryting perfeck again. Da eart goin come one paradise an eryting Jehovah like happen goin happen!​—Jesus Show 21:1-4, NWT.

16. Wat life goin be like afta da Tousand Years iz pau?

¹⁶ Life goin be so good wen da Tousand Years iz pau. Not goin get sin, so no goin need da ransom anymoa fo hemo oua sins. Not goin need da 144,000 fo be prieses or Jesus fo be da Main Pries fo have one frenship wit Jehovah. “Da las ting God goin wipe out” iz death. Nobody goin be in da graves, cuz da guys who wen mahke goin come back alive. An erybody on eart goin be perfeck.​—1 Cor 15:25, 26.

17-18. (a) Wat goin happen wen da Tousand Years iz pau? (b) Wat Jesus goin do wen he pau rule? (1 Fo Da Corint Peopo 15:24, 28, NWT.) (Go look da picha.)

¹⁷ Someting else importan goin happen wen da Tousand Years iz pau. Da question wedda or not Jehovah’s name deserve respeck neva goin come up again. How come? In da Eden garden, Satan wen tell dat Jehovah iz one bulaia an da way He rule no show love. But since dat time, had plenny guys who love Jehovah dat wen prove dat da way He rule iz da bes. So wen da Tousand Years iz pau, Jehovah’s rep goin be full on cleared. By dat time, He goin have proved he one loving Faddah.

¹⁸ Afta da Tousand Years iz pau, erybody goin kno dat wat Satan wen say about Jehovah wuz all lies. Wat Jesus goin do wen he pau rule? He goin make like Satan an go agains Jehovah? No ways! (Read um 1 Fo Da Corint Peopo 15:24, 28, NWT.) Jesus goin turn eryting ova back to his Faddah. Not like Satan, he willing fo give up his powa cuz he love Jehovah.

19. How importan iz Jehovah’s name to Jesus?

¹⁹ Make sense how come Jehovah wen give Jesus his name! Jesus wen rep his Faddah perfeck. So wat we wen learn in dis lesson about Jesus? Jehovah’s name iz moa importan to him den anyting else. Dass why he wuz willing fo die fo dat name, an he goin be willing fo give eryting back to Jehovah wen da Tousand Years pau. In da nex lesson we goin talk about how we can copy Jesus exampo.