Wat Jehovah’s Name Should Mean To Us

1-2. How we kno Jehovah’s name iz importan to Jesus?

JEHOVAH’S name iz da mos importan ting to Jesus. Nobody else wen do moa den him fo tell peopo about his Faddah’s name. In da las lesson we wen see dat eryting Jehovah wen do wuz right, an dat Jesus wuz willing fo die fo his Faddah’s name. (Mar 14:36; Heb 10:7-9) An afta Jesus rule fo Tousand Years, he goin be willing fo give all da powa back to his Faddah so dat erybody goin give Him plenny respeck. (1 Cor 15:26-28) Eryting Jesus wen do fo Jehovah prove he love his Faddah real plenny.

² Jehovah’s name wuz supa importan to Jesus. (John 5:43; 12:13) Wen he wuz on da eart, he wen teach his followas about Jehovah’s name an wat His name wen mean. (John 17:6, 26, NWT.) Even wen he had teach peopo an do miracles, he let erybody kno dat he ony could do dat cuz of his Faddah. (John 10:25) He even wen ask Jehovah fo watch ova his guys cuz of his name. (John 17:11, NWT.) So Jehovah’s name wuz supa importan to Jesus, an if we like follow Jesus, den we gotta kno an use Jehovah’s name too.

3. Wat we goin talk about in dis lesson?

³ Cuz we fo real kine Christians, we follow Jesus an we show respeck fo Jehovah’s name. (1 Pet 2:21) In dis lesson we go see how come Jehovah wen give his name to da guys who preach “da Good Kine Stuff.” (Mat 24:14) Anodda ting we goin talk about iz wat Jehovah’s name should mean to all us guys.

“PEOPO . . . FO CARRY HIS NAME”

4. (a) Befoa Jesus wen go heaven, wat he wen tell his followas? (b) Wat question we goin ansa?

⁴ Right befoa Jesus wen go heaven, he wen tell his followas, “But you guys goin get spesho kine powa wen da Good An Spesho Spirit take charge a you. An den you guys goin tell da peopo in Jerusalem wat you know bout me, an same ting fo da peopo all ova Judea, Samaria, an all ova da world.” (Jesus Guys 1:8) So da good kine stuff about God wuz goin get preached all ova da world, not ony in Israel. (Mat 28:19, 20) Peopo all ova would get da chance fo follow Jesus. But Jesus wen say, “You guys goin tell . . . wat you know about me”. So eryting wuz ony goin be about Jesus? Wat about Jehovah an His name? In Jesus Guys chapta 15, we goin ansa dat.

5. How da aposals an olda leada guys show dat erybody gotta kno Jehovah’s name? (Go look da picha.)

⁵ In 49 C.E., had one big meeting in Jerusalem wit da aposals an da eldas fo figga out wat da guys who wuzn’t Jews needed fo do fo be one Christian. Dey wuz almos pau talking about dat wen Jesus half braddah James wen say, “Simon Peter wen jus tell us how God now stay focusing on guys dass not Jews so dat he could pick peopo from dem fo carry his name.” He wen add some moa from wat da prophet Amos wen say, “da guys dat stay called by my name, da ones who trying real hahd fo find me, Jehovah, togedda wit da peopo dass not Jews, Jehovah say dey da ones who doin dis stuff.” (Jesus Guys 15:14-18, NWT.) So da new followas would have fo learn about Jehovah an carry His name. Dat mean dey would have to tell oddas about Jehovah’s name an peopo would kno dem by dat name.

6-7. (a) How come Jesus wen come to da eart? (b) Wat iz one moa big reason why Jesus wen come to da eart?

⁶ Jesus name mean “Jehovah Iz Da One Who Save.” Jesus wen live up to dat name wen Jehovah wen use him fo save erybody dat wen show fait. How dat wen happen? He wen mahke fo us. (Mat 20:28) Cuz he wen do dat, erybody wen get chance fo get saved an live foeva.​—John 3:16.

⁷ How come peopo had fo get saved in da firs place? It go back to wat had happen in da Eden garden wen Adam an Eve wen go agains Jehovah. (Start 3:6, 24) Dey neva ony lose out on living foeva, but someting even moa worse wen happen. Jehovah’s name wen get trashed. (Start 3:4, 5) So erybody getting saved iz conneckted to someting moa big, Jehovah’s name getting plenny respeck. Cuz Jesus rep Jehovah an His name perfeck, he da bes one fo prove dat Jehovah neva do notting wrong an dat He deserve all da respeck.

8. Wat all da guys who follow Jesus gotta kno?

⁸ All da guys who follow Jesus gotta kno dat da ony way dey goin get saved iz tru Jehovah. (John 17:3) Jesus followas would carry Jehovah’s name. An dey had fo see how importan wuz fo show plenny respeck fo da name. Dat wuz da ony way dey wuz goin get saved. (Jesus Guys 2:21, 22) So erybody dat follow Jesus had fo learn about Jesus an Jehovah. So dass how come Jesus wen pray in John chapta 17, “I wen tell dem about yoa name an going keep telling dem, so dat dey get da same kine love an aloha dat you get fo me, an I can stay tight wit dem.”​—John 17:26, NWT.

“YOU MY WITNESSES”

9. How we can show dat Jehovah’s name iz da mos importan ting to us?

⁹ Iz clear fo see dat fo follow Jesus we gotta respeck Jehovah’s name. (Mat 6:9, 10, NWT.) Jehovah’s name gotta be da mos importan ting to us. Goin take action fo show dat. So wat kine action we gotta take fo clear his name an show plenny respeck fo um?

10. Wat Isaiah chaptas 42 to 44 talk about? (Isaiah 43:9; 44:7-9) (Go look da picha.)

¹⁰ In Isaiah chaptas 42 to 44 we learn about wat we can do fo show plenny respeck fo Jehovah’s name. Ova dea Jehovah ask da guys dat no worship him fo prove dat dea gods iz fo real. He wen ask if get anybody dat can prove dat. But no moa!​—Read um Isaiah 43:9; 44:7-9.

11. Wat Jehovah tell his peopo at Isaiah 43:10-12, NWT?

¹¹ Read um Isaiah 43:10-12, NWT. Jehovah wen tell his peopo, “You my witnesses, . . . an I da true God.” He wen ask dem, “You tink get anodda god jalike me?” (Isa 44:8) We get da unreal chance fo ansa dat question. By da tings we say an do we can show dat Jehovah iz da tru God, an his name iz da greates. An da way we live oua life show dat we love Jehovah an we goin stick to him no matta wat kine presha Satan put on us. If we do dat, dass how we show we get plenny respeck fo Jehovah’s name.

12. How da prophecy at Isaiah 40:3, 5 wen happen?

¹² We go try check out one prophecy dat show how Jesus wuz one witness fo Jehovah an wen show plenny respeck fo His name. Isaiah wen tell dat would have somebody dat would clear da way fo Jehovah. (Isa 40:3) How dat wen happen? Da Bible wen say John da Baptiza wen open da way fo Jesus, but wuz actually fo Jehovah cuz Jesus wen carry his Faddah’s name an wen talk about Him. (Mat 3:3; Mar 1:2-4; Luk 3:3-6) Da same prophecy wen say dat erybody goin see how awesome Jehovah stay. (Isa 40:5) Wen Jesus wuz on da eart, he wen rep his Faddah so perfeck, wuz like Jehovah wuz on da eart.​—John 12:45.

13. How we can copy Jesus?

¹³ Jalike Jesus, we witnesses fo Jehovah. Dat mean we gotta carry dat name an make shua we tell erybody about Him. Fo do dis good, we gotta let erybody kno wat Jesus wen do fo show respeck fo his Faddah’s name. (Jesus Guys 1:8) He wen do dat betta den anybody else an we like try copy him. (Jesus Show 1:5) Wat iz anodda way we can show dat Jehovah’s name iz importan?

ODDA WAYS FO SHOW JEHOVAH’S NAME IMPORTAN

14. Jalike how Songs Fo God 105:3 show, how we feel about Jehovah’s name?

¹⁴ We proud of Jehovah’s name. (Read um Songs Fo God 105:3.) Jehovah real happy wen we talk big about his name. (Jer 9:23, 24; 1 Cor 1:31; 2 Cor 10:17) Fo talk big about Jehovah’s name mean dat we proud Jehovah oua God. We feel spesho cuz we carry his name an we tell odda peopo about um. Dass how come we not shame fo tell da guys we work wit, go skool wit, an da guys we live by, dat we Witnesses Fo Jehovah! But Satan like us stop talking about Jehovah to odda peopo. (Jer 11:21; Jesus Show 12:17) Dass how come Satan an da guys dat tell lies about Jehovah like erybody foget da name Jehovah. (Jer 23:26, 27) Cuz we love Jehovah, we goin keep telling peopo about his name ery chance we get.”​—Songs 5:11; 89:16.

15. Wat mean fo call on Jehovah’s name?

¹⁵ We gotta keep calling on Jehovah’s name. (Joel 2:32, NWT; Rome 10:13, 14, NWT.) Fo call on Jehovah’s name mean moa den jus knowing his name an using um. We really gotta kno Jehovah an da kine God him so dat we can trus him, an go to him fo help us kno da bes way fo live. (Songs 20:7; 99:6; 116:4; 145:18) Anodda way fo call on Jehovah’s name iz fo help peopo learn about his name an da kine God he iz, so dey can make changes in dea life an make him happy.​—Isa 12:4; Jesus Guys 2:21, 38.

16. How we prove Satan iz one liar?

¹⁶ We willing fo suffa fo Jehovah’s name. (Jam 5:10, 11) Wen we stick to Jehovah even tho we stay suffaring, we prove dat Satan iz one liar. In Job’s time, Satan wen say dis about da guys dat worship Jehovah, “Peopo goin give eryting dey get fo dem stay alive!” (Job 2:4) Satan wen say dat peopo ony serve Jehovah wen eryting stay goin good, an dey goin dig out wen times get hahd. Job wen prove dass one lie. We get da chance fo do da same ting an prove dat Satan iz one liar. If we suffa fo Jehovah’s name an no turn oua back on him, we kno garanz Jehovah goin take kea us.​—John 17:11, NWT.

17. Wat odda way we can show how awesome Jehovah’s name? (1 From Peter 2:12)

¹⁷ We show respeck fo Jehovah’s name. (Smart Guys 30:9; Jer 7:8-11) Cuz peopo kno dat we Witnesses Fo Jehovah, wat we do can eidda make him look good or make him look bad. (Read um 1 From Peter 2:12.) So dass how come we gotta watch wat we say an do. Dat way, even tho we not perfeck, we goin show how awesome Jehovah stay.

18. Wass anodda way we can prove dat Jehovah’s name iz importan to us? (Go look da extra info.)

¹⁸ Jehovah’s name iz moa importan to us den oua own rep. (Songs 138:2) How come we gotta tink lidat? Cuz we love Jehovah, plenny peopo not goin like us an goin talk stink about us.a Cuz Jehovah’s name wuz moa importan den his own rep, Jesus wuz willing fo die az one crook. An neva even bodda him “wen dey had make him come shame.” (Heb 12:2-4) Da main ting to him wuz doin wat Jehovah wen like him fo do.​—Mat 26:39.

19. How you feel about Jehovah’s name, an why?

¹⁹ Iz spesho fo be one Witness Fo Jehovah an we proud fo rep his name. Cuz of dat, we goin put up wit wateva peopo say or do to us. Jehovah’s name iz moa importan den oua own rep. So no matta wat Satan do fo try stop us, we goin keep telling oddas how awesome Jehovah’s name. Wen we do dat, jalike Jesus, Jehovah’s name goin be da mos importan ting to us.