How Fo Win Da Fight Agains Wanting Fo Do Wat Iz Bad

1. Wat all us struggle wit?

YOU eva wen really like do someting dat Jehovah no like you do? If dass how you feel, no give up. Da Bible say, “dass da same ting, jalike wat happen to all da odda peopo.” (1 Cor 10:13) Dis mean wateva wrong tings dat you like do dat you struggling wit, odda guys dealing wit da same ting too. Wit Jehovah’s help you can win da fight.

2. Wat wrong tings some Christians an Bible studies struggle wit? (Go look da picha.)

² Da Bible say dat erybody like do diffren “bad kine stuff.” (Jam 1:14) Wat one guy get hahd time wit can be diffren from anodda guy. Some Christians might like fool aroun wit somebody from da opposite sex, oddas wit da same sex. Oddas who wen stop looking at porn might struggle wit wanting fo look at um again. Plenny guys who wen stop doin drugs or drinking too much maybe getting hahd time fo not do um again. All us at one time or anodda wen feel like Paul who wen say, “Wen I like do wass good, right dea inside me I like do da bad kine stuff too.”​—Rome 7:21.

3. If you always wanting fo do da same wrong ting, how dat can make you feel?

³ If you always struggling fo like do da same wrong ting, you might feel like you neva goin be strong enuff fo fight agains um. An you might feel like Jehovah neva goin be happy wit you an you no moa hope. But none of dat iz tru. Fo show why, dis lesson goin ansa two questions, (1) Wea dose kine feelings come from? (2) How you can win da fight agains wanting fo do wat iz bad?

HOW DA DEVIL LIKE US FEEL

4. (a) Why Satan like us tink we no can fight agains wanting fo do wass wrong? (b) How we kno we can fight agains doin bad tings?

⁴ Jesus wen make um clear dat Satan goin try presha us wen he wen say, “An help us fo no give in wen we get presha fo do someting wrong. Proteck us from da Devil.” (Mat 6:13, NWT.) Satan like us feel like we not strong enuff fo fight da presha. He wen say dat wen peopo like do wass bad, dey not goin lissen to Jehovah. (Job 2:4, 5) Why he tink lidat? Cuz wen he had da presha fo do someting bad, he wen dig out on Jehovah, an he tink we goin do da same ting too. He even thought he could get Jesus fo do dat. (Mat 4:8, 9) But wat Satan tink iz not tru. We get da powa fo fight agains wanting fo do wrong kine stuff. We feel like Paul who wen write, “He give me da powa fo stay strong fo hando any kine stuff.”​—Php 4:13, NWT.

5. Why we can believe dat Jehovah kno we can fight agains wanting fo do wass bad?

⁵ Jehovah no tink da same way like Satan. He kno fo shua dat we can fight agains wanting fo do wass wrong. How we kno dat? Cuz Jehovah wen say wuz goin have uku plenny peopo dat wuz goin stay faitful an make um tru da big trouble. Dey wuz goin go in da new world all clean inside. (Jesus Show 7:9, 13, 14) An wen Jehovah say someting, he no can lie. So Jehovah kno we can fight agains da presha fo like do wat iz bad.

6-7. Wat else Satan like us believe?

⁶ Satan like us feel dat cuz we like do wrong tings, we neva goin make Jehovah happy an we no moa hope. Wen you tink about um, Satan da one no moa hope. He no can make Jehovah happy awready an he no can live foeva. (Start 3:15; Jesus Show 20:10) Satan stay jealous cuz we get da chance fo live foeva, so he try hahd fo make us feel like we no moa hope, jus like him. But we get hope, cuz da Bible say dat Jehovah like help us an “he no like nobody get cut off from him!”​—2 Pet 3:9.

⁷ If we feel like we not strong enuff fo fight agains wanting fo do wat iz bad, or we feel like we neva goin make Jehovah happy an no moa hope, den Satan wen get us fo tink da way he like us tink. If we kno dass wat Satan trying fo do, den we goin fight hahd fo stan up agains him.​—1 Pet 5:8, 9.

HOW WE CAN FEEL CUZ WE SINNERS

8. Besides doin wrong tings, wat else sin can mean? (Songs Fo God 51:5) (Go look “Wat Dis Mean.”)

⁸ Get anodda ting dat can make us feel like we not strong enuff fo fight agains wanting fo do wat iz bad an dat we no moa hope. Wat iz dat? We all stay born wit sin.a​—Job 14:4; read um Songs Fo God 51:5.

9-10. (a) How Adam an Eve wen feel afta dey had sin? (Go look da picha.) (b) How bein born wit sin make us feel?

⁹ Try tink about how Adam an Eve wen feel afta dey wen sin. Afta dey wen go agains Jehovah, dey had hide an cova dea bodies. Talking about dat, Insight on the Scriptures wen say, “Sin wen make dem feel guilty, shame, an stress out.” No matta wat Adam an Eve wen do, dey would always feel lidat cuz now dey stay sinners. Dey would neva be able fo be close wit Jehovah again.

¹⁰ We not in da same boat az Adam an Eve. Da ransom no can do notting fo dem. But da ransom can let us go from oua sins an we can be frenz wit Jehovah. (1 Cor 6:11) Still yet, we born wit sin. Dass why us too can feel guilty, shame, an stress out. Da Bible say dat sin get one tight grip on us even if we neva sin like Adam. (Rome 5:14) Even tho dis soun kinda junk, we no need feel like we neva can do wass right an dat we no moa hope. How we can fight dose kine feelings?

11. Wat us can do wen we feel like we no can fight agains wanting fo do wat iz bad, an why? (Fo Da Rome Peopo 6:12)

¹¹ Cuz we not perfeck, we can feel like we neva goin win da fight agains wanting fo do wat iz bad. But we gotta shut down dat kine tinking. How come? Cuz da Bible say, “No let da bad kine stuff take ova you.” (Read um Fo Da Rome Peopo 6:12.) Dat show we get one choice. (Gal 5:16) Jehovah kno dat we can fight agains wanting fo do wat iz bad. Oddawise, he wouldn’t tell us fo fight agains um. (Rules 30:11-14; Rome 6:6; 1 Tess 4:3) So fo shua we can win da fight!

12. Wat we should do wen we feel like we no moa hope, an why?

¹² Cuz we not perfeck, goin get times wen we feel like we neva goin be good wit God an we no moa hope. But we gotta shut down dat kine tinking. How come? Cuz da Bible teach us dat Jehovah kno dat we born wit sin. (Songs 103:13, 14) He kno eryting about us guys, even how sin goin make erybody like do diffren bad tings. (1 John 3:19, 20) Main ting, we no ack on da bad tings we like do, den we can be good wit Jehovah. How we kno dat?

13-14. Jus cuz we like do wrong tings, dat mean we no can be good wit Jehovah? Try explain um.

¹³ Da Bible show get one big diffrence between wanting fo do someting bad an doin um. We no can always control wanting fo do bad tings, but we can control wedda or not we goin ack on um. Like, some of da Christians in Corint wuz mahu befoa. Paul wen write, “Dass how some a you guys was befo time.” You tink dey neva wuz goin like do mahu kine stuff again? Probly not, cuz hahd fo get rid of dat kine feelings. But da Christians who wen hold back from doin da bad kine stuff, dey wuz “clean” in front Jehovah. (1 Cor 6:9-11) You can be lidat too.

¹⁴ No matta wat you struggle wit, you can win ova um. Even if dose feelings no eva go away, you can hold back an no do eryting yoa mind an body like do. (Efe 2:3) How you can win da fight fo do dat?

HOW FO WIN

15. If we goin win da fight agains wanting fo do wass bad, why we gotta be honest wit ouaselfs?

¹⁵ If you like win da fight agains wanting fo do wat iz bad, you gotta be honest wit yoaself about da tings you struggle wit. Be keaful fo no bulai yoaself. (Jam 1:22) If you say stuff like, “Odda peopo drink moa den me,” or “I ony look at porn cuz my wife no show me love,” you making like da problem not dat bad an you ony bulai yoaself. No make excuses fo da wrong tings dat you tink about or do. Ony you responsible fo wat you do.​—Gal 6:7.

16. How you can make up yoa mind fo no do wass wrong?

¹⁶ You no ony gotta be honest wit yoaself about da tings you struggle wit, but you gotta make up yoa mind fo no do um. (1 Cor 9:26, 27; 1 Tess 4:4; 1 Pet 1:15, 16) Try figga out wat you struggle wit, an wen. Maybe iz one certain ting you like do. Or maybe iz da time of da day dass da mos hahdest, like wen you tired or late at night. Tink about da ting you struggle wit an play out in yoa mind how you goin proteck yoaself an no give in. Da bes time fo do dis iz befoa da ting come up.​—Smart Guys 22:3.

17. Wat we can learn from Joseph? (Da Start 39:7-9) (Go look da pichas.)

¹⁷ Try look wat wen happen wen Potifar’s wife wen try get Joseph fo sleep wit her. Fas he wen shut her down. (Read um Da Start 39:7-9.) Wat dat show us? Dat Joseph knew exackly wat he wuz goin do befoa Potifar’s wife wen try sleep wit him. Same lidat, befoa someting come up, make up yoa mind fo do da right ting. Den wen you stay unda presha, goin be moa easy fo you stick to wat you wen awready choose fo do.

KEEP LOOKING INSIDE YOU

18. How you can win da fight agains wanting fo do wat iz wrong? (2 Fo Da Corint Peopo 13:5)

¹⁸ Fo win da fight agains wanting fo do wass wrong, you gotta keep looking inside you all da time fo see how you doin. (Read um 2 Fo Da Corint Peopo 13:5.) Ery now an den you gotta check da way you tink an ack fo see if you gotta make changes. Even if you neva cave in to doin wat iz wrong, you can ask yoaself, “How long wen take fo say no?” If you neva say no right away, no beat yoaself up. Jus try tink about wat you can do fo proteck yoaself moa betta nex time. Try ask yoaself dese questions, “Wen I get wrong thoughts, I can shut um down moa fas? Da stuff I watching an lissening to making um moa hahd fo me? I look away fas wen I see dirty pichas? Even if I gotta work hahd fo control myself, I undastan why Jehovah’s way iz da bes?”​—Songs 101:3.

19. How smalla choices can make um moa hahd fo fight agains wanting fo do bad tings?

¹⁹ No make excuses wen you check yoaself. Da Bible tell, “inside we stay sly.” (Jer 17:9) Jesus wen say dat “any kine bad kine stuff come out from inside.” (Mat 15:19) Like, somebody who wen stop looking at porn might layta on tink iz ok fo look at sexy kine pichas cuz da peopo inside um no stay naked. Or he might tink notting wrong wit tinking about doin wrong kine tings az long az he no do um. Iz like yoa sly heart iz planning fo do da bad kine stuff. (Rome 13:14) How you can make shua you no do dat? You gotta kno da smalla tings dat goin make you like do da bigga tings dass wrong, an stay away from um.b Hemo any kine tinking dat can make you come up wit excuses fo do wrong tings.

20. Wat hope we get fo da future, an wat kine help we get right now?

²⁰ We wen learn dat Jehovah can give us da powa fo fight agains wanting fo do wat iz wrong. An cuz of da ransom, we get da chance fo live foeva in da new world. Goin be so good fo serve Jehovah wit one clean heart an one clean mind. Until dat time come, we kno dat if we work hahd an wit Jehovah’s help we can win da fight!