Follow Jesus Eryday Afta You Get Baptize

1-2. How yoa life come betta afta you get baptize?

WE HAPPY wen we get baptize an come part of Jehovah’s ohana. Cuz we feel spesho dat we stay tight wit Jehovah, jalike David, we can tell, “Anybody you pick an bring um nea you fo dem make house nex to yoa Temple, dey can stay good inside.”​—Songs 65:4.

² Jehovah no jus let anybody come part of his ohana. Like da lesson befoa dis one wen tell, he come close to da guys who show dat dey like come close to him. (Jam 4:8) Wen you give yoa life to Jehovah an get baptize, you come tight wit Jehovah in one spesho way. You can be shua dat afta dat he going “pour down fo you guys plenny good tings, too plenny fo you guys handle.”​—Mal 3:10; Jer 17:7, 8.

3. Da guys dat wen give dea life to Jehovah an wen get baptize, wat kuleana dey get? (Da Teacha 5:4, 5)

³ Wen you get baptize, dass ony da start. Afta you do dat you going like do yoa bes fo keep yoa promise to Jehovah, even wen you get presha fo do bad stuff o you going thru hard times. (Read um Da Teacha 5:4, 5.) If you one followa of Jesus, you going copy him an do wat he tell az bes az can. (Mat 28:19, 20; 1 Pet 2:21) Dis lesson going help you do dat.

FOLLOW JESUS EVEN WEN YOU GO THRU HARD TIMES AN WEN YOU GET PRESHA FO DO BAD

4. In wat way Jesus followas carry one “pos fo suffa”? (Luke 9:23, NWT.)

⁴ No tink dat afta you get baptize yoa life going be easy. Jesus wen make um clear dat his followas would carry one “pos fo suffa.” An dey would carry um “eryday.” (Read um Luke 9:23, NWT.) Jesus wen mean his followas had fo suffa all da time, o wat? No, he was jus saying dat even if dey was going get blessings, wasn’t always going be easy fo dem. Some of da tings dey was going go thru maybe was going be real hard.​—2 Tim 3:12.

5. Wat blessings Jesus wen promise da guys dat give up tings?

⁵ Maybe you awready wen get hard time from yoa ohana, o maybe you wen give up plenny cuz you wen make God’s Govament da numba one ting in yoa life. (Mat 6:33, NWT.) Fo shua, Jehovah see all da tings you wen do fo him. (Heb 6:10) Pretty much garans you wen feel wat Jesus tell, “Whoeva give up dea home, dea braddahs, dea sistahs, dea muddah an faddah, dea kids, an dea land, fo stay tight wit me an da Good Stuff From God I stay tell you, bumbye dey goin get hundred time mo plenny stuff even befo dey mahke. Dey goin get home, braddahs, sistahs, muddah, kids, an land. An anodda ting dey goin get​—peopo goin make um suffa! An bumbye, one time goin come wen dey goin live to da max foeva.” (Mar 10:29, 30) Da good kine tings you get is way moa betta den anyting you wen give up.​—Songs 37:4.

6. How come we gotta fight fo no do wat we like afta we get baptize?

⁶ Inside dis world “peopo do wat dey like,” so we gotta fight fo no do dat afta we get baptize. (1 John 2:16) Dass cuz we still not perfeck. Sometimes maybe you going feel same like how da aposal Paul wen feel. He wen write, “I stay real good inside wen I think bout da Rules from God. But jalike get one diffren kine rule inside me dat erytime make me come hamajang . . . I like do wat stay good, but I no can. Da bad kine stuff take ova inside my body, an make me one prisona fo do all kine bad kine stuff.” (Rome 7:22, 23) Maybe you stay bum out cuz you gotta fight fo no do bad stuff. But if you tink about da promise you wen make wen you had give yoa life to Jehovah, dat going make you moa strong fo fight um. Da trut is, wen get presha fo do bad stuff, dat promise going make yoa life moa simpo. How can?

7. How giving yoa life to Jehovah going help you stay faithful to him?

⁷ Wen you give yoa life to Jehovah, you choose fo no live fo yoaself anymoa. Dat mean you going tell “no” to da tings you like do dat Jehovah no like. (Mat 16:24) So wen one tes come up, you no need wonda wat you going do. You awready know wat you going do, stay faithful to Jehovah. You wen make up yoa mind fo make Jehovah happy. You going be jus like Job. Even tho he wen go thru mayjah kine hard times in his life, he wen tell, “no ways I goin . . . do notting bad!”​—Job 27:5.

8. Wen you tink about da promise you wen make to Jehovah, how dat help you tell “no” to bad kine stuff?

⁸ Wen you tink about da promise you wen make to Jehovah fo give yoa life to him, dat going help you fo no give in. Like, you no going flirt wit somebody dat stay married to somebody else. You awready wen tell “no” to dat kine stuff. If you no let wrong kine feelings start fo grow, den you no need struggle fo get rid of um afta. You “no stay go da same way da bad kine peopo go.”​—Smart Guys 4:14, 15.

9. Wen you tink about da promise you wen make to Jehovah, how dat keep yoa worship to Jehovah numba one in yoa life?

⁹ Wat if you get one job offer dat going make you miss da meetings? You know wat fo do aah? You know awready dat you no going take one job lidat. You not going make one bad choice an try figga how you going make um work. Tinking about Jesus exampo can help you. He wen make up his mind fo make his Faddah happy. If you make like him, you no going do anyting dat going make Jehovah sad, cuz you wen give yoa life to him.​—Mat 4:10; John 8:29.

10. Afta you get baptize, how Jehovah going help you fo “follow Jesus eryday”?

¹⁰ Wen you get problems o get presha fo do someting bad, dat give you one chance fo show you like “follow Jesus eryday.” You know fo shua Jehovah going help you do dat. Da Bible tell, “You guys can trus God . . . He no goin let you guys get mo plenny presha den you guys can handle. Erytime get presha lidat, God goin make um fo you guys get outa dat. He goin make you guys strong fo handle da presha fo you no fall down.”​—1 Cor 10:13.

HOW FO FOLLOW JESUS ERYDAY

11. Wat one of da bes ways fo follow Jesus eryday? (Go look da picha.)

¹¹ Jesus wen go all out fo serve Jehovah, an prayer wen help him stay close to Him. (Luk 6:12) One of da bes ways you can follow Jesus eryday afta you get baptize is fo keep doing tings dat going make you come moa close to Jehovah. Da Bible tell, “You guys stay good how you stay, so stick wit da stuff you know an do um.” (Php 3:16) Sometimes you hear about braddahs an sistahs who wen choose fo do moa fo Jehovah. Maybe dey wen go da School Fo Kingdom Evangalizas o wen move one place wea need moa help. If you can go, go! Jehovah’s peopo always look fo ways fo do moa. (Jesus Guys 16:9) Wat if you no can do dat now? No tink you not az good az da guys who can. Is importan fo you hang in dea. (Mat 10:22) No foget, you make Jehovah supa happy wen you do da bes you can. Dass one importan way fo follow Jesus eryday afta you get baptize.​—Songs 26:1.

12-13. Wat you can do if you no stay pump up fo serve Jehovah like befoa? (1 Fo Da Corint Peopo 9:16, 17) (Go look da box “No Stop Running.”)

¹² Wat you going do if you not praying from da heart o yoa preaching not az fun az befoa? Wat if reading da Bible is boring now? If you feel lidat afta you get baptize, no tink you wen lose Jehovah’s spirit. Cuz you no stay perfeck, da way you feel can change. If dat stay happen to you, try tink about da aposal Paul. Even if he wen try make like Jesus, he wen know was going get times dat he no feel like doing wat he s’pose to do. (Read um 1 Fo Da Corint Peopo 9:16, 17.) He tell, “But if I do um cuz I gotta do um, den az jalike God stay trus me fo take kea his stuffs fo him.” In odda words, Paul wen make up his mind fo do wat he needed fo do no matta how he wen feel.

¹³ Same same, no choose fo do tings ony cuz of how you feel. Make up yoa mind fo do wat stay right no matta you no like um. If you keep doing da right ting, dat can change da way you feel. Til den, if you no stop studying, praying, going meeting, an preaching, dat going help you follow Jesus eryday afta you get baptize. Wen yoa braddahs an sistahs see you hang in dea, dat going pump dem up fo keep going too.​—1 Tess 5:11.

“LOOK INSIDE YOU . . . CHECK OUT REAL GOOD HOW YOU STAY”

14. Wat you gotta check out real good inside yoaself an how come? (2 Fo Da Corint Peopo 13:5)

¹⁴ Afta you get baptize, is importan fo look inside yoaself sometime. (Read um 2 Fo Da Corint Peopo 13:5.) Check out real good if you stay pray eryday, read an study da Bible, go meetings, an go preach. Try find ways fo make dese tings worth moa to you. Try ask yoaself, “Easy fo me explain da basic tings in da Bible? Get ways I can get moa good fun wen I go preach? How deep my prayers, an dey show I full on trus Jehovah? I go meetings all da time? I can lissen betta an ansa moa at da meetings?”

15-16. Wat you wen learn from wat wen happen to Robert?

¹⁵ Would be good fo check out wat kine tings you get hard time wit. Fo show dis, try look wat one braddah name Robert wen go thru. He tell, “Wen I was about 20 years old, I was working part-time. One day afta pau hana, dis wahine I work wit wen tell me come her house. Nobody else was going be dea, an she wen tell me we “was going have good fun.” At firs I neva tell her strait up how come I no was going, but I finally wen tell her “no” an da real reason.” Dass good dat Robert neva give in. Layta on he was tinking about wat wen happen an wen figga he could have do um betta. He tell, “I neva tell her “no” fas kine like Joseph wen do to Potifar’s wife. (Start 39:7-9) Wen surprise me how hard was fo tell “no”. Dat wen help me see I needed fo make my frenship wit Jehovah moa strong.”

¹⁶ Might be good fo you if you check yoaself out like Robert wen do. Even if you neva give in an do someting wrong, ask yoaself, “How long wen take me fo say “no”?” If you can do betta, no feel all bum out. Be happy you know wat you get hard time wit. Pray to Jehovah about um, an den do tings dat going make you like lissen to Jehovah.​—Songs 139:23, 24.

17. How wat Robert wen do wen proteck Jehovah’s rep?

¹⁷ Get someting else we can learn from wat wen happen to Robert. He wen tell, “Afta I wen tell her “no”, she sed, “You wen pass da tes!” I wen ask wat she talking about. She wen tell dat one of her frenz, who was one Witness befoa, wen tell her dat all da young Witnesses, if dey had da chance, would do bad kine stuff in secret. She wen tell her fren she would check out if I was going do dat. Right den an dea I was so happy fo know dat I wen proteck Jehovah’s rep.”

18. Wat you like keep doing afta you get baptize? (Go look da box “Two Lessons You Going Like.”)

¹⁸ Wen you give yoa life to Jehovah an get baptize, you like show respeck fo Jehovah’s name no matta wat happen. Fo shua Jehovah know da hard times you go thru an da times wen you get presha fo do someting bad but you no do um. He going bless you fo doing wat you can fo stay faithful to him. Garans he going use his spesho spirit fo give you da powa fo do dat. (Luk 11:11-13) Jehovah can help you follow Jesus eryday afta you get baptize.