You Ready Fo Give Yoa Life To Jehovah?

1-2. Wat one person gotta do befoa getting baptize?

IN DA pas five years, moa den one million guys wen get baptize az Witnesses Fo Jehovah. Jalike Timoty in da Bible, plenny of dem wen learn da trut “from small kid time.” (2 Tim 3:14, 15) Oddas wen learn about Jehovah wen dey was olda. Like, had one wahine dat wen study da Bible wit Witnesses Fo Jehovah an she wen get baptize wen she was 97!

² If you one Bible learna o yoa parents raising you in da trut, you tinking about getting baptize, o wat? Dass one real good goal fo have! But befoa you get baptize, you gotta give yoa life to Jehovah firs. Dis lesson going talk about wat dat mean fo do dat. An going help you fo see why you no need hold back from giving yoa life to God, an getting baptize, wen you stay ready fo do um.

WAT DAT MEAN FO GIVE YOA LIFE TO GOD?

3. Wat some exampos in da Bible of guys who was spesho to Jehovah?

³ In da Bible, giving yoa life to Jehovah mean being separate fo do someting spesho fo Him. Da Israel peopo was spesho lidat to Jehovah. But some of dem wen work fo God in one even moa spesho way. Aaron wen wear one pries kine hat wit one “gold piece dat tell dat [he] stay spesho” fo Jehovah. Da gold piece wen show dat he wen get pick fo work fo Jehovah in one spesho way, fo be da main pries fo Israel. (Pries 8:9) Da Nazirites was spesho fo Jehovah too. In Hebrew, Nazirite o “Nazir guy” mean “Somebody Dass Separate o Diffren.” Da Nazirites had fo follow da Rules from Moses.​—Cens 6:2-8.

4. (a) Wen you give yoa life to Jehovah, wass da mos importan ting? (b) Wat dat mean fo “no . . . be da boss” fo yoaself? (Go look da picha.)

⁴ Wen you give yoa life to Jehovah, you choose fo follow Jesus, an doing wat God like is da mos importan ting in yoa life. Wat dat mean? Jesus wen tell, “Whoeva like stay tight wit me, dey gotta make up dea mind dat dey no goin be da boss fo dem no moa.” (Mat 16:24) In Greek, da words “no goin be da boss fo dem no moa” can mean “tell yoaself no.” If you wen give yoa life to Jehovah, you gotta say no to anyting dat Jehovah no like. (2 Cor 5:14, 15) So dat mean saying no to “bad kine stuff dea body tell um fo do,” like pilau kine sex. (Gal 5:19-21; 1 Cor 6:18) Yoa life going be moa hard if you follow dat? Not going be, if you love Jehovah an you know dat da tings he tell is good fo you. (Songs 119:97; Isa 48:17, 18) One braddah name Nicholas wen say, “You can look at wat Jehovah tell you fo do like bars on one jail dat stop you from doing wat you like o bars on one lion cage dat proteck you.”

5. (a) How you give yoa life to Jehovah? (b) How giving yoa life to Jehovah an getting baptize diffren from each odda? (Go look da picha.)

⁵ How you give yoa life to Jehovah? You promise him in prayer you going ony worship him, an wat he like going be da mos importan ting in yoa life. You promising Jehovah you going keep loving him “wit eryting inside, wit how you feel, wit how you tink, an wit all yoa powa.” (Mar 12:30) You give yoa life to Jehovah wen you by yoaself so az ony between you an him. But wen you get baptize, dass diffren, az in front odda peopo showing erybody you wen give yoa life to Jehovah. Giving yoa life to Jehovah is one spesho promise, so you should try yoa bes fo keep dat promise, an Jehovah expeck you fo do dat too.​—Teacha 5:4, 5.

WHY GIVE YOA LIFE TO JEHOVAH?

6. Wat make somebody choose fo give dea life to Jehovah?

⁶ Da main reason you give yoa life to Jehovah is cuz you love him. Yoa love no ony come from yoa emotions. But you love Jehovah cuz you wen learn about him an get fo know him, an you wen “find out wat he like.” (Col 1:9) Wen you study da Bible you know fo shua dat (1) Jehovah stay real, (2) da Bible come from him, an (3) he use his hui fo make wat he like happen.

7. Wat we gotta do befoa we give oua life to Jehovah?

⁷ Guys who give dea life to Jehovah gotta know da main tings he teach in da Bible, an dey follow um. Dey do dea bes fo tell odda peopo about wat dey wen learn. (Mat 28:19, 20) Da love dey get fo Jehovah wen grow, an dey like go all out fo worship ony him. Dass you aah? If you love Jehovah wit eryting inside you, giving yoa life to him an getting baptize not going be jus fo make yoa Bible teacha o yoa parents happy, o cuz all yoa frenz stay doing um.

8. How being tankful can help you make da choice fo give yoa life to Jehovah? (Songs Fo God 116:12-14)

⁸ Wen you tink about eryting Jehovah wen do fo you, ony automatic you like give yoa life to him. (Read um Songs Fo God 116:12-14.) Wen we get “someting nice an spesho,” da Bible tell dat all dose gifs come from Jehovah. (Jam 1:17) Da mos spesho of dose gifs is da sacrifice of his Boy, Jesus. Try tink! Dat wen make um so you can come frenz wit Jehovah, an he wen give you da chance fo live foeva. (1 John 4:9, 10, 19) Giving yoa life to Jehovah is one of da bes ways fo show you tankful fo Jehovah’s love an all da good tings he wen give you. (Rules 16:17; 2 Cor 5:15) Dass wat talk about in lesson 46, poin numba 4, in da You Can Live Good Foeva! book dat get da video Giving Yoa Gifs To God.

YOU READY FO GIVE YOA LIFE TO JEHOVAH AN GET BAPTIZE?

9. Why you no need feel presha fo give yoa life to Jehovah?

⁹ Maybe you feel you not ready fo give yoa life to Jehovah an get baptize. Maybe get some tings in yoa life you gotta change so dat you can do wat Jehovah like, o maybe you need moa time fo yoa faith come moa strong. (Col 2:6, 7) Erybody’s love fo Jehovah no grow da same, an not all young peopo going be da same age wen dey ready fo give dea life to Jehovah an get baptize. Try fo undastan wat you need fo work on, an den do um, an no try compare yoaself wit anybody else.​—Gal 6:4, 5, NWT.

10. If you not ready fo give yoa life to Jehovah an get baptize, wat you can do? (Go look da box “Fo Da Guys Raise In Da Trut.”)

¹⁰ Even if you tink you not ready fo give yoa life to Jehovah yet, no stop working at um. Ask Jehovah fo help you make wateva changes you gotta. (Php 2:13; 3:16) Garans he going hear yoa prayer an help you.​—1 John 5:14.

HOW COME SOME GUYS HOLD BACK

11. How Jehovah help us stay faithful to him?

¹¹ Some peopo hold back from giving dea life to Jehovah an getting baptize even if dey stay ready. Dey sked dat afta dey get baptize, dey going do someting real bad an get disfellowshipped. If you feel lidat, no worry cuz Jehovah going help you “live da way [he] like you fo live.” (Col 1:10) He going make you strong enuff fo do wass right. He wen help plenny odda peopo do dat awready. (1 Cor 10:13) Dass how come ony litto bit peopo get disfellowshipped from da Christian hui. Jehovah help his guys fo stay faithful to him.

12. Wat can help us fo no do one mayjah sin?

¹² Erybody like do stuff dass wrong. (Jam 1:14) But erybody get one choice wedda dey do um o not. You da one can control how you live. Some peopo say dat we no can control how we feel an wat we do. But dass not true. Can. You can learn fo control dose tings. So even if stuff come up wea you like do someting bad, you can choose fo no do um. Get stuff you can do fo help you no do one mayjah sin. Like, pray eryday, get one good schedule fo study da Bible, go to da meetings, an share wat you believe wit odda peopo. Doing all dese tings regula going make you strong enuff fo stick to yoa promise to Jehovah. An no foget, Jehovah going help you too.​—Gal 5:16.

13. How Joseph wen set one good exampo fo us?

¹³ Going be moa easy fo stay faithful to Jehovah if you make up yoa mind wat you going do befoa you get presha fo do someting bad. Da Bible get plenny exampos of guys who wen do dat even tho dey no was perfeck. Like Joseph, wen Potifar’s wife wen keep trying fo get wit him, he wen awready know wat he was going do. Joseph wen tell her, “No way I goin go agains God an do dis real bad ting you like do!” (Start 39:8-10) So can see dat even befoa she wen try get wit him, Joseph wen know how he was going ack. Dat wen make um moa easy fo him wen he was unda presha.

14. How we can learn fo say no to doing wass wrong?

¹⁴ How you can copy Joseph wen you get presha fo do wass wrong? Figga out wat you going do now so you know wat fo do wen da presha is on. Learn fo say no right away to da tings Jehovah hate, an no even tink about um. (Songs 97:10; 119:165) Dat way you not going cave unda da presha. You going awready know wat fo do cuz you wen awready make up yoa mind.

15. How somebody can show dey “like know Jehovah fo real kine”? (Fo Da Hebrew Peopo 11:6)

¹⁵ Maybe you know dat you wen find da trut an dat you like serve Jehovah wit eryting inside you, but you still no feel like you ready fo give yoa life to him an get baptize. You can do wat King David wen do. You can beg Jehovah, “Check me out fo see how I stay deep inside. Go tes me, an know wat tings I tink bout dat bodda me. If you see anyting inside me dat bodda you, go tell me. Show me da right way fo go fo get da kine life dat goin stay to da max foeva!” (Songs 139:23, 24) Jehovah bless da guys who “like know him fo real kine.” Wen you keep working hard fo reach yoa goal of giving yoa life to Jehovah an getting baptize, you show him you like know him fo real.​—Read um Fo Da Hebrew Peopo 11:6.

KEEP COMING CLOSE TO JEHOVAH

16-17. How Jehovah bring to him dose raise in da trut? (John 6:44)

¹⁶ Jesus wen say dat his followas, Jehovah bring um to him. (Read um John 6:44.) Try tink how unreal dat is an wat dat mean fo you. Ery person Jehovah bring to him, he see someting good in dem. His peopo is “worth plenny” to him.” (Rules 7:6) Dass da same ting wen come to you too.

¹⁷ Maybe you stay young an you being raise in da trut. An maybe you feel like Jehovah neva bring you to him, an dat you ony in da trut cuz a yoa parents. No matta wat, da Bible say, “Come close to God, an he goin come close to you.” (Jam 4:8; 1 Rec 28:9) Wen you take da steps fo come close to Jehovah, he going come close to you too. Jehovah no jus look at you az part of one package deal wit oddas. He bring ery person to him. So wen somebody take steps fo come close to Jehovah, even somebody who stay raise in da trut, He going do da same to dem, like tell in From James 4:8.​—Go check 2 Fo Da Tessalonika Peopo 2:13.

18. Wat we going talk about in da nex lesson? (Songs Fo God 40:8)

¹⁸ Wen you give yoa life to Jehovah an get baptize, you copy Jesus’ attitude. He was ready fo do wateva his Faddah wen ask him fo do. (Read um Songs Fo God 40:8; Heb 10:7) In da nex lesson, we going talk about wat can help you keep serving Jehovah even afta you get baptize.