You Can Hang In Dea No Matta Tings Bum You Out

1. Wat blessings we get cuz we part of Jehovah’s hui?

IN DESE hard times befoa da world pau is one blessing fo be part of Jehovah’s hui. Cuz da world stay getting moa an moa worse now days, Jehovah wen give us oua braddahs an sistahs fo help us. (Songs 133:1) He help oua family fo be happy. (Efe 5:33–6:1) An he give us da smarts fo hando da presha an fo stay happy.

2. Wat we gotta do, an how come?

² We gotta work hard fo keep serving Jehovah faithfully. How come? Cuz sometimes, maybe oddas going rub us da wrong way. Maybe we get bum out wen we jam up, speshly if we do da same ting ova an ova. We gotta hang in dea an keep serving Jehovah (1) wen one braddah o sistah rub us da wrong way, (2) wen we get problems wit oua odda half, an (3) wen we stay bum out wit ouaselfs. In dis lesson, we going go ova dese tings, an we going learn from three peopo in da Bible who wen stay faithful.

HANG IN DEA WEN ONE BRADDAH O SISTAH RUB YOU DA WRONG WAY

3. Wat can make um hard fo Jehovah’s peopo?

³ Wat make um hard. Some braddahs an sistahs can make us all irraz. Maybe oddas going make us feel junk o no treat us in one nice kine way. Even da eldas can jam up. Problems lidis can make some peopo wonda if dis fo real kine is God’s hui. Radda den “work togedda” wit da braddahs an sistahs, maybe dey stop hanging out wit da guys who wen rub dem da wrong way o even stop going to da meetings. (Zef 3:9) Dass smart o wat? Try look wat we can learn from somebody in da Bible who wen go thru someting lidat.

4. Wat kine problems Paul had fo go thru?

⁴ Da Bible exampo. Da aposal Paul had know his Christian braddahs an sistahs no was perfeck. Fo exampo, wen he got to da Jerusalem hui, some guys neva trus him. (Jesus Guys 9:26) Bumbye some guys wen talk stink about him fo hurt his rep. (2 Cor 10:10) Paul wen see one elda choose fo do someting dat coulda jam peopo up. (Gal 2:11, 12) An one of Paul’s good frenz, Mark, wen let um down big time. (Jesus Guys 15:37, 38) Paul coulda let any one of dose tings make him no like hang out wit any of dem buggahs. But still yet, he wen tink good about his braddahs and sistahs an wen keep serving Jehovah faithfully. Wat wen help Paul fo no give up?

5. Wat wen help Paul fo no give up on his braddahs an sistah? (Fo Da Colosse Peopo 3:13, 14) (Go look da picha.)

⁵ Paul had love his braddahs an sistahs. Dat wen help him fo look at dea good qualities, an not da bad kine stuff dey do. Love wen help Paul fogive oddas, like wat he wen tell at Fo Da Colosse Peopo 3:13, 14. (Read um.) Try look how Paul wen treat Mark. Even tho Mark wen bag from Paul during his firs missionary trip, Paul neva stay all huhu wit him. Bumbye, wen Paul wen write one letta to da hui in Colosse, he wen tell good tings about how Mark had help him, dat make him “stay real good inside.” (Col 4:10, 11) Wen he was in prison in Rome, Paul wen ask dat Mark be da one come help him. (2 Tim 4:11) Fo shua, Paul neva wen give up on his braddahs. Wat we can learn from him?

6-7. Wat going help us fo keep showing love to oua braddahs an sistahs even tho dey jam up? (1 John 4:7)

⁶ Wat we learn. Jehovah like us hang in dea an no stop showing love to oua braddahs an sistahs. (Read um 1 John 4:7.) Wen oua braddahs an sistahs no treat us da way dey should, we can trus dey neva mean fo hurt us an dey ony trying fo do wat Jehovah tell is right. (Smart Guys 12:18) Jehovah love his guys no matta dey jam up. Even tho we jam up, he still yet oua fren an he no stay mad wit us. (Songs 103:9) Cuz Jehovah fogive us we gotta copy him an fogive oddas!​—Efe 4:32–5:1.

⁷ Rememba, befoa da world come pau we gotta stick tight to oua braddahs an sistahs. We know moa peopo going go agains us an tings going come moa worse. We might even go prison cuz we worship Jehovah. If dat happen, we going need oua braddahs an sistahs moa den eva. (Smart Guys 17:17) Try look wat wen happen to Josep,a one elda in Spain. Him an some odda braddahs wen get put in prison cuz dey neva take sides. He wen tell, “Cuz we all stay togedda in prison, sometimes we get all irraz wit each odda. We had fo deal wit each odda an be fas fo let each odda go. Dis wen help us stick togedda an proteck each odda. All da odda guys in prison neva worship Jehovah. One time I wen hurt my arm so bad dey wen put um in one cast, an I no was able fo do tings fo myself. But one of my braddahs wen wash my clothes an help take kea me. I wen feel real kine love wen I needed um da mos.” Dis one good exampo why we gotta fix problems wit each odda now!

HANG IN DEA WEN YOU GET PROBLEMS WIT YOA ODDA HALF

8. Wat make um hard fo married coupos?

⁸ Wat make um hard. Ery marriage get problems. Da Bible tell strait up, dat married peopo going “get problem inside dis world.” (1 Cor 7:28) How come? Cuz az two peopo dat no stay perfeck coming togedda wit diffren qualities an tings dey like o no like. Maybe dea culture o da way dey wen grow up stay diffren. Layta on dey might see tings about dea odda half dey neva see befoa dey had get married. Any of dose tings can make problems. Dey maybe blame each odda fo da problems dey get in da marriage, even tho dey both make mistakes an should work togedda fo fix um. Dey might even start fo tink az betta if dey split up o get one divorce. You tink giving up on dea marriage going solve dea problems?b We go learn from one wahine in da Bible dat wen hang in dea even tho her husband wen make her life supa hard.

9. Wat wen make um hard fo Abigail?

⁹ Da Bible exampo. Abigail was married to Nabal, an da Bible tell he was mean an pilau. (1 Sam 25:3) Musta been supa hard fo Abigail live wit him. Abigail had chance fo get outa her marriage? Yeah. She had chance wen David, da king fo Israel, wen come fo kill Nabal cuz he wen give him lip. (1 Sam 25:9-13) Abigail coulda jus bag out an let David kill um. But she wen step in so dat David no kill Nabal. (1 Sam 25:23-27) How come she wen do dat?

10. Wat probly wen help Abigail hang in dea in her marriage?

¹⁰ Abigail had love Jehovah an wen respeck how he feel about marriage. Fo shua she wen know wat God wen tell Adam an Eve wen he had marry dem. (Start 2:24) Abigail had know dat marriage is supa spesho to Jehovah. Cuz she wanted fo make God happy, she wen go all out fo proteck erybody in her house, even her husband. She wen ack fas fo stop David from killing Nabal. An she wen say sorry fo someting she neva even do. Can see Jehovah had love dis brave wahine dat neva tink ony about herself. Wat wifes an husbands can learn from Abigail’s exampo?

11. (a) Wat Jehovah like fo one husband an wife? (Fo Da Efesus Peopo 5:33) (b) Wat you wen learn from da way Carmen wen work fo proteck her marriage? (Go look da picha.)

¹¹ Wat we learn. Jehovah like one husband an wife fo stay togedda, even wen dea odda half stay hard fo deal wit. Jehovah must be so happy wen he see married peopo working hard fo fix dea problems an show each odda love an respeck. (Read um Fo Da Efesus Peopo 5:33.) Try look wat wen happen to Carmen. Almos six years afta Carmen wen get married, she wen start fo study wit Witnesses Fo Jehovah an wen get baptized layta on. Carmen tell, “My husband neva like dat . . . he was jealous of Jehovah an he wen talk stink to me an tell he was going leave me.” But still yet Carmen wen hang in dea in her marriage. Fo 50 years, she wen work hard fo love an respeck her husband. “Ova time, I wen learn fo undastan moa betta how my husband feel an wen try talk to him in one nice kine way. Cuz I wen know dat marriage is supa spesho to Jehovah, I wen do eryting fo proteck um. I neva gave up on my marriage cuz I love Jehovah.”c If you get problems come up in yoa marriage, you can trus dat Jehovah get yoa back an he going help you fo hang in dea.

HANG IN DEA WEN YOU STAY BUM OUT WIT YOASELF

12. If we wen sin mayjah, how dat make um hard fo us?

¹² Wat make um hard. If we wen sin mayjah, dat can make us feel supa bum out. Da Bible tell da bad stuff we do can make us feel “bus up an sore inside.” (Songs 51:17) One braddah name Robert wen work hard fo years fo qualify fo come one helpa guy. But he wen do someting real bad an wen see how much he wen hurt Jehovah. “Wen I wen figga wat I had do was wrong, dat wen hit me like a ton of bricks,” he tell. “Afta dat I wen feel sick to my stomach. I wen hemo watta an I wen pray to Jehovah. I rememba tinking, no ways God would eva lissen to me. Why he would do dat? I wen let um down, I wen make um feel sad.” If we wen sin mayjah, we could feel so bad about um an start fo tink dat Jehovah wen give up on us, so we should jus give up too. (Songs 38:4) If you eva wen feel lidis, try tink about dis guy in da Bible dat wen hang in dea an serve Jehovah even if he wen do someting real bad.

13. How Peter wen jam up plenny, an wat mayjah sin dat wen lead to?

¹³ Da Bible exampo. Da night befoa Jesus wen mahke da aposal Peter wen jam up plenny. All dose tings wen lead to him making da worse mistake of his life. Da firs way Peter wen jam up was he wen tink he no was going cave in. He wen tell dat even if da odda aposals bag from Jesus, no way he was going bag from him. (Mar 14:27-29) Nex, in Getsemane, Peter had keep falling asleep even tho Jesus had tell him fo stay up. (Mar 14:32, 37-41) An den, wen one mob wen come afta Jesus, Peter wen dig out. (Mar 14:50) An da las ting, three times Peter wen tell he neva know who Jesus was, an had even promise he neva bulai about dat. (Mar 14:66-71) How Peter wen ack afta he figga out he had do someting real bad? He wen break down an cry real hard, probly cuz of how guilty he had feel. (Mar 14:72) An den try tink how much worse Peter had feel wen ony coupo hours layta, dey wen kill his fren Jesus. Peter musta feel supa junk!

14. Wat wen help Peter fo hang in dea an keep serving Jehovah? (Go look da picha on da cova.)

¹⁴ Try look how come Peter was able fo hang in dea an keep serving Jehovah. He neva stay all by himself, he wen go by his spiritual braddahs an fo shua dey wen help him feel betta. (Luk 24:33) An afta Jesus wen come back alive, he wen go see Peter, probly cuz he wanted fo give him good kine words. (Luk 24:34; 1 Cor 15:5) Afta dat, instead of scolding Peter fo his mess ups, Jesus wen tell his fren dat he going get moa importan work fo do bumbye. (John 21:15-17) Peter wen know dat he had screw up big time, but he neva give up an wen keep trying fo do da right ting. How come? Cuz he wen know fo shua dat Jesus had still love him. An Peter’s spiritual braddahs wen keep helping him. Wat we can learn from Peter?

15. Wat Jehovah like us know fo shua? (Songs Fo God 86:5; Fo Da Rome Peopo 8:38, 39) (Go look da picha.)

¹⁵ Wat we learn. Jehovah like us know dat he love us an he ready fo fogive us. (Read um Songs Fo God 86:5; Fo Da Rome Peopo 8:38, 39.) Wen we do someting bad, we feel guilty. Dass normal an dass how should be. But, we no can tink dat Jehovah no going love us o fogive us anymoa. We gotta get help right away. Robert, who we wen talk about earlia tell, “I wen try fo face da presha on my own, an cuz a dat I wen cave in an jam up big time.” He wen come fo see he needed fo talk to da eldas. He tell, “Wen I had go talk to da eldas, right away I wen feel Jehovah’s love fo me. An I had feel da eldas love fo me. Dey wen help me fo see dat Jehovah neva bag from me.” Same ting wit us, we can be shua dat Jehovah love us plenny an going fogive us if we fo real kine sorry, get da help we need, an try oua bes fo no do da same ting again. (1 John 1:8, 9) Wen we know Jehovah love us an like fogive us den we not going stop serving him even afta we jam up.

16. How come you like hang in dea an no stop serving Jehovah?

¹⁶ Eryting you do fo serve Jehovah in dese hard times is worth plenny to him. Wit Jehovah’s help we can hang in dea no matta we get bum out. We can keep loving oua braddahs an sistahs an fogive dem even if dey rub us da wrong way. We can show how much love we get fo Jehovah an oua respeck fo marriage by doing wateva we can fo fix problems dat come up in oua marriage. Wen we sin, go to Jehovah fo help, trus dat he love you an going fogive you, an no stop serving him. We can know fo shua dat Jehovah going bless us if we “no get wore out fo do good kine stuff.”​—Gal 6:9.