No Foget Pray Fo Oddas

1. How we kno dat oua prayas stay importan to Jehovah?

PRAYA iz one awesome gif. Try tink about um, Jehovah wen give da angels work fo do. (Songs 91:11) An he wen give his Son some heavy kuleana. (Mat 28:18) But who lissen to da prayas? Ony Jehovah. Dass someting he wen pick fo do. He “da one dat lissen wen us guys pray.”​—Songs 65:2.

2. How iz Paul one good exampo wen come to praying fo oddas?

² Even tho we can pray to Jehovah about oua own problems, we should pray fo oddas too. Dass wat da aposal Paul wen do. He wen write to da Efesus hui, “I erytime . . . pray fo you guys.” (Efe 1:16) He wen pray fo peopo by name too. He wen tell Timoty, “Wen I pray, I tell God “Mahalo plenny!” erytime I tink bout you, day time an nite time.” (2 Tim 1:3) So can see dat even tho Paul had his own worries fo pray about, still yet he wen take da time fo pray fo oddas.​—2 Cor 11:23; 12:7, 8.

3. How come we might foget fo pray fo oddas?

³ Sometimes we can foget fo pray fo oddas. How come? One sistah name Sabrinaa give one reason. She tell, “Life can get crazy. If we ony tink about wat we stay goin tru, den we might pray ony about wat we need.” If you eva find yoaself praying lidis, dis article can help you. We goin talk about (1) how come iz importan fo pray fo oddas an (2) how you can do dat.

WHY PRAY FO ODDAS?

4-5. How oua prayas get “powa an can do plenny”? (From James 5:16)

⁴ Praying fo oddas get “powa an can do plenny.” (Read um From James 5:16.) Can praying fo oddas really change wat happen to dem? Yessah. Jesus wen kno dat Peter wuz goin ack like he neva kno him, so Jesus wen say, “But I wen tell God fo help you, Peter, so you trus God an no give up.” (Luk 22:32) Even Paul wen kno praya could change wat happen to somebody. Wen Paul wuz in prison in Rome, he had write to Filemon, “I stay shua God goin let me go ova dea yoa place fo stay, cuz you guys erytime pray fo me.” (Fil 22) An dass wat wen happen. Paul wuz let go an could go preaching again.

⁵ But dis no mean dat wen we pray we can presha Jehovah fo do someting. He see how much we kea about da tings we pray fo, an sometimes he do someting about um. Cuz we kno dat, dis can help us fo pray moa hahd to Jehovah about one problem, an den trus Jehovah goin hando um in da bes way.​—Songs 37:5; 2 Fo Da Corint Peopo 1:11.

6. Wen you pray fo oddas, how dat can affeck how we feel? (1 From Peter 3:8)

⁶ Praying fo oddas help us “get pity fo each odda.” (Read um 1 From Peter 3:8.) Wen you get pity, dat mean you see somebody goin tru one hahd time an you like do someting fo help dem out. (Mar 1:40, 41) Michael, one elda, wen say, “Wen I pray fo oddas an wat dey need, it help me undastan moa betta wat dey goin tru, an dis make me love dem even moa. Dey might not kno it, but I feel closa to dem.” One elda name Richard talk about anodda good ting dat come from praying fo oddas. He tell, “Wen we pray fo someone, dat can make us like do someting fo dem . . . . An wen we do help dem, iz kinda like we stay helping ansa oua own prayas fo dat guy.”

7. How can praying fo oddas help us see oua problems in da right way? (Fo Da Philippi Peopo 2:3, 4) (Go look da pichas.)

⁷ Praying fo oddas help us fo see oua problems in da right way. (Read um Fo Da Philippi Peopo 2:3, 4.) Cuz we live in one world wea Satan stay in control, all us guys get problems. (1 John 5:19; Jesus Show 12:12) Wen we keep praying fo oddas, it can make us rememba dat oua “braddahs an sistahs all ova da world stay suffa jalike [us] guys.” (1 Pet 5:9) One pionea sistah Katherine wen tell, “Praying fo oddas help me rememba dat oddas goin tru hahd times too. Dis help me fo stop tinking too much about my own problems.”

ODDAS NEED OUA PRAYAS

8. Who we can pray fo?

⁸ Who we can pray fo? We can pray fo groups of peopo. Like guys dat get healt problems, or guys goin tru hahd times cuz of getting olda. Can even pray fo young guys in skool dat get picked on, or get presha from classmates fo do wrong tings. Oddas stay hanging in dea even tho get guys from da govament or in dea ohana dat goin agains dem. (Mat 10:18, 36; Jesus Guys 12:5) Some of oua braddahs had fo dig out from dea homes cuz peopo wuz getting nutz ova political stuffs. Oddas wen catch cracks from natural disastas. We might not kno ery single one of dese braddahs an sistahs. But wen we pray fo dem we show we doin wat Jesus wen tell us fo do, fo “show love an aloha fo each odda.”​—John 13:34.

9. How come iz good fo pray fo da braddahs taking da lead in Jehovah’s hui an dea wifes?

⁹ We can pray fo da guys taking da lead in Jehovah’s hui too. Like Jesus Luna Guys an da braddahs dat help um, Guys Dat Kea Fo Da Branch, ovaseahs at da branch offices, circuit ovaseahs, eldas, an da helpa guys in da local huis. Dese braddahs work hahd fo us, but still yet dey dealing wit dea own problems an worries too. (2 Cor 12:15) Fo exampo, one circuit ovaseah name Mark wen tell, “One of da hahdest ting fo me iz being far away from my parents who getting olda, an dea healt not too good. Even tho my sistah an her husban stay taking good kea of dem, it hurts me dat I no can be dea fo help dem moa.” Wedda we kno wat dese braddahs stay goin tru or not, would be good fo rememba fo pray fo dem. (1 Tess 5:12, 13) An we no like foget fo pray fo dea wifes too, cuz dey stay helping da braddahs keep goin in dea assignments.

10-11. Jehovah like wen we pray fo groups of oua braddahs an sistahs? How come?

¹⁰ Like we wen talk about, we can pray fo groups of oua braddahs an sistahs. Fo exampo, we can ask Jehovah fo help dose dat stay in prison or guys dat had loved ones mahke. Donald, one elda had say, “Get so many braddahs an sistahs goin tru hahd times, dat sometimes we jus say one praya fo all dem.”

¹¹ You tink Jehovah like dose kine prayas? Fo shua! We donno exackly wat ery single one of oua braddahs an sistahs need, so iz good fo pray fo diffren groups of dem. (John 17:20; Efe 6:18) Wen we pray lidis, we show dat we “get love an aloha fo [oua] braddahs an sistahs.”​—1 Pet 2:17.

PRAYING FO PEOPO BY NAME

12. Wen we look aroun, how dat help us wen we pray?

¹² Look aroun. On top of praying fo groups of oua braddahs an sistahs, iz good fo pray fo dem by name. Someone in yoa local hui really sick? Or get one young guy dass feeling down, maybe cuz of da preshas he get in skool? Or get one single parent trying hahd fo raise dea kid fo kno an love Jehovah? (Efe 6:4) By looking aroun an seeing wat oddas goin tru, dat goin help you love dem moa an make you like pray fo dem.b​—Rome 12:15.

13. How we can pray fo da braddahs an sistahs we neva meet yet?

¹³ Wen you pray, use dea name. We can even do dat fo dose we neva meet yet. Like, try tink about all da Witnesses dat stay in prison in Crimea, Eritrea, Russia, an Singapore. On top jw.org, you can find plenny of dea names.c Brian, one circuit ovaseah wen tell, “Wen I write da name of one braddah or sistah who stay lock up, an den say um out loud, den iz moa easy fo me rememba fo pray fo dem.”

14-15. Wat can help us fo pray fo someting oddas might need?

¹⁴ Ask fo someting dey might need. Michael, who we had talk about earlia, wen say, “Wen I read on jw.org about oua braddahs in prison, I try fo put myself in dea slippahs. I would worry about my wife an want to make shua she has wat she needs. So dis give me someting I can ask Jehovah fo wen I pray fo da married braddahs who stay lock up.”​—Heb 13:3.

¹⁵ Wen we tink about wat oua braddahs in prison goin tru, dat can help us find odda tings we can pray about. Like, we can pray fo da prison guards fo be nice, an dat da guys in charge goin let oua braddahs worship Jehovah. (1 Tim 2:1, 2) We can pray dat da good exampos of da braddahs an sistahs in prison will build up dea local hui, an help da guys who not Witnesses like lissen to da trut. (1 Pet 2:12) We can use wat we had learn in dis article an pray lidis fo any of oua braddahs an sistahs goin tru hahd times. We can look aroun, use dea names wen we pray, an ask Jehovah fo someting dey might need. Wen we do dat, we show we “get love an aloha fo each odda mo plenny.”​—1 Tess 3:12.

KEEP DA RIGHT KINE ATTITUDE ABOUT OUA PRAYAS

16. How we can keep da right kine attitude wen we pray? (Matthew 6:8)

¹⁶ Like we wen see, oua prayas might change wat might happen to somebody. But same time, we gotta have da right kine attitude. Wen we pray, we not telling Jehovah someting he donno, an he no need us fo tell him how fo fix one problem. Jehovah kno wat his servants need, even befoa dey kno it or we kno it. (Read um Matthew 6:8, NWT.) So how come we gotta pray fo oddas den? Cuz iz one good way fo show how much we really love an kea about oddas. An Jehovah stay supa happy wen we copy his love.

17-18. How oua prayas show oua love fo oua braddahs an sistahs? Use one word picha.

¹⁷ Even tho might look like oua prayas neva change or do anyting, it shows oua love fo oua braddahs an sistahs, an Jehovah see all dat. Try picha um lidis. Get one ohana wit two small keiki, one boy an one girl. Wen da boy stay sick, da girl cry to her faddah, “Dad, try do someting! He supa sick!” But da faddah get um all unda control. He love his boy an awready taking good kea of him. Still yet, da faddah stay supa happy fo see his bebe girl kea so much about her braddah dat she cry to him fo help.

¹⁸ So same ting, Jehovah like all us kea about one anodda an pray fo each odda. Cuz wen we pray lidat, Jehovah see dat we no kea ony about ouaselfs but we really love oua braddahs an sistahs. (2 Tess 1:3; Heb 6:10) An like we had talk about earlia, sometimes oua prayas can change wat happen to somebody. So den, we like do oua bestes fo rememba fo pray fo each odda.