Jesus Iz Oua Main Pries Who Undastan Us

1-2. (a) How come Jehovah wen sen his Boy to da eart? (b) Wat we goin talk about in dis lesson? (Fo Da Hebrew Peopo 5:7-9)

ABOUT 2,000 years ago, Jehovah God wen sen his Boy to da eart. How come? One reason wuz fo cut us guys loose from sin an deat, an fo hemo all da problems dat Satan had make. (John 3:16; 1 John 3:8) An Jehovah had kno dat wat Jesus would go tru az one human wuz goin help him fo be one Main Pries dat can undastan us. Jesus wen take on da kuleana az da Main Pries afta he wen get baptize in 29 C.E.a

² In dis lesson, we go talk about how wat Jesus wen go tru on da eart had help him be one Main Pries dat kea plenny fo us. Iz importan fo us undastan dis, cuz dat goin make um moa easy fo us pray to Jehovah, speshly wen we bummed out cuz of oua mistakes or feel like we goin give up.​—Read um Fo Da Hebrew Peopo 5:7-9.

JESUS COME TO DA EART

3-4. Wat kine changes Jesus wen go tru wen he came to da eart?

³ Plenny of us guys had fo deal wit some kine of change in oua life, like moving away from home an leaving family an frenz. Dat can be hahd. But none of us guys had fo deal wit da change dat Jesus wen go tru. In heaven, he wuz da firs an mos importan angel. Jehovah wen love him plenny, an he wen love working wit his Faddah. (Songs 16:11; Smart Guys 8:30) But Jesus wen give up eryting he had in heaven fo go live on eart wit peopo who no wuz perfeck.​—Php 2:7.

⁴ Try tink about wat wuz goin on da time Jesus wuz born, an wen he wuz one young boy. Jesus’ parents wuz pooa, an we kno dis cuz dey could ony give one small sacrifice afta he wuz born. (Pries 12:8; Luk 2:24) Den wen King Herod had find out about Jesus, he wen try kill him. Fo get away from King Herod, his parents wen take Jesus an live in Egypt fo awhile. (Mat 2:13, 15) All dis wuz one total flip from how he wen live in heaven!

5. Wat Jesus had see wen he wuz on eart, an how dat wen help him fo be one Main Pries dat undastan us? (Go look da picha.)

⁵ Wen Jesus wuz in heaven he wen see suffaring. But wen he wuz on eart, he had see um in one whole new way. (Isa. 53:4) Growing up az one human, he wen see plenny peopo suffa. He wen learn wat it feel like fo humans lose peopo dey love, cuz he wen lose peopo close to him, like his hanai faddah Joseph. Jesus had meet plenny peopo who wuz supa sick, blind, no could walk, an even parents who wen lose dea keikis. An Jesus wen feel fo all of dem. (Mat 9:2, 6; 15:30; 20:34; Mar 1:40, 41; Luk 7:13) Wat Jesus had see on top da eart wen help him undastan moa betta how peopo feel, an da pains dey go tru. He wen see wat wuz like fo feel tired, stressed an sad.

JESUS SHOW HE FEEL FO PEOPO

6. Wat we can learn from Isaiah’s prophecy about da love an pity Jesus get fo peopo? (Isaiah 42:3)

⁶ Da whole time he wuz preaching, he wen show dat he feel fo da guys dat wuz treated bad. Same time wen he had do dat, he wuz making prophecy come tru. In da Hebrew scripchas, sometimes dey compare guys dass strong an doin good, to one garden dat get plenny watta or trees dass tall an strong. (Songs 92:12; Isa 61:3; Jer 31:12) But dey compare da guys dass pooa or not treated fair to one stick dass about fo broke, or one candle dass ready fo go out. Peopo look at dose tings az stuffs dey no can use. (Read um Isaiah 42:3; Mat 12:20) Jehovah had da prophet Isaiah write dese word pichas fo tell how Jesus wuz goin show love, an pity fo da peopo dat oddas look at like dey rubbish.

7-8. How Jesus wen make Isaiah’s prophecy come tru?

⁷ Matthew had show Jesus wen make da prophecy at Isaiah 42:3 come tru. (Luk 5:12, 13) Jesus had do plenny miracles fo da guys dat wuz treated bad by oddas, an who wen feel like dey wuz one stick about fo broke or one fiyah ready fo burn out. Fo exampo, Jesus wen meet one guy dat had leprosy. Da guy probly had feel like he neva wuz goin get betta an get fo hang out wit his family an frenz. (Luk 5:12, 13) An den had one guy dat wuz deaf an no could talk good. Try tink how da guy wen feel wen he had see peopo talking wit each odda an he no could undastan dem.​—Mar 7:32, 33

⁸ Wen Jesus wuz on eart, plenny Jew guys wen tink peopo suffa cuz of da bad stuff dey wen do or da bad stuff dea parents wen do. (John 9:2) Cuz of dis wrong tinking, had some dat look down on da guys dat wuz suffaring, an wen make dem feel like dey wuz notting. But Jesus neva treat dem lidat. He wen heal dem an help dem kno dat God kea about dem. Wat dis teach about how Jesus feel about us today?

9. How Fo Da Hebrew Peopo 4:15, 16 show dat oua Main Pries really undastan peopo?

⁹ Read um Fo Da Hebrew Peopo 4:15, 16. We can kno fo shua Jesus always goin undastan us. Da Greek word fo “undastan” mean fo feel da pain dat oddas get. Wen we read in da Bible about how Jesus had help peopo, we can see how he really wen kea fo dem. He neva help peopo cuz he feel he had to, but he wanted to. Like wen Jesus had heal da lepa, he neva have to touch him, but he did. Dat wuz probly da firs time in years somebody wen reach out an touch da lepa. An look wat wen happen wen Jesus heal da deaf guy. Wen he had heal him, he wen take him to wea neva have too much guys or plenny noise. An tink about da wahine who wen do real bad tings but had change. She wen wash Jesus’ feets wit her tears. One Pharisee wuz mean to her, but Jesus wen proteck her an back her up. (Mat 8:3; Mar 7:33; Luk 7:44) Jesus neva stay away from da guys dat wuz sick or da guys dat wen do real bad stuff. He wanted dem fo come close to him cuz he wanted fo show dem love. We can kno fo shua dat he goin treat us da same way.

COPY OUA MAIN PRIES

10. Wat we get today fo help da deaf an blind guys come moa close to Jehovah? (Go look da pichas.)

¹⁰ Cuz we like copy Jesus, we try oua bes fo feel fo oddas an show love. (1 Pet 2:21; 3:8) We no can heal da deaf or blind, but we can help um spiritually. Like, we get Bible publications in ova 100 sign languages. Fo da guys dat no can see good, we get stuffs in braille in ova 60 languages. An in ova 100 languages, we get audio descriptions fo oua videos. All dese stuffs help da deaf an blind guys come moa close to Jehovah an his Boy.

11. How Jehovah’s hui show dey feel da same way fo peopo jalike Jesus? (Jesus Guys 2:5-7, 33) (Go look da pichas.)

¹¹ Jehovah’s hui trying fo help all kine peopo. Rememba wen Jesus had come back alive, he wen give his spesho spirit to his followas at Pentecos so dat dey could preach to erybody dea in “dea own kine language.” (Read um Jesus Guys 2:5-7, 33.) Today, da hui follow Jesus’ lead an make Bible publications in ova 1,000 languages. Some of dem ony litto bit peopo speak, like da Amerindian languages in North an South America. Still yet, Jehovah’s hui wen make publications in moa den 160 of dose languages fo make shua dey can hea da trut. We even get stuff in ova 20 Romany languages. An plenny guys who talk dose languages wen start fo serve Jehovah.

12. Wat odda tings Jehovah’s hui do fo help peopo?

¹² On top of helping peopo learn da trut, Jehovah’s hui help guys dat get hit wit natural disastas. Tousans of oua braddahs an sistahs iz ready fo jump in an help. Da hui even set up meeting places wea peopo come togedda fo learn about Jehovah an how much he love dem.

OUA MAIN PRIES CAN HELP YOU

13. Wat iz some ways Jesus help us?

¹³ Jesus iz one good shepherd dat make shua we get eryting we need fo stay close to Jehovah. (John 10:14; Efe 4:7, NWT) But sometimes we can feel like giving up, like one stick dass ready fo broke or one fiyah about fo go out. Maybe iz cuz we sick, wen mess up, or wen get into one beef wit one braddah or sistah. All dose problems can make um hahd fo focus on oua hope fo da future. But rememba Jesus see wat you goin tru an undastan how you feel, an he like help you. Fo exampo, he can use spesho spirit fo help you come strong wen you feel weak. (John 16:7; Titus 3:6) An he can use da eldas, an odda braddahs an sistahs fo build you up an help you.​—Efe 4:8, NWT.

14. Wat we can do wen we start fo lose fight?

¹⁴ If you start fo lose fight, try fo rememba Jesus’ kuleana az oua Main Pries, an wat dat mean fo you. Jehovah neva ony sen Jesus to da eart fo die fo us, but so dat he can undastan wat we go tru moa betta too. So wen we get bummed out cuz of oua sins or we stay weak, Jesus always ready fo help us at da right time.​—Heb 4:15, 16.

15. Try tell wat wen help one guy come back to Jehovah.

¹⁵ Jesus also help da hui fo kokua da guys dat wen leave Jehovah fo come back to Him. (Mat 18:12, 13) Try look wat wen happen to Stefano.b Afta he wuz hemo from da hui fo 12 years, he had go one meeting. He tell, “Wuz awkward, but I wanted fo be paht of Jehovah’s ohana again . . . . Da eldas who wen meet wit me wen make me feel at home. Sometimes I had feel so down, I wanted fo give up. But da braddahs wen remind me dat Jehovah an Jesus wanted me fo keep goin. Wen I wuz reinstated, da local hui wen show me an my ohana so much love an aloha. Layta on my wife started fo study da Bible, an now we all serving Jehovah togedda az one family.” Oua Main Pries iz so happy wen guys come back to Jehovah!

16. Why you tankful dat we get one Main Pries dat full on undastan us?

¹⁶ Wen Jesus wuz on da eart, he wen help plenny peopo. An today we kno fo shua he goin help us too. Pretty soon in da new world, Jesus goin hemo sin an all da bad stuff dat come from it. We so tankful to Jehovah fo da love he wen show us by making his Boy da Main Pries dat full on undastan us!