You Wort Plenny To Jehovah!

1-2. Wat can help us kno dat we wort plenny to Jehovah?

JEHOVAH’S peopo iz spesho to him. But get some who tink dey not, cuz maybe somebody had make dem feel wortless. If you eva wen feel lidis, how you can kno fo shua you wort plenny to Jehovah?

² Iz good fo look inside da Bible fo see how Jehovah like peopo be treated. Jesus wuz nice to peopo an had treat dem wit respeck. Wen he had do dat, Jesus wen show dat da guys who feel like dey wort notting iz wort plenny to him an Jehovah. (John 5:19; Heb 1:3) In dis lesson we goin go ova (1) how Jesus wen help peopo see dat dey wort plenny to Jehovah an (2) how we can be shua dat we wort plenny to Him too.​—Hag 2:7.

HOW JESUS WEN HELP PEOPO SEE DEY WORT PLENNY TO JEHOVAH

3. How Jesus wen treat da guys in Galilee who wen come to him fo help?

³ Wen Jesus wuz preaching in Galilee, plenny peopo wen come fo lissen to him an get healed. He had say ”dey jalike da sheeps dat no mo one sheep guy fo take kea dem.” (Mat 9:36) Da religious leadas wen look at da peopo like dey wuz rubbish, like dey wuzn’t even wort taking kea of. (John 7:47-49) But Jesus wen show dat dey wuz importan cuz he wen take da time fo teach an heal dem. (Mat 9:35) An cuz Jesus wanted fo help moa peopo, he wen teach his aposals fo preach, an had tell dem fo make da sick guys come good.​—Mat 10:5-8.

4. Wat we learn from how Jesus wen treat da guys dat oddas wen look down on?

⁴ Wen Jesus wuz nice an had treat da guys dat oddas look down on wit respeck, he had show dey wort plenny to him an his Faddah. If you feel like you no matta to Jehovah, tink about how Jesus wen treat da guys who wanted fo learn from him. Dat goin help you see how importan you stay to Jehovah.

5. Wat wuz goin on wit da wahine from Galilee?

⁵ Jesus neva ony help big groups of peopo, but sometimes wen help one person at a time too. Like wen he wuz preaching in Galilee, he had meet one wahine wit one medical problem dat wen make her bleed fo 12 years. (Mar 5:25) Cuz of dat problem, she probly wuz by herself mos of da time. An she no could worship Jehovah wit odda peopo. (Pries 15:19, 25) So dis wahine wuz not ony sick, but probly wen feel wortless too.​—Mar 5:26.

6. Wat da wahine wen do fo get betta?

⁶ Da wahine dat wuz suffaring wanted Jesus fo heal her, but she neva go right up to him fo ask fo help. How come? Maybe she wuz shame. Or maybe she wuz sked Jesus wuz goin scold her, cuz she wuzn’t suppose to be aroun peopo since she no wuz clean. So wat she had do? She wen touch his clothes cuz she wen believe dat if she did, she would get betta. (Mar 5:27, 28) An cuz she did dat, she wen get healed. Wen take plenny fait fo her do dat! Den Jesus wen ask who had touch him. She wen fess up dat she wuz da one. How Jesus wen reack to wat she wen do?

7. How Jesus wen treat da wahine? (Mark 5:34)

⁷ Jesus wuz nice to da wahine an had treat her wit respeck. He even wen call her “sistah”, one word dat show respeck an love fo somebody. (Read um Mark 5:34.) Da original word Jesus wen use ova hea, iz da ony time he eva wen call one wahine dat. He probly wen call her dat cuz he wen see dat she wuz “sked an shaking.” (Mar 5:33) Try picha how she had feel, she musta been so happy! Woulda been junk if Jesus had heal her but wen make her feel guilty cuz she no wuz suppose to be aroun peopo. But he neva do dat. Jesus wen help her see dat she wuz spesho to Jehovah.

8. Wat one sistah from Brazil had fo deal wit?

⁸ Today some in Jehovah’s hui get healt problems dat make dem feel depress. Like one sistah name Maria,a one full time pionea from Brazil. She wuz born wit no legs or lef hand. She tell, “Da kids wen bully me all da time an call me names dat wen hurt me. Even my family had treat me bad.”

9. Wat wen help Maria see dat she wort plenny to Jehovah?

⁹ So wat wen help Maria? Wen she wen come one Witness Fo Jehovah, da braddahs an sistahs had help her see herself like how Jehovah see her. She tell, “Had choke peopo dat wen help me. I tank Jehovah fo giving me one awesome spiritual family.” Fo shua da braddahs an sistahs wen help her fo see she wort plenny to Jehovah.

10. Wat kine problems Mary da Magdala wahine had? (Go look da pichas.)

¹⁰ Now try look how Jesus wen help Mary da Magdala wahine, who had seven demons dat wen take ova her. (Luk 8:2) Da demons probly wen make her ack all crazy, an cuz of dat, peopo probly neva like go by her. She wen suffa plenny. Maybe she had feel supa sked, an like nobody wen love her, or could help her out. But Jesus wen help an free her from da demons, an she wen come one of his followas.

11. How Jesus wen help Mary da Magdala wahine see dat she wuz wort plenny to Jehovah? (Go look da pichas.)

¹¹ Wat odda kine ways Jesus wen help Mary da Magdala wahine see she wuz wort plenny to Jehovah? Wen he wuz goin go preach in diffren towns, he had ask her fo go wit him. An cuz of dat, she got fo hea him teach all kine peopo.b On da day dat Jesus wuz resurrected, she wuz one of da firs ones he wen talk to dat day. Den Jesus wen give her da kuleana fo tell da aposals dat he wen come back alive. In all dese kine ways, he wen show she wort plenny to Jehovah!​—John 20:11-18.

12. How come Lidia wen feel like nobody love her?

¹² Jus like Mary da Magdala wahine, choke peopo today feel like no one can love dem. Lidia, one sistah from Spain, wen tell dat her maddah had tink of getting one abortion wen she wuz pregnant wit her. Even wen Lidia wuz one small kid, she rememba how her maddah neva take kea her an wen say all kine mean stuff to her. She tell, “All I wanted wuz fo oddas love me, cuz my maddah neva did. She wen make me tink I wuz one bad person so I wuz sked nobody would eva love me.”

13. Wat wen help Lidia fo see dat she iz spesho to Jehovah?

¹³ Tings started fo change fo Lidia wen she had learn da trut. Praying, studying, an how da braddahs an sistahs wen treat her had help her fo see she wort plenny to Jehovah. She tell, “My husban always tell me how much he love me an keep reminding me of da good tings he see in me. An da braddahs an sistahs do da same ting.” You kno anybody dat need help seeing dat dey spesho to Jehovah?

HOW FO SEE OUASELFS DA WAY JEHOVAH SEE US

14. How 1 Samuel 16:7 help us fo see ouaselfs da way Jehovah see us? (Go look da box “How Fo See Ouaselfs Da Way Jehovah See Us”)

¹⁴ Rememba dat da way Jehovah see us iz not da way da world see us. (Read um 1 Samuel 16:7.) Peopo in da world tink how you look, how much money you get, or how much skool you wen go iz importan. But Jehovah no tink lidat. (Isa 55:8, 9) So try see yoaself da way he see you, not da way peopo in da world see you. Da Bible talk about peopo dat wen feel wortless, like Elijah, Naomi, an Hannah. Wen you read about dem, try look how Jehovah wen show how much he love dem. Try write down tings dat wen happen in yoa life dat prove you importan to Jehovah, an he love you. You can even look up articles dat show you wort plenny to Jehovah.c

15. How come Daniel wuz spesho to Jehovah? (Daniel 9:23)

¹⁵ Kno dat cuz you faitful, you spesho to Jehovah. Had one time wen Daniel wuz almos 100 years old, an he “wuz supa tired an weak.” (Dan 9:20, 21, NWT) How Jehovah wen build him up? Jehovah wen sen da angel Gabriel fo help Daniel see dat he wort plenny an God wen hea his prayas. (Read um Daniel 9:23.) How come Daniel wuz spesho to Jehovah? Cuz Daniel wuz faitful to him, an wen love wat wuz right. (Eze 14:14) Jehovah wen put dis story in da Bible fo build us up. (Rome 15:4) Cuz you love wat iz right an stay faitful to Jehovah, you spesho to him. An jus like he wen lissen to Daniel’s prayas, Jehovah goin lissen yoa prayas too.​—Mic 6:8, NWT; Heb 6:10.

16. Wat can help you fo see Jehovah az one Faddah dat love you?

¹⁶ See Jehovah az one Faddah who love you. Jehovah focus on da good in you, not da bad. He like help you. (Songs 130:3; Mat 7:11, NWT; Luk 12:6, 7) Tinking about dat wen help plenny peopo who feel like dey wort notting. Try look Michelle one sistah from Spain. Her husban wen talk real mean to her fo plenny years. Cuz of dat, she had feel useless an like no one could love her. She tell, “Weneva I feel useless, I try fo tink of Jehovah carrying me, proteckting me, an showing me love.” (Songs 28:9) Lauren, one sistah from South Africa, remind herself, “If Jehovah wen bring me by him, an keep me close to him all dese years, an even wen use me fo teach oddas about him, den fo shua I wort plenny to him.”​—Hos 11:4.

17. Wat can help you kno fo shua dat Jehovah stay good wit you? (Songs Fo God 5:12) (Go look da pichas.)

¹⁷ Kno fo shua dat Jehovah stay good wit you. (Read um Songs Fo God 5:12.) David wen tell dat Jehovah stay good wit da guys dat do da right ting an proteck dem like “one shield.” Weneva you start fo feel wortless, knowing dat Jehovah stay good wit you can proteck you like one shield from dat kine tinking. But how you can kno Jehovah stay good wit you? Like we wen talk about earlia, Jehovah let us kno tru da Bible. On top of dat, he use da eldas, good frenz, an oddas fo let you kno you dat you wort plenny to Him. But wen dey say dat kine stuff, how you should ack?

18. Why you no like shut down da nice stuff peopo say about you?

¹⁸ Wen da peopo dat kno an love you tell you nice kine tings, no shut um down. Cuz Jehovah might be using dem fo help you kno dat he good wit you. Michelle, da sistah we wen talk bout earlia, tell, ”Litto by litto, I starting fo believe da nice stuff peopo say about me. Iz hahd, but I kno dass wat Jehovah like me do.” Anodda ting dat wen help Michelle wuz da eldas. Dey wen help her see dat Jehovah love her. An now she one pionea an remote worka fo Bethel.

19. Why you can kno fo shua dat you spesho to Jehovah?

¹⁹ We kno fo shua dat we wort plenny to Jehovah cuz Jesus wen help us fo see we spesho to Him. (Luk 12:24) We neva like foget dis! An we like try real hahd fo help oddas see dat dey wort plenny to Jehovah too!