Ի՞նչ ենք դիտելու այս ամառ

ԱՄԱՌԸ ի՞նչ սպասելիքներ է արթնացնում ձեր մեջ։ Թերևս ակնկալում եք, որ եղանակը կտաքանա, և դուք ժամանակ կանցկացնեք դրսում, միգուցե կգնաք ծովափ կամ զբոսայգի։

Կինոարդյունաբերությամբ զբաղվողները, սակայն, հույս ունեն, որ միլիոնավոր մարդիկ շատ ժամանակ կանցկացնեն կինոթատրոնների պատերի մեջ։ Միայն ԱՄՆ–ում գոյություն ունեն առնվազն 35 000 կինոսրահներ։ Վերջին տարիներին այդ երկրում տոմսարկղերից ձեռք բերված եկամտի մոտ 40 տոկոսը հավաքվել է ամռան ընթացքում։a Ինչպես մի պարբերագրում ասում է Հայդի Փարքերը, ամառային սեզոնը կինոարդյունաբերության համար «նույնքան եկամտաբեր է, որքան Սուրբ Ծնունդը՝ մանրածախ առևտրի» («Movieline»)։

Սակայն միշտ չէ, որ այսպես է եղել։ Ամռան ընթացքում ԱՄՆ–ի կինոթատրոնները դատարկ էին լինում, ինչի հետևանքով դրանցից շատերը սահմանափակում էին ֆիլմերի ցուցադրությունը կամ էլ փակվում։ Բայց երբ 1970–ականների կեսերին կինոթատրոններում տեղադրվեցին օդափոխիչ սարքավորումներ, միլիոնավոր մարդիկ ներս հոսեցին շոգից խուսափելու համար։ Ամառային արձակուրդները վայելող երեխաները պոտենցիալ գնորդներ էին, որոնք չվրիպեցին կինոարտադրողների ուշադրությունից։ Կարճ ժամանակ անց երևան եկան ամառային բլոքբասթերները։b Եվ դա փոխեց կինոֆիլմերի արտադրման ու վաճառքի եղանակը։ Բայց այդ մասին՝ հաջորդ հոդվածում։

[Ծանոթագրություններ]