Երիտասարդները հարցնում են...

Ինչպե՞ս վարվեմ, երբ ինձ առաջարկում են զբաղվել սեքսով

«Տղաները փորձում են աղջիկների հետ «կապվել» միայն նրա համար, որ տեսնեն, թե որքան հեռու կարող են «գնալ» և, ի վերջո, քանի հոգու հետ զբաղվել սեքսով» (Փենի)։a

«Տղաները բացեիբաց խոսում են այդ թեմայով։ Նրանք պարծենում են, որ սիրած աղջիկ ունենալով հանդերձ՝ հաջողեցնում են սեքսով զբաղվել նաև շատ ուրիշ աղջիկների հետ» (Էդուարդ)։

«Նրանք, ովքեր ինձ առաջարկեցին սեքսով զբաղվել, շատ պարզ էին արտահայտվում այդ մասին։ «Ոչ» ասելը չի կանգնեցնում նրանց» (Իդա)։

ՏԱՐԲԵՐ երկրներում տարբեր կերպ են անվանում այս երևույթը։ Օրինակ՝ Ճապոնիայում, ինչպես ասում է երիտասարդ Ակիկոն, «դա կոչվում է «սեֆրե» [հապավում անգլերեն «sex friend» արտահայտությունից], այսինքն՝ սեքսի ընկեր։ Այդպիսի ընկերության միակ նպատակը սեքսով զբաղվելն է»։

Ինչպես էլ որ այդ երևույթը կոչվի, իմաստը նույնն է՝ սեռական հարաբերություն՝ առանց էմոցիոնալ կապվածության։b Որոշ տղաներ և աղջիկներ նույնիսկ պարծենում են, որ ունեն, այսպես ասած, օգուտ տվող ընկերներ (ընկերուհիներ), այսինքն՝ ծանոթներ, որոնց հետ կարող են սեռական կապի մեջ մտնել՝ առանց այն «բարդությունների», որ սովորաբար լինում են երկարատև սիրային հարաբերությունների ժամանակ։ «Նպատակը արագորեն հաճույք ստանալն է,— ասում է մի երիտասարդ կին։— Դու ստանում ես այն, ինչ քեզ պետք է։ Հետո թողնում գնում ես»։

Դու պետք է «փախչես պոռնկությունից», քանի որ քրիստոնյա ես (1 Կորնթացիներ 6:18)։c Սա գիտակցելով՝ հավանաբար կձգտես խուսափել այնպիսի իրավիճակներից, որոնք կարող են փորձանքի մեջ գցել քեզ։ Սակայն երբեմն փորձանքն ինքն է գալիս քեզ մոտ։ Սինդին ասում է. «Դպրոցում շատ տղաներ ինձ առաջարկում են «հանդիպել»»։ Նույնը կարող է պատահել աշխատավայրում։ Մարգարիտը պատմում է. «Տնօրենս ինձ առաջարկեց իր հետ «ժամանակ անցկացնել»։ Նա այնքան համառ էր, որ ես ստիպված էի թողնել աշխատանքս»։

Սակայն մի զարմացիր, եթե նկատես, որ ներքուստ նման կապի մեջ մտնելու ցանկություն է առաջանում։ Աստվածաշունչն ասում է. «Խորամանկ է սիրտն ամենից աւելի եւ ապականուած» (Երեմիա 17:9)։ Լուրդես անունով մի աղջիկ համոզված է այս խոսքերի ճշմարտացիության մեջ։ Նա խոստովանում է. «Ինձ դուր էր գալիս այն տղան, որն առաջարկել էր սեռական հարաբերություն ունենալ իր հետ»։ Ջեյնի հետ նույնպես նման բան է պատահել. «Ես խելահեղ զգացմունքներ ունեի նրա հանդեպ։ «Ո՛չ» ասելը մեկն էր այն ամենածանր որոշումներից, որ երբևէ ստիպված եմ եղել կայացնել»։ Էդուարդը, որի խոսքերը մեջբերվեցին վերևում, նույնպես խոստովանում է, որ բարոյապես մաքուր մնալը հեշտ չէ։ «Շատ աղջիկներ են ինձ առաջարկում սեքսով զբաղվել։ Նրանց մերժելը ամենադժվար փորձությունն է, որ ես՝ որպես քրիստոնյա, դիմագրավում եմ։ Հեշտ չէ «ո՛չ» ասել»։

Եթե դու քեզ զգացել ես Լուրդեսի, Ջեյնի և Էդուարդի պես, բայցևայնպես արել ես այն, ինչ ճիշտ է Եհովայի աչքին, ապա գովասանքի ես արժանի։ Քեզ համար մխիթարական կլինի իմանալ, որ Պողոս առաքյալը նույնպես ներքին պայքար էր մղում սխալ հակումների դեմ (Հռոմեացիներ 7:21–24)։

Աստվածաշնչյան ի՞նչ սկզբունքներ պետք է հիշես, երբ քեզ առաջարկում են զբաղվել սեքսով։

Հասկացի՛ր, թե ինչու է դա սխալ

Աստվածաշունչը դատապարտում է ամուսնությունից դուրս սեռական հարաբերությունները։ Պոռնկությունն այնքա՛ն լուրջ մեղք է, որ դրանով զբաղվողները «Աստծու թագավորությունը չեն ժառանգելու» (1 Կորնթացիներ 6:9, 10)։ Որպեսզի չտրվես սեքսով զբաղվելու գայթակղությանը, պետք է Եհովայի տեսակետն ունենաս այդպիսի վարքի վերաբերյալ։ Դու պետք է ինքդ ցանկանաս, վճռես բարոյապես մաքուր մնալ։

«Ես վստահ եմ, որ մեծագույն երջանկությունը բխում է Եհովայի ուղիներին հետևելուց» (Կարինա, Կանադա)։

«Անհատը շատ բան է կորցնում, երբ անտեսում է Եհովայի բարոյական չափանիշները ընդամենը մի քանի րոպե հաճույքի համար» (Վիվիեն, Մեքսիկա)։

«Հիշիր, որ դու մեկի որդին ես կամ դուստրը, շատերի ընկերը և ժողովի անդամ։ Այդ բոլոր մարդկանց դու հիասթափություն կպատճառես, եթե տրվես գայթակղությանը» (Փիթեր, Մեծ Բրիտանիա)։

Պողոս առաքյալը գրեց. «Շարունակե՛ք հավաստիանալ, թե ինչն է ընդունելի Տիրոջը» (Եփեսացիներ 5:10)։ Պոռնկության վերաբերյալ ունենալով Եհովայի տեսակետը՝ դու կկարողանաս «ատել չարը», թեև անկատար մարմնի համար այդ չար բանը գուցե գրավիչ լինի (Սաղմոս 97:10)։

◼ Առաջարկում ենք ընթերցել Ծննդոց 39։7–9-ը։ Ուշադրություն դարձրու, թե Հովսեփն ինչպես համարձակորեն մերժեց սեռական կապի մեջ մտնելու առաջարկը, և թե ինչն օգնեց նրան այդպես վարվելու։

Հպարտացի՛ր քո համոզմունքներով

Սովորաբար երիտասարդները թիկունք են կանգնում և պաշտպանում են այն, ինչին հավատում են։ Որպես քրիստոնյա՝ դու առանձնաշնորհում ունես քո օրինակելի վարքով պաշտպանելու Աստծու անունը։ Մի՛ ամաչիր, որ մինչամուսնական սեքսի վերաբերյալ անզիջում դիրքորոշում ունես։

«Թող բոլորը հստակ իմանան, որ բարոյական որոշակի սկզբունքներ ունես» (Ալեն, Գերմանիա)։

«Քեզ անհարմար մի զգա քո համոզմունքների համար» (Էսթեր, Նիգերիա)։

«Հասակակիցներդ սեքսով զբաղվելու վերաբերյալ քո տեսակետը չեն հարգի, եթե նրանց, օրինակ, ասես «ծնողներս ինձ չեն թույլատրում» կամ նման մի բան։ Դու պետք է ցույց տաս նրանց, որ դու ինքդ չես ուզում զբաղվել դրանով» (Ջանեթ, Հարավային Աֆրիկա)։

«Մեր դասարանի տղաները գիտեին, թե ով եմ ես, և լավ հասկանում էին, որ իզուր ժամանակ են կորցնելու ինձ վրա» (Վիկի, Միացյալ Նահանգներ)։

Համոզմունքներդ պաշտպանելը նշան է այն բանի, որ դու հասուն քրիստոնյա ես դառնում (1 Կորնթացիներ 14:20)։

◼ Առաջարկում ենք ընթերցել Առակաց 27։11–ը։ Մտածիր, թե ինչպես կարող ես քո կոնկրետ գործողություններով թիկունք կանգնել բոլոր ժամանակների ամենակարևոր հարցին՝ Եհովայի անվան սրբացմանը։

Հաստատակա՛մ եղիր

Կարևոր է ասել «ո՛չ»։ Սակայն ոմանք կարող են սխալ մեկնաբանել քո մերժումը՝ մտածելով, թե դու պարզապես «կոտրատվում» ես։

««Ո՛չ» ասելը կարող է դիտվել որպես մարտահրավեր, խոչընդոտ, որը հարկավոր է հաղթահարել, և անհատը գուցե ավելի վճռականորեն տրամադրվի՝ հետամուտ լինելու քեզ» (Լորեն, Կանադա)։

«Քեզ հետ կապված ամեն ինչ, այն, թե ինչպես ես հագնվում, խոսում, ում հետ ես խոսում և թե ինչպես ես շփվում մարդկանց հետ, պետք է ցույց տա, որ մերժում ես նման առաջարկները» (Ջոյ, Նիգերիա)։

«Քո «ո՛չ»–ը պետք է լինի վճռական և հստակ» (Դանիել, Ավստրալիա)։

«Եղիր ուժե՛ղ։ Երբ մի երիտասարդ անպարկեշտ առաջարկ արեց ինձ, ես ասացի՝ «ձեռքդ քաշի՛ր ուսիցս», և հեռացա՝ խիստ հայացք նետելով նրան» (Էլեն, Մեծ Բրիտանիա)։

«Դու պետք է կտրականորեն ասես, որ քեզ դա չի հետաքրքրում և չի էլ հետաքրքրի։ Այդ պահին մեղմությունը ամենևին էլ տեղին չէ» (Ջին, Շոտլանդիա)։

«Մի տղա շարունակ անհանգստացնում էր ինձ իր առաջարկներով և ծաղրում։ Եկավ պահը, երբ շատ կտրուկ պետք է վարվեի նրա հետ։ Միայն այդ ժամանակ նա դադարեց ինձ անհանգստացնելուց» (Խուանիտա, Մեքսիկա)։

Դու պետք է պարզ ասես, որ այդպիսի բան երբեք չի լինի։ Երբեք նվերներ մի ընդունիր այն տղաներից, ովքեր սեքսով զբաղվելու առաջարկություն են անում քեզ։ Եթե ընդունես, նրանք դա կօգտագործեն քո դեմ, կարծես դու ինչ–որ բան ես պարտք նրանց» (Լարա, Մեծ Բրիտանիա)։

Եհովան կօգնի քեզ, եթե հաստատակամ լինես։ Ելնելով անձնական փորձից՝ սաղմոսերգու Դավիթը կարող էր Եհովայի մասին ասել. «Նվիրվածի հետ նվիրված ես» (Սաղմոս 18:25, ՆԱ)։

◼ Առաջարկում ենք ընթերցել Բ Մնացորդաց 16։9–ը։ Ուշադրություն դարձրու, թե որքան շատ է Եհովան ուզում օգնել նրանց, ում սիրտն «ուղիղ է [իր] հետ»։

Հեռատե՛ս եղիր

Աստվածաշունչն ասում է. «Խորագէտը տեսնում է չարիքը եւ իրան պահում» (Առակաց 22:3)։ Ինչպե՞ս կարող ես հետևել այս խորհրդին։ Հեռատես լինելով։

«Որքան կարող ես, հեռու մնա այն մարդկանցից, որոնք խոսում են նման բաների մասին» (Նաոմի, Ճապոնիա)։

«Խուսափիր այն ընկերակցություններից և իրավիճակներից, որոնք կարող են վտանգավոր լինել։ Ես գիտեմ ոմանց, ովքեր համաձայնվել են սեքսով զբաղվել ալկոհոլի ազդեցության տակ» (Իշա, Բրազիլիա)։

«Քո մասին ինֆորմացիա մի տուր, ասենք, հեռախոսիդ համարը, կամ տանդ հասցեն» (Դայանա, Մեծ Բրիտանիա)։

«Թույլ մի տուր, որ համադասարանցիներիդ քեզ հետ ազատորեն ողջագուրվեն» (Էսթեր, Նիգերիա)։

«Ուշադրություն դարձրու քո հագուկապին։ Հագուստդ չպետք է ցանկահարույց լինի» (Հայդի, Գերմանիա)։

«Ծնողների հետ լավ հարաբերություններ ունենալն ու նրանց հետ այդ մասին զրուցելը կարող է զորեղ պաշտպանություն լինել» (Ակիկո, Ճապոնիա)։

Ուշադրություն դարձրու քո խոսքին, վարքին, ընկերակցությանը և այն բանին, թե ուր ես հաճախ գնում։ Ապա հարցրու ինքդ քեզ. «Ինքս ինձ դնո՞ւմ եմ այնպիսի իրավիճակում կամ անգիտակցաբար անո՞ւմ եմ այնպիսի բաներ, որոնք հակառակ սեռի անհատին կարող են հուշել, որ սեքսով զբաղվելու առաջարկներ անի ինձ»։

◼ Առաջարկում ենք ընթերցել Ծննդոց 34։1, 2–ը։ Խորհիր, թե սխալ վայրում գտնվելը ինչ ողբերգական հետևանքներ ունեցավ Դինա անունով աղջկա համար։

Հիշիր, որ Եհովան շատ լուրջ է վերաբերվում այն բանին, երբ մարդիկ ապօրինի սեքսով են զբաղվում։ Ուստի դու նույնպես պետք է այդպիսի տեսակետ ունենաս։ Աստվածաշունչն ասում է. «Ոչ մի պոռնիկ կամ անմաքուր [անհատ].... ժառանգություն չունի Քրիստոսի և Աստծու թագավորության մեջ» (Եփեսացիներ 5:5)։ Ճիշտ բանին թիկունք կանգնելով՝ կարող ես խիղճդ մաքուր պահել և ինքնահարգանքի զգացում ունենալ։ Կարլի անունով մի աղջիկ ասաց. «Ինչո՞ւ թույլ տաս, որ ինչ–որ մեկը քեզ օգտագործի իր րոպեական հաճույքի համար։ Պահպանիր այն, ինչն ունենալու համար մեծ ջանքեր ես ներդրել»։

«Երիտասարդները հարցնում են...» խորագրից ավելի շատ հոդվածներ կարելի է գտնել www.watchtower.org/ypa վեբ կայքում

[Ծանոթագրություններ]

ՄՏԱԾԻՐ

◼ Անկատար մարմնին գուցե դուր գա ապօրինի սեքսով զբաղվելու միտքը, սակայն ինչո՞ւ է դա սխալ։

◼ Ի՞նչ կանես, եթե ինչ–որ մեկը քեզ առաջարկի սեքսով զբաղվել։

[Շրջանակ 19–րդ էջի վրա]

◼ Աստվածաշունչն ասում է, որ պոռնկությամբ զբաղվող մարդը «իր իսկ մարմնի դեմ է մեղք գործում» (1 Կորնթացիներ 6:18)։ Ինչպե՞ս։ Խորհիր, թե ինչպես դա կարող է պատահել և նշիր այստեղ։

․․․․․

Հուշում։ Որպեսզի կարողանաս պատասխանել այս հարցին, օգտվիր «Դիտարանի» 2006 թ. հունիսի 15–ի (էջ 28, պարբ. 14) և 2002 թ. հունիսի 15–ի (էջ 21, պարբ. 17) համարներից, ինչպես նաև «Տրամաբանել Սուրբ Գրությունների հիման վրա» գրքից (էջ 188, անգլ.) և «Գրությունների ըմբռնում» հանրագիտարանից (հ. 1, էջ 863, անգլ.)։ Հրատարակվել են Եհովայի վկաների կողմից։

[Շրջանակ 21–րդ էջի վրա]

ԽՈՍՔ՝ ԾՆՈՂՆԵՐԻՆ

«Դպրոցում դասընկերներիցս մեկը առաջարկեց իր հետ «լինել»։ Ես միանգամից չհասկացա, թե նա ինչ նկատի ուներ։ Ընդամենը 11 տարեկան էի» (Լիա)։

Երեխաները սեքսի մասին առաջին անգամ լսում են բավական վաղ հասակից։ Դարեր առաջ Աստվածաշունչը կանխագուշակել էր, որ «վերջին օրերը» կբնութագրվեն «չափազանց ծանր ժամանակներով», երբ մարդիկ կլինեն «ինքնատիրապետում չունեցող» և «ավելի հաճոյասեր, քան աստվածասեր» (1 Տիմոթեոս 3:1, 3, 4)։ «Սեքսով զբաղվելու» տենդենցը, որի մասին խոսվեց երիտասարդների համար գրված այս հոդվածում, բազում ապացույցներից մեկն է, որ վերոհիշյալ մարգարեությունն իսկապես կատարվում է։

Այսօրվա աշխարհը մեծապես տարբերվում է այն աշխարհից, որում դուք եք մեծացել։ Սակայն հիմնականում խնդիրները նույնն են մնացել։ Այնպես որ մի՛ անհանգստացեք կամ վախեցեք այն բանից, որ ձեր երեխաները վատ շրջապատում են գտնվում։ Փոխարենը՝ վճռեք օգնել նրանց վարվելու այնպես, ինչպես որ Պողոս առաքյալը քրիստոնյաներին հորդորեց վարվել մոտ 2 000 տարի առաջ. «Հագե՛ք Աստծու ամբողջ սպառազինությունը, որպեսզի կարողանաք հաստատ կանգնել Բանսարկուի նենգությունների դեմ» (Եփեսացիներ 6:11)։ Իրողությունն այն է, որ բազմաթիվ պատանի քրիստոնյաներ պայքարում են ճիշտն անելու համար՝ չնայած շրջապատի բացասական ազդեցությանը, և դա գովելի է։ Ինչպե՞ս կարող եք օգնել ձեր երեխաներին, որպեսզի նրանք էլ նույնն անեն։

Օրինակ՝ կարող եք այս հոդվածի միջոցով զրույց սկսել երեխաների հետ։ «Առաջարկում ենք ընթերցել» հատվածները մղում են խորհրդածելու սուրբգրային որոշ համարների շուրջ։ Դրանցից մի քանիսն իրական օրինակներ են պարունակում այն մարդկանց մասին, ովքեր կա՛մ ճիշտ են վարվել և օրհնություններ ստացել Եհովայից, կա՛մ անտեսել են Աստծու օրենքները և վատ հետևանքներ քաղել։ Մյուս սուրբգրային համարները պարունակում են սկզբունքներ, որոնք կարող են օգնել երեխաներին հասկանալու, թե ինչ մեծ առանձնաշնորհում ունեն նրանք, ինչպես նաև դուք, որ ապրում են Աստծու օրենքներով։ Ինչո՞ւ չծրագրեք այս նյութը միասին քննարկել։

Աստծու չափանիշներով ապրելը միայն ու միայն մեր օգտի համար է (Եսայիա 48:17, 18)։ Դրանք անտեսելը անխուսափելիորեն մեծ ցավեր կպատճառի։ «Արթնացե՛ք»–ի հրատարակիչները ցանկանում են ձեզ Եհովայի օրհնությունը, մինչ ձգտում եք արմատավորել Աստծու օրենքներն ու սկզբունքները ձեր երեխաների սրտում (Բ Օրինաց 6:6, 7)։

[Նկար 20–րդ էջի վրա]

Դու պետք է պարզ ասես, որ այդպիսի բան երբեք չի լինի